Segundu Karakata para Tesalónika anapuecha 1:1-12
1 Ji Pablu, ístu Silbanu* ka Timoteu engaksï jíndeni jingoni jaka, karakuxaka Tesalónika anapu kúnguarhikuani enga Tata Diosïiriika enga jindeeka Taati ka enga ístu Tata Jesukristueriika.
2 Ji kómarhisïnga eskaksïni Tata Diosï, enga jindeeka Taati, ka ístu Tata Jesukristu, kánikua kóndentaaka* ka eskaksïni jarhuataaka parajtsï pínandikua jatsini.
3 Erachiicha,* jucha méntkisï ísï pʼikuarherasïnga eskachi jatsiska para diosmaiamukua arhini Tata Diosïni chánksïni jimbo, ka jatsiskachi para ísï úni jimbokajtsï iásï iauani sánderu mintsikaxakaia ka jimbokajtsï sánhani arhixaka sánderu xénchperani.
4 Ísï jimbo, jucha kánikua sési pʼikuarherasïnga engachi chaari ambe aianguajka Tata Diosïiri kúnguarhikuechani jimbokajtsï chá tekaantaxaka ka mintsikani nájkirukajtsï no sési kánhani jaka ka nájkirukajtsï xáni úkua jukanchani jaka.
5 Iámindu i ambe xarhatasïndi eska Tata Diosï sési jusgarpisïnga ka jimboksïnisï ísï exejti eskajtsï chá jukanchaska para Tata Diosïiri Reinuni pʼirani, jimbokajtsï chá indeni jimbosï xáni no sési nitamakuarhini jaka.
6 Jimboka sési jarhaska eska Tata Diosï no sési úkuantauaka imeechani engaksïni xáni no sési kámani jaka.
7 Joperu chá engajtsï iáiasï kómu nitamakuarhini jaka sésijtsï pʼikuastanhaaka, ísï eska jucha, jiáni enga Jesúsi* chpiri jingoni xarhantaaka auandarhu imeeri ánjeliicha jingoni engaksï xáni uinhapitiika,
8 paraka kastigariuauaka imeechani engaksï no míteka Tata Diosïni ka imeechani engaksï no újka ambe enga uandajka ambakiti aianhperakua Jesúsiiri ambe enga jindeeka juchaari Tata.
9 Juchaari Tata jusgariuauati, méntku kʼamajkuauati para kastigariuani, ka nóteru méni exeauatia nijtu jarhuataani imeeri uinhapikua jingoni.
10 Jiáni enga Tata juuaka para kʼéri ambe arhinhani imeeri pímbinharhatiichani jingoni, iámindu imeecha engaksï imani mintsikaaka janhanharhiatiksï, ka jimbokajtsï chá jakajkuska ambe engaksïni jucha aianguka, chájtujtsï imeecha jingoni jauaka.
11 Jimboksïnisï kómarhijpichejka para juchaari Tata Diosï exeni eskajtsï chá jukanchaska paraksïni ima ióarhini ka paraka imeeri uinhapikua jingoni uaaka ambe enga xáni uékani jaka úni ka paraka kʼamaraaka úni ambe engajtsï xáni újka chá imani mintsikaparini.
12 Ísï jimbo, Jesúsiiri* nombri, kʼéri ambe arhinhaati indeni ambe jimbo engajtsï chá újka ka chájtujtsï kʼéri ambe arhinhaaka jimbokajtsï imeeriiska, jimbokaksïni Tata Diosï ísï uékaska kóndentani ka ístu juchaari Tata Jesukristu.
Notecha
^ Enga ístu arhinheenga Silasi.
^ Exe je Glosario, Tata Diosï kánikua kóntpintasïndi.
^ O “Ermanuecha”.
^ Griegu jimbo: “Tata Jesúsi”.
^ Griegu jimbo: “juchaari Tata Jesúsiiri”.
