Lukasï 23:1-56
23 Ísï jimbo, iámindu kʼuiripuechaksï jauaraspti ka pásptiksï Jesúsini Pilatuni jingoni.
2 Jimajkani, ueenasptiksï mámaru ambe kʼamanharhitantani. Uandasïreendiksï: “I achamasï támisï jánhastaaxapti iretarhu anapu kʼuiripuechani, ka ístu arhixapti kʼuiripuni eska no jatsiska para impuestu íntskuni Roma anapu juramutini,* ka ístu uandaxapti eska inde jindeeska Kristu ka eska juramutiiska”.
3 Tátsekua Pilatu kurhamarhispti: “¿Tʼu jindeeski judiuecheeri juramuti?”. Jesúsi arhispti: “Jo, tʼuri mismu uandaxaka”.
4 Jimajkani Pilatu arhiaspti kʼérati saserdotiichani ka kʼuiripuechani: “Para ji, i achamasï no ma ambe no sési ústi”.
5 Joperu imeechaksï inchandimesïreendi: “Támisï jánhastaasïndi iretarhu anapuechani; jimboka iámu Judeaisï jámaska jorhentpini, Galilea ueenasti ka ixúesïsï jamberi janostia”.
6 Enga Pilatu kurhaapka ini ambe, kurhanguarhispti sini inde achamasï Galilea anapuespi.
7 Ka enga mítepkia eska ima jima anapuespka nani enga Erodesi juramuni japka, jirejiresï axakuspti Erodesini, imajtu Jerusalénisï jámaxapti jiánisï.
8 Enga Erodesi exepka Jesúsini, kánikua tsípispti. Ióniisptia enga uékani japka exeni Jesúsini, jimboka uánikua ambe kurhaaspkia imeeri ambe ka uékasïreendi exeni eska milagru* ma úpiringa.
9 Jimajkani ueenaspti uánikua ambe kurhamarhini, joperu Jesúsi no ma ambe kurhakuspti.
10 Ka kʼérati saserdotiicha ka karariichaksï jauarasïreendi ka ikiatkuksï kʼamanharhitantasïreendi.
11 Jimajkani Erodesi ka imeeri sondaduechaksï no sési kámaspti Jesúsini, ka Erodesi uékantku jatsikuntaspti ambakiti xukuparhakua ma para teresmarhuni. Tátsekua, ménderu Pilatuni axakuntaspti.
12 Ima jurhiatikua, Erodesi ka Pilatu ueenasptiksï sési pájperani, jimbokaksï antesi ikiatsperasïreenga.
13 Tátsekua, Pilatu pʼitajkuarhiaspti kʼérati saserdotiichani, juramutiichani ka iretarhu anapuechani,
14 ka arhiaspti: “Chájtsï juáska ini achamasïni, ka uandaskajtsï eska arhisïnga kʼuiripuni eska no jatsiska para kurhajchani juramutini, joperu exe je, kurhamarhiskia chánksïni japarini ka no ma ambe exekuntaska ambe engajtsï chá xáni kʼamanharhitantani jaka.
15 Ka Erodesijtu no ma ambe exekuntasti, jimbojtsïnisï axachentati ménderu. Exe je, i achamasï no ma ambe ústi parachi uándikuni.
16 Ísï jimbo, kʼuikirhitarkuarheaka ka tátsekua jurajkuaka”.
17 *
18 Joperu iámindu kʼuiripuechaksï ueenaspti uinhachani: “¡Uándiku indeni achamasïni ka jurajku Barrabásini!”.
19 —I achamasï ónhakuarhetixapti jimboka inchaparhakuspka imani kʼuiripuechani jingoni engaksï juramutiichani jingoni jupiperapka iretarhu, ka ístu jimboka uándikpispka—.
20 Pilatu ménderu uandajpaaspti jimboka uékasïreenga Jesúsini jurajkuni.
21 Ka imeechaksï ueenaspti uinhachani: “¡Chkarirhu ma cháparhata! ¡Chkarirhu ma cháparhata!”.
22 Ka para tanimu úni jámania, ménderu arhiaspti: “Joperu ¿andi? ¿Ambe no sési úski i achamasï? Ji no ma ambe exekuntaxaka parachi uándikuni. Ísï jimbo, kʼuikirhitarkuarheaka ka tátsekua jurajkuaka”.
