Lukasï 1:1-80
-
Ambe enga karakuka Teófiluni (1 a 4)
-
Gabrieli uandasïndi eska Juanu andajpenuaka, ima enga itsï ataajka kʼuiripuechani (5 a 25)
-
Gabrieli uandasïndi eska Jesúsi andajpenuaka (26 a 38)
-
María nirasïndi Elisabetini exeni (39 a 45)
-
María kʼéri ambe arhisïndi Tata Diosï Jeobani (46 a 56)
-
Juanu andajpenusïndi ka ísïksï arhirasïndi (57 a 66)
-
Sakaríasi uandasïndi ambe enga Tata Diosï arhipka (67 a 80)
1 Uánikuaksï jánguarhintastia karantani ambe enga xáni úkuarhika ka juchachi jakajkusïnga eska iámu ambe ísï úkuarhiska,
2 ísï eskajtsïni na aianguka imeecha engaksï ueenakuarhutki iámu ambe exeka ka engaksï uandantajka Tata Diosïiri ambe.
3 Ísï jimbo, jíjtuni jánguarhintaska iámindu ambe sési jirinhantani desde ueenakuarhu. Tata Teófilu, jimbokenisï iámu ambe ísï karachika eska na jurhimbitkueka
4 parakari mintsikaaka eska ísïiska ambe engari aiangunhakia.
5 Erodesiiri* jurhiatikuechani jimbo, Judea anapu juramuti, saserdoti ma jarhaspti enga Sakaríasi arhinheenga ka Abíasiiri grupurhu jarhaspti.* Imeeri témba Elisabeti arhinhasïreendi ka Aaróni uájpeespti.*
6 Ka Tata Diosï ísï exeasïreendi tsimarhani komueska kʼuiripuecha engaksï sési jámeenga ka iámindu ambeksï ísï úsïreendi eskaksï mandamientuecha na uandajka ka ístu ambe engaksï uandajka Tata Diosï Jeobaeri leiicha.
7 Nóksï ma sapini kánguarhisïreendi jimboka Elisabeti no úsïreenga kánguarhiani sapiichani ka tsimarhanksï jatiriisptia.
8 Jiáni enga Abíasiiri grupu tokariuenga templurhu marhuani, Sakaríasi jima jarhaspti Tata Diosïni marhuakuni komueska saserdoti
9 ka ísï eskaksï na pʼindepka úni saserdotiicha,* Sakaríasi Tata Diosï Jeobaeri templurhu inchaspti para kʼuájtsïtakua* kurhirani.
10 Ka enga kʼuájtsïtakua kurhirani japka, iámindu iretarhu anapuechaksï uérakua kómarhixapti.
11 Jimajkani, jima xarhakuspti Sakaríasini Tata Diosï Jeobaeri ánjeli ma. Altarirhu jurhijkandani jimbo anhandetixapti, jima engaksï kʼuájtsïtakua kurhirajka.
12 Enga Sakaríasi exepka, no jánhaskaspti ambe úni ka kánikua chérakuarhespti.
13 Joperu ánjeli arhispti: “Sakaríasi, asï ché. Tata Diosï kurhaasti ambe engari xáni kurhakuka. Chiiti uarhiiti Elisabeti sapini ma kánguarhiati ka Juanuri arhiraaka.
14 Tʼuri sési pʼikuarheraaka ka kánikuari tsípiaka ka ístu uánikua kʼuiripuechaksï tsípiati enga ima andajpenuaka;
15 jimboka chiiti sapi kʼéri ambeuaka Tata Diosï Jeobani japarini. Joperu no méni tsʼémuati binu nijtu máteru jásï kauikua ambe. Ka ante de andajpenuni, Tata Diosï tʼuini íntskuatia imeeri espiritu santu.
16 Ka jarhuatauati uánikua Israeli uájpeechani paraksï kʼuanhatsentani imeecheeri Tata Diosï Jeobani jingoni.
17 Ístu, Tata Diosïiri orhepani jimbo niuati kánikua tsípikua* ka uinhapikua jingoni, ísï eska Elíasi, para mójtakukuani taatiicheeri mintsitani paraksï ísïini komueska uájpeecheeri ka para mójtakukuani mintsita imeechani engaksï no kurhandijka paraksï májkueni jánhaskani eska imeecha engaksï sési jámajka, para ima tʼuini listu jatsinia ambakiti ireta ma enga uékaaka Tata Diosï Jeobani marhuakuni”.
