Lukasï 20:1-47
20 Ma jurhiatikua, enga Jesúsi templurhu jorhendaani japka iretarhu anapu kʼuiripuechani ka enga aianhpini japka ambakiti aianhperakuani, jurhasptiksï kʼérati saserdotiicha, karariicha ka orhejtsïkutiicha
2 ka kurhamarhisptiksï: “¿Andiresï ini ambe újki? ¿Nékini arhiski parari ísï úni?”.
3 Ima arhiaspti: “Jíjtuksïni kurhamarhiaka ambe ma ka chájtsïni arhi je.
4 ¿Né arhiski Juanuni eska itsï ataapiringa* kʼuiripuechani, Tata Diosï o kʼuiripuecha?”.
5 Ka imeechaksï ueenaspti mámaru ambe arhijperani. Uandasïreendiksï: “Engachi arhiska eska Tata Diosï, indejtsïni arhiati: ‘¿Andijtsïsï no jakajkukupi?’.
6 Ka engachi uandaska eska kʼuiripuecha, iámindu iretarhu anapuechajtsïni tsakapu jimbo ataati, jimbokaksï iáminduecha uandasïnga eska Juanu Tata Diosïiri uandakua páriispka”.*
7 Ísï jimbo, arhisptiksï eskaksï no mítespka né arhispi Juanuni.
8 Ka Jesúsi arhiaspti: “Jiájkani jíjtuksïni no aianguaka nérini arhiski parani ini ambe úni”.
9 Jimajkani ueenaspti arini ejemplu jingoni jorhendaani iretarhu anapuechani: “Achamasï ma ubasï jatsikuspti. Tátsekua, echerini amediasï íntsaaspti tarheriichani ka ióni sáni niraspti iauanisï.
10 Ísï tátsekua, axaspti jántspirini ma para arhiani tarheriichani eskaksï arhukukuntapiringia ubasïni. Joperuksï imeecha ataspti jántspirini ka ískuksï axantaspti.
11 Ka achamasï ménderu axaspti máteru jántspirini. Íntuksï ataspti ka no sésiksï arhispti* ka ískuksï axantaspti.
12 Ka ménderu axaspti máteru jántspirini, ini jingonksï tanimuesptia. Joperu íntuksï ataspti ka petaatantasptiksï.
13 Tátsekua achamasï enga ubasï jatsikupka, uandaspti: ‘¿Ka iásï ambe uaaia? Juchiiti sapini axaaka engani xáni xénchajka. Jamberiksï ini kʼóru janhanharhiati’.
14 Engaksï tarheriicha exepka, arhijperasptiksï: ‘I jindeesti ima enga pʼiuaka erensiani. Ju je uándikuni parachi jucha pakatakuarhini erensiani’.
15 Ísï jimbo, petaatantasptiksï ka uándikusptiksï. Jimajkani, ¿ambe úkuaua ima achamasï enga ubasï jatsikuka?
16 Juuati ka uándikuauati tarheriichani ka máteruechani íntsauati echerini”. Engaksï ini ambe kurhaapka, imeechaksï uandaspti: “¡Asï méni ísï úkuarhie!”.
17 Joperu Jesúsi erateaspti ka arhiaspti: “Jiájkani, ¿ambe arhikuekasïni i ambe enga karakata jaka: ‘Ima tsakapu engaksï kʼumanchikua úriicha no jiókuarhika, ima jindeesti sánderu ambakiti tsakapu’?*
18 Ima enga ini tsakapurhu andatseraaka, méntku xerendurhikuarhiati. Ka enga i tsakapu jatajchakuska nemani, méntku puchandurhiati”.
19 Jimajkani karariicha ka kʼérati saserdotiichaksï uékasïreendi jima mismu jupikani, jimbokaksï pʼíkukuarhintaspka ambe enga Jesúsi uandani japka.* Joperuksï chérhiasïreendi kʼuiripuechani.
20 Ísï jimbo, engaksï na exepkia ambe enga ueenga Jesúsi, sïpatikuarkuksï arhiaspti máru acheetiichani eskaksï nipiringa Jesúsini exeni paraksï no sési ambe uandarani ka eskaksï ísï jámapiringa enajkiksï ambarhati kʼuiripuepi. Imeechaksï uékasïreendi no sési ambe uandarani paraksï úni juramuti jingoni páni ka imani jingonksï jurajkuni.
21 Imeechaksï arhispti: “Jorhentpiri, míteskachi eskari tʼu sési uandasïnga ka eskari sési jorhentpisïnga, eskari iáminduechani májkueni kaasïnga ka eskari tʼu jurhimbikua ambe jorhentpisïnga Tata Diosïiri ambe.
22 ¿Sési jarhaski impuestu maiamuni Roma anapu juramutini* o nómbe?”.
23 Joperu Jesúsi mítespti eskaksï ísku jatinisï ísï arhini japka, jimbosï arhiapti:
24 “Juáchejtsïni je denariu* ma parani exeni. ¿Neeski i enga ixú jukanharhitini jaka ka neeri nombri karakata jarhaski ixú?”. Imeechaksï arhispti: “Roma anapu juramutiiri”.
25 Ka Jesúsi arhiaspti: “Jiájkani, íntsku je méntkisï Roma anapu juramutini ambe enga imeeriika, joperu Tata Diosïni ambe enga Tata Diosïiriika”.
