Segundu Karakata para Korintu anapuecha 1:1-24
1 Ji Pablu, Kristu Jesúsiiri apostoliiska jimboka Tata Diosï ísï uékaska, ka juchaari erachi* Timoteuni jingoni jarhaska. Ji karakuxaka Tata Diosïiri kúnguarhikuani enga Korintu jaka ka ístu iámindu pímbinharhatiichani engaksï Akaia jaka:
2 Ji kómarhisïnga eskaksïni Tata Diosï, enga jindeeka juchaari Taati, ka ístu Tata Jesukristu, kánikua kóndentaaka* ka eskaksïni jarhuataaka parajtsï pínandikua jatsini.
3 K’éri ambe arhinhee juchaari Tata Jesukristueri Tata Diosï, enga jindeeka imeeri Taati jémba; ima jindeesti Taati enga xáni pʼamojpejka ka ima jindeesti Tata Diosï enga iámindu ambe jimbo sési pʼikuastpentajka.
4 Imajtsïni méntkisï sési pʼikuastantasïndi* ambe uéjkichi nitamakuarhini jarhani* parakachi juchajtu uaaka sési pʼikuastaantani imeechani engaksï no sési nitamakuarhini jarhajka* ísï eskajtsïni Tata Diosï na sési pʼikuastantajka juchantsïni.
5 Jimboka, ísï eskachi na xáni kómu nitamakuarhijka Kristuni jimbo, ístuchi Kristuni jimbo kánikua sési pʼikuastanhantani jarhasïnga.
6 Ka engachi jucha no sési nitamakuarhijka,* jindeesti paraksïni chánksïni sési pʼikuastantani ka paraksïni pʼímutantani. Ka ístu engachi jucha sési pʼikuastanhantajka, jindeesti paraksïni jucha úni sési pʼikuastantani chánksïni. Ka engaksïni jucha sési pʼikuastantajka, inde ambeksïni jarhuatasïndi parajtsï chá úni tekaantani engajtsï kómu nitamakuarhini jarhajka ísï eska jucha.
7 Juchaksïni kánikua mintsikasïnga jimbokachi míteska eskajtsï chájtu kómu nitamakuarhisïnga ísï eska jucha, ísï jimbo, chájtujtsï sési pʼikuastanhantaaka ísï eska jucha.
8 Erachiicha, jucha uékasïnga eskajtsï chá mítetini jauaka na engachi no sési nitamakuarhika Asiaisï. Kánikuachi úkua jukanchaska ka ísïchi pʼikuarherasïreenga enajkichi nóteru úpirinia jandiajku orhepani uérani ka xánchi uandanhiaxapka engachi jamberi no mítepka sinchi tsípiti pakarapirini o nómbe.
9 Ka ísïchi pʼikuarherasïreenga enajkichi uarhipirinia. Joperu engachi ísï nitamakuarhika exeskachi na engachi no jatsika para juchajku mintsinharhikuarhini, sino Tata Diosïni mintsikani, imani enga tsítantaajka* uarhiriichani.
10 Imajtsïni kuájchakusti parachi jucha no uarhini, ka ménderujtsïni kuájchakuati. Ka jucha imani mintsikaxaka eskajtsïni ima seguiriini jauaka kuájchakuni.
11 Chájtujtsïni uaaka jarhuatani engajtsïni kómarhijpicheska. Ka uánikua kʼuiripuechaksï diosmaiamukua arhiati Tata Diosïni engajtsïni ima ísï jarhuatajka ka imajtsïni jarhuatasïndi jimbokajtsïni uánikuecha kómarhijpichesïnga.*
12 Jucha kánikua sési pʼikuarherasïnga jimboka parhakpini anapuechani japarini ka sánderia chánksïni japarini, jucha jánguarhintaxaka sési irekani* ka ístuchi no ísku apariiska, jucha sési kámpisïnga ísï eska Tata Diosï na sési kámpijka ka nóchi mintsikaasïnga imani kʼuiripuechani engaksï uandajka jánhaskani.
