Segundu Karakata Juanueri 1:1-13
1 Ji engani jatiriikia, karakuxaka imani uarhiitini enga erakukateeka ka imeeri uájpeechani engani ji xáni xénchaajka, ka no jíjkusïni xáni xénchaajka, ístu iámindu imeecha engaksï míteka jurhimbikuani,
2 indeni jurhimbikua jimbo enga juchaari mintsitarhu jaka ka enga méntkisï juchaari mintsitarhu jauaka.
3 Tata Diosï, auandarhu anapu Taati ka imeeri Uájpa, tata Jesukristu, jurhimbikua ambejtsïni jorhendaati ka xénchaatijtsïni, kánikuajtsïni kóndentaati,* pʼamojkuatijtsïni ka íntskuatijtsïni pínandikua.
4 Ji kánikua tsípispka míteni eskaksï máru chiiti uájpeecha jurhimbikuarhu jámaxaka ísï eskajtsïni Taati na juramuchika.
5 Ísï jimbo, uarhiiti, jíkeni kurhachexaka eskachi iáminduecha xénchperaaka. —Jíkeni no jimbanhi mandamientu ma karachixaka, sánderu sési, imani engachi ueenakuarhutki intsïnhaka—.
6 Ka ísïsï jindeeti para xénchpeni: eskachi seguiriini jauaka ísï jámani eskajtsïni ima na juramuchika. Ísï eskajtsï ueenakuarhutki na kurhandipkia, i jindeesti mandamientu: eskajtsï seguiriini jauaka xénchpeni.
7 Jimbokaksï uánikua jarhaska ini parhakpinirhu engaksï chkuanderani jámajka,* indeecha engaksï no jakajkujka eska tata Jesukristu ísï jurhaska komueska kʼuiripu ma. Indesï jámajti chkuanderani ka indesï ikiakujti Kristuni.*
8 Xéparini je para no tsïncheni inde ambe engachi jimbo xáni uinhamu ánchikuarhika ka parajtsï sésimindu intsïnhani ambe engajtsï andakuarheka.
9 Ima enga nóteru jakajkujkia ambe enga Kristu jorhentpijka ka máteru ambe jámani jorhentpini, no Tata Diosïni jingoni jarhasïndi. Joperu ima enga seguiriini jarhajka jorhentpini ambe enga Kristu jorhentpijka, imasï Taatini jingoni jati ka Uájpani jingoni.
10 Engaksïni nema niuaka andarhierani ka no ini ambe jorhentpini, asï jáma je jiókani chaari kʼumanchikuarhu ka asï jáma je uandajpani.
11 Jimboka ima enga uandajpajka, jaiapanhekuntani jarhasïndi* ambe enga ima no sési úni jaka.
12 Ka nájkirukaksïni útasï uékapiringa uánikua ambe aianguni, nóksïni uékasïnga sïranda jimbo arhini, sánderu sési, uékasïngaksïni nirani exeni parachi sési uandontskuarheni, parajtsï chá sésimindu tsípini.
13 Chiiti jingonikueri uájpeecha, ima enga erakukateeka, uandajperataksïni ma axachexati.
Notecha
^ Exe je Glosario, Tata Diosï kánikua kóntpintasïndi.
^ O “engaksï támisï jánhastpijka”.
^ Griegu jimbo: “indesï jindeeti antikristu”.
^ O “sési exeni jarhasïndi”.