18 Ka Sakaríasi arhispti ánjelini: “¿Ka ji néna uaa míteni eska i ambe ísï úkuarhiaka? Jimbokani tʼarhepiskia ka juchiiti uarhiitijtu kutsïmestia”.
19 Ka ánjeli arhispti: “Ji Gabrieliiska, ima enga Tata Diosïni japarini jarhajka, ka axanhaska parani tʼungini jingoni uandontskuarheni ka parakeni aianguni ini ambakiti aianhperakua.
20 Joperu exe, nóteruri uaaka uandani ka ísïri pakaraaka asta jiáni jamberi enga na iámindu ambe ísï úkuarhiakia, jimbokari no jakajkuska ambe engakeni aianguka, enga jiáni úkuarhiaka enga uaxastakata jakaia”.
21 Joperu kʼuiripuechaksï erontaxapti Sakaríasini ka kurhamarhikuarhixaptiksï andisï xáni ióndani japi templurhu uéntani.
22 Ka enga Sakaríasi na uéntapkia, no úsïreendi uandani ka kʼuiripuechaksï kuenta íntskukuarhespti eska templurhu xarhakuspka ambe ma. Níjkurhaparini arhiasïreendi ambe ma, joperu no úsïreendi uandani.
23 Jimajkani níntaspti imeeri kʼumanchikuarhu enga na kʼamarapkia templurhu marhuani.
24 Máru jurhiatikua tátsekua, imeeri témba Elisabeti, sapini ma erokuarhixaptia ka sinko kutsï no uéraspti imeo. Uandasïreendi:
25 “I ambeesti enga Tata Diosï Jeoba úka jíndeni jimbo. Exestireni parani nóteruni kʼuratsetanhania”.
26 Enga ima seisi kutsï páni japkia, Tata Diosï axaspti ánjeli Gabrielini Nasareti, ireta ma enga Galilea jaka,
27 para nirani uátsïni ma exeni enga kurhajkuarhikata japkia para tumbi ma jingoni uambuchani enga José arhinheenga, enga Dabidiiri kʼumanchikuarhu anapuepka. Uátsï María arhinhasïreendi.
28 Enga ánjeli inchapka jima enga uátsï japka, arhispti: “¿Nári erandeski María? Tata Diosï Jeoba tʼungini jingoni jarhasti ka kánikuakeni xénchasïndi”.
29 Joperu enga María kurhaapka ini ambe, ísku pakareeraspti ka eratsentani pakaraspti andisï ísï arhipi.
30 Ísï jimbo, ánjeli arhispti: “Asï jáma chéni María, jimbokakeni Tata Diosï jaiapanhentasïnga.
31 Exe, embarasadari pakaraaka ka tataka sapichundi ma kánguarhiaka ka Jesúsiri arhiraaka.
32 Ima kʼéri ambeuati ka uandanhaati eska Tata Diosïiri Uájpeeska enga auandarhu jaka. Ka Tata Diosï Jeoba juramuti uaati ísï eska Dabidini, imeeri taati jémba
33 ka Jakobueri kʼumanchikuarhu juramuati para méntkisï. Imeeri Reinu no méni kʼamakurhiati”.
34 Joperu María arhispti ánjelini: “¿Ka néna uaa ísï úkuarhini? Jimbokani ji nótki ma tataka jingoni relasioni seksuali jatsixaka”.
35 Ánjeli arhispti: “Tata Diosï enga auandarhu jaka, íntskuatikeni imeeri espiritu santu ka kuájchakuatikeni imeeri uinhapikua jingoni. Ísï jimbo, uandanhaati eska ima sapi enga andajpenuaka pímbinhasïiska, eska Tata Diosïiri Uájpeeska.
