Lukasï 10:1-42
-
Jesúsi axaasïndi 70 chúxapatiichani (1 a 12)
-
Uandasïndi eskaksï kastigarinhaaka ima ireteecha engaksï no móantaka (13 a 16)
-
Setenta chúxapatiichaksï kʼuanhatsentasïndi (17 a 20)
-
Kʼéri ambe arhisïndi imeeri Taatini jimboka kóndeantasïnga kaxumbitiichani (21 a 24)
-
Ambakiti achamasï ma Samaria anapu (25 a 37)
-
Jesúsi nirasïndi exeni Martani ka Maríani (38 a 42)
10 Ísï tátsekua, Tata erakuaspti máteru 70 chúxapatiichani ka tsimandani axaaspti paraksï nirani orhepani imani ireteecharhisï ka jimeesïsï enga ísï tátsekua ima nipiringa.
2 Jimajkani arhiaspti: “Kánikuesti para pʼikuntani, joperuksï ánchikuarhiriicha no uáneesti. Ísï jimbo, kómarhi je pʼikuntskueri Dueniuni eska axauaka ánchikuarhiriichani paraksï nirani pʼikuntani.
3 Ísï jimbo, ¡ní je! Exe je, jíksïni ísï axaxaka komueska karichiicha jima engaksï jiuatsïicha jaka.
4 Asï jáma je páni sentabu, nijtu sutupu ma tʼirekua ambe jingoni, nijtu kuarhachiichani, ka engajtsï uandajpaska nemani xanharu jimbo, asï pakareera je.
5 Engajtsï inchaakuaka kʼumanchikuarhu ma, arhia je imeechani engaksï jima jauaka: ‘Eskaksï i kʼumanchikuarhu anapuecha pínandikua jatsiaka’.
6 Ka enga jauaka kʼuiripu ma enga uékaaka pínandikua jatsini, ima jatsiati ima pínandikuani engajtsï chá uéjka eska jatsiaka. Joperu enga no ma kʼuiripu jauaka, inde pínandikua chánksïni jingoni kʼuanhatsentaati.
7 Ísï jimbo, imani kʼumanchikua jimbojku pakara je ka á je ka itsïma je ambe engaksïni jatsirachiaka, jimboka ánchikuarhiri jukanchaska eska maiamunhaaka. Jimajku pakara je ka asï jáma je jini ka jini jámani jarhani jirinhani nani pakarani.
8 ”Ístu, engajtsï inchaakuaka iretarhu ma ka sésiksïni erokani, á je ambe engaksïni íntskuni jauaka
9 ka ambakeraanta je imani pʼamenchatiichani engaksï jima jauaka ka arhia je: ‘Tata Diosïiri Reinu janoxatiia’.
10 Joperu engajtsï iretarhu ma inchaakuaka ka nóksïni jiókani, ní je kʼérati xanharuechani jimbo ka arhia je:
11 ‘Uarhanduntaxakachi* tʼupurini engachi chaari ireta jimbo jándurhaka parajtsï mítetini jarhani eskajtsï chásï no sési úni jaka. Joperu mítetini ja je arini ambe: Tata Diosïiri Reinu janoxatiia’.
12 Jíksïni arhisïnga eska ima jurhiatikua,* sánderu sési nikuauaka Sodoma anapuechani ka eska imani iretarhu anapuechani.
13 ”¡Lástima tʼu Korasíni! ¡Lástima tʼu Betsaida! Jimboka engaksï inde milagruecha engaksï jimini úkuarhika niárapiringa Tiru ka Sidóni úkuarhini, íksï ireteecha desde ióntki móantapirindi ka jukantapirindiksï chʼechʼerasï takusï* ka tʼupuri jápurhuksï* uaxandepirindi.
14 Ísï jimbo, ima jurhiatikua enga Tata Diosï kuenta kurhakuantauaka kʼuiripuechani, sánderu sési nikuauati Tiru ka Sidóni anapuechani ka eska chánksïni.