26 Ka nóksï úspti kʼuiripu japarini no sési ambe uandarani ka ískuksï pakaraspti engaksï kurhajchapka Jesúsini ka nóteruksï ambe ma uandasptia.
27 Joperu jurhasptiksï máru saduseuecha, imeecha engaksï no jakajkujka eskaksï kʼuiripuecha tsíntaaka ka kurhamarhisptiksï:
28 “Jorhentpiri, Moisési karaspti: ‘Enga achamasïiri ermanu jémba ma niáraska uarhini ka jurajkuni uarhiitini joperu no kánguarhiani sapiichani, i achamasï jatsisti para tembuntani uarhiitini para uájpeechani jurajkukuani ermanu jémbani enga uarhikia’.
29 Jiájkani siete kʼuiripuechaksï jarhaspti engaksï ermanuepka. Ima enga orheteepka, tembuchaspti joperu uarhispti ka no ma sapini kámaspti.
30 Ka ima enga chúxapeenga, tembuntaspti uarhiitini, joperu imajtu uarhispti
31 ka iámindu siete ermanu jémbeechaksï májkueni úkuarhinchaspti, uarhisptiksï ka nóksï ma sapini kámaspti.
32 Tátsekua, uarhiitijtu chúngumaantaspti.*
33 Jiájkani, jiáni engaksï uarhiriicha tsíntaaka, ¿neeri témbeua ima uarhiiti? Jimbokaksï siete ermanuecha tembuspka uarhiitini”.
34 Jesúsi arhiaspti: “Iásï anapu* kʼuiripuechaksï uambuchasïndi ka tembuchani,
35 joperu imeecha enga Tata Diosï erakuaka paraksï tsíntani ka tsípikuaksï jatsini imani tiempu jimbo enga jurhani jaka, nóksï tembuchasïndi nijtu uambuchani,
36 ka ístu, nóteruksï uarhisïndia, jimbokaksï ísïiska eskaksï ánjeliicha ka Tata Diosïiri uájpeestiksï jimbokaksï tsíntaaka.
37 Joperu Moisési jamberi uandantasti eskaksï uarhiriicha tsíntaaka,* jima enga anhatapu sapichueri ambe uandantajka, jiáni enga uandapka eska Jeoba jindeeska ‘Abraániiri Tata Diosï, Isaakiiri Tata Diosï ka Jakobueri Tata Diosï’.
38 Ima no uarhiriicheeri Tata Diosïisti, sino imeecheeri engaksï tsípiti jaka, jimbokaksï iámindu imeecha tsípiti jarhaska para ima”.
39 Engaksï ini ambe kurhaapka, máru karariichaksï arhispti: “Jorhentpiri, sésiri uandaska”.
40 Ka nóteru nema tekaasptia kurhamarhini ambe ma.
41 Jimajkani Jesúsi kurhamarhiaspti: “¿Andiksïsï imeecha uandajki eska Kristu Dabidi uájpeeska?
42 Jimboka Dabidi mismu uandaska Salmueri karakatarhu: ‘Tata Diosï Jeoba arhisti juchiiti Tatani: “Uaxaka juchiiti jurhijkandani jimbo
43 asta jiáni engakeni chiiti jantsiriicharhu peerachiauaka imeechani engaksïni ikiachejka parakari jatanduauaka”’.
44 Ka enga Dabidi ísï arhijka ‘juchiiti Tata’. Jiájkani, ¿andisï imeeri uájpee?”.
45 Ka engaksï iámindu kʼuiripuecha kurhajchani japka, arhiaspti imeeri chúxapatiichani:
46 “Xéparini jáma je karariicha jingoni engaksï kánikua tsitijka takusï iósti ma jukantani paraksï xanharisï jámani ka tsitinksï eskaksï kʼuiripuecha uandajpauaka merkadurhisï ka ístuksï tsitisïndi orhepani* uaxakani jima engaksï judiuecha tánguarhijka para Tata Diosïni kómarhini, ka tʼirekuecharhu, tsitisïndiksï uaxakani jima engaksï imeecha uaxakajka engaksï sánderu kʼéri ambeeka.
47 Ka euakuarhiasïndiksï uarhiiti tsïndiichani ambe engaksï xáni jatsikuarheka* ka iónksï kómarhisïndi Tata Diosïni paraksï sési pakarani kʼuiripuni japarini.* Imeechaksï sánderu no sési kastigarinhaati”.
Notecha
^ Exe je Glosario, itsï atakuarhini; itsï atani.
^ O “profeteespka”.
^ O “kʼuratsetasptiksï”.
^ O “eskinarhu anapu tsakapu”. Indeni tsakapunisï arhikuekani jati enga kʼumanchikuarhu karhakua jukeenga para eskinani ma jójtsïtani para sánderu uíuinhasï jarhani.
^ O “jimbokaksï kurhanguspka eska Jesúsi imeechanisï arhikuekaani japka”.
^ Griegu jimbo: “Sésarini”. Ísïksï arhiasïreendi máru Roma anapu juramutiichani.
^ Exe je Glosario, denariu.
^ O “uarhispti”.
^ O “I tiempu anapu”. Exe je Glosario, tiempu.
^ Griegu jimbo: “jauaraaka”.
^ O “sánderu ambakiti uaxantskuecharhu”.
^ Griegu jimbo: “kʼumanchikuechani”.
^ O “paraksï indeni ambe arhiparhatani”.
