Segundu Karakata para Korintu anapuecha 11:1-33
11 Sántsïni tekaachinta je chá, jamberijtsï chá uandani jaka eskani ji méntkuni no jánhaskasïnga. ¡Joperuni ji míteska eskajtsïni chá méntku tekaachintani jarhasïnga!
2 Jíksïni kánikua uandanhiasïnga chánksïni ísï eskaksïni Tata Diosï na uandanhiajka, jimbokajtsï chá kurhajkuarhikata jarhaskia parajtsï Kristu jingoni uambuchani ka jíksïni uékasïnga ísï peerani imani japarini komueska pímbinhasï uátsï ma.
3 Joperuksïni uandanhiasïnga jimbokani chésïnga eska, ísï eska akuitsi na chkuanderakuka Ebani para támisï jánhastani, eskaksïni chánksïntu nema ísï támisï jánhastaaka parajtsï chá nóteru pímbinhasïinia ka parajtsï nóteru mintsita jingoni xénchania Kristuni.
4 Jimboka ísï eskaksïni na exeni jaka, chájtsï sési exesïnga enga nema jurhajka ka ueenanksïni aianguni Jesúsiiri ambe joperu no imeeri engachi jucha uandantajka, ojtsï ueenani ménderueni eratseni ka no ísï eskajtsï na eratseni japkia, ojtsï ueenani máteru ambakiti aianhperakuani jakajkuni ka no imani engajtsï jakajkupkia.
5 Péringajtsï exekia eskani ji no sánderu sapichu ambeeska eska ima apostoli arhikateecha engaksï xáni arhikuarhijka* ka engaksï chánksïni jingoni jaka.
6 Joperu, nájkirukani ji no újka xáni sési uandani, kʼóruni uánikua ambe míteska Tata Diosïiri ambe ka juchaksïni iámindu ambe jimbo xarhatacheskia eska ísïiska.
7 Tsípikua jingonksïni aianguska ambakiti aianhperakuani Tata Diosïiri ambe ka nóksïni ma sentabu euaska. Ji ískuni exekuarhiska parajtsï chá úni kʼéri ambe exenhani, jiájkani, ¿no sési úskia engani ísï úka?
8 Ka paraksïni chánksïni marhuacheni, ji euakuarhiaska* máteru kúnguarhikuechani engani ísï jiókuarhika eskajtsïni jarhuatapiringa.*
9 Joperu engani na chánksïni jingoni japkia ka engani ueenapka uétarhinchani, jíksïni no uékaska chánksïni kurhacheni, jimboka engaksï na Masedonia anapu erachiicha* niárapka, imajtsïni kánikua íntskusti parani ji úni jatsini ambe engani xáni uétarhinchani japka. Ísïisti, jánguarhintaska paraksïni no chánksïni kurhacheni jarhani ka útasï seguiriini jauaka jánguarhintani.
10 Ka engani útasï seguiriini jauaka Kristuni chúxapani, no ma amberini pʼínguati parani ji iámu Akaiaisï arhikuarhini ini ambe jimbo.
11 ¿Joperu andi? ¿Jimbokaksïni no xénchasïnga chánksïni? Tata Diosï sési mítesti eskaksïni ji kánikua xénchasïnga.
12 Jarhastiksï máru engaksï jukari arhikuarhijka ka engaksï uandajka eskaksï imeechajtu apostoliiska ísï eska jucha. Ísï jimbo, seguiriini jauaka májkueni úni ísï eskani na úni jakaia paraksï no ima indeni ambe arhiparhatani ka indeni ambe jimboksï arhikuarhini jarhani.
13 Jimbokaksï inde achamasïicha uandasïnga eskaksï apostoliiska, ánchikuarhisïndiksï para támisï jánhastaani máteruechani ka ísïksï jámasïndi enajkiksï Kristueri apostolii.*
14 Ka ji no na exesïnga ini ambe jimboka Satanásijtu ísï jámasïnga enajki ambakiti ánjeli máe.*
15 Jimboksïsï ima kʼuiripuecha engaksï imani marhuakujka, ístuksï ísï jámajti enajkiksï iámindu ambe sési újki. Joperuksï kʼamajkunhaati ísï eskaksï na jukanchaka imani ambe jimbo engaksï újka.
16 Ménderuksïni arhisïnga eska no nema jámaaka uandani eskani ji méntkuni no jánhaskasïnga. Joperu sésijtsïni eroka je na uéjkijtsï uandani eskani ji méntkuni no jánhaskasïnga, parani jíjtuni úni sáni arhikuarhini.
17 Joperuksïni iásï no ísï uandontskuarhechixaka eskaksïni na uandontskuarhechipiringa Tata, sánderu sési, ísï uandaxaka komueska kʼuiripu ma enga méntku no jánhaskajka, enga sési xékuarhijka ka enga arhikuarhijka.
