Filipusï 3:1-21
3 Ka para kʼamarania juchiiti erachiicha,* jíksïni uékasïnga arhini eskajtsï méntkisï tsípini jauaka Tatani jimbo. Ka ji no kuatantaaka ménderuksïni májkueni ambe karachini, jimbokaksïni uékasïnga kuájchakuni.
2 Xéparini jáma je uíchuechani jingoni; xéparini jáma je imeechani jingoni engaksï no sési útspijka; xéparini jáma je imeechani jingoni engaksï pʼikujka ambe ma kuerpurhu.*
3 Jimboka juchachisï sési jimbo pasïri pʼikujtsïkuka tsʼiuerakuani,* jucha engachi marhuakuni jaka Tata Diosïni imeeri espiritu santuni jimbo; ka jucha no jámasïnga sési xékuarhini, sánderu sési, mintsikasïngachi Kristu Jesúsini.
4 Jimboka iámindu kʼuiripuechani jingoni, ji kʼóruni úpiringa sési xékuarhini.
Enga nema exejka eska uaaka sési xékuarhini, jísïni uaaka sési xékuarhini,
5 jimbokajtsïni pasïri pʼikujtsïkucheska engani na ochu jurhiatikua andangutapkia, ji Israeli anapueska ka Benjamíniiri kʼumanchikuarhu anapueska, ka ebreueska jimbokaksï juchiiti taatiicha ebreueska, ka ísï eska fariseu ma, ísïminduni úsïreenga eska lei na uandajka;
6 ka sési inchamukutixapka jimini, jimbokani jamberi niáraska kánikua no sési kaani kúnguarhikuarhu anapuechani, ka ji xarhataska eskani no ma ambe no sési úska, jimbokani ísïminduni úska eska lei na uandajka.
7 Joperu inde ambe engani jimbo ji xáni sési xékuarhienga, iásï para ji ísku ambe máestia* Kristuni jimbo.
8 Ka ji ísï exesïnga eska iámindu inde ambe ísku ambe máeska, jimboka iauani sánderu sési jarhaska míteni Kristu Jesúsiiri ambe enga jindeeka juchiiti Tata. Imani jimbo, ji iámindu ambe jurajkuska ka iásï ísï exesïngia komueska basura ambe parani úni jaiapanherantani Kristuni
9 ka para mítenhani eskani ji imani jingoni jarhaska, joperu no jindeesti jimbokani ji xáni sési jámasïnga engani úka ambe enga Lei uandajka, sánderu sési, jimbokani mintsikasïnga Kristuni ka Tata Diosïrinisï ísï exejti komueska kʼuiripu ma enga sési jámajka jimbokani mintsikasïnga.
10 Ji uékasïnga sési míteni imani, míteni indeni uinhapikuani enga tsítantaka ka ístuni uékasïnga májkueni no sési nitamakuarhini eska ima parani jíjtuni ísï uarhini eska ima.
11 Parani exeni aberi engani jíjtuni uaaka tsíntani imeecha jingoni engaksï orheta ueenaaka tsíntani.
12 Ka no uandaxaka eskani ji intsïnhaskia ambe engani andakuarheka, nijtuni uandani jaki eskani nóteruni pekadu jukaraskia, sánderu sési, seguirixaka jánguarhintani parani exeni nándikani ístu uaaka intsïnhani imani ambe engareni jimbo Kristu Jesúsi erakuka.*
13 Erachiicha, ji exesïnga eskani nótkini intsïnhaxaka indeni ambe. Joperu ambe engani kʼóruni sési mítetini jaka, jindeesti eskani mirikurhixakaia indeni ambe enga nitamakia ka eskani jánguarhintaxaka* parani intsïnhani imani ambe enga jurhani jaka,
14 ji kánikua jánguarhintaxaka parani jima niárani nani engani intsïnhaaka ambe engani andakuarheaka; inde ambe engani andakuarheaka jindeesti auandarhu irekani, ísï jimbojtsïnisï ióarhiti Tata Diosï, Kristu Jesúsini jimbo.
15 Ísï jimbo, jucha engachi eratsekua jukarikia, jatsiskachi para ísï eratseni, ka engajtsï chá ma repentku niárapiringa ménderueni eratseni, Tata Diosïksïni exeraati na engajtsï jatsika para eratseni.
16 Joperu na uéjkichi xáni eratsekua jukariinia, ju je seguiriini jarhani sési jámani indeni xanharuni jimbo.
17 Erachiicha, jánguarhinta je iáminduecha parajtsï ísï jámani eskani ji, ka ístu, exe je na engaksï jámajka* imeecha engaksï ísï jámajka eska jucha.
18 Jimbokaksï uánikua jarhaska engaksï ísku exejka Kristuni ka na enga ima uarhika chkarirhu ma enga jindeeka para no sési nitamakuarhini,* ióntki, ji someni uandasïreenga imeecheeri ambe, joperuni iásï uerasïnga engani imeecheeri ambe uandajka.
19 Imeechaksï kʼamajkunhaati, ka imeecheeri diosï jindeesti iámindu ima ambe engaksï xáni tsitijka; kʼéramakuarhisïndiksï imani ambe jimbo engaksï jimbo jatsipiringa para kʼuratseni ka parhakpinirhu anapu ambejkuksïsï eratseni jarhajti.
20 Joperuchi jucha auandarhu anapueska ka jinichi tsípikua jingoni erokani jauaka imani engajtsïni pʼímutantaaka, enga jindeeka Tata Jesukristu,
21 ima mójtakuati juchaari kuerpuni, enga ísku ambe máeka, para ísïini* komueska imeeri kuerpu enga xáni kʼéri ambeeka, ka imeeri uinhapikua jingoni ísï uaati, indeni uinhapikua jingoni enga intsïnhaka para iámindu ambeni juramukuni.
Notecha
^ O “ermanuecha”.
^ O “kʼuiripetarhu”.
^ O “sirkunsidarikuarhika”.
^ O jamberi “ji uékaska jurajkuni indeni ambe”.
^ Griegu jimbo: “pʼíkuka”.
^ O “eskani iójkurhantaxaka”.
^ O “na engaksï irekajka”.
^ Exe je Glosario, chkari enga jindeeka para no sési nitamakuarhini.
^ Griegu jimbo: “para xáxeni”.
