Segundu Karakata para Tesalónika anapuecha 3:1-18
3 Ka parachi kʼamarania erachiicha,* chájtsïni seguirii je kómarhijpicheni paraka Tata Diosï Jeobaeri uandakua sánderu etsakurhiaka ka para sési exenhani ísï eskajtsï chá na sési exejka,
2 ka parakajtsïni kuájchakuaka ima kʼuiripuecheeri engaksï xáni no ambakeka, jimbokaksï no iámindu kʼuiripuecha jakajkusïnga.*
3 Joperu Tata mintsinharhikuesti ka imaksïni uinhaperantaati ka ístuksïni kuájchakuati Noambakitiiri.
4 Ístu, juchachi mintsikaxaka Tatani eskajtsï chá ísï úxaka eskaksïni jucha na arhistachika ka eskajtsï seguiriini jauaka ísï úni.
5 Eskaksïni Tata seguiriini jauaka jarhuatani paraka chaari mintsita xénchaaka Tata Diosïni ka parajtsï tekaantani Kristuni jimbo.
6 Ka iásï erachiicha, juchaari Tata Jesukristueri nombri jimbo, kurhachexakaksïni eskajtsï no jámaaka kúrhini imani erachini enga no uékaaka kurhandini* ka enga no uékaaka úni ambe* engaksïni jucha arhistachika.*
7 Chájtsï sési míteska ambe engajtsï jatsika para úni parajtsï ísï jámani eska jucha, jimboka jiáni engachi jucha chánksïni jingoni japka, nóchi méni jámaska ísï no kurhandini* eskaksï indeeni járhati kʼuiripuecha
8 ka nóchi nemani euamukuska tʼirekua. Sánderu sési, chúskutaspkachi uinhamu ánchikuarhini ka chúrikua jamberichi ánchikuarhisïreenga ka nóchi jamberi mintsikuarhisïreenga paraksïni no chánksïni arhini jarhani eskajtsïni kéndapiringa.
9 Ka nájkirukani jucha sésikua jatsipka* para ísï úni, nóchi ísï úspka, jimbokachi uékasïreenga eskajtsï chá exepiringa na engajtsï jatsika para jámani.
10 Ka jiáni engachi útasï chánksïni jingoni japka, juchaksïni ísï arhisïreenga: “Ima enga no uéjka ánchikuarhini, ístu asï tʼiree”.
11 Jimbokachi míteska eskaksï máru engaksï chánksïni jingoni jaka nóksï uékasïnga kurhandirani,* jimbokaksï no ánchikuarhisïnga ka máteruechanksï jámasïndi inchaakukuani.
12 Indeni kʼuiripuechani engaksï ísï jámajka, juchachi uékasïnga arhiani ka kurhakuani* juchaari Tata Jesukristuni jimbo, eskaksï jánguarhintaaka sési irekani ka imeecheeri ánchikuarhita ambe úni ka eskaksï mándani arhini andakuarheaka ambe tʼireni.
13 Joperu chá erachiicha, seguirii je úni ambe enga sési jaka.
14 Joperu enga nema no uékaaka úni ambe engaksïni karachini jaka, chájtsï jatsiska para jingontku jámani indeni kʼuiripuni jingoni* ka nóterujtsï kúrhinia paraka ima kʼuratseaka.
15 Joperu asï jáma je ikiakuni. Sánderu sési, seguirii je arhistakuni jimboka chaari erachiiska.
16 Eskaksïni Tata, ima enga pínandikua íntspijka, jarhuataaka parajtsï méntkisï pínandikua jatsini. Eska Tata chánksïni jingoni jauaka.
17 Ji Pablu, jíksïni karachixaka ini uandajperatani engaksïni axacheni jaka. Ka méntkisï ísï karasïnga parakajtsï chá míteaka eskaksïni jísï karachini jaka.
18 Eskaksïni juchaari Tata Jesukristu kánikua kóndentaaka iámindu chánksïni.
Notecha
^ O “ermanuecha”.
^ O “mintsikasïnga”.
^ O “enga no káni sési jámajka”.
^ O “enga no uékaaka úni indeni pʼindekua ambe”.
^ O jamberi “engani jucha arhistakuaka imeechani”.
^ O “ísï no káni sési jámani”.
^ Griegu jimbo: “juramukua jatsipka”.
^ O “nóksï káni uékasïnga sési jámani”.
^ O “uandontskuarhekuani”.
^ Griegu jimbo: “mínda ma jatsikuni”.
