Segundu Karakata para Korintu anapuecha 12:1-21
12 Jurajkuchkani arhikuarhinia sáni. Nájkirukani ísku jatini arhikuarhini jauaka, jurajkuksïni aianguni ambe engareni Tata exeraka ka ambe engareni aianguka.
2 Ji míteska achamasïni ma enga Kristueri chúxapatiika ima mátirku pánhaspti terseru auandarhu ka 14 uéxurhiniistia enga ísï úkuarhika —joperu indeni kʼóruni no míteskia sini ima kuerpu jingoni pánhaspi o nómbe, Tata Diosïjkusï míteti—.
3 Ísïisti, míteska indeni achamasïni, ima mátirku pánhaspti paraisurhu —joperu indeni kʼóruni no míteskia sini ima kuerpu jingoni pánhaspi o nómbe, Tata Diosïjkusï míteti—,
4 Tata Diosï paraisurhu páspti ka uandakua ambe kurhaaspti enga no ma kʼuiripu sésikua jatsika para uandani o uandantani jámani.
5 Ji indeni achamasïni jimbojkusïni arhikuarhiaka ka ji imani ambe jimbojkusïni arhikuarhiaka ambe engareni chkérajka.
6 Ka nájkirukani uékapiringa arhikuarhini, ji no ísïipiringa komueska kʼuiripu ma enga méntku no jánhaskajka, jimbokani jurhimbikua ambe uandani japiringa. Joperuni ji no jámasïnga arhikuarhini parareni no ma kʼuiripu kʼéri ambe exeni imani ambe jimbo engani ji újka o engani uandajka
7 jimbokarini Tata kánikua ambakiti ambe aianguska.
Ka parani ji no jámani kʼéramakuarhini, intsïnhaska ambe ma enga ísïika komueska chekamikua ma juchiiti kuerpurhu, Satanásiiri ánjeli ma engareni méntku páksanharhikuni* jaka parani ji no jámani kʼéramakuarhini.
8 Ji tanimu xanhari kómarhiska Tatani eskarini kénditachepiringa indeni chekamikuani.
9 Joperu imarini arhisti: “Sésku jarhastia, jíkeni kánikua kóndentaskia tʼungini, jimboka juchiiti uinhapikua jiánisï sánderu uinhapijti engari tʼu chkérini jarhajka”. Ísï jimbo, tsípikua jingonksïni aianguaka ambe engareni jíndeni chkérajka parareni Kristueri uinhapikua ísï kuájchakuni komueska kʼumanchikua sapichu ma.*
10 Ísï jimbo, ji tsípisïnga engani chkérini jarhajka, engani no sési arhinhajka, engani uétarhinchajka, engajtsïni no sési kámajka ka engani úkua jukanchani jarhajka Kristuni jimbo. Jimboka engani ji chkérini jarhajka, jiájkanimendusïni sánderu uíuinhasï pʼikuarherajka.
11 Engajtsï chá sési ambe uandapiringa juchiiti ambe, ji no ísï uandani japiringa komueska kʼuiripu ma enga méntku no jánhaskajka. Jimboka nájkirukani ji ísku nemeeka, chájtsï exeskia eskani ji no sánderu sapichu ambeeska eskaksï inde apostoli arhikateecha engaksï xáni arhikuarhijka.*
12 Ji kánikua jánguarhintaska parakajtsï chá exepiringa eskani ji apostoli máeska, ji milagruechani uaaska, kʼéri ambe úska ka uánikua máteru ambe.
13 Jíksïni chánksïni no ma ambe kurhacheska, jimbojtsïsï chá no májkueniika eskaksï máteru kúnguarhikuecha. Ka engani ísï úka, cháchkajtsïni sáni tekaachinta jeia.
14 Exe je, tanimu xanhariistia engaksïni ji uékani jaka nirani exeni ka nóksïni ambe ma kurhacheaka jimbokani ji no chaari jatsikuarhekua ambesïni uéjka, jíksïni chánksïnisï uéjka exeni. Jimbokaksï no sapiichasï patsakuani jarhajka jatsikuarhekua ambe taati jémbeechani, sánderu sési, taatiichaksïsï patsakuajti sapiichani.
15 Joperu ji kʼóruni tsípikua jingoni íntspiaka ambe engani jatsikuarheka ka juchiiti tsípikuani jamberi íntspiaka chánksïni jimbo. Jimajkani, ¿andi chájtsïni no jatsipirini para májkueni xénchani jíndeni ísï eskaksïni ji na xénchajka chánksïni?
16 Ka nájkirukaksïni ji no ma ambe kurhachika, chájtsï uandasïnga eskani ji no na jámaska paraksïni “trampa ma jingoni” jupikani.
17 ¿Andi ambeksïni euakuarhiski ji engani ísï axaapka máru kʼuiripuechani?
18 Ji kurhakuspka Tituni eskaksïni nipiringa exeni ka ístuni imani jingoni axaspka máteru erachini.* Jimajkani, ¿ambeksïni euakuarhiski Titu? ¿Andi juchachi no májkueni eratsesïni ka nóchi májkueni jámasïni?
19 Jamberijtsï chá eratsejka eskani jucha kuájpikuarhixaka engachi ísï uandani jaka, joperu no ísïisti, sánderu sési, Tata Diosïni japarinchisï jurhimbikua ambe uandani jaka jimbokachi jucha Kristueri chúxapatiiska. Erachiicha engaksïni xáni xénchajka, jucha ini ambe úxaka paraksïni chánksïni uinhaperantani.
20 Jimbokani uandanhiaxaka eskaksïni ma repentku no ísï exenunguaka eskani ji na uékapiringa o eskaksïni no ísï kámaaka eskajtsï chá na uékapiringa, ka masi úni, ísïksïni exenunguani eskajtsï chá no sési kámberaxaka, eskajtsï enbidiarperasïnga, eskajtsï sóntku ikiasïnga, eskajtsï no sési arhirperasïnga, eskajtsï uandakua ambe jauatatsperasïnga, eskajtsï uandatspini jámasïnga, eskajtsï kʼéramakuarhisïnga ka eskajtsï no úsïnga sési pájperani.
21 Engani ménderuni niuaka, jamberireni Tata Diosï chánksïni japarini kʼuratsetaati ka ji niárani no sési pʼikuarherani imeechani jimbo engaksï no sési ambe úka ióntki ka nótkiksï móantani jarhani indeni ambe jimbo engaksï ísï ikichakueni jásï ambe úka, engaksï ísï ísku jándikua ambe* niátaka ka engaksï no sáni kʼuratsekua jingoni niátaka no sési jásï ambe.*
Notecha
^ O “atani”.
^ O “kʼumanchikua sïkuiriiri ma”.
^ O “jatsijpakuarhijka”.
^ O “ermanuni”.
^ Griegu jimbo pornéia. Exe je Glosario, ísku jándikua ambe.
^ Uandakua griegu jimbo jindeesti asélgueia. Exe je Glosario, no sáni kʼuratsekua jingoni niátani no sési jásï ambe.
