Segundu Karakata para Timoteu 1:1-18
-
Ueenasïndi uandajpani (1 ka 2)
-
Pablu diosmaiamukua arhisïndi Tata Diosïni jimboka Timoteu mintsikasïnga (3 a 5)
-
Méntku no méni jámani jurajkuni Tata Diosïiri intsïmperatani (6 a 11)
-
No jámani jurajkuani ambakiti uandakuechani (12 a 14)
-
Imeecha engaksï no jurajkupka Pabluni ka imeecha engaksï ikiakuenga (15 a 18)
1 Ji Pablu, Kristu Jesúsiiri apostoliiska jimboka Tata Diosï ísï uékaska, parani uandantani eska Tata Diosï tsípikua aiakuaska iámindu imeechani engaksï Kristu Jesúsiiri chúxapatiika.
2 Karachixakakeni tʼungini Timoteu, jíkeni ísï exesïnga tʼungini komueska juchiiti sapi* ka kánikuakeni xénchasïnga.
Ji kómarhisïnga eska Tata Diosï, enga jindeeka Taati, ka ístu Kristu Jesúsi enga jindeeka juchaari Tata, eskaksïni kánikua kóndentaaka,* eskaksïni pʼamojkuaka ka eskaksïni jarhuataaka parari pínandikua jatsini.
3 Ji diosmaiamukua arhisïnga Tata Diosïni, imani Tata Diosïni engani marhuakuni jaka ísï eskaksï na marhuakupka juchiiti ióntki anapu parientiicha ka ístuni jánguarhintaxaka sési jámani imani japarini, ka jíkeni méntkisï miántasïnga engani chúrikua ka jurhiakua kómarhini jarhajka Tata Diosïni.
4 Engani miántajka na engari xáni uerapka, jíkeni kánikua jirinhantasïnga jimbokarini tʼu sési pʼikuastasïnga.
5 Jimbokani miántasïnga na engari tʼu mintsita jingoni mintsikajka Tata Diosïni, májkueni eska chiiti mama kʼéri Loida ka chiiti naandi Eunise, jimbokaksï ima ueenaspka ísï mintsikani ka ji sési mítetixaka eskari tʼujtu májkueni mintsikasïnga.
6 Ísï jimbo, jíkeni uékasïnga miátantani eskari méntku no jámaaka jurajkuni* indeni intsïmperatani engakeni Tata Diosï íntskuka ka engari jiáni intsïnhaka engakeni ji pʼájtsïkupka.
7 Jimbokajtsïni Tata Diosï no íntskuska espiritu ma enga újka eskachi jucha chéni pʼikuarheraaka, sánderu sési, inde espiritu úsïndi eskachi jucha uinhapiti jauaka, eskachi xénchpeaka ka eskachi méntkisï sési eratseaka.
8 Ísï jimbo, asï jáma kʼuratseni juchaari Tateeri ambe uandantani ka ístu asï jáma kʼuratseni jíndeni jimbo engani ísï ónhakata jaka imani jimbo. Sánderu sési, tekaanta ambe engari xáni no sési nitamakuarhiaka ambakiti aianhperakuani jimbo ka méntkisï mintsika Tata Diosïiri uinhapikuani.
9 Imajtsïni pʼímutantasti ka ióarhistijtsïni parachi pímbinhasïini, joperu no jimbokachi jucha xáni sési jámapiringa,* sino imani ambe jimbo enga ima eratsekata jatsikia ka jimbokajtsïni xáni kóndentaska. Ka Tata Diosïjtsïni desde ióntkisï xáni kóndentati Kristu Jesúsini jimbo,
10 joperu iásï enga Kristu Jesúsi xarhantakia, ima engajtsïni pʼímutantaka, iásï kʼóru sési xarharasïndia na engajtsïni xáni kóndentaka. Ima ústi eska uarhikua méntku nóteru ambe ma uaakia úni, ka ambakiti aianhperakuani jimbo, imajtsïni aiangusti nénachi uaa jucha tsípikua jatsini ka imani kuerpu jatsini enga no méni terejka
11 ka ji erakunhaska parani ini ambe jámani uandantani, ka parani apostoliini ka parani indeni ambe jorhentpini.
12 Ísï jimbosïni jíjtuni ini ambe tekaantani jaka joperuni no kʼuratsesïnga. Jimbokani ji sési míteska imani engani ji jakajkujka ka mintsikasïnga eska ima kuájchakuaka ambe engani ji patsaraka asta ima jurhiatikua jamberi enga uaxastakata jakaia.
13 Asï jáma jurajkuani* indeni ambakiti uandakuechani* engaksï jakaia ka engakeni ji jorhendaaka, ka seguirii mintsikani Tata Diosïni ka xénchpeni jimbokari Kristu Jesúsiiri chúxapatiiska.
14 Ka inde espiritu santu engachi jatsika, indekini jarhuataati parari tʼu kuájchakuni indeni xáni ambakiti ambe engari jurajkuminhaka.
15 Ka tʼuri míteskia eskajtsïni jurajkuska iámindu ima achamasïicha engaksï Asiaisï anapueka ka ístu Fijelu ka Ermójenesi.
16 Eska Tata kánikua pʼamojkuauaka Onesíforueri kʼumanchikuarhu anapuechani, jimbokarini ima someni uinhaperantaska ka no kʼuratsesti indeni jimbo engani ji ónhakata jaka.
17 Jimboka enga ima Roma japka, méntkurini ísï jámaspti jirinhantani astakarini exentapka.
18 Eska Tata Diosï Jeoba pʼamojkuaka ima jurhiatikua enga uaxastakata jakaia. Ka tʼuri sési mítetixakaia na engareni ima xáni jarhuataka jini Éfesu.
Notecha
^ O “uátsïti”.
^ Exe je Glosario, Tata Diosï kánikua kóntpintasïndi.
^ Griegu jimbo: “eskari méntku tixarhutani jauaka komueska chpirini ambe”.
^ O “jimbokachi xáni ambakiti ambe úsïnga”.
^ O “Uinhamu jupikaa”.
^ O “Asï jurajku imani ambe uandani enga kánikua marhuajka”, “Asï jurajku imani ambe uandani enga sési útspijka”.
