Lukasï 17:1-37
17 Jimajkani Jesúsi arhiaspti imeeri chúxapatiichani: “Nóchi ambe ma uaaka úni para no jarhani ima ambe enga újka eska kʼuiripu no sési ambe niátaaka.* Joperu, ¡lástima ima kʼuiripu enga újka eska máteru nema no sési ambe niátaaka!
2 Sánderu sési japirindi eskaksï imani kʼuiripuni molinurhu anapu tsakapu ma jójchakupiringa ka marirhuksï kʼuanimani ka eska ima kʼuiripu no sési ambe úrani* máisï ini sapirhatiichani.
3 Jingontku jáma je. Engakeni chiiti erachi* no sési ambe úchiaka, arhi ambe enga no sési úni jaka.* Ka enga ima móantaska, puákunta.
4 Na uéjkikeni ma jurhiatikua jimbo siete xanhari no sési ambe úchini ka ménderukeni siete xanhari nirani andarhierani ka imakeni arhini ‘Tekaachintarini’, tʼu puákunta”.
5 Jimajkani apostoliichaksï arhispti Tatani: “Jarhuatajtsïni parachi sánderu mintsikani”.
6 Ka Tata arhiaspti: “Engajtsï ísï mintsikapiringa eska na xáni sapinharhika ma semiia mostaseeri, arhipiringajtsï arini sïtuniiri anhatapuni ‘¡Murutakuarhi ka marirhu niára!’ ka íksïni kurhajchapirindi.
7 ”¿Jaki nema ixú enga jatsika jántspirini ma enga tarheni jarhajka o karichiichani eranguani ka enga na niántajkia juátarhu uératini chájtsï arhini ‘Juia kókuani tʼireni’?*
8 ¿Andi no arhia ‘Júreni kókuani úmachintani, tatsunharhikua ma jukanta, ka ixú ja astakani na kʼamaraaka tʼireni ka itsïmani ka tátsekuari tʼujtu uaakia arhani’?
9 Joperujtsï chá no diosmaiamukua arhisïnga imani jántspirini, jimboka úska ambe engajtsï juramukuka, ¿no ísïiski?
10 Májkueni, engajtsï chá uaaka ambe engajtsï arhinhaaka, uanda je: ‘Jucha jántspiriiska engachi no ma ambe jukanchaka.* Imani ambejkuchisï úka engachi jatsipka para úni’”.
11 Enga Jerusaléni nirani japka, Samaria ka Galileaisï nitamaspti.
12 Ka enga ireta sapichu ma jimbo inchaakuni japka, nirasptiksï kúmuni 10 acheetiicha engaksï lepra pʼamenchani japka, joperuksï iauani sáni pakaraspti ka nóksï andarhieraspti.
13 Ka úndasptiksï uinhachani: “¡Jesúsi, Jorhentpiri, pʼamojkujtsïni sáni!”.
14 Enga Jesúsi exeapka imani acheetiichani, arhiaspti: “Ní je saserdotiichani jingoni”. Jimajkani, engaksï na nirani japkia, ambakentasptiksï.
15 Ka máechakua exespti eska ambakentaspkia, jimajkani kʼuanhatsentaspti ka uinhachaparini kʼéri ambe arhixapti Tata Diosïni.
16 Niraspti andarhierani Jesúsini ka tinguikuatsespti ka diosmaiamukua arhispti. Ima acheeti Samaria anapuespti.
17 Enga Jesúsi exepka ini ambe, uandaspti: “¿Andi nóksï diesiispi engaksï ambakentaka? Jiájkani, ¿naniksï jarhaskia máteru nuebe?
18 ¿Nóteru nema kʼuanhatsentaskia para kʼéri ambe arhini Tata Diosïni? ¿I acheetijkusï juki enga máteru iretarhu anapueka?”.
19 Ka arhispti: “Jauara ka níia níntani; ambakentaskaria jimbokari mintsikaska”.
20 Fariseuechaksï kurhamarhispti Jesúsini na jatini janopirini Tata Diosïiri Reinu ka ima arhiaspti: “Nóksï iáminduecha exeati jiáni enga Tata Diosïiri Reinu janoaka.