15 Ka tʼu Kapernaúmi, ¿andi tʼu exesïni eskari uaaka auandarhu nirani? Nómbe, tʼuri Tumbarhusï* niuaka.
16 ”Ima engaksïni kurhajchajka chánksïni, jíndenisï kurhajchajti ka ima engaksïni chánksïni no kurhajchajka, jíndenisï no kurhajchajti. Ístu, ima engareni jíndeni no kurhajchajka, imanisï no kurhajchajti engareni axaka”.
17 Jimajkani, ima 70 chúxapatiichaksï tsípiparini kʼuanhatsentaspti ka arhisptiksï Jesúsini: “Tata, demoniuechajtsïni jamberi kurhajchasïndi chiiti nombri jimbo”.
18 Ísï jimbo, Jesúsi arhiaspti: “Exexaka eska Satanási ísï uekorhexaka auandarhu uératini komueska piritakua ma.
19 Exe je, juramukuaksïni íntskuxaka parajtsï tʼauajchakuani akuitsiichani ka alakraniichani, ka ístu parajtsï úni andani imani engaksïni ikiachejka ka parajtsï kʼamajkuni imeeri uinhapikuani. Ka méntkuksïni no ma ambe uaati úchini.
20 Joperu, asï tsípi je jimbokaksïni espirituecha kurhajchasïnga. Sánderu sési, tsípi je jimbokaksï chaari nombriicha karakata jarhaskia auandarhu”.
21 Ka ima jandora, espiritu santu úspti eska Jesúsi kánikua tsípipiringa, ka uandaspti: “Taati, jíkeni kʼéri ambe arhisïnga kʼuiripuechani japarini, tʼu engari Juramutiika auandarhu ka echerirhu, jimbokari méntku no mítetaraaska ini ambe imeechani engaksï kánikua jorhenaka ka imeechani engaksï jánhaskatiika, sánderu sési, mítetaraaskari imeechani engaksï ísï kaxumbitiika komueska tataka sapirhatiicha. Jo, juchiiti Taati, jimbokari tʼu sési exeska ísï úni”.
22 Ístu uandaspti: “Juchiiti Taatireni jíndeni íntskusti iámindu ambe. No nema mítesti Uájpani, Taatijkusï míteti. Ka no nema mítesti neeski Taati, Uájpajkusï míteti ka ístu ima kʼuiripu enga Uájpa uékaaka jorhendani imeeri Taatiiri ambe”.
23 Ka engaksï imeeri chúxapatiichaterku japkia, Jesúsi arhiaspti: “Tsípisïndiksï imeecha engaksï exejka ambe engajtsï chá exeni jaka.
24 Jimbokaksïni ji arhisïnga eskaksï uánikua Tata Diosïiri uandakua páriicha* ka juramutiichaksï uékasïreenga exeni ambe engajtsï chá exeni jaka, joperuksï no exesti, ka uékasïreendiksï kurhaani ambe engajtsï chá kurhaani jaka, joperuksï no kurhaasti”.
25 Jimajkani, jauaraspti achamasï ma enga sési mítepka Leiiri ambe ka kurhamarhispti Jesúsini para tsʼéjkuni: “Jorhentpiri, ¿ambe jatsiski parani úni parani jatsini tsípikua para méntkisï?”.
26 Jesúsi arhispti: “¿Ambe karakata jarhaski Leirhu? ¿Amberi arhintasïni jima?”.
27 Ima arhispti: “‘Xéncha chiiti Tata Diosï Jeobani iámu chiiti mintsita jingoni, iámu chiiti alma jingoni,* iámu chiiti uinhapikua jingoni ka iámu chiiti eratsekua jingoni’ ka ‘xénchaa máteru kʼuiripuechani* ísï eskari tʼujkumindu na xénchakuarhijka’”.