13 Jimbokaksïni jucha imani ambesï karachini jaka ambe engajtsï chá uaaka arhintani* ka ístu kurhanguni. Ka mintsikaxaka eskajtsï uaaka iámindu ambe sési kurhanguni,
14 ísï eskajtsï máru na kurhangukia eskajtsï jatsiska para sési pʼikuarherani juchantsïni jimbo, ísï eskani jucha na xáni sési pʼikuarheraaka chánksïni jimbo Jesúsiiri jurhiatikua jimbo, enga jindeeka juchaari Tata.
15 Ka ini ambe mintsikaparini, jíksïni uékasïreenga orheta chánksïni nirani exeni parakajtsï chá ménderu sési pʼikuarherantapiringa.
16 Ji uandaspka eskaksïni nipiringa exeni jiáni engani Masedonia nirani japiringa ka ístu engani Masedonia uératini junguani japiringia, parajtsïni tátsekua chá nirani sáni pámbetani xanharu jimbo engani na Judea nirani japiringia.
17 Engani eratsepka ísï úni, no ísku jatinisïni ísï uandani japka, nijtuni uékani japi úni ambe engani ji uéjka, parani no ísku jatini uandani eska “jo” ka tátsekua uandania eska “nómbe”.
18 Ísï eskachi na újka mintsikani Tata Diosïni, chájtujtsï uaaka mintsikani eskaksïni jucha no ísku jatini arhisïnga eska jo ka tátsekuachi uandania eska nómbe.
19 Jimboka ji, Silbanu* ka Timoteu, juchaksïni tata Jesukristueri ambesï aianguka enga jindeeka Tata Diosïiri Uájpa. Ka ima no méni jámasti ísku jatini uandani eska jo ka tátsekua uandania eska nómbe. Sánderu sési, enga ima uandajka eska jo, méntkisï ísïisïndi.
20 Ambe enga Tata Diosï xáni aiatspeka, niárasti iámindu ambe ísï úkuarhini Jesúsini jimbo. Ka jimbochisï imeeri nombri jimbo arhijka Tata Diosïni “eska ísï úkuarhiaka” paraka Tata Diosï kʼéri ambe arhinhaaka juchantsïni jimbo.
21 Joperu Tata Diosïsï uandajti eska chá ka ístu jucha, Kristueriiska ka imajtsïnisï erakuti.
22 Imajtsïni jatsikusti mínda ka juchaari mintsitarhu peerasti imeeri espiritu parajtsïni aiachini* ambe enga no ióni jimbo úkuarhiaka.
23 Ji nótkini niraxaka Korintu jimbokani no uékasïnga eskajtsï chá sánderu kómu pʼikuarheraaka. Tata Diosï mítetixati eska i ambe ísïiska.
24 Ka nóksïni ísï arhixaka jimbokaksïni jucha uékapiringa arhini* na engajtsï jatsika para mintsikani Tata Diosïni, sánderu sési, juchachi jarhuajperasïnga parajtsï chá tsípikua jingoni irekani ka chájtsï uíuinhasï jarhaska jimbokajtsï chásï mintsikajka.
Notecha
^ O “ermanu”.
^ Exe je Glosario, Tata Diosï kánikua kóntpintasïndi.
^ O “uinhaperantasïndi”.
^ O “engachi tsʼéjkukua ambe jatsijka”.
^ O “engaksï tsʼéjkukua ambe jatsijka, ambe uéjkiini”.
^ O “engachi jucha tsʼéjkukua ambe jatsijka”.
^ Griegu jimbo: “jauatantaajka”.
^ O “jimbokaksï uánikua kʼuiripuecha jini eranchesïnga paraksï kómarhini”.
^ O “jucha ambakiti konsiensia ma jatsiska”. Exe je Glosario, konsiensia.
^ O jamberi “ambe engajtsï chá mítekia”.
^ Enga ístu arhinheenga Silasi.
^ Griegu jimbo: “parajtsïni tʼuini maiamunia sáni”.
^ O “juramuchini”.
