Segundu Karakata para Korintu anapuecha 9:1-15
9 Ka no uétarhisïndi eskaksïni ji karachini jauaka parajtsï chá jarhuataani* erachiichani.*
2 Jimbokani ji sési míteska eskajtsï chá uékasïnga jarhuajpeni ka arhiaska Masedonia anapuechani eska ma uéxurhiniiskia engaksï Akaia anapuecha uékani jakaia jarhuajpeni. Ka jimbokajtsï chá xáni tsípikua jingoni íntspisïnga, imeechajtuksï uékaxatiia májkueni úni.
3 Ka ji axaaxaka erachiichani parajtsï chá tʼuini jatsirini jarhania ambe engajtsï íntspiaka, ísï eskani na arhiakia, parachi no ísku jatini arhiani erachiichani eskajtsï chá uékaxaka jarhuajpeni.
4 Engajtsïni Masedonia anapuecha máru nipiringa pámbeni, ka chá nótki ambe ma jatsirini jarhani, jucha kánikua kʼuratsepiringa, ka sánderia chá, jimbokaksïni jucha mintsikaxaka.
5 Jimbosïni sési exeka arhiani máru erachiichani eskaksï orhepapiringa paraksïni jarhuatani ka tʼuintsï jatsirini jarhania ambe engajtsï xáni aiatspeka. Ka engani jucha na niáraakia, chájtsï tʼuini jatsirini jauakia ambe engajtsï xáni íntspiaka ka ísïjtsï xarhataaka eskajtsï chásï uéjka íntspini ka no eskajtsï afuersa íntspixaka.
6 Miá je arini ambe, ima kʼuiripu enga sántku jatsikuka, sántkusï pʼikuntaati, ka ima enga kánikua jatsikuka, kánikua pʼikuntaati.
7 Eska mándani arhini uaaka ambe enga uandarini jakaia imeeri mintsitarhu ka eska no jámaaka pʼamondakuarhini, nijtu afuersa íntspini, jimboka Tata Diosï xénchasïnga imani kʼuiripuni enga tsípikua jingoni íntspijka.
8 Jimboka Tata Diosï uinhapikua jatsiska paraksïni kánikua kóndentani parajtsï no méni kueratanchani ka méntkisïjtsï jatsini ambe engajtsï uétarhinchani jauaka ka ístu parajtsï kánikua jatsikuarheni ka úntsï ambakiti ambe úni.
9 —Ísï eska na karakata jaka: “Ima kánikua íntspisïndi; íntsaasïndi imeechani engaksï no ma ambe jatsikuarheka. No méni mirikurhinhaati na enga xáni sési jámajka ima”.
10 Tata Diosï kánikua semiia íntskusïndi imani enga jatsikujka ka ístu íntskusïndi tʼirekua para arhani, ísï jimbo, imaksïni íntskuati semiia ka kánerachentaatiksïni parajtsï chá jatsikuni ka jarhuataatiksïni parajtsï chá uánikua ambe pʼikuntani indeni jimbo engajtsï chá sési jámajka—.
11 Tata Diosïksïni chánksïni kánikua kóndentaxati parajtsï chá úni íntspini ambe uéjki uétarhini jarhani ka kʼuiripuechaksï diosmaiamukua arhiati Tata Diosïni engani jucha na íntspintaakia ambe engajtsï chá íntspiaka.
12 Jimboka engachi jarhuataani* jaka pímbinharhatiichani paraksï jatsini ambe engaksï uétarhinchani jaka, ístu jindeesti paraksï sánderu uánikua kʼuiripuecha diosmaiamukua arhini Tata Diosïni.
13 Ambe engajtsï chá úni jaka parajtsï jarhuataani,* xarhatasïndi na engajtsï jásï kʼuiripueka chá, jimboksïsï imeecha kʼéri ambe arhijti Tata Diosïni indeni jimbo engajtsï chá ísï úni jaka eskajtsï na uandantajka ambakiti aianhperakuani Kristueri ambe ka jimbokajtsï uánikua ambe íntsaasïnga imeechani ka ístu iáminduechani.
14 Ka imeechaksïni kómarhijpichesïndi ka ístuksïni xénchasïndi jimbokaksïni Tata Diosï xáni kánikua kóndentasïnga.
15 Jucha diosmaiamukua arhisïnga Tata Diosïni imeeri intsïmperata jimbo enga no nema jamberi újka uandantani na enga xáni kʼéri ambeeka.
