Segundu Karakata para Korintu anapuecha 8:1-24
8 Erachiicha,* ístuksïni uékasïnga aianguni na enga Tata Diosï kánikua kóndeantaka Masedonia anapu kúnguarhikuechani.
2 Jiáni engaksï ima kómu pʼikuarherani japka jimbokaksï kʼéri uandanhiata ma jatsispka, tsípikua jingonksï íntspispti ambe engaksï xáni jatsikuarhepka nájkirukaksï no uánikua ambe jatsikuarhepka. Indeni jimbochisï úpka exeni eskaksï tsitisïnga intsïmpini.
3 Jimbokani ji sési mítetixaka* eskaksï íntspiska ambe engaksï xáni úka ka jukariksï jamberi íntspisti,
4 ka imajtsïnisï ueenapti méntku úndani arhini eskachi jurajkuapiringa paraksï imajtu mintsita jingoni intsïmpini ka ísïksï úni* jarhuataani pímbinharhatiichani.
5 Jucha no uandaspka eskaksï ima xáni ambe úpiringa, jimbokaksï orheta ueenaspka Tatani marhuakuni iámu mintsita jingoni ka ístu juchantsïni, ísï eska Tata Diosï na uéjka.
6 Ísï jimbo, arhispkachi Tituni eska kʼamarapiringa tánani ambe engajtsï chá mintsita jingoni intsïmpipiringa, jimboka ima ueenaspka tánani ambe engajtsï chá íntspini japka.
7 Chájtsï kánikua xarhatasïnga arini ambe: kánikuajtsï mintsikasïnga Tata Diosïni, jorhenaskajtsï uandani, uánikua ambejtsï míteska, tsípikua jingontsï úsïnga iámindu ambe ka májkuentsï xénchpesïnga ísï eskaksïni jucha na xénchajka; ísï jimbo, engajtsï chá uékani jauaka mintsita jingoni íntspini ambe ma, kánikua íntspi je.
8 Joperuksïni no juramuchixaka engaksïni ísï arhini jaka, sánderu sési, jíksïni ísï arhixaka parakajtsï exeaka na engaksï máteruecha tsípikua jingoni íntspini jaka ka parachi exeni eskajtsï mintsita jingoni xénchpesïnga.
9 Jimbokajtsï chá sési míteska na engajtsïni xáni kóndentaka juchaari Tata Jesukristu: nájkiruka ima uánikua ambe jatsikuarhepka iámu ambe jurajkuspti chánksïni jimbo, parakajtsï chá uaaka uánikua ambe jatsikuarheni enga ima ísï jurajkuka iámindu ambe.
10 Jíksïni arhiaka na engani exejka ini ambe. Chaari sési jimboesti jimboka ma uéxurhiniiskia engajtsï chá ueenaka ini ambe úni, ka engajtsï ueenapka, jucha exespka na engajtsï chá uékani japka ísï úni.
11 Ísï jimbo, kʼamara je ini ambe, ka engajtsï íntspiska ambe engajtsï jatsikuarheka, uaakajtsï kʼamarani ísï eskajtsï ueenani jámani na uékani japka úni.
12 Tata Diosï kánikua tsitisïndi enga nema uéjka mintsita jingoni íntspini, jimboka ima uékasïnga eska kʼuiripu ma imani ambe íntspiaka ambe enga jatsikuarheka ka no imani ambe enga no uaaka íntspini.
13 Ka nóksïni ísï arhixaka paraksïni chánksïni uandanhiatani ka máteruechani nómbe.
14 Ambe engani ji uéjka, jindeesti eskajtsï iáminduecha májkueni jatsikuarheaka: eska indeni ambe jingoni engajtsï chá jatsikuarheka jarhuatauaka imeechani engaksï indeni ambe uétarhinchani jaka, ka eskaksïni imeechajtu jarhuataaka indeni ambe jingoni engaksï imeecha jatsikuarheka ka engajtsï chá uétarhinchani jaka, ka ísïjtsï iáminduecha májkueni jatsikuarheakia.
15 Ísï eska na karakata jaka: “Ima kʼuiripu enga uánikua ambe jatsikuarhepka, no jukari ambe jatsispti, ka ima kʼuiripu enga no kánikua ambe jatsikuarhepka, no ma ambe kueratanchaspti”.
16 Jucha diosmaiamukua arhisïnga Tata Diosïni jimboka jarhuataska Tituni paraksïni imajtu uandanhiani ísï eskaksïni jucha na uandanhiajka.
17 Jucha kánikua sési pʼikuastantaska ka ima xáni tsípixati enga jamberi uandaka eskaksïninha niuaka exeni.
18 Ka ístuchi axaxaka imani jingoni imani erachini engaksï iámindu kúnguarhikuecha sési exejka, jimboka jánguarhintasïnga aianhpini ambakiti aianhperakuani.
19 Ka ístu, kúnguarhikuechaksï indeni erachini erakusti parajtsïni nirani pámbetani jiáni engachi niuaka etsakuntani ambe engajtsï chá íntspika, paraka kʼéri ambe arhinhaaka Tata ka paraka ístu exenhaaka eskachi jucha uékasïnga jarhuajpeni.
20 Ka ísï, no nema no sési exeati na engachi etsakuaka ambe enga xáni íntspinhaka.
21 Jimbokachi ‘jucha jánguarhintasïnga méntkisï sési jámani Tata Diosï Jeobani japarini ka ístu kʼuiripuechani japarini’.
22 Ístu, jucha axaxaka imeechani jingoni máteru erachini engachi mámaru ambe úrakia ka uánikua xanharichi exeskia eska sési ánchikuarhisïnga. Joperu útasï sánderu sési ánchikuarhiati jimbokaksïni kánikua mintsikasïnga.
23 Ka engajtsï chá no káni mintsikajka Tituni, jurajkuksïni aianguni eska imajtu jíndeni jingoni jámasïnga ka eska imajtu jarhuajpesïnga parajtsï chá sési jarhani. Ka engajtsï no káni mintsikauaka juchaari erachiichani, ji uékasïnga eskajtsï mítetini jauaka eskaksï imeechajtu apostoliiska kúnguarhikuecharhu paraksï kʼéri ambe arhini Kristuni.
24 Ísï jimbo, xarhatakua je eskajtsï xénchaasïnga parakaksï kúnguarhikuechajtu exeaka andichisï jucha xáni sési uandajki chaari ambe.
