Lukasï 16:1-31
-
Ejemplu jántspiriiri enga iámindu ambe exejka kʼumanchikuarhu ka enga no mintsinharhikueka (1 a 13)
-
Ima enga mintsinharhikueka para sánisï ambe jingoni, ístu mintsinharhikuesti para uánikua ambe jingoni (10)
-
-
Lei ka Tata Diosïiri Reinu (14 a 18)
-
Ejemplu achamasïiri enga jatsikuarheriika ka Lásaru (19 a 31)
16 Tátsekua arhiaspti imeeri chúxapatiichani: “Achamasï ma jarhaspti enga jatsikuarheriipka ka nirasptiksï aianguni: ‘Ima jántspiri enga iámindu ambe exejka chiiti kʼumanchikuarhu, ísku ambendurhixati chiiti jatsikuarhekua ambe’.
2 Ísï jimbo, achamasï pʼitajkuarhispti jántspirini ka arhispti: ‘¿Ísïiski ambe engaksï uandani jaka chiiti ambe? Aiangurini nénari ánchikuarhixaki, jimbokari nóteru tʼu exeni jauakia juchiiti kʼumanchikuarhu anapu ambe’.
3 Jimajkani ima jántspiri enga iámindu ambe exeenga kʼumanchikuarhu, uandaspti: ‘¿Iásï ambe uaaia engareni juchiiti tata euantaaka ánchikuarhitani? Ji no uinhapiska parani tarheni jámani ka kʼuratsesïnga sentabu kurhajkuarhini jámani.
4 ¡Ah! Míteskia ambe engani uaaka parakajtsïni kʼuiripuecha sési erokaaka imeecho jiáni engani nóteruni jatsiakia ánchikuarhita’.
5 Jimajkani, mándani arhini pʼitajkuarhiaspti imeechani engaksï achamasïni kánguni japka. Ka kurhamarhispti imani enga orheta jupka: ‘¿Nári xáni kánguxaki juchiiti tatani?’.
6 Ka ima arhispti: ‘100 medida* aseiti olibusïiri’. Jántspiri arhispti: ‘Inde kókuani chiiti sïranda, uaxaka ka kara eskari 50 medida kánguxaka’.
7 Tátsekua, máteruni kurhamarhispti: ‘¿Ka tʼu na xáni kánguxaki?’. Ka ima arhispti: ‘100 kʼérati medida* trigueri’. Jántspiri enga iámindu ambe exeenga kʼumanchikuarhu, arhispti: ‘Inde chiiti sïranda ka kara eskari 80 medida kánguxaka’.
8 Ka kʼumanchikuarhu anapu achamasï kánikua sési exespti ambe enga úpka imeeri jántspiri, jimboka sési eratsekuntaspka* néna jámani nájkiruka no sési niátapka. Jimbokaksï parhakpini* anapuecha sánderu sési jirinhakuntasïnga* nénaksï jámaa paraksï andani uérani ka eska imeecha engaksï Tata Diosïni marhuakujka.
9 ”Ístuksïni arhisïnga: úra je chaari jatsikuarhekua ambe engajtsï ini parhakpini jimbo jatsikuarheka parajtsï amiguechani jirinhakuarhiani, para jiáni engajtsï kʼamajkuaka chaari jatsikuarhekua ambe, sésijtsï eronhani jima engajtsï uaaka irekani para méntkisï.
10 Ima enga mintsinharhikueka para sánisï ambe jingoni, ístu mintsinharhikuesti para uánikua ambe jingoni ka ima enga no mintsinharhikueka para sánisï ambe jingoni, ístu no mintsinharhikuesti para uánikua ambe jingoni.
11 Ísï jimbo, engajtsï chá no mintsinharhikueka parajtsï sési úrani chaari jatsikuarhekua ambe engajtsï ini parhakpini jimbo jatsikuarheka, ¿néksïni mintsikaa paraksïni ambakiti jatsikuarhekua ambe patsarani?
12 Ka engajtsï no mintsinharhikueka parajtsï sési úrani ambe enga no chaariika, ¿néksïni uékaa íntskuni ambe ma enga chaariuaka?
13 No ma jántspiri úsïndi tsimani patroniichani marhuakuani, jimboka máechakuani kurhunhiaka ka máteruni xénchaati o máechakuani sési marhuakuati ka máteruni ísku exeati. Chájtsï no uaaka Tata Diosïni marhuakuni jarhani* ka ístujtsï jánguarhintani jarhani kánikua sentabu andani”.
14 Ka fariseuecha engaksï xáni tsitienga sentabu kámani, kurhaaxaptiksï ambe enga Jesúsi uandani japka ka ueenasptiksï no sési nínharhikuni.*
15 Ka ima arhiaspti: “Chájtsï uandasïnga kʼuiripuechani japarini eskajtsï sési jámasïnga, joperu Tata Diosï mítesti ambe enga chaari mintsitarhu jaka. Jimboka ambe engaksï kʼuiripuecha xáni jukaparharajka, ikichakueni jásï ambeesti Tata Diosïni japarini.