28 Jesúsi arhispti: “Sésiri uandaska; seguirii ísï úni ka uaakari tsípikua jatsini”.
29 Joperu achamasï uékasïreendi xarhatani eska ima méntkisï sési jámasïreenga, jimbosï kurhamarhipti Jesúsini: “Ka ¿neeskiksïa inde máteru kʼuiripuecha?”.*
30 Jesúsi arhispti: “Achamasï ma Jerusaléni uératini kétsemunguaxapti para Jerikó niárani ka enga xanharu jimbo nirani japkia, sïpariichaksï máru uekarhukuspti, iámindu ambeksï euakuarhispti ka xáskuksï jurajkuspti. Uéki jimboksï ataspti ka sánoksï uándikuspti ka jimaksï jurajkuspti.
31 Ka saserdoti ma jimeesïsï kétsemunguaxapti, joperu enga exepka, ísku uanopakuspti ka masi úspti máteru ladu jimbo nitamani.
32 Ístu, lebita ma jimeesïsï nitamaxapti ka enga exepka, imajtu ísku uanopakuspti ka masi úspti máteru ladu jimbo nitamani.
33 Joperu Samaria anapu achamasï ma enga jimeesïsï nitamani japka, kánikua pʼamojkuspti enga exepka.
34 Ísï jimbo, andarhieraspti ka aseiti ka binu jatsikuspti jima enga atakata japka ka takusï jingoni irhirespti. Tátsekua, burrurhu jatsiraspti ka páspti kʼumanchikua ma jimbo nani enga úpiringa mintsikuarhini ka jima exexaptia.
35 Pauandikua, tsimani denariu* íntskuspti kʼumanchikuarhu anapu achamasïni ka arhispti: ‘Chá sáni exe je ini achamasïni ka engajtsï sánderu sentabu úraska, jíksïni maiamunguaka’.
36 ¿Tʼu na exesïni? ¿Náki i tanimu kʼuiripuecha xarhataski eska xénchaska imani achamasïni* engaksï sïpariicha uekarhukupka?”.
37 Ima arhispti: “Ima kʼuiripu enga jarhuatapka jimboka pʼamojkuspka”. Jimajkani Jesúsi arhispti: “Jiájkani ní ka tʼujtu májkueni ú”.
38 Enga xanharu jimbo nirani japka, Jesúsi ireta sapichu ma jimbo inchaakuspti. Jima irekaspti nanaka ma enga Marta arhinheenga ka Jesúsi imeo pakaraspti.
39 Ka imeeri jingonikua María arhinhasïreendi. Ka María uaxandespti jima enga Tata japka ka jima pakaraspti kurhajchani.*
40 Joperu Marta masi arhixapti máteru ambe úni. Ísï jimbo, andarhieraspti Jesúsini ka arhispti: “Tata, ¿nóri ambe ma sáni uandaa engareni juchiiti jingonikua no sáni jarhuatani jaka? Arhi eskarini jarhuataaka”.
41 Ka Tata arhispti: “Marta, Marta, tʼuri masi arhixaka máteru ambe úni ka uánikua ambe jimbo uandanhiani,
42 joperu sántku ambesï uétarhijti o ma ambejku. Ka María sánderu ambakiti ambe erakusti ka no euanhantaati”.
Notecha
^ O “Uauanduntaxakachi”.
^ Indenisï arhikuekani jati Jurhiatikua enga Tata Diosï Jusgarpiaka.
^ Exe je Glosario, chʼechʼerasï takusï.
^ O “jápu tʼupurirhuksï”, “echeri jápurhuksï”.
^ O “Adesirhusï”. Indenisï arhikuekani jati jima engaksï uarhiriicha mintsikuarhini jaka, joperu inde lugari no nani jarhasti. Exe je Glosario, tumba.
^ O “profeteecha”.
^ Exe je Glosario, alma.
^ O “xéncha chiiti prójimuni”.
^ O “Ka ¿neeskia juchiiti prójimu?”.
^ Exe je Glosario, denariu.
^ O “prójimu úkuarhiski ima achamasïiri”.
^ Griegu jimbo: “kurhaani imeeri uandakuani”.
