Lukasï 12:1-59
-
Fariseuecheeri xarhipiti (1 a 3)
-
Tata Diosïni chénharhini ka no kʼuiripuechani (4 a 7)
-
Kʼuiripuechani japarini uandani eska jakajkusïnga Kristuni (8 a 12)
-
Ejemplu achamasïiri enga jatsikuarheriika ka enga no sáni jánhaskajka (13 a 21)
-
Nóteru uandanhiania (22 a 34)
-
Namunitu karichiicha (32)
-
-
Jingontku jarhani (35 a 40)
-
Jántspiri enga mintsinharhikueka ka ima enga no mintsinharhikueka (41 a 48)
-
No jurhasti paraka pínandikua japiringa sino paraka kʼuiripu no uaaka májku kʼéri jarhani (49 a 53)
-
Kurhanguni ambe enga úkuarhini jaka (54 a 56)
-
Sési peentani ambe ma (57 a 59)
12 Enga i ambe úkuarhini japka, uánikua kʼuiripuechaksï tánguarhintaspti, xáni uáni enga jamberi jatajchakperanhani japka. Jimajkani Jesúsi orheta imeeri chúxapatiichani ueenaspti arhiani: “Xéparini je fariseuecheeri xarhipiti* jingoni jimbokaksï chkuandereeska.
2 Joperu ambe enga sési jískakata jaka, niáraati exenhantani, ka ístu ambe enga no mítekuarhika, niáraati mítekuarhini.
3 Ísï jimbo, ambe engajtsï chá sïpatikuarku uandaaka, kʼuiripu japarini uandanhantaati, ka ambe engajtsï incharini arhindikpiaka, kʼumanchikuarhu karhakua uératini uandanhantaati.
4 Juchiiti amiguecha, ístuksïni arhisïnga: asï jáma je chérhiani imeechani engaksï uándikujka kuerpuni ka tátsekuaksïni nóteru ambe ma úni úchinia.
5 Jíksïni arhiaka néni engajtsï jatsika para chénharhini.* Chénharhi je imani engaksïni uaaka uándikuni ka enga jatsika juramukua paraksïni tátsekua Jeenarhu* kʼuanijpani. Jo, jíksïni arhisïnga eskajtsï imanisï jatsika para chénharhini.
6 Sinko pájaruechaksï íntspikuarhinhasïndi sántku sentabu jimbo,* ¿no ísïiski? Joperu Tata Diosï méntku no ma mirikurhisïndi.
7 Ka chánksïni jingoni sánderia, jimboka iámu chaari jauiri jamberi kuenta úkata jarhaska. Asï ché je. Chájtsï sánderu jukaparhaska eska uánikua pájaruecha.
8 ”Jíksïni arhisïnga eska ima enga kʼuiripuechani japarini uandantajka eskarini jakajkusïnga, Achamasïiri Uájpajtu uandantaati Tata Diosïiri ánjeliichani japarini eska ima kʼuiripu imeeriiska.
9 Joperu enga nema kʼuiripuechani japarini uandaska eskarini no míteska, Achamasïiri Uájpajtu uandaati eska no míteska Tata Diosïiri ánjeliichani japarini.
10 Ka ima enga no sési ambe uandaaka Achamasïiri Uájpeeri ambe, puáminhantaati imeeri pekaduni; joperu ima kʼóru méntku no puáminhantaati enga no sési ambe uandaaka espiritu santueri ambe.
11 Engaksïni jima paaka nani enga uánikua kʼuiripu tánguarhitini jauaka,* juramutiiri ánchikuarhiriichani jingoni ka juramutiichani jingoni, asï uandanhia je eratseparini nénajtsï kuájpikuarhia o ambe engajtsï uandaaka,
12 jimbokaksïni espiritu santu jiájkanimindu arhiati ambe engajtsï jatsiaka para uandani”.
13 Jimajkani achamasï ma enga jima japka kʼuiripuechani jingoni, arhispti: “Jorhentpiri, arhi sáni juchiiti ermanuni eskarini arhukuchintaaka erensiani”.
