Segundu Karakata para Timoteu 3:1-17
3 Joperuri jatsiska para mítetini jarhani eska últimu jurhiatikuechani jimbo kánikua no sési jánhaskuarhiaka ka eska kánikua úkua jukaaka.
2 Jimbokaksï kʼuiripuecha jandiajkumindu xénchakuarhiaka, jukariksï tsitiati sentabu, arhikuarhiatiksï,* sésiksï xékuarhiati, no sési ambeksï uandaati Tata Diosïiri ambe, nóksï kurhajchauati taati jémbeechani, nóksï diosmaiamukua arhijpiati,* ka jurajpinksï jámaati,*
3 nóksï xénchpeati, nóksï nani máru uékaati kurhanguni, uandakua ambeksï jauatatspeati, nóksï uaati pʼíngukuarhini, no sésiksï jámaati, méntkuksï no sáni uékaati sési ambe úni,
4 nóteruksï mintsinharhikueuatia ka inchandimeatiksï, kʼéramakuarhiatiksï, sánderuksï uékaati tsípikuarhini ka eska Tata Diosïni xénchani,
5 ísïksï jámaati enajkiksï marhuakuni jaua Tata Diosïni,* joperu imeecheeri irekua jingoni xarhataatiksï eskaksï no marhuakuxaka. Kéndikukua indeeni járhati kʼuiripuechani.
6 Ixúksï uérasïndi ima achamasïicha engaksï inchatspini jámajka kʼumanchikuecharhu ka engaksï támisï jánhastaajka imani uarhiitiichani engaksï no jánhaskajka ka engaksï no sési pʼikuarherani jarhajka indeni ambe jimbo engaksï no sési niátaka* ka engaksï no újka pʼíngukuarhini jimbokaksï indeni ambe niátasïnga engaksï xáni tsitijka,
7 indeecha engaksï méntku jorhenguarhini jarhajka ambe ma, joperu engaksï méntku no újka sési míteni jurhimbikua ambe.
8 Janesi ka Jambresi méntkuksï no kurhajchaspti Moisésini ka indeechajtuksï májkueni jámaxati, méntkuksï no jiókuarhisïndi jurhimbikua ambe. Inde achamasïichaksï iámu xerejtsïstia ka Tata Diosï no jaiapanheantasïndi jimbokaksï no mintsikasïnga imani.
9 Joperuksï nóteru ambe ma uaatia úni, jimbokaksï iáminduecha exeaka na engaksï xáni tontueka,* ísï eska na úkuarhipka imani tsimani achamasïicha jingoni.
10 Joperuri tʼu kʼóru ísï úxaka eskakeni ji na jorhendaka, tʼujturi májkueni jámasïnga eskani ji, tʼujturi májkueni ambe uékasïnga úni eskani ji, tʼujturi májkueni mintsikasïnga eskani ji, tʼujturi májkueni tekaantasïnga eskani ji, májkuendi xénchpesïnga eskani ji ka tʼujturi májkueni no kuatantasïnga eskani ji,
11 ka tʼuri míteska na engani xáni no sési kánhapka ka na engani xáni no sési nitamakuarhipka engani Antiokía, Ikoniu ka Listraisï jámani japka. Ji tekaantaska engani ísï no sési kánhani japka ka Tatarenisï méntkisï kuájchakuti.
12 Jimboka iámindu imeecha engaksï Kristu Jesúsini chúxapajka ka engaksï uéjka sési marhuakuni Tata Diosïni,* ístuksï no sési kánhaati.
13 Joperuksï no sési úriicha ka imeecha engaksï chkuanderajka, sánhani arhiatiksï sánderu no sési ambe niátani, támisïksï jánhastauati kʼuiripuechani ka imajtuksï támisï jánhastanhaati.
14 Joperu tʼu asï jáma jurajkuni indeni ambe engaksïni jorhendaka, ka engaksïni kurhangutaraka parakari tʼu úpiringa jakajkuni, jimbokari tʼu míteska néksïnisï jorhenda,
15 ka ísturi míteska eskari jiáni ueenaska jorhenguarhini pímbinharhati karakateecheeri ambe desde engari andajpenuka.* Indeni jimborisï tʼu uaaka sési jánhaskani ka niárandi pʼímutantskata uérani engari mintsikaska Kristu Jesúsini.
16 Ambe enga xáni karakata jaka Karakateecharhu Tata Diosï kararkuarhisti* ka marhuasïndi para jorhentpini, para exeraani kʼuiripuechani ambe engaksï no sési úni jaka, para sési peentani iámindu ambe ka para jorhendaani kʼuiripuechani ambakiti ambe úni,*
17 paraka ima kʼuiripu enga Tata Diosïni marhuakuaka sési jorhendakata jauaka ka paraka sési míteaka néna sési úni ambakiti ambe.
Notecha
^ O “jatsijpakuarhiatiksï”.
^ O “nóksï agradeseritspiati”.
^ O “jurajkuatiksï Tata Diosïni”.
^ O “enajkiksï kómarhini jaua Tata Diosïni”, “enajkiksï no jurajkua Tata Diosïni”.
^ O “engaksï pekariika”.
^ O “no sáni jánhaskajka”.
^ O “engaksï uéjka kómarhini Tata Diosïni”, “engaksï no uéjka jurajkuni Tata Diosïni”.
^ O “engari sapichku japka”.
^ Indenisï arhikuekani jati eska Tata Diosïiri espiritu santu jimbo karanhaska.
^ O “imani ambe úni enga Tata Diosï uandajka eska sési jarhaska”.