23 Joperuksï imeecha méntku úndaxapti uinhachani eskaksï chkarirhu ma cháparhatapiringa, ka ísïksï úspti astakaksï kurhajchanhapka.
24 Ísï jimbo, Pilatu uandaspti eskaksï úpiringa ambe engaksï kʼuiripuecha uandani japka.
25 Jimajkani, jurajkuspti imani engaksï kʼuiripuecha arhipka, imani achamasïni enga ónhakuarhetini japka jimboka juramutiichani jingoni jupiperaspka ka jimboka uándikpispka. Joperu jurajkukuaspti Jesúsini paraksï úkuni ambe engaksï imeecha uékapiringa.
26 Engaksï páni japkia Jesúsini, jimeesïsï nitamaxapti achamasï ma enga tarhetarhu uératini junguani japka, Simóni arhinhasïreendi ka Sirene anapuespti. Jupikasptiksï ka imanksï páraspti chkarini enga jindeeka para no sési nitamakuarhini,* para Jesúsiiri tátsepani jimbo nirani.
27 Uánikua kʼuiripuechaksï chúxapaxapti ka ístuksï jima niraxapti uánikua uarhiitiicha engaksï uánhepani japka xáni no sési pʼikuarherani ka engaksï uinhachani japka xáni uerani imani jimbo.
28 Jesúsi pʼirhikuarhispti, erateaspti uarhiitiichani ka arhiaspti: “Jerusaléni anapu uarhiitiicha,* ásteru ueraia je jíndeni jimbo, sánderu sési, chá mismu pʼamojkukuarhi je ka chaari sapiicha jimbo uera je;
29 jimboka exe je, janoati ima jurhiatikua enga uandanhaaka: ‘¡Tsípisïndiksï ima uarhiitiicha engaksï no újka kánguarhiani sapiichani ka imeecha engaksï no méni kánguarhika sapini ma ka ístu imeecha engaksï no méni tʼireraka* charhakuni ma!’.
30 Jimajkani ueenaatiksï arhiani juáteechani ‘¡Ójchakurajtsïni je!’ ka kʼumbuntsïteechani ‘¡Kuájchakujtsïni je!’.
31 Engaksï ini ambe újka enga anhatapu útasï xuxunhaxeka, ¿ambeksï uaa enga iámu kʼarhiakia?”.
32 Ístuksï paaxapti máteru tsimani acheetiichani engaksï no sési úriipka paraksï Jesúsini jingoni uándikuani.
33 Ka engaksï niárapkia jima enga Kalabera arhinhajka, cháparhatasptiksï chkarirhu ka ístu tsimani sïpariichani: ma imeeri jurhijkandani jimbo ka máteru uikixkandani jimbo.
34 Joperu Jesúsi uandaspti: “Taati, puákuanta jimbokaksï no míteska ambe engaksï úni jaka”. Ka suerte jimboksï arhukutsperaspti imeeri xukuparhakuani.
35 Ka uánikua iretarhu anapuechaksï exexapti. Joperu juramutiichaksï no sési nínharhikusïreendi* ka teresmarhusïreendiksï arhiparini: “Jarhuataasti máteruechani, eska jandiajku kuájpekuarhiaka enga inde jindeeka Kristu, Tata Diosïiri Erakukata”.
36 Sondaduechaksï jamberi teresmarhuxapti ka andarhierasptiksï paraksï binu xarhipiti íntskuni
37 ka arhisptiksï: “Engari tʼu judiuecheeri juramutiika, kuájpikuarhi”.
38 Ístu, chkarirhu karhakua, jatsikusptiksï karakata ma enga arhienga: “I jindeesti judiuecheeri juramuti”.
39 Jimajkani, no sési úri ma enga jima máekandu tirhipakuarhetini japka, ueenaspti no sési arhini, arhispti: “¿Andi no tʼu jindeeski Kristu? Jimajkani kuájpikuarhi ka ístujtsïni kuájpi juchantsïni”.