14 Ka Jesúsi arhispti: “Tata, ¿andi né uandaski eskani ji juesiiska o eskaksïni ji uaaka arhukuchini chaari erensiani?”.
15 Jimajkani arhiaspti: “Xéparini je, asï jáma je jukari tsitini jatsikuarhekuekani, jimboka na uéjki xáni jatsikuarheni kʼuiripu ma, no indeni ambe jimbosï uaati tsípikua jatsini”.
16 Ka indeni ambe jimbo, Jesúsi arini ejempluni jingoni jorhendaaspti: “Achamasï ma enga jatsikuarheriipka, kánikua pʼikuntaspti imeeri echeri jimbo.
17 Jimbosï ueenapti eratseni: ‘¿Iásï néna jámaia? No jatsiska nani patsani ambe engani pʼikuntaka’.
18 Jimajkani uandaspti: ‘Míteskia ambe engani uaaka: xereantauaka imani kʼumanchikuechani nani engani tʼirekua ambe patsajka ka sánderu kʼérati uaantauaka. Jima patsaaka iámu semiiani ka ambe engani xáni pʼikuntaaka.
19 Tátsekua uandaaka: “Uánikua amberisï jatsikia patsarini engakeni ióni marhuacheaka; mintsikuarhia, tʼire, itsïma ka tsípikuarhi”’.
20 Joperu Tata Diosï arhispti: ‘Xáni engari no sáni jánhaskajka, i chúriri uarhiaka, ¿ka né pakatakuarhia iámindu ambe engari xáni patsarini jaka?’.
21 Ísï úkuarhinchasïndi ima enga kánerakuarhijka jatsikuarhekua ambe ka no ma ambe jatsikuarheni Tata Diosïni japarini”.
22 Jimajkani arhiaspti imeeri chúxapatiichani: “Jimboksïnisï arhijka eskajtsï nóteru uandanhiauakia chaari tsípikua jimbo, ambejtsï tʼirea; o chaari kuerpu jimbo, ambejtsï xukuparhaa.
23 Jimboka tsípikua sánderu jukaparhakua ambeeska eska tʼirekua ka kuerpu eska xukuparhakua.
24 Jingontku exea je kʼuákiichani, nóksï ambe ma jatsikusïndi niksï pʼikuntajki, niksï tʼirekua ambe tánantajki paraksï patsakuarhini, joperu Tata Diosï tʼireraasïndi. ¿Andi chá no iauani sánderu jukaparhaski eska imeecha?
25 ¿O chá máisï uaa sánderu sáni ióni irekani engajtsï niáraska uandanhiani?
26 Ísï jimbo, engajtsï no újka xáni sapichitu ambe úni, jiájkani, ¿andijtsïsï uandanhiajki máteru ambe jimbo?
27 Exe je na engaksï andarajka tsïtsïkiicha. Nóksï ánchikuarhisïndi nijtuksï piruakua ambe újki; joperu jíksïni arhisïnga eska Salomóni no niáraspka ísï xukuparhani eskaksï inde tsïtsïkiicha, nájkiruka xáni sési jásï ambe jatsikuarhepka.
28 Jimajkani, enga Tata Diosï ísï xukutajka juátarhu anapu uitsakuani enga iásï jukarini jaka ka pauani chpirirhu kʼuanijpanhani, ¡na xáni sánderuminduksïni xukutaa chánksïni, kʼuiripuecha engajtsï xáni sántku mintsikajka imani!
29 Ísï jimbo, ásteru pendienti páia je ambejtsï tʼirea ka ambejtsï itsïmaa, ka ásteru xáni uandanhiaia je.
30 Jimboka parhakpini anapuechaksïsï xáni jánguarhintajti ini ambe jatsikuarheni, imeecha engaksï no marhuakujka Tata Diosïni, joperu chaari Taati mítesti eskajtsï uétarhinchasïnga ini ambe.
31 Ísï jimbo, seguirii je orheta peerani imeeri Reinuni, ka ísï úparini, intsïnhaakajtsï iámindu ini ambe.
32 ”Asï jáma je chéni chá engajtsï namunitu karichiicheeka, jimbokaksïni chaari Taati chánksïni uékasïnga íntskuni imeeri Reinuni.