36 Ka exe, chiiti parienti Elisabeti ístu kánguarhiati sapini ma nájkiruka jatiriikia. Kʼuiripu uandasïndi eska no úsïnga sapiichani kaani, joperu seisi kutsï páxatiia,
37 jimboka ambe enga Tata Diosï uandajka, méntkisï niárasïndi ísï úkuarhini”.*
38 Jimajkani María arhispti: “¡Ixú jarhaska ji, Tata Diosï Jeobaeri jántspiriiska! Eska ísï úkuarhiaka jíndeni jingoni eskari tʼu na uandaka”. Enga ísï arhipka, ánjeli kéndikuspti.
39 Ísï no ióni jimbo, María sóntku karhamaspti para iretarhu ma nirani enga Judá jaka
40 ka Sakaríasiiri kʼumanchikuarhu niáraspti ka uandajpaspti Elisabetini.
41 Ka enga Elisabeti kurhaapka eska María uandajpaspka, charhaku mátirku manakuarhispti, jimajkani espiritu santuni jimbo, Elisabeti
42 uinhachaparini uandaspti: “¡Tʼuri kóndenhantaska sánderu eska máteru uarhiitiicha ka ístu kóndenhantasti inde sapi engari erokuarhini jaka!
43 ¿Andisïni ji xáni kóndenhanta engareni ísï juka exeni juchiiti Tateeri amamba?
44 Jimboka engareni na uandajpaka, charhaku mátirku manakuarhisti xáni tsípini.
45 Ístu, tsípisïndi ima uarhiiti enga jakajkuka, jimboka iámindu ambe ísï úkuarhiaka eska Tata Diosï Jeoba na aiakuka”.
46 Ka María uandaspti: “Ji* kʼéri ambe arhisïnga Tata Diosï Jeobani
47 ka juchiiti mintsita kánikua tsípixati juchiiti Tata Diosïni jimbo enga jindeeka juchiiti Pʼímutantspiti,
48 jimbokarini ima kóndentaska jíndeni engani imeeri jántspiriika ka engani no ma ambe jatsikuarheka. ¡Ka iásï uératini, iáminduechaksï uandaati eskarini Tata Diosï kánikua kóndentaska!
49 Jimboka Tata Diosï enga xáni uinhapitiika, kánikua ambakiti ambe ústi jíndeni jimbo ka imeeri nombri pímbinhasïisti.
50 Méntkisï pʼamojkuauati imeechani engaksï janhanharhijka.
51 Imeeri jájki jingoni xarhatasti na enga xáni uinhapitiika; etsandurhiasti imeechani engaksï kʼéramakuarhijka mintsitarhu.
52 Euaantasti kʼéri uaxantskuani* imeechani engaksï juramukua jatsika ka ústi eskaksï kʼéri ambeuaka imeecha engaksï kaxumbitiika,
53 ka imeechani engaksï kʼarhimani japka, uánikua ambakiti ambe íntsaasti paraksï sési uiniarhani ka ísku axaantasti imeechani engaksï jatsikuarheriika.
54 Jurhasti jarhuatani Israelini enga jindeeka imeeri jántspiri, jimboka miásïnga eska jatsiska para méntkisï pʼamojkuni
55 Abraánini ka imeeri uájpeechani, ísï eska na aiakuapka juchaari ióntki anapu parientiichani”.
56 María ma tanimu kutsï pakaraspti Elisabeti jingoni ka tátsekua níntaspti imeeri kʼumanchikuarhu.
57 Ka enga na niárakupkia Elisabetini para ambakentani, tataka sapichuni ma kánguarhispti.
58 Imeeri besinu jémbeecha ka parientiicha, kánikuaksï tsípixapti Elisabeti jingoni engaksï mítepka na enga xáni pʼamojkupka Tata Diosï Jeoba.
59 Ka enga sapi na ochu jurhiatikua andangutapkia, nirasptiksï páni paraksï tsʼiuerekuani pasïri pʼikujtsïkukuni* ka uékasïreendiksï májkueni arhirani eska taati jémba: Sakaríasi.
