Lukasï 18:1-43
-
Ejemplu tsïndiiri enga méntku nirani jarhajka juesini exeni (1 a 8)
-
Fariseu ka impuestu kobrarpiti (9 a 14)
-
Jesúsi ka sapiicha (15 a 17)
-
Ambe enga kurhanguarhipka juramuti ma enga jatsikuarheriika (18 a 30)
-
Jesúsi ménderu uandasïndi eska uándikunhaaka (31 a 34)
-
Acheeti ma enga no újka exeni ka enga sentabu kurhajkuarhijka éskantasïndi (35 a 43)
18 Jimajkani Jesúsi ejemplu ma jingoni exeraaspti eskaksï jatsispka para méntkisï kómarhini ka nóksï méni kuatantani.
2 Arhiaspti: “Ireta ma jimbo, juesi ma jarhaspti enga no sáni chénharhienga* Tata Diosïni nijtu janhanharhiani kʼuiripuechani.
3 Ka ístu imani ireta jimbo, uarhiiti ma irekaspti enga tsïndiipka ka méntku niraxapti exeni imani juesini ka arhisïreendi: ‘Kʼuiripu ma jingonchi arhirperaska, tʼureni sáni jarhuata parachi sési peentani indeni ambe’.
4 Ka sáni ióniisptia enga i juesi no uékeenga jarhuatani, joperu tátsekua uandaspti: ‘Nájkirukani ji no chénharhijka* Tata Diosïni ka nijtuni janhanharhiani kʼuiripuechani,
5 jarhuataakachkania ini uarhiitini para no ménderu jurhani jarhani ka méntkurini ójkutani jarhani’”.*
6 Ka Tata ístu arhiaspti: “¿Exeskijtsï ambe enga uandapka ima juesi nájkiruka no sési úriipka?
7 Jimajkani, ¿chá no exesïni eska Tata Diosï jarhuatauaka imeeri erakukateechani engaksï chúrikua ka jurhiakua kómarhini jarhajka para ima jarhuataani? Ka Tata Diosï tekaantskua jingoni kurhajchaani jarhasïndi.
8 Jíksïni arhisïnga eska Tata Diosï sóntku jarhuatauaka. Joperu enga Achamasïiri Uájpa ixú jauakia, ¿chá exesïni eskaksï jauaka ixú echerirhu inde járhati kʼuiripuecha engaksï ísï mintsikaaka?”.
9 Ístu, arini ejemplu jingoni jorhendaaspti imani kʼuiripuechani engaksï eratseenga eskaksï ima kʼóru sési jámasïreenga ka engaksï ísku exeauenga máteruechani.
10 “Tsimani acheetiichaksï templurhu niraspti paraksï Tata Diosïni kómarhini: máechakua fariseuespti ka máteru impuestu kobrarpisïreendi.
11 Fariseu jauaraspti ka ueenaspti kómarhini eratseparini: ‘Juchiiti Tata Diosï, diosmaiamu jimbokani ji no ísïiska eskaksï máteru kʼuiripuecha engaksï euakuarpini jámajka, engaksï no káni sési jámajka, engaksï ísku jándiika..., ka ístu jimbokani no ísïiska eska inde impuestu kobrarpiti.
12 Tsimani xanhari kʼarhinda jarhasïnga* ma semana jimbo, ka ambe engani xáni andajka, arhutasïnga sáni parani diesmu íntspini’.
13 Joperu ima enga impuestu kobrarpienga, jima no iauani jarhaspti anhandetini ka no tekaaxapti nisikiera erancheni ka uánhexapti. Uandasïreendi: ‘Juchiiti Tata Diosï, pʼamojkureni sáni jimbokani ji no sési úriiska’.*
14 Jíksïni arhisïnga eska i acheeti kʼuanhatsentaspka cheeni jémbo xarhataparini eska sánderu sési jámasïreenga ka eska ima fariseu. Jimboka ima enga kʼéri ambe exekuarhijka, kʼuratsekua jingoni pakaraati, joperu ima enga kaxumbikua jingoni jámajka, kʼéri ambe exenhaati”.
15 Ístu, kʼuiripuechaksï juákuasïreendi uájpeechani para ima újchakuraani.* Joperu imeeri chúxapatiichaksï ueenaspti xukaani engaksï exepka ini ambe.
16 Joperu Jesúsi arhiaspti eskaksï juákuapiringa sapiichani ka uandaspti: “Jurajkua je parajtsïni sapiicha jurhani andarhierani. Asï jáma je pʼínguani, jimboka Tata Diosïiri Reinu imeecheeriiska engaksï ísïika komueska i sapiicha.
17 Jíksïni sési jimbo arhisïnga eska ima enga no jiókuarhijka Tata Diosïiri Reinuni ísï eska sapi ma, no méni uaati inchani Tata Diosïiri Reinurhu”.
18 Judiuecheeri juramuti ma kurhamarhispti: “Ambakiti Jorhentpiri, ¿ambe jatsiski parani úni parani intsïnhani tsípikua para méntkisï?”.
19 Jesúsi arhispti: “¿Andirenisï arhijki ambakiti kʼuiripu? No nema jarhasti enga ambakitiika, májkusï jati: Tata Diosï.
20 Tʼuri míteska ambe engaksï mandamientuecha arhijka: asï jáma ísku jándikua ambe niátani,* asï jáma uándikpini, asï jáma sïpani, asï jáma chkuanderakua ambe uandantani, janhanharhi chiiti taatini ka chiiti naandini”.
