Lukasï 13:1-35
-
Móantani o kʼamajkunhani (1 a 5)
-
Ejemplu jígusïiri anhatapueri enga no ma jígusï jukajka (6 a 9)
-
Uarhiiti ma enga iámu juruparhapkia ambakeranhantasïndi sábadu jurhiatikua jimbo (10 a 17)
-
Ejemplu semiia mostaseeri ka xarhipitiiri (18 a 21)
-
Jánguarhintani inchani imani puerta jimbo enga no kómukurhaka (22 a 30)
-
Erodesi kúmu jiuatsï (31 a 33)
-
Jesúsi no sési pʼikuarherasïndi Jerusalénini jimbo (34 ka 35)
13 Imani jurhiatikuechani jimbo, máru kʼuiripuecha engaksï jima japka, aiangusptiksï Jesúsini eska Pilatu uándikuaspka máru Galilea anapuechani, eska jima uándikuaspka nani engaksï kéjtsïtakua ambe úni japka.
2 Enga Jesúsi kurhaapka ini ambe, arhiaspti: “¿Andi chá exesïni eskaksï inde kʼuiripuecha ísï úkuarhinchaska jimbokaksï sánderu pekadoriispka eska iámindu Galilea anapuecha?
3 Jíksïni arhisïnga eska nómbe. Ka engajtsï chájtu no móantaska, iáminduechajtsï niáraaka kʼamajkunhani.
4 O ima 18 kʼuiripuecha enga Siloami anapu torre jatajchakuapka ka uándikuani, ¿chá exesïni eskaksï imeecha sánderu pekadoriispka eska iámindu Jerusaléni anapuecha?
5 Jíksïni arhisïnga eska nómbe. Ka engajtsï chájtu no móantaska, iáminduechajtsï niáraaka kʼamajkunhani ísï eska imeecha”.
6 Jimajkani ueenaspti ini ejemplu jingoni jorhendaani: “Achamasï ma enga jígusïiri anhatapu ma jatsipka imeeri echeri jimbo nani enga ubasï jatsikuenga, niraspti erarhutani abersieka jukapka jígusï, joperu no ma exekuntaspti.
7 Tátsekua arhispti imani enga kuáenga jima enga ubasï jukapka: ‘Exe, tanimu uéxurhini jurhaskia erarhutani ka no ma jígusï jukasïndi. ¡Chʼapaia! No ma jukasïndi ka ískusï jimini jati’.
8 Ka kuári arhispti: ‘Tata, jurajku máteru uéxurhini ka ji ambandukuaka ka jureri* jatsindukuaka.
9 Enga sánderu orhepani niáraska frutu jukani, sési jauati; ka enga nómbe, jiánchka kʼóru chʼapaia’”.
10 Sábadu ma jimbo, Jesúsi jorhentpixapti kʼumanchikua ma jimbo nani engaksï judiuecha tánguarhijka para Tata Diosïni kómarhini.
11 Ka jima jarhaspti uarhiiti ma enga 18 uéxurhini páni japkia pʼamenchani, jimboka no sési jásï espiritu ma incharhitixapka enga iámu chkéreenga, iámu juruparhasptia ka no úsïreendi jurhimbentani.
12 Enga Jesúsi exepka, andarhieraspti uarhiitini ka arhispti: “Nana, ambakentaskaria chiiti pʼamenchakueri”.
13 Jesúsi pʼájtsïkuspti ka uarhiiti jirejiresï jurhimbentaspti ka ueenaspti kʼéri ambe arhini Tata Diosïni.
14 Joperu ima enga jima orhejtsïkuenga nani engaksï judiuecha tánguarhijka para Tata Diosïni kómarhini, no sési exespti enga Jesúsi ísï ambakerantapka uarhiitini sábadu jurhiatikua jimbo. Jimbosï arhiapti kʼuiripuechani: “Seisi jurhiatikua jarhasti para ánchikuarhini, ísï jimbo, jiáni ju je parajtsï ambakeranhantani ka asï jáma je sábadu jurhiatikua jimbo jurhani”.
15 Joperu Tata arhispti: “Ísku apariicha, chájtsï kueratasïnga chaari toruni o burruni sábadu jurhiatikua jimbo parajtsï nirani itsïmatani, ¿no ísïiski?
16 Jiájkani, ¿no sési jarhaski engani ísï jarhuataka ini uarhiitini sábadu jurhiatikua jimbo? I uarhiiti Abraáni uájpeesti, ka Satanási 18 uéxurhini no sési pʼikuastasptia”.
17 Enga Jesúsi ini ambe uandapka, kánikuaksï kʼuratsespti imeecha engaksï ikiakuenga, joperu iámindu kʼuiripuecha engaksï jima japka, kánikuaksï tsípispti ini ambakiti ambe jimbo enga Jesúsi úni japka.
