Lukasï 19:1-48
19 Jimajkani Jesúsi Jerikó inchaakuspti ka iretarhisï teruakuspti.
2 Jima jarhaspti achamasï ma enga kánikua jatsikuarheriipka, Sakeu arhinhasïreendi. Ima juramukuasïreendi imeechani engaksï impuestu kobrarpienga.
3 I achamasï uékasïreendi Jesúsini míteni, joperu no úsïreendi exeni jimboka uánikua kʼuiripu niraxapka ka ima no iójtarhaspti.
4 Ísï jimbo, uiriispti orhepani jimboka Jesúsi jimeesïsï nitamapiringia ka jígusïiri anhatapu ma jimbo karharaspti para úni Jesúsini exeni.
5 Enga jimeesïsï nitamani japkia, Jesúsi eranchespti ka arhispti: “Sakeu, kétsenta kókuani jimbokani iásï cheeni pakaraaka”.
6 Sakeu sóntku kétsentaspti ka tsípikua jingoni páspti imeeri kʼumanchikuarhu.
7 Engaksï kʼuiripuecha ini ambe exepka, ueenasptiksï uandauandamini: “No sési úriiri* kʼumanchikua jimbo nirasti pakarani”.
8 Joperu Sakeu jauaraspti ka arhispti Tatani: “Exe Tata, ambe engani xáni ji jatsikuarheka, terujkani jamberi íntsauaka imeechani engaksï no ma ambe jatsikuarheka, ka engani ísï chkuanderakuaka kʼuiripuechani parani euakuarhiani ambe ma, tʼámu uelta sánderuni íntsaantauaka”.
9 Jimajkani Jesúsi arhispti: “Tata Diosï iásï pʼímutantasti ini achamasïni ka indeeri kʼumanchikuarhu anapuechani, jimboka indejtu Abraáni uájpeeska.
10 Jimboka Achamasïiri Uájpa jurhaska jirinhaantani ka pʼímutaantani imeechani engaksï tsïnchetini jámani japka”.
11 Engaksï kʼuiripuecha ini ambe kurhaani japka, Jesúsi ueenaspti máteru ejemplu jingoni jorhendaani, jimboka Jerusaléni no iauani jarhaspka, ka jimbokaksï imeecha eratsesïreenga eska Tata Diosïiri Reinu na uéjki jatini janopiringia.
12 Ísï jimbo, uandaspti: “Achamasï ma enga juramutiiri uájpeepka, iauanisï niraspti para úni juramukua intsïnhani* ka tátsekua kʼuanhatsentani.
13 Inde achamasï 10 jántspiriichani ióarhiaspti, 10 mina* íntsaaspti ka arhiaspti: ‘Inchajpa je ini sentabuni ka sési ánchita je astakani na junguaka’.
14 Joperuksï jima anapu kʼuiripuecha kurhunhesïreendi ka axaasptiksï máru uandakua páriichani paraksï uandani: ‘Jucha no uékasïnga eskajtsïni inde achamasï juramuchiaka’.
15 ”Enga na juramukua intsïnhapkia, kʼuanhatsentaspti ka tánaantaspti imani jántspiriichani enga sentabu* íntsaapka para kurhamarhiani náksï xáni andaspia.
16 Jántspiri ma niáraspti ka arhispti: ‘Tata, 10 mina andaska imani mina jingoni engareni íntskuka’.
17 Ka juramuti arhispti: ‘¡Sésiri úska, tʼuri ambakiti jántspiriiska! Ka jimbokari mintsinharhikueska para sáni ambe jingoni, tʼuri 10 ireteechani juramukuauaka’.
18 Tátsekua, jurhaspti máteru jántspiri ka arhispti: ‘Tata, sinko mina andaska imani mina jingoni engareni íntskuka’.
19 Ka íntu májkueni arhispti: ‘Tʼuri sinko ireteechani juramukuauaka’.
20 Joperu jurhaspti máteru jántspiri ka arhispti: ‘Tata, íia chiiti minani, ji takusïrhu irhiakuspka parani sési patsani.
21 Ísï úska jimbokakeni chérhisïnga, jimbokari tʼu uinhamarhitspesïnga; euajpintasïngari jima engari no patsaka ka pʼikuntasïngari jima engari no jatsintaka’.
22 Juramuti arhispti: ‘Jántspiri engari xáni no ambakeka, arhiakakeni ambe engari no sési úka indeni ambe jimbo engari tʼu uandaka. Jiájkani, ¿tʼu mítespi eskani uinhamarhitspesïnga ka eskani euajpintasïnga jima engani no patsaka ka eskani pʼikuntasïnga jima engani no jatsintaka?
23 Jiájkani, ¿andiresï no pá juchiiti sentabuni* jima enga sentabu patsanhajka? Ka engani na junguapiringia, ji andakua jingoni euajpintapiringa’.
24 ”Ka arhiaspti imeechani engaksï jima japka: ‘Euanta je minani ka imani íntsku je enga 10 mina kámani jaka’.
25 Joperuksï imeecha arhispti: ‘¡Tata, ima kámaxatiia 10 mina!’.
26 Juramuti arhiaspti: ‘Jíksïni arhisïnga eska ima enga jatsika, niáraati sánderu intsïnhani, joperu ima enga no jatsika asta imani ambe euanhantaati enga jatsika.