21 Ka ima arhispti: “Ji sapiitini ueenaska iámindu indeni ambe úni”.
22 Enga Jesúsi kurhaapka ini ambe, arhispti: “Útasï jarhasti ma ambe engari jatsika para úni: íntspikuarhi ambe engari xáni jatsikuarheka, ka na engari xáni andaaka imeechani íntsaa engaksï no ma ambe jatsikuarheka; ísï úparini, tʼuri auandarhu jatsiaka chiiti jatsikuarhekua ambe. Tátsekua jungua ka júreni chúxapuni”.
23 Enga achamasï kurhaapka ini ambe, kánikua kómu pʼikuarheraspti jimboka uánikua ambe jatsikuarhespka.
24 Jesúsi eratespti ka uandaspti: “¡Kánikuaksï úkua jukanchaati imeecha engaksï sentabu jatsikuarheka paraksï Tata Diosïiri Reinurhu inchani!
25 Jimboka sánderu fásiliiska eska kameiu ma pʼikukuarhisï inchajchakuaka ka eska jatsikuarheri ma Tata Diosïiri Reinurhu inchaaka”.
26 Ka imeecha engaksï ini ambe kurhaapka, uandasptiksï: Jiájkani, “¿né uaa pʼímutantskata uérani?”.
27 Jesúsi arhiaspti: “Ima ambe engaksï kʼuiripuecha ísï exejka enajkiksï no uaa úni, Tata Diosï kʼóru úsïndi úni”.
28 Ka Pedru arhispti: “Exe, jucha jurajkuska juchaari ambe paraksïni chúxapani”.
29 Ima arhiaspti: “Jíksïni sési jimbo arhisïnga eska no nema jarhaska enga jurajkuka imeeri kʼumanchikuani, témbani, ermanu jémbeechani, taati jémbeechani o uájpeechani Tata Diosïiri Reinuni jimbo,
30 enga no niáraaka sánderu uánikua ambe intsïnhantani ini jurhiatikuechani jimbo, ka imani tiempu* jimbo enga jurhani jaka tsípikua para méntkisï”.
31 Jimajkani, támu paaspti 12 apostoliichani ka arhiaspti: “Exe je, Jerusalénchi karhamaxaka ka ambe engaksï Tata Diosïiri uandakua páriicha* karaka Achamasïiri Uájpeeri ambe, iámindu ambe niáraati* ísï úkuarhini.
32 Arini ambeksï úkuati: kʼuiripuecheeri jájki jimboksï jurajkuati engaksï no Israeli anapueka, teresmarhuatiksï, no sésiksï arhiati* ka tʼuárhiatiksï.
33 Ka tátsekuaksï kʼuikirhiati ka uándikuatiksï, joperu tanimu jurhiatikua jimbo tsíntaati”.*
34 Joperu imeechaksï no kurhanguspti ambe enga arhikuekeenga i ambe, jimbokaksï no jánhastanhaspka ka nóksï kurhangusïreendi ambesï uandani japi Jesúsi.
35 Enga Jesúsi niárani japkia Jerikó, jima jarhaspti acheeti ma enga xanharu jimbo uaxarhupka, acheeti no úsïreendi exeni ka sentabu kurhajkuarhixapti.*
36 Ka jimboka kurhaaspka eska uánikua kʼuiripu nitamaxapka, úndaspti kurhanguarhini ambe úkuarhixapi.
37 Ka arhisptiksï: “¡Ixúesïsï nitamaxati Jesúsi, Nasareti anapu!”.
38 Ka ima, indeni ambe míteparini, uinhachaspti: “¡Jesúsi, Dabidi Uájpa, pʼamojkureni sáni!”.
39 Ka imeecha engaksï orhepani japka, ueenasptiksï xukani ka arhisïreendiksï eska pínasku japiringa. Joperu ima sánderu uinhachasïreendi: “¡Dabidi Uájpa, pʼamojkureni sáni!”.
40 Jimajkani Jesúsi anhaxurhispti ka arhiaspti kʼuiripuechani eskaksï juákupiringa acheetini. Enga acheeti na andarhierapkia, Jesúsi kurhamarhispti:
41 “¿Amberi uékasïni eskani uaaka tʼungini jimbo?”. Ka ima arhispti: “Tata, eskani uaaka exeni”.
42 Jimajkani Jesúsi arhispti: “Éskantsïa, ambakentaskaria jimbokari mintsikaska”.
43 Ka acheeti jirejiresï ueenaspti exeni ka úndaspti kʼéri ambe arhini Tata Diosïni ka niraspti chúxapani Jesúsini. Ka engaksï iámindu iretarhu anapuecha exepka ini ambe, imeechajtuksï kʼéri ambe arhispti Tata Diosïni.
Notecha
^ O “janhanharhienga”.
^ O “janhanharhijka”.
^ O “ka méntkurini ájchakuni jarhani”.
^ O “no ma ambe arhasïnga”.
^ O “pekadoriiska”.
^ O “pʼájtsïkuani”.
^ Exe je Glosario, enganiarpini; ísku jándikua ambe niátani.
^ Exe je Glosario, tiempu.
^ O “profeteecha”.
^ O “jiáni kʼamaraati”.
^ O “no sésiksï kámaati”.
^ Griegu jimbo: “jauaraati”.
^ O “ka kurhajkuarhixapti ambe ma”.