18 Ka jimbokaksï uánikuecha arhikuarhisïnga ini parhakpini anapu ambe jimbo, jíjtuchkani sáni arhikuarhiakia.
19 Chájtsï sési exeasïnga imeechani engaksï méntku no jánhaskajka jimbokajtsï chá kʼóru “iámindu ambe jánhaskasïnga”, ¿no ísïiski?
20 Jimbokajtsï chá sési exeasïnga imeechani engaksïni jántspiri újka, imeechani engaksïni kʼamajkuchijka chaari jatsikuarhekua ambe, imeechani engaksïni iámindu ambe euakuarhijka, imeechani engaksï kʼéri ambe exekuarhijka chánksïni japarini ka imeechani engaksïni páksanharhikujka.
21 Kʼuratsekua ambeesti engachi ísï uandani jaka, jimbokaksï máru uaaka uandani eskachi no míteska sési juramuni.
Joperu engaksï máru kʼuiripuecha no kʼuratsejka arhikuarhini, jíjtuchkani no kʼuratseakia arhikuarhini nájkiruka uandanhaaka eskani méntkuni no jánhaskasïnga.
22 ¿O indeni jimboeski engaksï ima ebreueka? Jíjtuni ebreueska. ¿Israeliteeskiksï? Jíjtuni israeliteeska. ¿O jimbokaksï Abraáni uájpeeska? Jíjtuni Abraáni uájpeeska.
23 ¿Andi indeechaksï Kristuni marhuakusïni? Jamberichkani ísï uandani jakaia enajkini loku jaki: ji sánderuni marhuakusïnga eska imeecha. Sánderuni ánchikuarhiska, sánderuni uánikua xanhari ónhanhaska, uánikua xanharijtsïni atasti ka ístuni sáno uarhiska someni.
24 Judiuechajtsïni sinko xanhari jupikaspti parajtsïni atani, ka méni engajtsïni jupikeenga, máterkusï kueratendia parajtsïni 40 xanhari atani,
25 tanimu xanharijtsïni pirimu jimbo atasti, ma xanharijtsïni tsakapu jimbo atasti, tanimu xanhari iámuksï xerekuarhentaspti ima barkuecha engani ji nirani japka ka ma chúri ka ma jurhiatikua marirhu terumikua pakaraspka.
26 Uápurisï niraska, kánikua úkua jukanchaspka iurhekuecharhisï, kánikua úkua jukanchaspka sïpariichani jimbo, juchiiti iretani jimbo ka no judiuechani jimbo, kánikua úkua jukanchaspka iretarhu, desierturhu ka marirhisï ka ístuni kánikua úkua jukanchaspka imeechani jimbo engaksï uandajka eskaksï erachiiska,
27 kánikua jánguarhintaska ánchikuarhini ka no jamberini mintsikuarhini, someni no kʼuíska chúrikisï, kʼarhimaska ka kʼarhichani ka someni no jatsispka ambe arhani, niáraska tsʼirani ka xáskuni pakarani.*
28 Ka no inde ambejkuesti, jimbokani ístu pauani pauani uandanhiasïnga máteru ambe jimbo: iámindu kúnguarhikuechani jimbo uandanhiasïnga.
29 Jíjtuni no sési pʼikuarherasïnga enga nema chkerini jarhajka ka ikiasïnga enga nema no sési ambe úrajka* máteru nemani.
30 Ka engani jatsika para arhikuarhini ambe ma jimbo, imani ambe jimbo arhikuarhiaka engareni chkérajka.
31 Jesúsiiri* Tata Diosï, enga jindeeka imeeri Taati jémba, ima enga jatsika para méntkisï kʼéri ambe arhinhani, ima sési mítesti eskani ji no chkuanderaxaka.
32 Ka Damasku, jarhaspti juramuti ma enga rei Aretasi peerapka. Ima kuáxapti iretani parareni jupirkuarhini,
33 joperu kʼéri bardarhu, bentana ma jukaspti ka erachiichajtsïni jimeesïsï késkuntaspti xúndi ma jimbo ka ísï sïpakuarhispka.
Notecha
^ O “jatsijpakuarhijka”.
^ Griegu jimbo: “sïpakuaska”.
^ O “engani ísï jiókuarhika imeecheeri jatsikuarhekua ambe”.
^ O “ermanuecha”.
^ Griegu jimbo: “Kristueri apostoliiriiksï jukantasïndi”.
^ Griegu jimbo: “ánjeliiri jukantasïndi enga meremerexejka”.
^ O “sáno patsïki jásï pakaraspka”.
^ O “enga nema téksarutarajka”.
^ Griegu jimbo: “Tata Jesúsiiri”.