60 Joperu amamba uandaspti: “¡Nómbe! Juanu arhinhaati”.
61 Imaksï arhispti: “Joperu cheeni no nema ísï arhinhasïndi”.
62 Jimajkani, níjkurhaparinksï kurhamarhispti taati jémbani na arhinhapirini tataka sapichu.
63 Ima tabla sapichu ma kurhajkuarhispti ka jima karaspti: “Juanu arhinhasïndi”. Ka iáminduechaksï ísku pakareeraspti.
64 Ka imeeri katamba jirejiresï kuatapentaspti ka ueenaspti ménderu uandani. Ka úndaspti kʼéri ambe arhini Tata Diosïni.
65 Ískuksï pakarasïreendi* imeecha engaksï jimajkisï irekapka; ka iámu Judeaisï engaksï xáni uánikua juáteecha jaka, ueenaspti uandanhani ambe enga úkuarhipka.
66 Ka imeecha engaksï kurhauenga i ambe, ískuksï pakarasïreendi eratsentani ka uandasïreendiksï: “¿Na xáni kʼéri ambeua i tataka sapichu?”. Jimboka xarharasïreenga eska Tata Diosï Jeoba imani jingoni jarhaspka.
67 Jimajkani espiritu santuni jimbo, Sakaríasi, enga jindeepka tataka sapichueri taati jémba, ueenaspti uandani ambe enga Tata Diosï arhipka, uandaspti:
68 “Kʼéri ambe arhinhee Tata Diosï Jeoba enga jindeeka Israeli anapu Tata Diosï, jimboka pʼamojkuska imeeri iretani ka pʼímutantasti.
69 Imajtsïni íntskusti nemani* enga kánikua uinhapitiika parajtsïni pʼímutantani, Dabidiiri kʼumanchikuarhu anapuesti enga imeeri jántspiriika,
70 ísï eska na uandapka Tata Diosï imani pímbinharhati kʼuiripuechani jimbo engaksï ióntki imeeri uandakua páriipka,*
71 parajtsïni kuájpini ima kʼuiripuecheeri engajtsïni ikiachejka ka imeecheeri engajtsïni kurhunhijka,
72 parajtsïni pʼamojkuni juchaari ióntki anapu parientiichani jimbo ka para miántani imeeri pímbinhasï aiatsperakuani,
73 imani ambe enga Abraánini aiakupka, juchaari ióntki anapu parientini,
74 eskajtsïni íntskupiringa kóntperata parachi marhuakuni no sáni chéparini, engajtsïni na kuájpepiringia imeecheeri engajtsïni ikiachejka,
75 ka parachi pauani pauani imantku marhuakuni ka sésichi jámani imani japarini asta jiáni jamberi engachi irekaaka.
76 Ka tʼu juchiiti sapi, arhinhaakari eskari uandakua páriiska Tata Diosïiri enga auandarhu jaka, parari listu jatsini Tata Diosï Jeobaeri xanharuni,
77 para aianguni imeeri iretani eska ima pʼímutantauaka jimboka puákuantauaka imeecheeri pekaduechani,
78 jimboka juchaari Tata Diosï kánikua pʼamojpitiiska. Ka indeni jimbo engajtsïni ísï pʼamojkujka, tʼíntskachiatijtsïni auandarhu uératini ísï eska jurhiata na tʼíntskajka enga erandeni jarhajkia
79 para tʼíntskakuani imeechani engaksï jima uaxakatini jaka nani enga pápkʼandeka ka engaksï jima jaka nani enga uarhikua ísïika komueska kʼumanda ma. Ka parajtsïni imani xanharu jimbo páni nani enga pínandikua jaka”.
80 Tataka sapichu tʼarhexespti ka Tata Diosïiri espiritu santu jatsispti ka desierturhu pakaraspti asta jiáni jamberi enga úndapka jámani Israeli anapuechani japarini.
Notecha
^ Exe je Glosario, Erodesi.
^ O “imani grupurhu jarhaspti enga Abíasi arhinheenga”.
^ O “Aaróni imeeri ióntki anapu parientiispti”.
^ O “ísï eska na uaxastakata japka para saserdotiicha”.
^ O “insiensu”.
^ O “espiritu”.
^ O “jimboka Tata Diosï iámindu ambe úsïnga úni”.
^ O “Juchiiti tsípikua jingoni”, “Juchiiti alma jingoni”. Exe je Glosario, alma.
^ O “tronuni”.
^ O “sirkunsidariini”.
^ O “Chérakuarhesïreendiksï”.
^ Griegu jimbo: “sïuangua ma”. Exe je Glosario, sïuangua.
^ O “profeteepka”.
