Segundu Karakata para Timoteu 4:1-22
4 Kristu Jesúsi jusgariuauati tsípitiichani ka ístu uarhiriichani jiáni enga ima xarhantaaka ka enga imeeri Reinurhu jauakia. Jíkeni ini ambe arhixaka Kristu Jesúsini japarini ka ístu Tata Diosïni japarini:
2 uandanta Tata Diosïiri uandakuani; kánikua jánguarhinta aianhpini enga sési jánhaskuarhini jauaka o na uéjki no sési jánhaskuarhini jarhani; arhistakua máteruechani, xukaa ka uandontskuarhekua, kánikua tekaantskua jingoni ú ini ambe ka jánguarhinta sési míteni néna jorhentpini.
3 Jimboka niáraaka ima jurhiatikua engaksï imeecha méntku no uékaaka kurhaani ambakiti jorhentperakuani* ka uékaatiksï imani jorhentpiriicha jingoni jarhani engaksï arhiauaka ambe engaksï imeecha kurhandinchajka jimbokaksï imani ambejkusï uéjka úni ambe engaksï imeecha tsitijka.
4 Nóteruksï uékaatia kurhandini jurhimbikua ambe ka sánderuksï kurhandinchaati uandantskua ambe.
5 Joperu tʼu méntkisï sési eratsenta iámindu ambe,* tekaanta engari no sési nitamakuarhini jauaka, ú indeni ánchikuarhitani enga jindeeka aianhpini ambakiti aianhperakuani ka jánguarhinta sési ánchikuarhikuni Tata Diosïni.
6 Jimbokani ji ísï kéjtsïtanhaxaka komueska binu ka no ióni jimbo ji pʼímutanhantaakia.
7 Ji uarhipeskia ini ambakiti uarhiperakuani jimbo, andaskia ini karrerani jimbo, ka iásï jamberini ji útasï mintsikaxaka Tata Diosïni.
8 Iásï, ima Tata enga sési jusgarpijka koronarini ma íntskuati. I korona míndakata jarhasti para imeecha engaksï sési jámajka. Ka ima jurhiatikua, imarini indeni korona jingoni maiamuntaati ka nóreni jíndentku íntskuati, ístu imeechani íntskuauati engaksï uékani jakaia eska ima xarhantaaka.
9 Jánguarhinta parareni sóntku jurhani exeni.
10 Jimbokarini Demasi jurajkuska, jimboka sánderu tsitiska ini parhakpini anapu* ambe ka Tesalónika nirasti. Kresenti Galasia nirasti ka Titujtu Dalmasia nirasti.
11 Lukasïjkusï jíndeni jingoni jati. Juájta Markusïni jimbokarini ima kánikua jarhuataaka parachi Tata Diosïni ánchikuarhikuni.
12 Ji Éfesu axaska Tíkikuni.
13 Engari juuaka, juájta sáni imani takusïni engani Karpueri kʼumanchikua jimbo jurajkuka jini Troasi, ka juájtaa karakateechani,* ka asï jáma mirikurhiani imeechani juaani engaksï sïkuiriiriika.
14 Alejandru, ima enga kobriiri úkata ambe újka, kánikuarini no sési kámasti. Tata Diosï Jeoba íntskuati ambe enga ima jirinhakuarhika.
15 Tʼujtu xéparini jáma imani jingoni, jimboka ima méntku no sési jámaska parajtsïni pʼínguni parachi nóteru jámania aianhpini ambe engachi jucha uandantajka.
16 Jiáni engani orhetku nípka kuájpikuarhini ji jandiajkuni jarhaspka jimbokajtsïni iáminduecha jurarkuspka. Ka no uékasïnga eska nema no sési arhinhaaka indeni ambe jimbo.
17 Joperureni Tata kʼóru no méni jurajkusti, imarini uinhaperantasti parani ji úni sési aianhpini ambe enga xáni arhijka Tata Diosïiri karakatarhu ka iámindu ireteechaksï niárani míteni indeni ambe. Ka ístureni kuájpintasti parakarini leoni no ántapiringa.
18 Tatareni kuájpintaati iámindu no sési ambeeri ka imeeri Reinu jimborini paati enga auandarhu jaka, parareni pʼímutantani. Eska ima kʼéri ambe arhinhaaka para méntkisï. Eska ísï úkuarhiaka.
19 Tʼu sáni aiangu Priskani ka Ákilani eskani ji uandajperata ma axakuaxaka ka ístu Onesíforueri kʼumanchikuarhu anapuechani.
20 Erastu Korintu pakarasti ka Miletu jurajkuska Trófimuni jimboka pʼamenchaxapka.
21 Jánguarhinta parakari tʼuini ixú jauakia ante de ueenani iauani.*
Eubulukini uandajperata ma axachexati ka ístu Pudente, Linu, Klaudia ka iámindu erachiicha.*
22 Eska Tata tʼungini jingoni jauaka jimbokari ambakiti mintsita ma jukaska. Eskaksïni ima kánikua kóndentaaka.
Notecha
^ O “jorhentperakuani enga kánikua marhuajka”, “jorhentperakuani enga sési útspijka”.
^ O “Joperu tʼu jánhaskatii”.
^ O “i tiempu anapu”. Exe je Glosario, tiempu.
^ O “roiuechani”.
^ O “iéstani”.
^ O “ermanuecha”.
