Filemóni 1:1-25
1 Ji Pablu, ónhakata jarhaska Kristu Jesúsini jimbo, ka juchaari erachi* Timoteu jíndeni jingoni jarhasti, ka karachixakakeni tʼungini Filemóni, tʼujtsïni kánikua jarhuatasïnga ka juchaksïni kánikua xénchasïnga,
2 ístuni karakuxaka juchaari pirenchi Apfiani ka Arkipuni, enga Kristueri sondadueka ísï eska jucha, ka ístuni karakuaxaka imani kúnguarhikuarhu anapuechani engaksï chiiti kʼumanchikuarhu tánguarhijka:
3 Ji kómarhisïnga eskaksïni Tata Diosï, enga jindeeka juchaari Taati, ka ístu Tata Jesukristu, kánikua kóndentaaka* ka eskaksïni jarhuataaka parajtsï pínandikua jatsini.
4 Méni engakeni kómarhijpichejka, méntkisï diosmaiamukua arhisïnga juchiiti Tata Diosïni,
5 jimbokani méntkuni kurhandixaka na engari xáni mintsikajka ka na engari xáni xénchajka Jesúsini* ka ístu na engari xáni xénchaajka iámindu pímbinharhatiichani.
6 Jimbokari tʼujtu májkueni mintsikasïnga eskaksï máteruecha, ji kómarhisïnga Tata Diosïni parakakeni inde ambe jarhuataaka exeni eskachi ambakiti ambe jatsiska Kristuni jimbo.
7 Tsípispka ka kánikua sési pʼikuarheraspka míteni na engari xáni xénchpejka, jimboka tʼungini jimbo, juchiiti erachi, iámindu pímbinharhatiichaksï kánikua sési pʼikuarherantasti.
8 Ísï jimbo, nájkirukani Kristuni jimbo sésikua jatsika parakeni juramuchini eskari uaaka ambe enga sési jaka,
9 jíkeni uékasïnga ini ambe kurhacheni, jimbokani míteska eskari xénchpesïnga, jimbokani ji Pablu, jatiriiskia ka iásï ónhakata jarhaska Kristu Jesúsini jimbo.
10 Jíkeni Onésimu jimbosï kómarhini jaka, jimboka ima ísïiska komueska juchiiti sapi,* ka iásï engani ónhakata jaka, ji niáraska imeeri taati jémbeeni.
11 Ióntki, imakeni no káni jarhuatasïreendi, joperukeni iásï kʼóru kánikua jarhuataatia tʼungini ka ístu jíndeni.
12 Ka jíkeni axachentaxaka Onésimuni, jo, imani engani ji xáni xénchajka.
13 Iásï engani ónhakata jaka ambakiti aianhperakuani jimbo, ji uékapiringa eska inde ixú pakarapiringa jíndeni jingoni parareni inde jarhuatani chiiti kuenta jimbo.
14 Joperukeni orheta tʼungini uékaxapka kurhamarhini, jimbokani no uékasïnga eskari afuersa uaaka ambe engakeni kurhacheni jaka, sino tsípikua jingoni.
15 Jamberikeni jimbosï jurajkupti ma tiempu parakeni iásï kʼóru nóteru méni jurajkunia,
16 joperu iásï nóteru ísïiuatia komueskaksï máteru jántspiriicha, jimboka iásï chiiti erachiiskia ka kánikuachi xénchasïnga. Ji kánikua xénchasïnga, joperu tʼu sánderia, jimbokajtsï iásï ménderu márku jauakia ka májku kʼérijtsï marhuakuni jauaka Tatani.
17 Ísï jimbo, engani ji chiiti amigueka, sési eroka, ísï eskarini na erokapiringa jíndeni.
18 Ka engakeni no sési ambe úchika, okeni káncheni jarhani ambe ma, jíkeni maiamuntaaka.
19 Ji Pablu, jíkenisï karachini jaka: jíkeni maiamuntaaka iámu ambe, —ka asï mirikurhi eskarini tʼu kánikuasï káncheni jaka—.*
20 Jo erachi, jánguarhinta ísï úni Tatani jimbo; sésirini pʼikuastanta* Kristuni jimbo.
21 Ji mintsikaxaka eskarini kurhajchaaka ka karachixakakeni jimbokani míteska eskari tʼu no indeni ambejku uaaka engakeni arhini jaka.
22 Ístu, ambantskanta sáni kuartu ma parani ji jima pakarani, jimbokani mintsikaxaka eskaksïni ménderu niuaka exeni indeni jimbo engajtsïni chá ísï kómarhijpicheni jaka.
23 Epafrasikini uandajperata ma axachexati, indejtu jíndeni jingoni ónhakata jarhasti jimboka indejtu Kristu Jesúsiiri chúxapatiiska.
24 Markusï, Aristarku, Demasi ka Lukasï, indeecha engajtsïni jarhuatajka, indeechaksïni uandajperata ma axachexati.
25 Eskaksïni Tata Jesukristu kánikua kóndentaaka jimbokajtsï ambakiti mintsita ma jukaska.
Notecha
^ O “ermanu”.
^ Exe je Glosario, Tata Diosï kánikua kóntpintasïndi.
^ Griegu jimbo: “Tata Jesúsini”.
^ O “uátsïti”.
^ O “eskarini tʼu asta chiiti tsípikuani jamberi kánchexaka”.
^ O “sési pʼikuastanta juchiiti mintsitani”.