33 Íntspikuarhi je chaari jatsikuarhekua ambe ka jarhuataa je imeechani engaksï uétarhinchani jaka.* Úkuarhia je sutupu sapirhatiichani engaksï no jiánguarhijka parajtsï sentabu jatsirani, indeni ambakiti ambe engajtsï chá auandarhu kánerakuarhika ka enga no méni kʼamakurhiaka, jimboka jima sïpari no úsïnga inchani ka nijtu seperi arhani.
34 Jimboka nani enga jauaka chaari jatsikuarhekua ambe, ístu jima jauati chaari mintsita.
35 ”Jingontku ja je ka xukuparhatini* ka ístu tixataa* je chaari kandeleechani;*
36 ísïi je komueskaksï ima jántspiriicha engaksï erontani jarhajka kʼumanchikuarhu anapu achamasïni paraksï jirejiresï mítakuni puertani enga ima janonguaka tembuchakuarhu uératini ka uámutani.
37 ¡Tsípisïndiksï ima jántspiriicha enga kʼumanchikuarhu anapu achamasï ísï exenunguauaka eskaksï jingontku jarhaska! Jíksïni arhisïnga eska ima jukantaaka tatsunharhikua ma,* arhiauati jántspiriichani eskaksï mesarhu uaxaparhakuaka ka tʼirerauati.
38 ¡Tsípisïndiksï ima jántspiriicha enga kʼumanchikuarhu anapu achamasï junguaska ka imeechaksï jingontku jarhani, nájkiruka terujkani chúrisï* janonguaka o jiáni enga tʼarhechu pireni jarhajkia!*
39 Enga kʼumanchikuarhu anapu achamasï mítepiringa na jandora niárapirini sïpari, no jurajkupirindi eska inchaakukupiringa, ¿no ísïiski?
40 Chájtu méntkisï jingontku ja je, jimboka Achamasïiri Uájpa ima jandora juuaka engajtsï chá no jamberi erokuarhini jauaka”.
41 Jimajkani Pedru arhispti: “Tata, ¿ini ejemplu jingondi uékasïni iáminduechani jorhendaani o juchantsïntku?”.
42 Ka Tata uandaspti: “¿Né jindeeski ima jántspiri enga mintsinharhikueka,* enga jánhaskatiika, ima enga kʼumanchikuarhu anapu achamasï jurajkukuauaka iámindu imeeri jántspiriichani para tʼirekua arhukukuani jiáni engaksï uétarhinchani jauaka?
43 ¡Kánikua tsípiati ima jántspiri enga kʼumanchikuarhu anapu achamasï exenunguaska indeni ambe úni jarhani!
44 Jíksïni jurhimbitku arhixaka: imeeri jájki jimbo jurajkuati iámindu imeeri jatsikuarhekua ambe.
45 Joperu enga ma repentku ima jántspiri ueenaska eratseni imeeri mintsitarhu ‘Juchiiti tata ióndaxatiia junguani’ ka pʼiárani ataani máteru jántspiriichani ka ueenani tʼireni, itsïmani ka kauini,
46 jimajkani kʼumanchikuarhu anapu achamasï jiáni junguati enga ima no erontani jauaka ka ima jandora enga ima no míteka, ka sánderu no sési jásï ambe úkuati indeni jántspirini ka imeechani jingoni peeraati engaksï no kurhajchajka Tata Diosïni.
47 Jimajkani, ima jántspiri enga kurhanguka ambe enga uéjka kʼumanchikuarhu anapu achamasï ka jini no jingontku jarhani ka nijtu úni ambe enga ima juramukupka,* kánikua no sési kánhaati.
48 Joperu ima jántspiri enga no míteparini támisï ambe újka, no xáni no sési kánhaati. Jimboka ima enga uánikua ambe intsïnhaka, niáraati sánderu uánikua ambe kurhaminhantani ka ima enga uánikua ambe jurajkuminhaka, jatsisti para sánderu uánikua ambe íntspintani.
49 ”Jurhaska parhakpinirhu parani chpiri tixatani,* ka ¿ambeteruni uékasïnia? Jimboka chpiri tixaraxakaia.
