Judasï 1:1-25
1 Ji Judasï, tata Jesukristueri jántspiriiska ka Santiagueri ermanu jémbeeska; ka karachixakaksïni chánksïni engajtsï ióarhinhaka. Tata Diosï, enga jindeeka Taati, imaksïni kánikua xénchasïndi chánksïni ka chájtsï míndakata jarhaska para tata Jesukristu:
2 Eskaksïni Tata Diosï sánhani arhiaka sánderu kánikua pʼamojkuni, eskaksïni pínandikua íntskuaka ka eskaksïni sánderu xénchaaka.
3 Juchiiti erachiicha* engaksïni ji xáni xénchajka, jíksïni uékaxapka karachini na engajtsïni Tata Diosï pʼímutantaaka. Joperuni sési exeska paraksïni orheta karachini eskajtsï jatsiska para jánguarhintani kuájpini indeni jurhimbikua ambe engaksï pímbinharhatiicha jorhendanhapka ma uelta ka para méntkisï.
4 Jimbokaksï jarhaska máru engaksï sïpatikuarku inchaakuka chánksïni jingoni ka Tata Diosïiri uandakua páriichaksï* ióntkitki uandarixaptia eskaksï indeecha kastigarinhapiringa.* Inde achamasïichaksï no sáni janhanharhisïndi Tata Diosïni ka uandasïndiksï eskaksï uaaka no sáni kʼuratsekua jingoni no sési jásï ambe niátani,* jimboka juchaari Tata Diosï kánikua kóntpintasïnga, ka jurajkustiksïa juchaari máechakua Tatani, Jesukristuni, ima engajtsïni piántaka.*
5 Nájkirukajtsï chá sési mítetini jakaia ini ambe, jíksïni uékasïnga miátantani eska Tata Diosï Jeoba iretani ma pʼímutantaspka Ejiptu uératini, joperu tátsekua kʼamajkuaspti imeechani engaksï no mintsikapka.
6 Ka imani ánjeliichani engaksï jurajkupka indeni ánchikuarhitani enga Tata Diosï ueenakuarhutki íntsaapka ka nóteruksï uékania jima irekani nani engaksï irestanhapka, Tata Diosï kadeneechani jingoni jótaasti para méntkisï jima enga xáni pápkʼandeka, asta ima jurhiatikua enga jusgariuauaka imeeri xáni kʼéri jurhiatikua jimbo.
7 Májkueni, Sodoma ka Gomorra ka ima ireteecha engaksï jima no iauani japka, tsïnchekuarhintasptiksï iatiru ísku jándikua ambe niátani,* ka tatakeechaksï ísku jándikua ambe únchasïreendi tatakeechani jingoni. Imeechaksï kastigarinhasti indeni chpiri jimbo enga jindeeka para méntkisï, ka inde ambe marhuasïndi parachi jucha no májkueni jámani.
8 Joperu inde achamasïichaksï ísku ambe ma eranhaskasïndi, ikichakueni jásï ambeksï úsïndi kuerpuni* ka nóksï jurajkutakuarhesïndi paraksï juramuminhani ka no sési jásï ambeksï uandasïndi imeecheeri ambe enga Tata Diosï kʼéri ambe uaaka.
9 Joperu jiáni enga arkanjeli Migueli arhirperapka Noambakitini jingoni Moisésiiri kuerpu jimbo, ima no ísku pʼitsïkuarhispti para jusgariini* ka no sési arhini, sánderu sési, uandaspti: “Eskakeni Tata Diosï Jeoba xukaaka”.*
10 Joperu inde achamasïichaksï no sési ambe uandasïndi iámindu ambeeri ka jiniksï no jamberi kurhanguni. Ísïistiksï komueska animaliicha engaksï no eratsejka ka méntkisïksï ísï jámasïndi eskaksï animaliicha, jimboksïsï jandiajku ikichakueni jásï ambe úkuarhijti.
11 ¡Lástima imeecha! Jimbokaksï májkueni jámasïnga eska Kaíni; ka jimbokaksï uékasïnga andani ambe ma, jirinhakuntastiksï májkueni no sési jámani eska Balaami, ka kʼamajkunhastiksï jimbokaksï imeechajtu no sési uandaska ísï eska Koré na no sési uandapka ima achamasïiri enga juramukua jatsipka.
12 Inde achamasïichaksï chánksïni jingoni tʼiresïndi jiáni engajtsï chá kʼéri tʼirekua ambe úntajka erachiichani jingoni,* joperuksï ísïisti eskaksï tsakapuecha engaksï itsïirhu jatameka; indeechaksï karichi erangutiisti engaksï méntku no sáni kʼuratsejka ka engaksï imeechajku pendienti pákuarhijka;* nubeestiksï engaksï no jataka itsï ka enga tarhiata jini ka jini paajka; anhatapuestiksï engaksï no jukajka frutu jiáni enga tiempuejka, engaksï iámu kʼarhikia ka engaksï murutanhaka;
13 inde achamasïichaksï ísïisti komueskaksï marirhu anapu oleecha engaksï uinhamu manamijka ka engaksï uanamukutenisï kʼuanikuntajka ikichakueni jásï ambe, inde ambe engaksï jimbo jatsipiringa para kʼuratseni; jóskuestiksï engaksï ísku nónanimarisï nirajka ka engaksï míndanhakia paraksï méntkisï pápkʼandekuarhu jarhani, jima enga xáni chónharhikuarhika.
