Lukasï 2:1-52
-
Jesúsi andajpenusïndi (1 a 7)
-
Máru ánjeliichaksï xarhakuasïndi karichi erangutiichani (8 a 20)
-
Pasïri pʼikujtsïkuni tsʼiuerakuani ka pímbinhasï jarhani Tata Diosïni japarini (21 a 24)
-
Simeóni exesïndi Kristuni (25 a 35)
-
Ana, tataka sapichueri ambe uandasïndi (36 a 38)
-
José ka María Nasaretiksï níntasïndi (39 ka 40)
-
Enga Jesúsi 12 uéxurhini jatiriipka templurhu jarhasïndi (41 a 52)
2 Imani jurhiatikuechani jimbo, Roma anapu juramuti* Augustu, juramuspti eskaksï iámindu kʼuiripuecha nipiringa apuntarikuarhini.
2 —I orheta sénsu, jiáni tarhatanhaspti enga Kiriniu Siria juramuni japka—.
3 Ka iámindu kʼuiripuechaksï níntaspti imeecheeri ireteecha jimbo paraksï jima apuntarikuarhini.
4 Joséjtu níntaspti imeeri iretarhu. Uéakuntaspti Nasareti uératini enga Galilea jaka ka Beléni karhamaspti Dabidiiri iretani jimbo, enga Judea jaka. Jimboka Dabidiiri kʼumanchikuarhu anapuespka ka imeeri parientiispti.
5 Niraspti apuntarikuarhini Maríani jingoni enga imeeri témbeepka ka enga no ióni jimbo ambakentapiringia.
6 Engaksï jima japkia, Maríani niárakusptia para ima ambakentani.
7 Ka sapini ma kánguarhispti enga jindeepka imeeri orheta uájpa. Takusïichani jingoni irhirespti ka chekakua ma jimbo apontskaspti, jimboka nóteru nani ambandespkia paraksï pakarani.
8 Ka jimeesïsï, karichi erangutiichaksï máru irekaspti juátarhisï engaksï chúrikuechani karichiichani kʼuítauenga.
9 Ka ma repentku, xarhakuaspti Tata Diosï Jeobaeri ánjeli ma ka Tata Diosï Jeobaeri tʼíntskua iámu jimeesïsï tʼíntskakuaspti ka imeechaksï kánikua chérakuarhespti.
10 Joperu ánjeli arhiaspti: “Asï ché je, jimbokaksïni jurhaska aianguni ambakiti aianhperakua, ambe ma enga kánikua sési pʼikuastauaka iámindu iretarhu anapuechani.
11 Jimboka iásï, Dabidiiri iretani jimbo andajpenusti nema engaksïni pʼímutantaaka enga jindeeka Kristu, chaari Tata.
12 Ini ambe jimbojtsï mítentaaka: exentaakajtsï charhakuni ma enga takusïichani jingoni irhirekata jaka ka enga chekakua ma jimbo apondetini jaka”.
13 Ka ma repentku, imani ánjeli jingonksï xarharaspti uánikua ánjeliicha engaksï kʼéri ambe arhini japka Tata Diosïni ka uandasïreendiksï:
14 “Kʼéri ambe arhinhee Tata Diosï auandarhu ka eskaksï pínandikua jatsiaka echerirhu ima kʼuiripuecha enga Tata Diosï jaiapanheantajka”.
15 Tátsekua, ánjeliichaksï kéndikuspti ka auandarhuksï karhanchentaspti ka karichi erangutiichaksï ueenaspti arhijperani: “Jatsiskachi para Beléni nirani ka exeni ambesï úkuarhi, ambe engajtsïni Tata Diosï Jeoba aianguka”.