50 Joperuni ji kánikua no sési jásï ambe nitamakuarhiaka, ¡ka xáni engani no sési pʼikuarherani jaka ka ísï pʼikuarherani jauaka asta jiáni enga na i ambe nitamaakia!
51 ¿Andi chá na uandaspia eskani ji jurhaska parhakpinirhu paraka pínandikua japiringa? Nómbe. Sánderu sési, jurhaska paraka kʼuiripu no uaaka májku kʼéri jarhani.
52 Jimboka iásï uératini, sinko kʼuiripuechaksï irekani jauati kʼumanchikua ma jimbo ka nóksï uaati májku kʼéri jarhani. Jimbokaksï tanimu kʼuiripuecha no uaaka sési pájperani tsimani kʼuiripuechani jingoni ka ima tsimani kʼuiripuechaksï no uaati sési pájperani imani tanimu kʼuiripuecha jingoni.
53 Taati no uaati sési pájperani imeeri tataka jingoni ka tataka no uaati sési pájperani taati jémba jingoni, naandi no uaati sési pájperani imeeri nanaka jingoni nijtu nanaka uaa sési pájperani amamba jingoni, suegra jémba no uaati sési pájperani tarhamba jingoni, nijtu tarhamba uaa sési pájperani suegra jémba jingoni”.
54 Jimajkani ueenaspti kʼuiripuechani uandontskuarhekuani ka arhiaspti: “Engajtsï chá exejka eska janikua tánguarhintaxakia jimeesïsï enga jurhiata inchajtsïkujka, chájtsï uandasïnga ‘Kʼéri ma janiati’ ka janisïndi.
55 Ka enga chá exejka eska surisï uératini tarhiaxaka, chájtsï uandasïnga ‘Iásï kʼóru aparhikuarhiati’ ka aparhikuarhisïndi.
56 Ísku apariicha, chájtsï míteska na enga jánhaskuarhiaka jimbokajtsï exesïnga auandani ka echerini, jiájkani, ¿andijtsïsï no újki kurhanguni ambe enga úkuarhini jaka ini jurhiatikuechani jimbo?
57 ¿Andijtsïsï no kurhangujki ambe engajtsï jatsika para úni?
58 Jiáni engakeni juramutiichani jingoni pʼitajkuarhiaka ima kʼuiripu engakeni ikiachejka, jánguarhinta sési peentani ambe ma engajtsï jamberi jusgadurhu nirani jauaka, parakeni ima no juesi jingoni jurajkuni ka tátsekua juesi jusgadurhu anapu kuári jingoni ka tʼuri niárani ónhakata pakarani.
59 Jíkeni arhisïnga eskari méntku no uéntaaka jima uératini astakari na iámu* maiampiaka”.
Notecha
^ O “kʼúratarakua”.
^ O “janhanharhini”.
^ Exe je Glosario, Jeena.
^ O “moneda ma jimbo enga sántku jukaparhaka”. Griegu jimbo: “tsimani asarioniicha jimbo”.
^ O jamberi “jima engaksï judiuecha tánguarhijka para Tata Diosïni kómarhini”.
^ O “ka íntspi je ambe ma pʼamojperakua jimbo”.
^ O “érhutaa”.
^ O “lámpareechani”.
^ Griegu jimbo: “sési jónguarhitini ja je”.
^ O “ima sési jónguarhiaka”.
^ Griegu jimbo: “segunda bijilia jimbo”. Jesúsiiri jurhiatikuechani jimbo, ima jandorisïispti nuebe chúrikua anapu uératini asta terujkani chúrisï jamberi.
^ Griegu jimbo: “tersera bijilia jimbo”. Jesúsiiri jurhiatikuechani jimbo, i jandora terujkani chúrisïispti asta 3 de la manianisï jamberi.
^ O “enga mintsinharhikueka para iámindu ambe exeni jarhani kʼumanchikuarhu”.
^ O “uékeenga”.
^ O “érhutani”.
^ Griegu jimbo: “na últimu kuadrante”. Xánksï maiamusïreendi kʼuiripuni ma enga 10 minutisï ánchikuarhienga.
