Segundu Karakata para Korintu anapuecha 7:1-16
7 Ísï jimbo, juchiiti erachiicha* engaksïni ji xáni xénchajka, ju je jurajkuni iámindu indeni ambe enga jájkujka juchaari kuerpuni ka juchaari espirituni, ka ju je sánhani arhini sánderu pímbinhasï jarhani ka ístu chénharhini* Tata Diosïni.
2 Mintsita jingontsïni jiókuarhi je. Jucha no nemani no sési úkuxaka ka no nemanchi támisï jánhastaxaka ka nijtuchi nemani euakuarhini jaki.
3 Juchaksïni no arhixaka ini ambe paraksïni no sési pʼikuastani, jimbokaksïni ji arhiskia eska ambe uéjki úkuarhini, juchaksïni kánikua xénchasïnga.
4 Jíksïni sésimindusï arhini jaka. Ji kánikua sési pʼikuarherasïnga chánksïni jimbo. Juchiiti mintsita kánikua sési pʼikuarheraxati ka ji kánikua tsípixaka nájkirukachi no sési nitamakuarhini jaka.
5 Méntkuchi no sáni úspka sési pʼikuarherantani engachi na niárapkia Masedonia jimbokachi útasï kómu nitamakuarhixapka: kʼuiripuechajtsïni kánikua no sési kámasïreendi ka ístuchi kánikua uandanhiaxapka kúnguarhikuechani jimbo.
6 Joperu Tata Diosï, ima enga sési pʼikuastaantajka imeechani engaksï no sési pʼikuarherani jarhajka, ístujtsïni sési pʼikuastantasti juchantsïni engajtsïni Titu nípka exeni.*
7 Jucha kánikua sési pʼikuarherantaspka engajtsïni ima nípka exeni, ka ístuchi kánikua sési pʼikuarherantaspka engachi exepka na engajtsï chá sési pʼikuastantapka imani. Imajtsïni aianguspti eskajtsïni chá uékaxapkia exeni, eskajtsï kómu pʼikuarheraxapka jíndeni jimbo ka na engajtsïni xáni uandanhiani japka, ka ji sánderuni tsípispka engani indeni ambe kurhaapka.
8 Jiájkani, engaksïni ma repentku no sési pʼikuastaka engaksïni ísï karachika, iásï nóteruni no sési pʼikuarheraxakaia, nájkirukani ueenani jámani no sési pʼikuarherapka —jimbokaksïni no sési pʼikuastaspka engaksïni ísï karachipka, joperu ma ratujkujtsïsï no sési pʼikuarherapka—,
9 joperuni iásï sési pʼikuarherasïngia no jimbokaksïni no sési pʼikuastaska, sino jimbokajtsï chá móantaska engajtsï ísï no sési pʼikuarherapka. Tata Diosï jaiapanhentasïndi engajtsï chá ísï no sési pʼikuarheraka ka inde ambeksïnisï jarhuatati, ísï jimbo, juchaksïni no ma ambe no sési úchiska engaksïni ísï arhika.
10 Jimboka Tata Diosï jaiapanhentasïnga enga kʼuiripu ma no sési pʼikuarherajka, jimboka tátsekua móantasïnga ka pʼímutanhantasïndi, ka no nema no sési pʼikuarherasïndi indeni ambe jimbo; joperu kʼuiripu ma uarhisïndi enga no sési pʼikuarherajka ísï eskaksï parhakpini anapuecha.
11 Joperu chájtsï no sési pʼikuarheraska ísï eska Tata Diosï na jaiapanhentajka ka jánguarhintaskajtsï sési jámani. Chájtsï jánguarhintaska parajtsï ménderu sési exenhani,* chájtsï kánikua ikiaxapka engajtsï ísï no sési niátapka, chénharhiskajtsï* Tata Diosïni, uékasïreengajtsï móantani, chájtsï mintsita jingoni marhuakuska Tata Diosïni ka jánguarhintaskajtsï nóteru no sési ambe únia. Kánikuajtsï jánguarhintaska parajtsï sési peentani indeni ambe.
12 Jíksïni no imani kʼuiripu jimbosï karachipka enga no sési ambe niátapka ka nijtu imani kʼuiripu jimbo enga no sési nitamakuarhipka indeni kʼuiripu jimbo enga no sési niátapka. Sánderu sési, jíksïni karachiska parani exeni sintsï chá xarhatapirini Tata Diosïni japarini eskajtsïni uékasïreenga kurhajchani.
13 Inde ambejtsïnisï sési pʼikuastantati.
Ísïisti, kánikuachi sési pʼikuarherantaska, joperuchi sánderu sési pʼikuarheraska engachi exeka na enga tsípini jaka Titu, jimbokajtsï iáminduecha uinhaperantaska.
14 Jimboka engani ji ísï sési ambe aianguka Tituni chaari ambe, chájtsïni no kʼuratsetaska. Jimboka ísïiska ambe engaksïni arhika chánksïni ka ístu ambe engachi aianguka Tituni.
15 Ístu, imaksïni útasï sánderu xénchasïndi enga miántajka na engajtsï iáminduecha kurhandirajka ka na engajtsï xáni janhanharhipka jiáni engaksïni ima nípka exeni.
16 Ji kánikua sési pʼikuarherasïnga jimbokaksïni méntkisï úsïnga mintsikani.
Notecha
^ O “ermanuecha”.
^ O “janhanharhini”.
^ O “jimboka Titu juchantsïni jingoni jarhaska”.
^ O “Chájtsï pímbinhajkuntaska chaari nombrini”.
^ O “janhanharhiskajtsï”.
