Segundu Karakata para Korintu anapuecha 13:1-14
13 Ini jingoni, tanimu xanhariistia engaksïni uékani jaka nirani exeni. “Ambe uéjki jarhani, jatsistiksï para tsimani o tanimu kʼuiripuecha uandantani* eska iámindu ambe ísïiska”.
2 Nájkirukani iáiasï no chánksïni jingoni jaka, ísïisti enajkiksïni tsimani xanhari nikiia exeni. Ísï jimbo, engani úska ménderuni nirani, arhiaxakaia imeechani engaksï no sési ambe úka ka ístu máteruechani eskani méntkuni no pʼamojkuauaka imeechani engaksï no sési ambe niátani jaka,
3 ka engani ji ísï uaaka, xarhatani jauaka eskani Kristuni jimbosïni uandajka, ima no chkérixati chánksïni japarini, sánderu sési, xarhatachesïndiksïni na enga xáni uinhapika ima.
4 Enga ima chkérini japka, chkarirhu ma cháparhatanhaspti, joperu iásï tsípiti jarhastia Tata Diosïiri uinhapikua jimbo. Ka ísïisti, juchajtuchi chkérixaka ísï eska ima na chkérini japka, joperuchi imani jingoni irekaaka Tata Diosïiri uinhapikua jimbo, indeni uinhapikua jimbo engajtsï chá jatsika.
5 Seguirii je exekuarhini parajtsï míteni sintsï mintsikaxaki Tata Diosïni. Seguirii je xarhatani na jásï kʼuiripueskijtsï chá. ¿Andi nójtsï mítetixakiia eska tata Jesukristu chánksïni jingoni jarhaska? Joperu engajtsï no káni sési úni jauaka iámindu ambe, ima no uaati chánksïni jingoni jarhani.
6 Ji uékapiringa eskajtsï chá exeaka eskachi jucha iámindu ambe sési úxaka.
7 Jucha kómarhixaka Tata Diosïni parajtsï chá no no sési ambe niátani. Ka jucha no ísï úxaka parachi ísï exenhani enajkichi iámindu ambe sési úni jaki, sánderu sési, jindeesti parajtsï chá sési ambe úni nájkirukachi jucha ísï exenhaaka enajkichi no iámindu ambe sési úni jaki.
8 Jimbokachi jucha no ma ambe úxaka parachi pʼínguni jurhimbikua ambe, sánderu sési, jucha etsakuxaka jurhimbikua ambe.
9 Jucha tsípisïnga engachi chkérini jarhajka ka engajtsï chá uíuinhasï jarhajka. Ini ambechisï kómarhijka Tata Diosïni: eskajtsï mójtakurhiaka parajtsï ménderu sési jámani.
10 Jimboksïnisï ini ambe karachini jaka iásï engani nótkini chánksïni jingoni jaka. Ka engani na jima jauakia, jíksïni no uinhamu xukaaka nájkirukarini Tata íntskuka juramukua, sánderu sési, uaakaksïni jarhuatani ka nóksïni chkérani.
11 Ka para kʼamarania erachiicha,* seguirii je tsípikua jingoni irekani, seguiriini ja je mójtakurhini parajtsï sési jámani,* jurajku je eskaksïni máteruecha sési pʼikuastantaaka, májkueni eratsi je iáminduecha ka sési pájpera je, engajtsï ísï uaaka, ima Tata Diosï enga xáni xénchpejka ka enga pínandikua íntspijka, chánksïni jingoni jauati.
12 Ka engajtsï uandajperaaka, mintsita jingoni putinharhikpera je.
13 Iámindu pímbinharhatiichaksïni uandajperata ma axachexati.
14 Eskaksïni Tata Jesukristu kánikua kóndentaaka, eskaksïni Tata Diosï kánikua xénchaaka ka eskajtsï seguiriini jauaka jatsini espiritu santu engaksïni jarhuatani jaka iámindu chánksïni.