40 Ka enga máteru kurhaapka ini ambe, xukaspti: “¿Andi nóri sáni chénharhisïni* Tata Diosïni iásï engari tʼujtu ísï no sési nitamakuarhini jaka?
41 Ka juchachi jatsiska para ísï kánhani jimbokachi no sési ambe niátaska, joperu i achamasï no ma ambe no sési ústi”.
42 Jimajkani arhispti: “Jesúsi, miántarini sáni engari chiiti Reinurhu jauakia”.
43 Ka Jesúsi arhispti: “Iásï, jíkeni sési jimbo arhisïnga: jíndeni jingondi jauaka Paraisurhu”.
44 Ka nájkiruka teruxutinisïipka,* iámu jimeesïsï pápkʼandespti ka ísï jarhaspti asta tresisï* jamberi
45 jimboka jurhiata nóteru tʼíntskaxapkia. Jimajkani, templurhu anapu kortina terujkani karupakurhispti.
46 Ka Jesúsi mátirku uinhachaspti: “¡Juchiiti Taati, chiiti jájki jimbo jurajkusïnga juchiiti tsípikuani!”. Ka enga na ísï uandapkia, uarhispti.*
47 Ka enga sondaduecheeri orhejtsïkuti exepka ini ambe, ueenaspti kʼéri ambe arhini Tata Diosïni uandaparini: “Sési jimbo, i achamasï no ma ambe no sési úspti”.
48 Ka ístu iámindu kʼuiripu enga jima japka exeni ambe enga úkuarhini japka, seguirisptiksï níntani uánhepantani engaksï na exepkia ambe enga xáni úkuarhipka.
49 Ka iámindu imeecha engaksï Jesúsini mítepka, jimaksï no iauani jarhaspti. Ka ístuksï jima jarhaspti exeni ambe enga xáni úkuarhini japka máru uarhiitiicha engaksï Galilea uératini pámbetapka.
50 Ka ístu jima jarhaspti ambakiti kʼuiripu ma ka enga sési jámeenga, José arhinhasïreendi ka Kʼérati Juesiichani jingoni kuenta úkuarhisïreendi.*
51 —I achamasï no jaiapanhentaspti ambe engaksï máteruecha úpka—. Arimatea anapuespti, ireta ma enga Judea jaka. Ka íjtu erokuarhixapti Tata Diosïiri Reinuni.
52 José niraspti uandontskuarheni Pilatuni jingoni ka kurhakuntaspti Jesúsiiri kuerpuni.
53 Ka José késkuntaspti Jesúsiiri kuerpuni ka ambakiti takusï linueri jingoni irhirespti. Tátsekua jatsintaspti tumbarhu ma enga kʼerendarhu jarhanharhitakata japka, nani enga nótki nema jatsinhantani japka.
54 Ima jurhiatikuespti enga iámu ambe listu jatsinheenga para sábadu, jimboka inchatiru sábaduepiringia.
55 Ka ima uarhiitiicha engaksï nípka Galilea uératini pámbetani, ístuksï jima niáraspti. Exesptiksï tumbani ka na engaksï peerapka Jesúsiiri kuerpuni.
56 Tátsekuaksï kʼuanhatsentaspti paraksï uitsakua ambe jeuetani enga sési jájkundejka ka aseiti pʼuntsumiti ambe. Joperuksï mintsikuarhispti sábadu jurhiatikua jimbo, ísï eska na arhijka mandamientu.
Notecha
^ Griegu jimbo: “Sésarini”. Ísïksï arhiasïreendi máru Roma anapu juramutiichani.
^ Griegu jimbo: “mínda”, “seniali”.
^ Exe je ambe enga arhijka nota enga Mateu 17:21 jimbo jaka.
^ Exe je Glosario, chkari enga jindeeka para no sési nitamakuarhini.
^ O “Jerusaléni uájpeecha”.
^ O “lechi íntskuka”.
^ O “jákxakusïreendi”.
^ O “janhanharhisïni”.
^ Griegu jimbo: “ora para sáno seisi úni jámani”.
^ Griegu jimbo: “ora para nuebe úni jámani”.
^ O “últimu jirejtaspti”. Griegu jimbo: “íntspintaspti imeeri espirituni”.
^ O “ka Sanedrínirhu jarhaspti”.
