Lukasï 3:1-38
3 Enga Roma anapu juramuti* Tiberiu 15 uéxurhini páni japkia juramuni, Ponsiu Pilatu Judea juramuxapti, Erodesi* Galileaisï juramuxapti ka imeeri ermanu jémba Filipu Iturea ka Trakonítideisï juramuxapti, ka Lisaniasi Abileneisï juramuxapti.
2 Anásiiri jurhiatikuechani jimbo enga jindeepka kʼéri saserdoti ka Kaifásiiri jurhiatikuechani jimbo, Tata Diosï uandajpaspti Juanuni, Sakaríasi uájpani, jiánisï enga desierturhisï jámani japka.
3 Ísï jimbo, Juanu iámu Jordánisï jámaspti aianhpini eskaksï kʼuiripuecha jatsispka para itsï atakuarhini* paraksï xarhatani eskaksï móantaspkia ka ísïksï puáminhaantani imeecheeri pekaduechani.
4 Ísï úkuarhispti eska na karapka Isaíasi Tata Diosïiri uandakua pári:* “Nema kurhaakuarhixati uinhachani jarhani desierturhisï: ‘¡Listu jatsi je Tata Diosï Jeobaeri xanharuni! Ú je eskaksï Tata Diosïiri xanharuecha pareju jándu pakaraaka.
5 Iámindu kauaruechanksï uininhantauati ka jimeesïsï enga juáteecha ka kʼumbuntsïteecha jaka, pareju jándu pakaraati; xanharuecha engaksï kʼuntsïka, jurhimberanhantaatiksï ka jimeesïsï enga no sési jándeka, sési jántskanhantaati.
6 Iáminduechaksï exeati na enga pʼímutantspijka Tata Diosï’”.*
7 Ísï jimbo, Juanu arhiaspti imani kʼuiripuechani engaksï nípka andarhierani para ima itsï ataani: “Akuitsi uájpeecha, ¿andi néksïni arhiski eskajtsï uaaka sïpakuarhini ima jurhiatikueri enga Tata Diosï kastigarpiaka?
8 Orheta ú je ambe ma parajtsï xarhatani eskajtsï móantaskia. Asï jáma je uandani ‘Juchaari taati Abraániisti’. Jimboka jíksïni arhisïnga eska Tata Diosï uaaka úni eskaksï ini tsakapuechani jimbo uéraaka Abraáni uájpeecha.
9 Ka jacha anhatapuecheeri sïranguarhu jarhastia. Ísï jimbo, ima anhatapuecha engaksï no ambanharhi frutu jukaaka, chʼapanhaatiksï ka chpirirhuksï kʼuanijpanhaati”.
10 Ka kʼuiripuechaksï kurhamarhisïreendi: “Jiájkani, ¿ambechi jatsiski para úni?”.
11 Ima arhiaspti: “Ima enga tsimani xukuparhakua kámani jaka, eska íntskuaka máechakua imani enga no kámani jaka ka ima enga jatsikuarheka sáni tʼirekua ambe, eska májkueni uaaka”.
12 Imeecha jamberiksï niraspti itsï atakuarhini engaksï impuestu kobrarpijka ka kurhamarhisptiksï: “Jorhentpiri, ¿ambechi jatsiski para úni?”.
13 Ima arhiaspti: “Xántku euajpi je* impuestu na enga xáni uaxastakata jaka”.
14 Sondaduechaksï kurhamarhisïreendi: “¿Ambechi jatsiski para úni?”. Ka ima arhiasïreendi: “Asï nemani euakuarhi je ambe ma nijtu chkuanderakua ambe jauatakuni nemani, sánderu sési, konforme ja je xáni jingontku engajtsï maiamunhajka”.*
15 Ireta erokuarhixapti eska Kristu janopiringa, jimboksïsï kurhamarhikuarhiendi* sini Juanu jindeespi Kristu.
16 Ísï jimbo, Juanu iáminduechani arhiaspti: “Jíksïni itsï jingoni itsï ataxaka, joperu jurhaxati ima enga sánderu uinhapika eskani ji ka ji no jamberini jukanchaska kuarhachiichani kuerandukuani. Imaksïni espiritu santu jingoni itsï ataati ka chpiri jingoni.
