Filipusï 1:1-30
-
Ueenasïndi uandajpaani (1 ka 2)
-
Diosmaiamukua arhisïndi Tata Diosïni; Pablu kómarhisïndi (3 a 11)
-
Nájkiruka uandanhiata ambe jarhajka sánderu mítekuarhixati ambakiti aianhperakua (12 a 20)
-
Kristuni jimbochisï jámani jaka, uarhikua andakuestia (21 a 26)
-
Jatsiskajtsï para sési jámani ísï eska na terukuntajka ambakiti aianhperakua jingoni (27 a 30)
1 Pablueri ka Timoteueri engaksï Kristu Jesúsiiri jántspiriika, para iámindu pímbinharhatiicha engaksï Kristu Jesúsiiri chúxapatiika ka engaksï Filipusï jaka, ka para orhejtsïkutiicha ka sierbo ministerialiicha:
2 Ji kómarhisïnga eskaksïni Tata Diosï, enga jindeeka juchaari Taati, ka ístu Tata Jesukristu kánikua kóndentaaka* ka eskaksïni jarhuataaka parajtsï pínandikua jatsini.
3 Méni engaksïni miántajka, ji diosmaiamukua arhisïnga juchiiti Tata Diosïni.
4 Ka méni engaksïni kómarhijpichejka iámindu chánksïni, jíksïni tsípikua jingoni kómarhijpichesïnga,
5 ka jimbosïni ísï újka jimbokajtsï chá kánikua ánchikuarhiska parajtsï ambakiti aianhperakuani uandantani ka ísïjtsï úxaka desde engajtsï kurhaaka ambakiti aianhperakuani asta iásï jamberi.
6 Jimbokani ji ísï mintsikaxaka: eska Tata Diosï kʼamaraaka úni indeni ambakiti ambe enga ueenaka úni chánksïni jingoni ka ísï uaati asta imani jurhiatikua enga Kristu Jesúsi juuaka.
7 Ka sési jarhasti engaksïni ji chánksïni ísï eraani jaka jimbokajtsï chá juchiiti mintsitarhu jarhaska. Ka Tata Diosïksïni chánksïntu kóndentaxati ísï eska jíndeni, chájtsïni méntkisï jarhuataska jiáni engani ónhakata japka ka ístu jiáni engachi juramutiichani japarini* kuájpika ambakiti aianhperakuani.
8 Tata Diosï sési mítetixati eskaksïni ji kánikua jirinhantasïnga ka eskaksïni jíjtu májkueni xénchasïnga eska Kristu Jesúsi.
9 Ka ji útasï ini ambesïni kurhakuni jaka Tata Diosïni: eskajtsï chá sánhani arhiaka sánderu ka sánderu xénchperani indeni jimbo engajtsï iámindu ambe sési míteka ka engajtsï iámindu ambe kurhangujka,
10 eskajtsï exeaka ambesï sánderu uétarhijki úni parakajtsï chá méntkisï sési jámaaka ka nójtsï jámani máteruechani no sési ambe úraani* enga jamberi niáraaka Kristueri jurhiatikua.
11 Ka ístuni kómarhisïnga paraka inde xáni ambakiti ambe enga tata Jesukristu újka juchantsïni úraparini, iámindu ambe jimboksïni jarhuataaka, paraksï kʼuiripuecha míteni na enga xáni kʼéri ambeeka Tata Diosï ka paraksï kʼéri ambe arhini.
12 Erachiicha,* ji uékasïnga eskajtsï chá mítetini jauaka eska ambe engani ji nitamakuarhini jaka, jarhuajpexaka para sánderu mítekuarhini ambakiti aianhperakua,
13 jimbokaksï iámindu Roma anapu juramutiiri kuáriicha ka ístu iámindu máteru kʼuiripuecha, sésiksï mítetixati eskani ji Kristuni jimbosïni ónhakata jaka.
14 Ka indeni jimbo engani ji ísï ónhakata jaka, iásïksï sáno iámindu erachiicha engaksï Tateeri chúxapatiika, nóteruksï chésïndia ka sánderuksï balori jukantastia paraksï no sáni chéparini uandantani Tata Diosïiri uandakuani.
15 Ísïisti, máruksï enbidia jimbosï aianhpini jati Kristueri ambe ka jimbokaksï andaperaxaka máteruecha jingoni, joperuksï jarhasti máteruecha engaksï sési jimbo aianhpini jaka.
