Segundu Karakata para Korintu anapuecha 5:1-21
5 Jimbokachi jucha míteska eska i kʼumanchikua engachi ini parhakpini jimbo jatsikuarheka, kʼamajkunhaaka,* juchaari kuerpu enga ísïika komueska kʼumanchikua sapichu ma. Joperujtsïni Tata Diosï kʼéri kʼumanchikua ma íntskuati jini auandarhu enga para méntkisï jauaka, kʼumanchikua ma engaksï no kʼuiripuecha úka.
2 Jucha kómu atsïkuarhixaka juchaari mintsitarhu jimbokachi útasï ini kʼumanchikuarhu jarhaska* ka uékaxakachia eskachi intsïnhaaka imani kʼumanchikuani enga auandarhu anapueka,
3 ima kʼumanchikuajtsïni ísï órhetaati komueska xukuparhakua ambe ka engachi na jukantaakia nóteruchi xásku jámaakia.
4 Ka jucha engachi ini kʼumanchikua jimbo jaka, kánikuachi kómu atsïkuarhisïnga ka kánikuachi uandanhiasïnga, joperu no jimbokachi uékaxakaia jurajkuni ini kʼumanchikuani, sánderu sési, jimbokachi uékaxakaia jatsini máteru kʼumanchikuani. Jimboka inde tsípikua engachi jatsiaka para méntkisï, kénditaati ini kuerpuni enga uarhijka.
5 Ka ísï jimbojtsïnisï erakuti Tata Diosï ka imajtsïnisï íntskuti imeeri espirituni parajtsïni aiachini* ambe enga no ióni jimbo úkuarhiaka.
6 Ísï jimbo, juchachi seguru jarhaska ka sésichi mítetixaka eska engachi jamberi útasï ini kuerpurhu irekani jauaka,* jucha iauani jarharitini jauaka Tatani;
7 jimbokachi jucha mintsikaparinisï irekani jaka ka no jimbokachi exexaka ambe ma.
8 Joperuchi jucha seguru* jarhaska ka sánderu sésiisti para jucha Tatani jingoni irekani ka jurajkuni ini kuerpuni.
9 Ísï jimbo, jatsiskachi para jánguarhintani parajtsïni ima jaiapanhentani na uéjkichi imani jingoni irekani jarhani o iauanchi jarhani.
10 Jimbokachi iáminduecha jatsiska para Kristueri orhepani jimbo jarhani parajtsïni ima jusgarini ka parajtsïni íntskuni ambe engachi andakuarheka indeni ambe jimbo engachi úka ini kuerpu jingoni, ambe uéjkichi úni, engachi sési ambe úka o engachi no sési ambe úka.
11 Juchachi míteska eskachi jatsiska para chénharhini* Tatani, jimbochisï jánguarhintani jaka jakajkutaraani kʼuiripuechani, joperujtsïni Tata Diosï sési mítesti juchantsïni ka jíjtuni uékasïnga eskajtsïni chá sési míteaka.
12 Juchaksïni no arhixaka ménderu neeskichi jucha, sánderu sési, ambe engachi uandani jaka jindeesti parajtsï chá sési uandani juchaari ambe ka parajtsï úni mókukuantani imeechani engaksï arhikuarhijka indeni ambe jimbo enga xarharajka ka no indeni ambe jimbo engaksï mintsitarhu jatsika.
13 Engani jucha loku japka, Tata Diosïni jimboespti ka chánksïni jimbochisï sési eratsejka.
14 Kristujtsïni xénchasïndi jimbochisï jucha kánikua jánguarhintajka ka jimbochisï kurhangukia ini ambe: eska ma achamasï uarhiska iámindu kʼuiripuechani jimbo jimbokaksï iáminduecha uarhispkia.
15 Ka ima iáminduechani jimbosï uarhiti paraksï ima nóteru irekania para imeechajkumindu, sino para ima enga imeechani jimbo uarhika ka enga tsítanhantaka.*
16 Jiájkani iásï para orhepatini, juchachi nóteru nemani ísï exesïngia eskaksï kʼuiripuecha na exejpejka. Ka engachi jucha niárapka ísï exeni Kristuni eskaksï kʼuiripuecha na exejpejka, iásïchi nóteru ísï exesïngia.
17 Ísï jimbo, enga nema Kristuni jingoni jaka, jimbanhi kueraakateestia. Ióntki anapu ambe nitamastia. ¡Exe je! Iásï jimbanhi ambe jarhastia.
18 Joperu iámindu ambe Tata Diosïni jimboesti, imasï úti eskachi jucha uaaka ménderu sési pájperantani imani jingoni Kristuni jimbo ka ístujtsïni íntskusti indeni ánchikuarhitani parachi jarhuataani kʼuiripuechani paraksï úni sési pájperantani imani jingoni.
19 Jiájkani Kristuni jimbo, Tata Diosï jarhuataaxapti iámindu parhakpini anapuechani paraksï úni sési pájperantani imani jingoni ka ima no miáxapti ambe engaksï no sési úka ka juchantsïni mintsikasti parachi aianguani kʼuiripuechani nénaksï uaa sési pájperantani imani jingoni.
20 Ísï jimbo, Tata Diosïjtsïni juchantsïni axasti Kristueri nombri jimbo. Ísïisti enajkijtsïni Tata Diosï juchantsïni úrani jaki para kómarhiani kʼuiripuechani. Ka jucha engachi Kristueri nombri jimbo axanhaka, kómarhiaxakachi kʼuiripuechani: “Jánguarhinta je parajtsï sési pájperantani Tata Diosïni jingoni”.
21 Kristu no méni no sési ambe niátasti, joperu Tata Diosï imani kéjtsïtasti juchaari pekaduechani jimbo, parajtsïni Tata Diosï ísï exeni juchantsïni komueska kʼuiripuecha engaksï sési jámajka Kristuni jimbo.
Notecha
^ O “xerenhantaaka”.
^ O “irekaxaka”.
^ Griegu jimbo: “parajtsïni tʼuini maiamunia sáni”.
^ Griegu jimbo: “útasï jatsikuarheaka juchaari kʼumanchikuani”.
^ O “uíuinhasï”.
^ O “janhanharhini”.
^ Griegu jimbo: “jauatanhantaka”.
