Filipusï 4:1-23
4 Erachiicha,* jíksïni kánikua xénchasïnga ka kánikuaksïni jirinhantaxakaia, chánksïni jimbosïni xáni tsípijka ka chájtsï jindeeska juchiiti intsïmperata. Ísï jimbo juchiiti erachiicha engaksïni ji xáni xénchajka, ísï eskaksïni na arhipkia, uíuinhasï ja je Tatani jimbo.
2 Ji kurhakuxaka Ebodiani ka Síntikeni eskaksï sési peentaaka indeni arhirperatani engaksï jatsika jimbokaksï Tateeri chúxapatiiska.
3 Ka tʼungini engareni xáni jarhuatajka,* kurhachexakakeni eskari seguiriini jauaka jarhuataani ini uarhiitiichani engaksï kánikua ánchikuarhini jaka paraksï uandantani ambakiti aianhperakuani jíndeni jingoni ka ístu Klemente jingoni ka iámindu imeecha jingoni engajtsïni jarhuatajka; iicheeri nombriichaksï karakata jarhasti imani karakatarhu nani enga karanhani jaka néksï intsïnhaa tsípikua.
4 Méntkisï tsípi je Tatani jimbo. Ka ménderuksïni arhiaka: ¡kánikua tsípi je!
5 Eskaksï iámindu kʼuiripuecha exeaka eskajtsï chá kurhangusïnga ka eskajtsï méntku no inchandimesïnga. Tata janoxatiia.
6 Asï jukari uandanhia je. Sánderu sési, kómarhi je Tata Diosïni parajtsï aianguni ambeksïnisï uandanhiatani jaki, kómatsïkuarhi je ka ístu diosmaiamukua arhi je,
7 ka Tata Diosïksïni pínandikua íntskuati, indeni pínandikua enga no ma kʼuiripu újka jánhaskani, ka ima kuájchakuati* chaari mintsitani ka chaari eratsekuani* Kristu Jesúsini jimbo.
8 Ka para kʼamarania erachiicha, jíksïni uékasïnga arhini eskajtsï méntku eratseni* jauaka iámindu indeni ambe enga jurhimbikua ambeeka, iámindu indeni ambe enga uétarhijka úni, iámindu indeni ambe enga sési jaka Tata Diosïni japarini, iámindu indeni ambe enga pímbinhasïika, iámindu indeni ambe enga jarhuajpejka paraksï kʼuiripuecha xénchpeni, iámindu indeni ambe enga sési jaka kʼuiripuechani japarini, iámindu indeni ambe enga ambakiti ambeeka ka iámindu indeni ambe engaksï kʼuiripuecha sési exejka.
9 Jánguarhinta je ísï úni eskaksïni ji na jorhendaka ka ísï eskajtsï na jakajkukia, ka ístu jánguarhinta je ísï úni eskaksïni ji na arhika ka ístu ambe engajtsïni exeka úni, ka ima Tata Diosï enga pínandikua íntspijka, chánksïni jingoni jauati.
10 Ji kánikua tsípixaka Tatani jimbo jimbokani míteska eskajtsï chá ménderu uandanhiaxakaia jíndeni jimbo. Ísïisti, chájtsïni uandanhiaxapka, jinijtsïnisï no úni japka jarhuatani.
11 Ka asï eratsi je eskani uétarhinchaxaka ka eskaksïni jimbosï ísï arhini jaka, jimbokani ji jorhenguarhiskia néna jámani* ambe uéjkini nitamakuarhini jarhani.
12 Míteska néna nitamakuarhini engani sántku ambe jatsikuarhejka ka ístuni míteska néna nitamakuarhini engani uánikua ambe jatsikuarhejka. Ambe uéjki jarhani, ji jorhenguarhiskia ambe ma engaksï no iáminduecha míteka: néneeski sési tʼirerini jámani ka ístu néneeski uarhini jarhani kʼarhimani, néneeski uánikua ambe jatsikuarheni ka ístu néneeski méntku no ma ambe jatsikuarheni.
13 Ji iámindu ambe úsïnga úni jimbokarini Tata Diosïsï uinhaperantajka, imarini íntskusïndi indeni uinhapikuani engani uétarhinchani jarhajka.
14 Joperujtsï chá sési úska engajtsïni ísï jarhuataka jiáni engani no sési nitamakuarhini japka.
15 Ka chá Filipusï anapuecha, chájtsï sési mítetixaka eska engani ji na uéakuntapkia Masedonia ka engajtsï na ueenapka jorhenguarhini ambakiti aianhperakuani, no ma kúnguarhikuareni uékaspti jarhuatani* nájkirukani ji kánikua jarhuajpikia, chájkujtsïnisï jarhuatapka;
16 jimboka jiáni engani ji Tesalónika japka, chájtsïni tsimani xanhari axachespka ambe engani uétarhinchani japka ka no ma xanharku.
17 No jimbokani uékasïnga eskajtsïni chá intsïmbini jauaka ambe ma, sánderu sési, eskajtsï chá uánikua ambe intsïnhaaka jimbokajtsï intsïmpesïnga.
18 Joperuni ji no ma ambe uétarhinchaxaka, jukarini jamberi jatsikuarheskia. Nóteruni ambe ma uétarhinchaxakaia jimbokarini Epafroditu íntskuntaska ambe engajtsïni chá axacheka: intsïmperata ma enga ísïika komueska kéjtsïtakua ma enga kánikua sési jájkundejka, ambe ma enga Tata Diosï kánikua jaiapanhentajka.
19 Ísï jimbo, juchiiti Tata Diosïksïni íntskuati ambe engajtsï chá xáni uétarhinchani jauaka, jimbokaksïni ima kánikua ambakiti ambe íntskuntaaka Kristu Jesúsini jimbo.
20 Ima enga jindeeka juchaari Tata Diosï ka juchaari Taati, imasï jukanchati k’éri ambe arhinhani para méntkisï. Eska ísï úkuarhiaka.
21 Uandajperata ma axakuaxaka iámindu Tata Diosïiri pímbinharhatiichani engaksï Kristu Jesúsiiri chúxapatiika. Inde erachiicha engaksï jíndeni jingoni jaka, indejtuksïni uandajperata ma axachexati.
22 Iámindu pímbinharhatiichaksïni uandajperata ma axachexati, ka sánderia imeecha engaksï Roma anapu juramutiiri* kʼumanchikuarhu jaka.
23 Eskaksïni Tata Jesukristu kánikua kóndentaaka jimbokajtsï ambakiti mintsita ma jukaska.
Notecha
^ O “Ermanuecha”.
^ Griegu jimbo: “engareni mintsita jingoni jarhuatajka uananchatarakuani páni”.
^ O “patsaati”.
^ O “ambe engajtsï chá eratsejka”.
^ O “eratsentani”.
^ O “ji jorhenguarhiskia tsípini”, “ji jorhenguarhiskia konforme jarhani”.
^ Griegu jimbo: “no ma kúnguarhikua jarhuajpesti para íntspini ka intsïnhani”.
^ Griegu jimbo: “engaksï Sésariiri”. Ísïksï arhiasïreendi máru Roma anapu juramutiichani.
