Lukasï 15:1-32
15 Ka imeecha engaksï impuestu kobrarpijka ka no sési úriicha,* nirasptiksï Jesúsini andarhierani paraksï kurhajtsïtani ambe enga ima uandeenga.
2 Ka fariseuecha ka ístu karariichaksï ueenaspti uandauandamini: “I achamasï sési eroasïndi no sési úriichani* ka iicha jingoni tʼiresïndi”.
3 Jimajkani Jesúsi ueenaspti arini ejemplu jingoni jorhendaani:
4 “Eranhaska je achamasïni ma enga 100 karichiichani kaani jaka ka tsïtani máechakuani, ¿andi no juátarhu jurajkuaua máteru 99 karichiichani ka nirani jirinhantani imani enga tsïnchetini jámani jaka astaka exentaaka?
5 Ka enga na exentajkia, kánikua tsípisïndi ka ichanditini pásïndi karichini.
6 Ka enga na niántajkia imeo, uandajpaasïndi amigu jémbeechani ka besinu jémbeechani ka arhiasïndi: ‘¡Chájtu tsípi je jíndeni jingoni, jimbokani exentaskia imani karichini enga tsïnchetini jámani japka!’.
7 Májkueni, jíksïni arhisïnga eska auandarhu sánderu tsípinhaaka enga no sési úri* ma móantaska ka eska imani 99 kʼuiripuechani jimbo engaksï sési jámajka ka engaksï no jatsika para móantani.
8 ”O eranhaska je uarhiitini ma enga 10 moneda plateeri* kámani jaka ka máechakuani tsïtani, ¿andi no tixataa kandela* ma ka iámu kʼumanchikuarhu kʼarhatani para sési jirinhantani astaka exentaaka?
9 Ka enga na exentajkia, uandajpaasïndi amiga jémbeechani ka besina jémbeechani ka arhiasïndi: ‘¡Chájtu tsípi je jíndeni jingoni, jimbokani exentaskia imani monedani* engani tsïtapka!’.
10 Jíksïni arhisïnga eskaksï Tata Diosïiri ánjeliicha májkueni tsípisïnga enga no sési úri* ma móantajka”.
11 Jimajkani Jesúsi arhiaspti: “Achamasï ma tsimani tatakeechani kaasïreendi.
12 Ka ima enga sánderu sapichuepka, arhispti taati jémbani: ‘Taati, íntskurinia erensia’. Ísï jimbo, taati jémba arhukukuaspti ambe enga xáni jatsikuarhepka.
13 Máru jurhiatikua tátsekua, ima enga sánderu sapichuepka pʼíkuspti imeeri ambe ka iauanisï niraspti irekani. Ka jima, ísku ambendurhispti sentabuni ka méntku tsïnchentaspti.
14 Ka enga na iámindu ambe kʼamajkupkia, ueenaspti kʼarhingua ambe jarhani jima enga ima irekani japka ka imajtu ueenaspti uétarhinchani.
15 Asta niraspti arhini jima anapu acheetini ma eska ánchikuarhikupiringa ka ima juátarhu axaspti para kúchiichani eranguani.
16 Ka uarhixapti kʼarhimani enga jamberi uékeenga kúchiiri tʼirekua arhani. Joperu no nema sáni intsïmbisïreendi ambe ma.
17 ”Jimajkani, sési eratsentaspti ka uandaspti: ‘¡Na xáni uánikua ánchikuarhiriichaksï jarhaski juchiiti taatiiri kʼumanchikuarhu engaksï kánikua tʼirekua jatsikuarheka ka ji ixú uarhini jarhani kʼarhimani!
18 Nipa juchiiti taati jingoni niántani ka arhiaka: “Taati, no sési ambe úska Tata Diosïni japarini ka tʼungini japarini.
19 Nóteruni jukanchaskia arhinhani eskani chiiti uájpeeska. Ísïrini kámia eskari chiiti ánchikuarhirini ma na kámajka”’.
20 Ísï jimbo, níntaspti taati jémba jingoni. Ka enga útasï iauanisï jurhani japka, taati jémba mítentaspti ka kánikua pʼamojkuspti. Uiriipaspti kúmuni, kamapchakuspti ka uékperakua jingoni putinharhikuspti.
21 Jimajkani, uájpa arhispti: ‘Taati, no sési ambe úska Tata Diosïni japarini ka tʼungini japarini. Nóteruni jukanchaskia arhinhani eskani chiiti uájpeeska’.
22 Joperu taati jémba arhiaspti imeeri jántspiriichani: ‘¡Jua je kókuani sánderu ambakiti takusï ma ka jatsikunta je! Ístu jatsiku je aniiu ma ka kuarhachiichani.
23 Ka jua je beserruni enga sési pʼukuka ka ata je, indeni jingonchi tʼireaka ka kʼuínchikuachi ma úntaaka jimboka juchiiti tataka junguaskia.
24 Juchiiti tataka uarhisptia ka tsíntasti, tsïnchetixapti ka exentaskachia’. Ka úndasptiksï tsípikuarhini.
25 ”Ka imeeri uájpa enga sánderu kʼériipka, juátarhu jámaxapti. Ka enga na niántani japkia kʼumanchikuarhu, kústakua kurhaaspti ka na enga uarhanhani japka.
26 Jimajkani, jántspirini ma uandajpaspti ka kurhamarhispti ambe úkuarhixapi.
27 Ka jántspiri arhispti: ‘Chiiti ermanu junguastia ka sési janonguasti jimbosï chiiti taati kʼuínchikua ma úti ka imani beserruni atasti enga sési pʼukupka’.
28 Joperu uájpa enga kʼériipka no sési exespti ka no uékaspti inchaakuntani. Ísï jimbo, taati jémba uéakuspti ka úndaspti arhini eska inchaakuntapiringa.
29 Ka uájpa arhispti taati jémbani: ‘Exe, ióniistia engakeni ísï ánchikuarhichika komueska jántspiri ma ka méntkisï úska ambe engareni tʼu arhienga, ka nóreni méni íntskuska chibu sapichuni ma parani ji juchiiti amiguecha jingoni tʼireni sáni.
30 Joperu enga na junguaka chiiti tataka engakeni ísku ambendurhichika sentabuni ísku jándiichani jingoni, indeni jimbori kʼóru sóntku ataska beserruni’.*
31 Jimajkani taati jémba arhispti: ‘Iju, tʼureni no méni jurajkuska ka chiitiisti iámindu ambe engani ji jatsikuarheka.
32 Joperuchi jatsispka para kʼuínchikua ma úni ka tsípikuarhinchi, jimboka chiiti ermanu junguaskia. Ima uarhisptia ka tsíntasti. Tsïnchetixapti ka exentaskachia’”.
Notecha
^ O “pekadoriicha”.
^ O “pekadoriichani”.
^ O “pekadori”.
^ Griegu jimbo: “drakmeeri”. Exe je Glosario, drakma.
^ O “érhutaa lámpara”.
^ Griegu jimbo: “drakmani”. Exe je Glosario, drakma.
^ O “pekadori”.
^ O “beserruni enga sési pʼukupka”.