27 Ístu, juaa je imeechani engajtsïni ikiachejka ka engaksï no uékeenga eskani ji juramukuapiringa ka jíndeni japarini uándikua je’”.
28 Enga na jorhendaapkia i ambe kʼuiripuechani, seguiriispti karhamani para Jerusaléni nirani.
29 Enga niárani japkia Betfagué ka Betania, Olibusïiri juáta jimbo, axaaspti imeeri tsimani chúxapatiichani
30 ka arhiaspti: “Ní je imani ireta sapichu jimbo. Engajtsï na inchaakuakia, exentaakajtsï burru sapichuni ma enga nótki nema jatani jaka, jima jótakuarhetini jauati. Kuerata je ka juáchejtsïni je.
31 Ka engaksïni nema kurhamarhiska ‘¿Andijtsïsï kueratani jaki?’, chá arhi je ‘Juchaari Tatasï uékani jati úrani’”.
32 Ísï jimbo, imeeri chúxapatiichaksï niraspti ka ísïksï exentaspti burru sapichuni eska Jesúsi na arhiapka.
33 Joperu engaksï na kueratani japkia burru sapichuni, dueniu jémbeechaksï kurhamarhiaspti: “¿Andijtsïsï kueratani jaki burru sapichuni?”.
34 Ka imeechaksï arhiaspti: “Juchaari Tatasï uékani jati úrani”.
35 Jimajkani, pákusptiksï Jesúsini burru sapichuni ka imeecheeri xukuparhakua ambeksï tatsuparhakuspti ka burru sapichurhuksï jatsiraspti Jesúsini.
36 Enga Jesúsi xanharu jimbo nirani japka, kʼuiripuechaksï tatsuntskakupaxapti imeecheeri xukuparhakua ambe.
37 Enga Jesúsi niárapkia imani xanharu jimbo enga juáta Olibusïrhu kétsemunguajka, iámindu ima kʼuiripuecha engaksï chúxapani japka, kánikuaksï tsípispti ka ueenasptiksï uinhachaparini kʼéri ambe arhini Tata Diosïni imani milagruechani jimbo engaksï exeapka.
38 Uandasïreendiksï: “¡Újchakuranhasti ima Juramuti enga Tata Diosï Jeobaeri nombri jimbo jurhani jaka! ¡Eska pínandikua jauaka auandarhu ka kʼéri ambe arhinhee Tata Diosï enga auandarhu jaka!”.
39 Joperuksï máru fariseuecha engaksï imani kʼuiripuecha jingoni jámani japka, arhisptiksï: “Jorhentpiri, arhia sáni chiiti chúxapatiichani”.
40 Jesúsi arhiaspti: “Jíksïni arhisïnga eska engaksï indeecha pínasku japiringa, tsakapuechaksï uinhachapirindi”.
41 Enga Jesúsi Jerusaléni niárani japkia, ueraspti iretani exerini
42 ka uandaspti: “Sésiipirindi engari ini jurhiatikua jimbo tʼu kurhangupiringa nénari úpirini pínandikua jatsini... Joperuri iásï nóteru sésikua jatsiskia parari kurhanguni.
43 Jimboka niáraaka ima jurhiatikua engaksïni chiiti ikiatspitiicha iámu uirhipandacheaka ka ótacheatiksïni chkariicha jingoni engaksï punta jukarhuka; iámuksïni uirhipandaati para no nema úni uéakuni.*
44 Tʼunginksïni kʼamajkuati ka ístu iámindu imeechani engaksï jimini irekani jaka* ka no ma tsakapu tsïntsïkata pakaraati jimbokari no kuenta íntskukuarheska na jatini jurhaski Tata Diosï para exeni ambe engari úni jaka”.
45 Jimajkani templurhu inchaspti ka iáminduechani petaantaspti engaksï jima atarantani japka.
46 Ka arhiaspti: “Karakata jarhasti ‘Juchiiti kʼumanchikua jindeuati parajtsïni kʼuiripuecha jima kómarhini’, joperujtsï chá úxaka eska ísïiuaka komueska kueba ma nani engaksï sïpariicha jarhajka”.
47 Jesúsi seguiriispti pauani pauani templurhu jorhentpini. Joperuksï kʼérati saserdotiicha, karariicha ka imeecha engaksï sánderu kʼéri ambeepka iretarhu, jirinhakuntaxaptiksï néna uándikuni.
48 Joperuksï no exekuntaxapti nénaksï úpirini uándikuni jimbokaksï méntku iámindu iretarhu anapuecha jingontku jarhasïreenga kurhajchani.
Notecha
^ O “Pekadoriiri”.
^ O “juramutiini”.
^ Gresia anapu mina ma 340 gramu kʼuetsapesïreendi (10,9 onsa troi) ka 100 drakmeespti. Exe je Glosario, mina.
^ Griegu jimbo: “plata”.
^ Griegu jimbo: “plata”.
^ O “paraksïni kánikua uandanhiatani”.
^ Griegu jimbo: “chiiti sapiichani”.
