Segundu Karakata para Tesalónika anapuecha 2:1-17
2 Joperu erachiicha,* para ima jurhiatikua enga juchaari Tata Jesukristu ixú jauakia ka jiáni engachi jucha imani jingoni jauakia, kurhachexakaksïni
2 eskajtsï no jámaaka jurajkutakuarheni paraksïni támisï jánhastani ka eskajtsï no jámaaka sóntku chérakuarheni enga uandanhani jauaka eska Tata Diosï Jeobaeri jurhiatikua axuterku jarhaskia, nájkiruka ísï xarharaaka enajki Tata Diosïiri uandakue* o enajkichi jucha ísï uandani jaki o enajkiksïni jucha ísï karachini jaki.
3 Eskaksïni no nema jámaaka támisï jánhastani,* jimboka ante de jurhani Tata Diosïiri jurhiatikua, orhetaksï jatsisti para imeecha jámani engaksï méntku no uéjka kurhajchani Tata Diosïni* ka ístu xarhantaati ima achamasï enga xáni no ambakeka, ima enga kʼamajkunhaaka.
4 Ima méntku no ma ambe jaiapanhentasïndi ka sánderu kʼéri ambe exekuarhisïndi eska náki uéjki diosï arhikata ma o ambe uéjki enga jindeeka para kómarhini. Ísï jimbo, Tata Diosïiri templurhu uaxakasïndi ka diosï eratakuarhisïndi.
5 ¿Nójtsï miásïni eskaksïni ji ísï arhisïreenga jiáni engani útasï chánksïni jingoni japka?
6 Ka iásïjtsï míteskia nésï pʼínguni jaki paraka ima jiáni xarhantaaka enga uaxastakata jakaia.
7 Ísïisti, iáiasï no xarharaxati na enga xáni no ambakeka i achamasï, joperu no sési ambe niátaxatiia. Ka ambe enga xáni no sési niátani jaka, jiáni jamberku jískakata jauati enga nóteru jauakia ima enga pʼínguni jaka.
8 Jiáni xarharaati ima achamasï enga xáni no ambakeka, ka Jesúsi* juramukua jingoni uandaati para kʼamajkuni ka jiáni kʼamajkuati enga xarharaaka eska ixú jarhaskia.
9 Joperu ísï jimbosï xarharaati ima achamasï enga xáni no ambakeka, jimboka Satanási mámaru ambe úxaka imeeri uinhapikua jingoni, kʼéri ambe úxati, ka ístu ísï úxati enajki milagruechani uaajki,
10 ka mámaru ambe úsïndi para támisï jánhastaani imeechani engaksï imani xanharu jimbo nirani jaka engaksï kʼamajkunhaaka,* ka indenksïsï jirinhakuarhiti jimbokaksï no xénchaska jurhimbikua ambe, jimboka engaksï ísï úpiringa, pʼímutanhantapirindiksï.
11 Ísï jimbosï Tata Diosï jurajkuajti paraksï chkuanderakua ambe jorhendanhani parakaksï imeecha chkuanderakua ambe jakajkuaka,
12 paraksï iámindu imeecha jusgarinhani jimbokaksï no jakajkuska jurhimbikua ambe ka sánderuksï tsitisti no sési ambe.
13 Joperu jucha ísï pʼikuarherasïnga eskachi jatsiska para diosmaiamukua arhini Tata Diosïni chánksïni jimbo. Erachiicha, Tata Diosï Jeobaksïni xénchasïndi, jimbokaksïni ueenakuarhutki erakuska parajtsï chá pʼímutanhantani jimbokaksïni pímbinhajkuntaska imeeri espiritu santu jingoni ka jimbokajtsï jakajkuska jurhimbikua ambe.
14 Ka ini ambakiti aianhperakuani jimbo engachi jucha uandantajka, imaksïni erakusti* parajtsï chá pʼímutanhantani, parakajtsï chá k’éri ambeuaka ísï eska juchaari Tata Jesukristu.
15 Ísï jimbo erachiicha, uíuinhasï ja je ka asï jáma je jurajkuni indeni ambe* engajtsï jorhendanhaka, na uéjkiksïni uandakua jimbo jorhendani o karakata ma jimbo engaksïni jucha karachika.
16 Ístu, Tata Diosï enga jindeeka juchaari Taati, imajtsïni kánikua xénchasti ka sésijtsïni pʼikuastantasti para méntkisï ka íntskustijtsïni sésikua parachi jucha ambakiti ambe erokuarhini jarhani jimbokajtsïni xáni kóndentaska. Jucha kómarhisïnga eska ima ka juchaari Tata Jesukristu
17 sési pʼikuastantaaka chaari mintsitani ka eskaksïni uinhaperantaaka parajtsï chá méntkisï sési ambe úni ka méntkisï sési uandani.
Notecha
^ O “ermanuecha”.
^ O “nájkiruka espiritu ma jimboeuaka”. Exe je Glosario, espiritu.
^ O “Eskaksïni no nema sési arhiaka”.
^ Griegu jimbo: “para apostateecha jámani”.
^ Griegu jimbo: “Tata Jesúsi”.
^ O “imeechani engaksï uarhini jakaia”.
^ Griegu jimbo: “ióarhisti”.
^ Griegu jimbo: “indeni pʼindekuechani”.