16 Iichaksï uékperakua jimbosï uandantani jati Kristueri ambe jimbokaksï míteska eskani ji erakunhaska parani ambakiti aianhperakuani kuájpini;
17 joperuksï máteruecha enbidia jimbosï aianhpini jati ka andakuekanksïsï ísï jámani jati ka no jimbokaksï sési jimbo uékaaka aianhpini, jimbokaksï ima uékasïnga eskani ji no sési nitamakuarhiaka iásï engani ónhakata jaka.
18 ¿Ka iásï ambe úkuarhixakiia? Eskaksï kʼuiripuecha uandantaxaka Kristueri ambe, na uéjkiksï máru mintsita jingoni uandantani jarhani o nómbe. Ka ji kánikua tsípixaka indeni ambe jimbo ka útasï seguiriini jauaka kánikua tsípini
19 jimbokani míteska eskani pʼímutanhantaaka indeni jimbo engajtsïni chá xáni kómarhijpichejka ka espiritu santu jimbo enga tata Jesukristu íntspijka.
20 Ka ji indenisïni uéjka ka indeni ambesïni erokuarhini jaka, eskani no ma ambe jimbo kʼuratseaka. Ji mintsikaxaka eskani útasï uaaka uandantani ka kʼéri ambe arhini Kristuni juchiiti kuerpu jingoni ísï eskani na úni jaka iásï jamberi, ka kʼéri ambe arhiaka iásï engani útasï jámani jaka o ístu engani niáraska uarhini.
21 Jimboka engani ji útasï jámani jaka, Kristuni jimbosïni jámani jaka ka andakueuatia engani niáraska uarhini.
22 Ka engani útasï jatsika para ini kuerpurhu irekani jarhani, jiájkani indeni jimbo,* seguiriini jauaka uinhamu ánchikuarhini. Joperuksïni no uaaka aianguni ambesïni uékapirini ji.
23 Ji no nani máru pʼikuarherasïnga jimbokani tsimani ambe uékapiringa, uékapiringa nóteruni jántspiriinia ka Kristu jingoni jarhani jimboka inde ambesï sánderu sési jaka para ji.
24 Joperu para chánksïni jarhuatani, ji jatsiska parani útasï ini kuerpurhu irekani jarhani.
25 Jiájkani ji ísï mintsikaxaka, jimbosïni mítetini jaka eskani útasï jámani jauaka ka eskani chánksïni jingoni jauaka parajtsï chá sánderu sési marhuakuni Tata Diosïni ka parajtsï tsípini indeni jimbo engajtsï mintsikani jaka.
26 Ka ísï jimbo, engani ji ménderu chánksïni jingoni jauakia, chájtsï sánderu mintsikaaka Kristu Jesúsini jíndeni jimbo.
27 Joperujtsï kʼóru jatsiska parajtsï sési jámani* ísï eska na terukuntajka Kristu Jesúsiiri ambakiti aianhperakua jingoni, paraka jiáni engaksïni ji niuaka exeni o nájkirukani no chánksïni jingoni jauaka, ji niárani míteni eskajtsï chá iáminduecha uíuinhasï jarhaska, eskajtsï májku kʼéri jarhaska, eskajtsï iáminduecha májku eratsekua* jingoni jámasïnga ka eskajtsï iáminduecha májku kʼéri ánchikuarhixaka para mintsikanhani inde ambakiti aianhperakua
28 ka eskajtsï no sáni chérhiasïnga imeechani engaksïni ikiachejka. Jiájkani i ambe xarhatasïndi eskaksï imeecha kʼamajkunhaaka joperu eskajtsï chá pʼímutanhantaaka, ka i ambe Tata Diosïni jimboesti.
29 Jimbokaksïni Tata Diosï íntskuska sésikua parajtsï chá mintsikani Kristuni, joperu no inde ambejku, ístuksïni íntskusti sésikua parajtsï chá no sési nitamakuarhini imani jimbo.
30 Jimbojtsïsï chá májkueni úkua jukanchani jaka ísï eskajtsïni jíndeni na exeka, ka chájtsï míteska eskani iásï jamberi májkueni úkua jukanchaxaka.
Notecha
^ Exe je Glosario, Tata Diosï kánikua kóntpintasïndi.
^ O “engachi leiicha jingoni”.
^ Griegu jimbo: “úni eskaksï máteruecha téksarhutaaka”.
^ O “Ermanuecha”.
^ Indenisï arhikuekani jati para Kristu kʼéri ambe arhinhani.
^ O “ísï jámani eska májku iretarhu anapuecha”.
^ Griegu jimbo: “alma”.