16 ”Ambe enga karakata jaka Leirhu ka ambe engaksï uandeenga Tata Diosïiri Uandakua Páriicha,* jiáni jamberi aianhpinhasti enga Juanu janoka. Ka jiáni uératini, aianhpinhaxati ambakiti aianhperakua Tata Diosïiri Reinueri ka mámaru jásï kʼuiripuechaksï jánguarhintaxati inchani.
17 Jíksïni sési jimbo arhisïnga eska sánderu no úkua jukaska eska kʼamajkunhaaka auanda ka echeri ka eska no niárani úkuarhini asta sánderu sapichitu ambe enga Leirhu karakata jaka.
18 ”Ima enga jurajkujka témbani* ka máteru nemani tembuni, ísku jándikua ambe niátasïndi.* Ka né enga tembuchantaaka imani uarhiiti jingoni enga jurajkunhaka,* ístu ísku jándikua ambe niátasïndi.
19 ”Jarhaspti achamasï ma enga jatsikuarheriipka, enga linueri xukuparheenga ka takusï moradu jingoni, kánikua sési irekuarhispti ka ambakiti ambe jatsikuarhespti.
20 Joperuksï imeeri kʼumanchikuarhu jamukuteni, acheetinksï ma jurajkusïreendi enga Lásaru arhinheenga. I acheeti no ma ambe jatsikuarhespti ka iámu pixirhekuarhispti
21 ka xáni kʼarhimasïreendi enga jamberi uékeenga ántskantani ambe enga achamasï uéjkuenga enga tʼireni jámeenga. Ka uíchuechaksï jamberi andarhierasïreendi ka kuenarhisïreendiksï jima enga pixirhekuarhipka.
22 Joperu tátsekua uarhispti ima acheeti enga no ma ambe jatsikuarhepka ka ánjeliichaksï Abraániiri máekandu jimbo páspti.
”Ka ístu uarhispti ima achamasï enga jatsikuarheriipka ka jatsintasptiksï.
23 Enga na Tumbarhu* japkia ima achamasï, kánikua no sési nitamakuarhixapti. Tátsekua jini eranchespti ka iauani jatini exespti Abraánini ka Lasaruni enga imeeri máekandu jimbo japka.
24 Ísï jimbo, uandajpaspti ka arhispti: ‘Juchiiti taati Abraáni, pʼamojkureni sáni ka axa Lasaruni para kuakarhutani sáni imeeri deduni ka arhi eskarini tsʼiraperachintaaka juchiiti katambani, jimbokani kánikua no sési nitamakuarhixaka ini chpiri jimbo’.
25 Joperu Abraáni arhispti: ‘Iju, miá eskari tʼu kʼóru uánikua ambe jatsikuarhespka jiáni engari tsípiti japka, joperu Lásaru kánikua no sési nitamakuarhispti. Ka iásï Lasaru sési pʼikuastanhantaxatiia, joperuri tʼu no sési nitamakuarhixaka.
26 Ka ístu, kʼéri kauaru ma* jarhasti engajtsïni kánikua jarhangutajka, parakaksï imeecha engaksï ixúani jaka no uaaka jiniani parhikuni ka nijtu imeecha engaksï jiniani jaka únksï ixúani jurhani’.
27 Jimajkani achamasï enga jatsikuarheriipka, arhispti: ‘Taati, jiájkani axa sáni juchiiti taatiiri kʼumanchikuarhu,
28 jimbokani sinko ermanuechani kaasïnga. Arhi eska niuaka sáni iámindu ambe aianguani paraksï no imajtu ixúesïsï janoni nani enga xáni no sési nitamakuarhinhajka’.
29 Ka Abraáni arhispti: ‘Jiminksï jarhasti Moisési ka Tata Diosïiri Uandakua Páriicha; uaatiksï imeechani kurhajchaani’.
30 Jimajkani ima arhispti: ‘¡Nóchkambe taati Abraáni! Joperu enga nema tsíntaska ka nirani, ísïksï kʼóru móantaati’.
31 Joperu Abraáni arhispti: ‘Engaksï no kurhajchajka Moisésini nijtu Tata Diosïiri Uandakua Páriichani, ístuksï no jakajkuati na uéjki nema tsíntani’”.
Notecha
^ O “batuecha”. Ma batu 22 litruespti.
^ O “koruecha”. Ma koru 220 litruespti.
^ O “jirinhakuntaspka”, “mítekuspka”.
^ O “i tiempu”. Exe je Glosario, tiempu.
^ O “eratsekuntasïnga”, “mítekusïnga”.
^ O “kómarhini jarhani”.
^ O “no sési jákxakuni”.
^ O “Profeteecha”.
^ O “diborsiarikuarhijka témba jingoni”.
^ Exe je Glosario, enganiarpini; ísku jándikua ambe niátani.
^ O “enga diborsiarikuarhika imeeri uámbeeri”.
^ O “Adesirhu”. Indenisï arhikuekani jati jima engaksï uarhiriicha mintsikuarhini jaka, joperu inde lugari no nani jarhasti. Exe je Glosario, tumba.
^ Griegu jimbo: “abismu ma”. Exe je Glosario, abismu.