18 Ka ístu arhiaspti: “¿Náki ejemplu jingoni úpirini uandani ambeeski Tata Diosïiri Reinu o ambe jingoni úpirini terukutantani?
19 Ísïisti komueska semiia mostaseeri enga achamasï ma imeeri echeri jimbo jatsikupka. Semiia niárasïndi tsikini ka xáni kʼésïndi komueska anhatapu ma ka auandarhu anapu pájaruechaksï imeeri rameecha jimbo uaasïndi xerekuechani”.
20 Ménderu arhiaspti: “¿Ambe jingoni úpirini terukutantani Tata Diosïiri Reinuni?
21 Ísïisti komueska xarhipiti* enga uarhiiti ma jeuetapka kánikua* jarina* jingoni ka tátsekua iámu tsïreri niáraspti xarhipini”.
22 Enga Jerusaléni nirani japka, iámindu ireteecharhisï inchaakusïreendi ka ireta sapirhatiicharhisï ka jorhendaasïreendi kʼuiripuechani.
23 Jimajkani achamasï ma arhispti: “Tata, ¿namunitueskiksï imeecha engaksï uaaka pʼímutantskata uérani?”. Ka Jesúsi arhispti:
24 “Kánikua jánguarhinta je parakajtsï uaaka inchani imani puerta jimbo enga no kómukurhaka, jimbokaksïni ji arhisïnga eskaksï uánikua jánguarhintaaka inchani joperuksï no uaati.
25 Enga kʼumanchikuarhu anapu achamasï jauaraaka ka sési míkani puertani,* chájtsï uérakua pakaraaka, uámutaakajtsï ka arhiakajtsï: ‘¡Tata, mítachejtsïni!’. Joperu imaksïni arhiati: ‘Jíksïni no míteska, chá nanindi anapue’.
26 Jimajkani pʼiáraakajtsï arhini: ‘Jucha tʼungini jingoni tʼireska ka itsïmani ka tʼuri juchaari iretarhu jorhentpispka kʼérati xanharuecha jimbo’.
27 Joperuksïni ima arhiati: ‘Jíksïni no míteska, chá nanindi anapue. ¡Kéndikuchejtsïni je, chá engajtsï no sési ambe niátajka!’.
28 Jimajtsïsï pʼiáraaka uerani ka kirisïmiantauakajtsï sïniichani* engajtsï exeaka eska Abraáni, Isaaki, Jakobu ka iámindu Tata Diosïiri uandakua páriicha* Tata Diosïiri Reinurhu jarhaska ka eskajtsï chá uérakua pakatanhaska.
29 Ístu, juuatiksï kʼuiripuecha jimeesïsï uératini nani enga jurhiata andarajka ka jimeesïsï uératini nani enga jurhiata inchajtsïkujka ka nortisï ka ístu surisï uératini ka uaxaparhakuatiksï mesarhu Tata Diosïiri Reinurhu.
30 Kurhaa je ini ambe: jarhastiksï máru engaksï iásï últimueka ka engaksï niáraaka orheteeni ka jarhastiksï máteruecha engaksï iásï orheteeka ka niáraatiksï últimueni”.
31 Jimajkani máru fariseuechaksï jimajkisï niáraspti ka arhisptiksï: “Kéndiku ixú uératini ka máteru naniisï ní, jimbokakeni Erodesi uékasïnga uándikuni”.
32 Jimajkani Jesúsi arhiaspti: “Ní je arhini imani kúmu jiuatsïni: ‘Exe, iásï ka pauani, demoniuechani jámaaka petarpiantani ka kʼuiripuechani ambakeraantani ka ísï pauandikua kʼamaraaka.
33 Joperu iásï ka pauani, útasïni jatsiska para xanharani parani Jerusaléni niárani, jimboka no sési japiringa eska Tata Diosïiri uandakua pári ma máteru naniisï uándikunhapiringa ka no Jerusaléni’.
34 Jerusaléni, Jerusaléni, ima enga uándikuajka Tata Diosïiri uandakua páriichani ka enga tsakapu jimbo ataajka imeechani engaksï jima axanhajka..., ¡namuni xanhari uékaska tánaantani chiiti sapiichani ísï eska tsíkata na tánaantajka pipichuechani para kʼirauani! Joperujtsï chá no uékaska.
35 ¡Exe je! Tata Diosï kéndikuati chaari kʼumanchikuarhu. Ka jíksïni sési jimbo arhisïnga eskajtsïni chá nóteru exeakia asta jiáni enga uandanhaaka: ‘¡Újchakuranhasti ima enga Tata Diosï Jeobaeri nombri jimbo jurhani jaka!’”.
Notecha
^ O “terenda”.
^ O “kʼúratarakua”.
^ O “10 kilu”.
^ O “kurhinda tsïreri”.
^ O “sési míkani iabe jingoni”.
^ Indenisï arhikuekani jati enga kʼuiripu ma kánikua ikiani jarhajka ka no jánhaskani ambe úni.
^ O “profeteecha”.