16 Jimajkani sóntkuksï niraspti ka exentasptiksï Maríani ka Joséni ka ístu charhakuni enga chekakuarhu apondetini japka.
17 Engaksï ini ambe exepka, uandantasptiksï ambe engaksï aiangunhapka tataka sapichueri ambe.
18 Ka iámindu kʼuiripuecha engaksï kurhaapka ambe engaksï karichi erangutiicha uandantapka, ískuksï pakaraspti.
19 Joperu María iámindu ini ambe patsasïreendi imeeri mintsitarhu ka eratsentani pakarasïreendi.
20 Karichi erangutiichaksï níntaspti. Ka engaksï níntani japkia, diosmaiamukuaksï arhixapti Tata Diosïni imani ambe jimbo engaksï exepka ka kurhaani, jimboka iámindu ambe ísïispka eskaksï na aiangunhapka.
21 Enga ochu jurhiatikua nitamapkia, niáraspti jurhiatikua paraksï tataka sapichuni pasïri pʼikujtsïkukuni tsʼiuerakuarhu* ka Jesúsiksï arhiraspti, ísï eska ánjeli na arhipka Maríani ante de embarasada pakarani.
22 Ístu, engaksï na nitamapkia jurhiatikuecha paraksï ima úni pímbinhasï jarhani Tata Diosïni japarini, ísï eska na arhijka Moisésiiri Lei, karhamasptiksï Jerusaléni tataka sapichuni jingoni paraksï Tata Diosï Jeobani míndakuni,
23 ísï eska na karakata jaka Tata Diosï Jeobaeri Leirhu: “Ima tataka enga orheta uájpeuaka míndakateuati* para Tata Diosï Jeoba”.
24 Ka kéjtsïtasptiksï ísï eska na arhijka Tata Diosï Jeobaeri Lei: “Tsimani palomasï kʼénharhi o tsimani palomasï sapinharhi”.
25 Ka achamasï ma jarhaspti Jerusaléni enga Simeóni arhinheenga, ima sési jámasïreendi ka janhanharhisïreendi Tata Diosïni ka erokuarhixapti eska Tata Diosï sési pʼikuastaantapiringa Israeli anapuechani. Ka Tata Diosï íntskuspti imeeri espiritu santu.
26 Ka espiritu santuni jimbo arhinhaspti eska no uarhipiringa astaka exepiringa Tata Diosï Jeobaeri Erakukatani.*
27 Jimajkani, espiritu santuni jimbo, inchaspti templurhu. Ka engaksï taati jémbeecha pápka Jesúsini templurhu paraksï úni Jesúsini jingoni ambe enga Lei arhijka,
28 Simeóni kamanharhispti tataka sapichuni, kʼéri ambe arhispti Tata Diosïni ka uandaspti:
29 “Juchiiti Tata, tʼuri jindeeska Sánderu Kʼéri Juramuti, chiiti jántspiri iásï kʼóru uaatia agustu uarhini, ísï eskari na uandapka
30 jimbokani juchiiti éskuechani jingoni exeskia néndi erakuski parajtsïni pʼímutantani,
31 imani engari tʼu axaka paraksï iámindu ireteecha exeni.
32 Ísïiuati komueska tʼíntskua ma enga pʼenonharhikuauaka no Israeli anapuechani ka uaati eska kʼéri ambeuaka chiiti ireta Israeli”.
33 Tataka sapichueri taati jémba ka amamba, ískuksï pakarasïreendi eratsentani imani ambe jimbo enga xáni uandanheenga imeeri ambe.
34 Ístu, Simeóni újchakuraaspti ka arhispti Maríani, tataka sapichueri amambani: “Exe, i tataka sapichu erakunhasti para úni eskaksï uánikua Israeli anapuecha kuarhatseaka ka eskaksï uánikuecha jauaraaka ka uánikuechaksï no sési ambe uandaati indeeri ambe, nájkiruka Tata Diosï xarhataaka eska indeni jingoni jarhaska
35 para úni eskaksï uánikuecha xarhataaka ambe engaksï jatsika imeecheeri mintsitarhu, ka tʼuri ísï pʼikuarheraaka enajkiksïni kʼéri espada ma jimbo ataa mintsitarhu”.