21 Ístu, kʼuiripuechaksï no uaati uandani: ‘¡Exe je, ixú jarhasti!’ o ‘¡Jini jarhasti!’. Jimboka Tata Diosïiri Reinu chánksïni jingoni jarhaskia”.
22 Jimajkani arhiaspti imeeri chúxapatiichani: “Ma jurhiani, chájtsï uékaaka exeni Achamasïiri Uájpani jiáni enga ixú jauakia, joperujtsï no uaaka exeni.
23 Kʼuiripuechaksïni arhiati: ‘¡Exe je, jini jarhasti!’ o ‘¡Exe je, ixú jarhasti!’. Asï jáma je uéakuni ka asï jáma je uiriini chúxapaani.
24 Jimboka ísï eska piritakua na xarharajka jima jamberi enga jurhiata andarajka asta jima jamberi enga jurhiata inchajtsïkujka, ísïiuati jiáni enga Achamasïiri Uájpa ixú jauakia.
25 Joperu orheta jatsisti para kánikua no sési nitamakuarhini ka iásï anapu kʼuiripuechaksï no jaiapanhentaati.
26 Ka ístu, ísï eska na úkuarhipka Noéri jurhiatikuechani jimbo, májkueni úkuarhiati Achamasïiri Uájpeeri jurhiatikuechani jimbo:
27 kʼuiripuechaksï tʼirexapti ka itsïmani, tatakeechaksï tembuchaxapti ka nanakeecha uambuchani... asta imani jurhiatikua jimbo enga Noé arkarhu inchapka, tátsekua kʼéri janispti* ka iáminduechani kʼamajkuaspti.
28 Ístu ísï úkuarhiati komueska Lotiiri jurhiatikuechani jimbo: kʼuiripuechaksï masi arhixapti tʼireni ka itsïmani, piáni ambe ma ka íntspikuarhini, júskani* ka kʼumanchikuechani uaani...
29 Joperu ima jurhiatikua enga Loti uéakuntapka Sodoma, auandarhu uératini chpiri ka asufri uekorhespti ka iáminduechani kʼamajkuaspti.
30 Májkueniuati ima jurhiatikua enga Achamasïiri Uájpa xarhantaaka.
31 ”Ima jurhiatikua jimbo, ima enga kʼumanchikuarhu karhakua jámani jauaka ka jatsikuarheni ambe ma imeeri kʼumanchikuarhu, eska no kétsentaaka imani ambe pʼíkuni; ka ima enga tarhetarhisï* jámani jauaka, eska no kʼuanhatsentaaka imani ambe jimbo enga jurajkuka.
32 Miánta je ambe enga úkuarhinchapka Loti témba.
33 Ima enga jánguarhintaaka kuájchakuni imeeri tsípikuani, masi uaati tsïtani, joperu ima enga tsïtaaka imeeri tsípikuani ménderu niáraati tsípikua jatsini.
34 Jíksïni arhisïnga eska ima chúri jimbo, tsimani kʼuiripuechaksï apondetini jauati kamarhu: máechakua pánhaati, joperu máteru jurajkunhaati.
35 Tsimani uarhiitiichaksï urhuni jauati molinurhu: máechakua pánhaati, joperu máteru jurajkunhaati”.
36 *
37 Engaksï imeeri chúxapatiicha kurhaapka ini ambe, kurhamarhisptiksï: “Tata, ¿nani úkuarhia i ambe?”. Ka Jesúsi arhiaspti: “Jimaksï niáraati águileecha nani enga uarhiri jauaka”.*
Notecha
^ O “téksarhutaaka”.
^ O “téksarhutaraaka”.
^ O “ermanu”.
^ Griegu jimbo: “xuka”.
^ O “uaxaparhakuni mesarhu”.
^ O “marhuajka”.
^ O “Dilubiu úkuarhispti”.
^ O “ikarani”.
^ O “uéramanisï”.
^ Exe je ambe enga arhijka nota enga Mateu 17:21 jimbo jaka.
^ Griegu jimbo, ixú kʼuiripu uarhirini ma arhikuekaxati o animali uarhirini ma.
