Segundu Karakata Pedrueri 3:1-18
-
Imeecha engajtsïni teresmarhujka, nóksï jakajkusïndi eskaksï no ióni jimbo kʼamajkunhaaka (1 a 7)
-
No jindeesti jimboka Tata Diosï Jeoba ióndaxaka (8 a 10)
-
Ju je jingontku exeni na jásï kʼuiripuchisï jatsi para jindeeni (11 a 16)
-
Jimbanhi auanda ma ka jimbanhi echeri ma (13)
-
-
Ju je jingontku jarhani parachi no támisï jánhastanhani (17 ka 18)
3 Juchiiti erachiicha* engaksïni ji xáni xénchajka, ini jingoni tsimani xanhariistia engaksïni karachini jaka, ka ísï eskaksïni orheta na karachipka, ménderuksïni uékasïnga miátantani sáni ambe ma parakajtsï uaaka sési eratsentani,
2 parajtsï miántani ambe engaksï ióntki uandapka Tata Diosïiri uandakua páriicha* engaksï pímbinhasïipka, ka ístu parajtsï miántani indeni mandamientuni engaksïni Tata arhistachika, ima engajtsïni pʼímutantajka, ka apostoliichani* axaaspti paraksïni arhistachini.
3 Joperujtsï orheta jatsiska para mítetini jarhani eska últimu jurhiatikuechani jimbo, jauakaksï kʼuiripuecha engaksïni teresmarhuaka ka engaksï ísï jámaaka eskaksï imeecha na tsitijka
4 ka uandaatiksï: “Ima uandaspti eska ménderu jupiringa, jiájkani ¿nani jarhaskia? Jimboka jiáni uératini engaksï juchaari ióntki anapu parientiicha uarhika, méntku iámu ambe májku jásï jarhasti eska jiáni enga ueenaka jarhani parhakpini”.
5 Imeechaksï uékantku no miásïndi eska ióntki auanda ma jarhaspka ka eska itsïirhu uéraspka echeri ma enga sési uaxastakata japka ka eska itsïirhisï jarhaspka inde echeri Tata Diosïiri uandakua jimbo,
6 i ambesï kʼamajkuti ióntki anapu kʼuiripuni ka jiáni ísï úkuarhispti enga itsï iámu ójchakurapka echerini.
7 Joperu indeni uandakua jimbojtu, echeri ka auanda enga iásï jaka, míndakataksï jarhastia para chpiri jingoni kʼamajkunhani ka patsakataksï jarhasti para ima jurhiatikua enga jusgarpinhaaka ka engaksï kʼamajkunhaaka ima kʼuiripuecha engaksï no janhanharhijka Tata Diosïni.
8 Joperu juchiiti erachiicha engaksïni ji xáni xénchajka, asï méni mirikurhi je ini ambe: eska para Tata Diosï Jeoba ma jurhiatikua ísïiska komueska mili uéxurhini ka mili uéxurhini komueska ma jurhiatikua.
9 Ka no jindeesti jimboka Tata Diosï Jeoba ióndaxaka úni ambe enga aiatspeka, ísï eskaksï máru kʼuiripuecha na eratsejka. Sánderu sési, imaksïni tekaachintaxati chánksïni jimboka no uékasïnga eska nema kʼamajkunhaaka, sino eskaksï iámindu kʼuiripuecha móantaaka.
10 Joperu Tata Diosï Jeobaeri jurhiatikua ísï juuati komueska sïpari ma. Ima jurhiatikua, auanda nóneuati ka uinhamu charhancheati,* ka ambe enga xáni jaka auandarhu ka echerirhu jorhejorhesï jauati ka iámuksï tsïtentaati; ka echeri ka ambe enga xáni jaka echerirhu, iámuksï kurhiati.
11 Ka jimboka méntku iámu ambe tsïtentaaka, ¡jingontku exe je na jásï kʼuiripujtsïsï jatsi para jindeeni! Jatsiskajtsï para sési jámani parajtsï pímbinhasïini ka jánguarhintani sési marhuakuni Tata Diosïni.*
12 Ístu, jingontku erokuarhini ja je eska janoaka Tata Diosï Jeobaeri jurhiatikua, ima jurhiatikua enga auanda kʼamajkunhaaka chpiri jingoni ka jiáni enga iámu tsïtentaaka ambe enga xáni jaka auandarhu ka echerirhu, jimboka kánikua kurhini jauaka.
13 Joperu jimbanhi auanda ma jarhasti ka ístu jimbanhi echeri ma, inde ambechisï erokuarhini jaka ísï eskajtsïni ima na aiachika, ka jima méntku iámindu ambe sési úkuarhiati.
14 Erachiicha engaksïni ji xáni xénchajka, chájtsï ini ambe erokuarhixaka, ísï jimbo, jánguarhinta je paraksïni ima no ma ambe exechintani tátsekua ka paraka exeaka eskajtsï pímbinhasïiska ka eskajtsï pínandikua jingoni irekaxaka.
15 Ístu, eratsenta je eska enga juchaari Tata ísï tekaantani jaka, jindeesti para pʼímutantspini, jimbokaksïni juchaari erachi Pablu engachi kánikua xénchajka, imajtuksïni ísï karachispti eska Tata Diosï na jánhastapka.
16 Imaksï indeni ambesï arhipti iámindu imani karakateecha jimbo engaksïni axacheapka. Joperu indeni karakateecha jimbo, uánikua ambe jarhasti enga úkua jukaka para kurhanguni, ima ambe engaksï mójtakujka imeecha engaksï no ma ambe míteka* ka engaksï no uíuinhasï jaka, ísï eskaksï na mójtakuajka iámu Karakateechani, ka indeni ambe jimbo, jandiajkuksï jirinhakuarhixati eskaksï kʼamajkunhaaka.
17 Ísï jimbo erachiicha engaksïni ji xáni xénchajka, jimbokajtsï míteskia ini ambe, seguiriini ja je jingontku jarhani parajtsï no támisï jánhastanhani ísï eska imeecha, indeni ambe jimbo engaksï no sési úriicha* no sési niátaka ka tátsekuajtsï nóteru uíuinhasï* jarhania.
18 Sánderu sési, jánguarhinta je paraksïni sánderu kánikua kóndentani juchaari Tata Jesukristu, ima engajtsïni pʼímutantajka, ka ístu parajtsï sánderu míteni imeeri ambe. Eska kʼéri ambe arhinhaaka ima iásï ka asta ima jurhiatikua enga jindeeka para méntkisï. Eska ísï úkuarhiaka.
Notecha
^ O “ermanuecha”.
^ O “profeteecha”.
^ O “ka chaari apostoliichani”.
^ Ísï eska na kurhaakuarhijka enga ambe ma sóntku manakuarhijka.
^ O “ka chaari úkuecha jimbo xarhatani eskajtsï sési marhuakuxaka Tata Diosïni”.
^ O “engaksï no jorhendanhaka”.
^ O “engaksï imeecha engaksï no újka ambe enga lei arhijka”.
^ O “nóteru sési anhaxurhitini”.