36 Ístu, jima jarhaspti uarhiiti ma enga Tata Diosïiri uandakua páriipka;* Ana arhinhasïreendi, Fanueli uájpa, Asériiri kʼumanchikuarhu anapu. Uarhiiti máespti enga jatiriipkia ka siete uéxurhintku irekaspti uámba jingoni desde jiáni enga uambuchapka,*
37 ka tsïndi pakaraspti ka iásï 84 uéxurhini jatiriisptia. Méntkisï templurhu jámasïreendi, jima marhuakusïreendi Tata Diosïni chúrikua ka jurhiakua, kʼarhinda jarhasïreendi* ka kómarhisïreendi Tata Diosïni.
38 Ka meru jiáni andarhieraaspti Joséni ka Maríani ka ueenaspti diosmaiamukua arhini Tata Diosïni ka ístu ueenaspti tataka sapichueri ambe aianguani iámindu imeechani engaksï erokuarhini japka eska Jerusaléni pʼímutanhantapiringa.
39 Ka engaksï na iámindu ambe ísï úpkia eska Tata Diosï Jeobaeri Lei na arhijka, níntasptiksï Nasareti, imeecheeri iretarhu enga Galilea jaka.
40 Tataka sapichu sési kʼuiripexapti, uíuinhaxespti ka sánhani arhixapti sánderu jánhaskani. Ka Tata Diosï jaiapanhentasïreendi.
41 Mándani uéxurhini, Jesúsiiri taati jémbeechaksï pʼindespti Jerusaléni nirani Paskueri kʼuínchikuarhu.
42 Enga Jesúsi 12 uéxurhini jatiriipka, karhamasptiksï Jerusaléni ísï eskaksï na pʼindepka úni iáminduecha mándani kʼuínchikuarhu.
43 Enga na nitamapkia kʼuínchikua, níntaxaptiksïa ka taati jémbeechaksï no exespti eska Jesúsi* Jerusaléni pakaraspka.
44 Ma jurhiatikuaksï xanharasptia eratseparini eska Jesúsi máteru kʼuiripuechani jingoni junguaxapka. Tátsekuaksï jámaspti kurhanguarhini imeeri parientiicha jingoni ka imeechani jingoni engaksï xáni míteapka.
45 Joperuksï no nani exentaspti, jimboksïsï Jerusaléni kʼuanhatsentapti ka iápurisïksï jámaspti jirinhantani.
46 Ísï tanimu jurhiatikua jimboksï exentaspti, templurhu jarhaspti ka jorhentpiriichani jingoni uaxakatixapti. Jima jarhaspti kurhajchaani ka uánikua ambe kurhamarhiaxapti.
47 Ka iámindu imeecha engaksï kurhajchani japka, ískuksï pakarasïreendi eratsentani jimboka sési kurhangusïreenga ambe ma ka sési mókuntasïreendi.
48 Engaksï taati jémbeecha exepka, ískuksï pakaraspti ka amamba arhispti: “Iju, ¿andijtsïnisï ísï káma? Méntkuksïni jini ka jini jámaska jirinhantani papa jingoni”.
49 Joperu Jesúsi arhiaspti: “¿Andijtsïnisï jirinhantani jámani japi? ¿Andi nójtsï mítespi eskani ji juchiiti Taatiiri kʼumanchikuarhu japiringa?”.
50 Joperuksï taati jémbeecha no kurhanguspti ambesï arhikuekani japi.
51 Jimajkani Jesúsi níntaspti Nasareti imeeri taati jémbeechani jingoni ka méntkisï kurhajchaasïreendi. Ka amamba patsasïreendi iámindu ini ambe imeeri mintsitarhu.
52 Ka Jesúsi sési kʼuiripexapti, sánhani arhixapti sánderu jánhaskani ka Tata Diosï xénchasïreendi ka ístu kʼuiripuecha.
Notecha
^ Griegu jimbo: “Sésari”. Ísïksï arhiasïreendi máru Roma anapu juramutiichani.
^ O “sirkunsidariini”.
^ O “pímbinhasïiuati”.
^ O “Kristuni”.
^ O “profeteepka”.
^ Griegu jimbo: “desde jiáni enga uátsïipka”.
^ O “no ma ambe arhasïreendi”.
^ Griegu jimbo: “tataka sapichu Jesúsi”.