14 Enoki jingoni, siete achamasïisptiksïa Adáni uératini, ka indejtu uandantaspti ambe engaksï úkuarhinchapiringa jimboka ísï uandaspka: “¡Exe je! Tata Diosï Jeoba uáni joperu uánikua ánjeliichani jingoni jurhasti
15 para iámindu kʼuiripuechani jusgariuani ka para uandantani ambe engaksï no sési niátaka ima pekadoriicha engaksï no janhanharhijka imani. Tata Diosï ísï úsïndi jimbokaksï imeecha iatiru no sési jásï ambe úsïnga ka jimbokaksï no sési jásï ambe uandasïnga imeeri ambe”.
16 Íksï achamasïicha méntku uandauandamini jarhasïndi ka méntkuksï pʼamondakuarhini jarhasïndi, jimboka no sési nikuasïnga ka ísïksï jámasïndi eskaksï imeecheeri kuerpu na tsitijka. Engaksï uandajka, kʼéramakuarhisïndiksï ka ístuksï sési jándirantasïndi paraksï sési arhiani máteruechani ka andanksï uérani.*
17 Joperu chá erachiicha engaksïni ji xáni xénchajka, miánta je ambe engaksï ióntki uandapka juchaari Tata Jesukristueri apostoliicha.
18 Imeechaksïni méntku arhini jarhasïreendi: “Últimu jurhiatikuechani jimbo,* jauatiksï kʼuiripuecha engaksïni teresmarhuaka ka engaksï no sési jásï ambe niátaaka ísï eska imeecheeri kuerpu na tsitijka”.
19 Íksï jindeesti imeecha engaksï támisï jánhastpijka; inde achamasïichaksï ísï jámasïndi eskaksï animaliicha* ka nóksï jatsisti Tata Diosïiri espiritu.
20 Joperu chá erachiicha engaksïni ji xáni xénchajka, uinhapikuarhinta je indeni jimbo engajtsï xáni mintsikajka Tata Diosïni ka kómarhi je espiritu santu jingoni
21 paraksïni Tata Diosï seguiriini jarhani xénchani engajtsï jamberi erokuarhini jauaka eskaksïni juchaari Tata Jesukristu pʼamojkuaka ka ísïjtsï úni jatsini tsípikua para méntkisï.
22 Ístu, seguiriini ja je pʼamojkuani imeechani engaksï nótki xáni jakajkujka;*
23 pʼímutaanta je ka pʼíjpaanta je chpirirhu. Ka seguiriini ja je pʼamojkuani máteruechani, joperu jingontku jáma je* parajtsï no pʼárhini imeecheeri xukuparhakua enga iámu jáxeka indeni ambe enga kuerpu* tsitijka.
24 Tata Diosïksïni kuájchakusïndi parajtsï no pekadu ambe niátani* ka jarhuatasïndiksïni parajtsï chá sési anhaxurhitini jarhani parajtsï chá no ma ambe no sési exeminhani ka parajtsï kánikua tsípini imani japarini enga xáni kʼéri ambeeka;
25 májkusï Tata Diosï jati ka imajtsïni pʼímutantasti juchaari Tata Jesukristuni jimbo, imajkusï kʼéri ambeeti, eska kʼéri ambe arhinhaaka, eska uinhapikua ka juramukua intsïnhaaka para méntkisï: ísï eska ióntki, iásï ka para méntkisï. Eska ísï úkuarhiaka.
Notecha
^ O “ermanuecha”.
^ O “profeteechaksï”.
^ O “ísï jusgarinhapiringa”.
^ Uandakua griegu jimbo jindeesti asélgueia. Exe je Glosario, no sáni kʼuratsekua jingoni niátani no sési jásï ambe.
^ O “ima enga jindeeka juchaari dueniu”.
^ Exe je Glosario, ísku jándikua ambe.
^ O “imeecheeri kuerpuni ka ístu máteruecheeri”.
^ O “jusgariuaka”, “jurhimberantaaka”.
^ O “kastigariini”.
^ O “kʼéri tʼirekua ambe úntajka parajtsï xarhatani eskajtsï xénchaasïnga erachiichani”, “kʼéri tʼirekua ambe úntajka ágapeeri”.
^ O “ka engaksï tʼirekuarhijka ka méntkuksï no sáni chéni”.
^ O “ka ístuksï jukari janhanharhiasïndi imeechani engaksï kʼéri ambeeka paraksï andani uérani”.
^ Griegu jimbo: “últimu tiempu jimbo”.
^ O “inde achamasïichaksï úsïndi ambe enga tsitijka imeecheeri kuerpu”.
^ O “nótki xáni mintsikajka”.
^ O “ché je”.
^ Griegu jimbo: “kʼuiripeta”.
^ O “parajtsï no téksarhutani”.