17 Jájkirhu kámaxati trigu kʼuanikutarakuani para ambantskantani jima enga trigu uauatajka ka para tánantani triguni ka jima patsani enga tʼirekua ambe patsajka. Joperu pajani chpiri ma jingoni kurhiraati enga méntku no pátakuarhijka”.
18 Ístu uánikua ambe arhistakuaspti iretarhu anapuechani ka méntku úndaxapti ambakiti aianhperakuani aianguani.
19 Erodesi Galileaisï juramuxapti ka Juanu xukasïreendi Erodesini, jimboka ermanu jémbeeri témba jingoni irekaxapka enga Erodíasi arhinheenga ka ístu jimboka uánikua ambe no sési niátaspka,
20 ka Erodesi ménderu no sési ambe niátaspti: ónhatarkuarhispti Juanuni.
21 Ka Juanu uánikua kʼuiripuechani itsï ataaspti ka ístu itsï ataspti Jesúsini. Enga Jesúsi kómarhini japka, auanda mítakuarhespti
22 ka espiritu santu xarharaspti jimboka ísï kétsespka komueska palomasï ma ka Jesúsini niraspti andarhierani ka nema uandaspti auandarhu uératini: “Tʼuri jindeeska juchiiti Sapi* engani xáni xénchajka. Jíkeni jaiapanhentasïnga”.
23 Jesúsi ma 30 uéxurhinisï jatirispti enga ueenapka jorhentpini. Uandanhasïreendi eskaJosé uájpeespka,Elí uájpa,
24 Matáti uájpa,Lebí uájpa,Melkí uájpa,Janaí uájpa,José uájpa,
25 Matatíasi uájpa,Amósi uájpa,Naúmi uájpa,Eslí uájpa,Nagái uájpa,
26 Maati uájpa,Matatíasi uájpa,Semeíni uájpa,Joseki uájpa,Jodá uájpa,
27 Joanáni uájpa,Resá uájpa,Sorobabeli uájpa,Sealtieli uájpa,Nerí uájpa,
28 Melkí uájpa,Adí uájpa,Kosami uájpa,Elmadami uájpa,Eri uájpa,
29 Jesúsi uájpa,Elieseri uájpa,Jorimi uájpa,Matati uájpa,Lebí uájpa,
30 Simeóni uájpa,Judasï uájpa,José uájpa,Jonami uájpa,Eliakimi uájpa,
31 Meleá uájpa,Mená uájpa,Matatá uájpa,Natáni uájpa,Dabidi uájpa,
32 Jesé uájpa,Obedi uájpa,Boasi uájpa,Salmóni uájpa,Nasóni uájpa,
33 Aminadabi uájpa,Arní uájpa,Esróni uájpa,Péresi uájpa,Judá uájpa,
34 Jakobu uájpa,Isaaki uájpa,Abraáni uájpa,Taré uájpa,Nakori uájpa,
35 Serugi uájpa,Reú uájpa,Pélegi uájpa,Éberi uájpa,Selá uájpa,
36 Kaináni uájpa,Arpaksadi uájpa,Semi uájpa,Noé uájpa,Lameki uájpa,
37 Matusaléni uájpa,Enoki uájpa,Jaredi uájpa,Maalaleli uájpa,Kaináni uájpa,
38 Enósi uájpa,Seti uájpa,Adáni uájpa,Tata Diosïiri uájpa.
Notecha
^ Griegu jimbo: “Sésari”. Ísïksï arhiasïreendi máru Roma anapu juramutiichani.
^ Ixú Erodesi Antipasini arhikuekaxati. Exe je Glosario, Erodesi.
^ Exe je Glosario, itsï atakuarhini; itsï atani.
^ O “profeta Isaíasi”.
^ O “ambe enga úraaka Tata Diosï para pʼímutantspini”.
^ O “kurhajkuarhi je”.
^ O “imani ambe jingoni engajtsï intsïnhajka”.
^ O “eratseendi imeecheeri mintsitarhu”.
^ O “Uátsïti”.
