Lukasï 4:1-44
-
Noambakiti tsʼéjkusïndi Jesúsini (1 a 13)
-
Jesúsi ueenasïndi Galilea aianhpini (14 ka 15)
-
Nóksï jaiapanhentasïndi Nasareti (16 a 30)
-
Kapernaúmi nirasïndi jima engaksï judiuecha tánguarhijka para Tata Diosïni kómarhini (31 a 37)
-
Ambakerantasïndi Simóniiri suegrani ka máteruechani (38 a 41)
-
Kʼuiripuechaksï jima exentasïndi Jesúsini nani enga pínandipka (42 a 44)
4 Jimajkani Jesúsi kéndikuspti iurhekua Jordánirhu uératini. Tata Diosï íntskuspti imeeri espiritu santu ka espiritu santu desierturhisï páspti
2 ka jimeesïsï jámaspti 40 jurhiatikua, ka Noambakiti tsʼéjkuspti. Ka jimboka no ma ambe arhaspka imani jurhiatikuechani jimbo, ueenaspti kʼarhimani.
3 Jimajkani Noambakiti arhispti: “Engari tʼu Tata Diosïiri uájpeeka, arhi ini tsakapuni eska kurhinda úkuarhintaaka”.
4 Joperu Jesúsi arhispti: “Karakata jarhasti: ‘No kurhinda jimbojkusï jatsiti para irekani kʼuiripu ma’”.
5 Tátsekua, Noambakiti iótakuarhu páspti ka sóntku exeraaspti iámu parhakpini anapu juramukuechani.
6 Jimajkani Noambakiti arhispti: “Jíkeni íntskuaka ambe engaksï xáni jatsikuarheka i juramukuecha ka ístukeni íntskuaka sésikua parari juramukuani, jimbokani ji intsïnhaska ini juramukuani ka ji uaaka né uéjkini sésikua íntskuni para juramuni.
7 Ísï jimbo, engareni ma xanharku kómarhiska, iámindu ambe chiitiuati”.
8 Jesúsi arhispti: “Karakata jarhasti: ‘Kómarhi chiiti Tata Diosï Jeobani ka imantku marhuaku’”.
9 Jimajkani Noambakiti páspti Jerusaléni ka jima peeraspti enga sánderu iótaka templurhu ka arhispti: “Engari tʼu Tata Diosïiri uájpeeka, kʼuanikurhi ixú uératini,
10 jimboka karakata jarhaska: ‘Ima juramukuauati imeeri ánjeliichani paraksïni jurhani jarhuatani ka paraksïni kuájchakuni’,
11 ka ‘Paatiksïni imeecheeri jájkiicha jimbo parari méntku no ma tsakapu jingoni atakuarhini jantsirirhu’”.
12 Jesúsi arhispti: “Uandakata jarhasti: ‘Asï jáma tsʼéjkuni chiiti Tata Diosï Jeobani’”.
13 Ísï jimbo, enga na kʼamarapkia tsʼéjkuni, Noambakiti jurajkuspti Jesúsini joperu jirinhakuntaxapti na jatini ménderu úpirini tsʼéjkuni.
14 Jimajkani espiritu santueri uinhapikua jimbo, Galilea niraspti. Ka niáraspti kánikua mítekateeni iámu jimeesïsï.
15 Ístu ueenaspti jorhentpini nani engaksï judiuecha tánguarhijka para Tata Diosïni kómarhini ka iáminduechaksï ambakiti ambe uandasïreendi imeeri ambe.
16 Tátsekua, Nasareti niraspti jima enga tʼarhexepka ka ísï eska na pʼindepka úni mándani sábadu, inchaspti nani engaksï judiuecha tánguarhijka para Tata Diosïni kómarhini ka jauaraspti para arhintani.
17 Jimajkani intsïtasptiksï Isaíasiiri karakateechani* enga Tata Diosïiri uandakua páriipka.* Ima pʼirakuspti ka exentaspti imani karakatani enga arhijka:
18 “Tata Diosï Jeobareni íntskusti imeeri espiritu santu, jimbokarini ima jíndeni erakuska parani ambakiti aianhperakua aianguani imeechani engaksï no ma ambe jatsikuarheka. Axastireni parani aianguani imeechani engaksï jupikakata jaka eskaksï jurajkunhaaka ka parani aianguani imeechani engaksï no újka exeni eskaksï éskantaaka, parani sési pʼikuastaantani imeechani engaksï no sési nitamakuarhini jaka,
19 parani uandantani ima uéxurhiniiri* enga Tata Diosï Jeoba jaiapanheantauaka kʼuiripuechani”.
20 Tátsekua, irhintaspti karakateechani* ka íntskuntaspti jima anapu jarhuajpirini* ka uaxakantaspti. Ískuksï pakaraspti exeni iámindu imeecha engaksï jima tánguarhintatini japka.
21 Ka ueenaspti arhiani: “I Karakata engajtsï kʼamaraka kurhaani, úkuarhixatiia iásï”.
22 Iáminduechaksï ueenaspti ambakiti ambe uandani imeeri ambe ka ískuksï pakarasïreendi engaksï kurhauenga na enga xáni sési ambe uandeenga. Uandasïreendiksï: “¿Andi no José uájpeeski?”.
23 Jimajkani Jesúsi arhiaspti: “Jíksïni sési jimbo arhisïnga eskajtsïni chá ísï arhiaka eska na uandanhajka: ‘Engari doktoriika, tʼu ueena ambakekuarhentani’. Ka ístujtsïni arhiaka: ‘Ambe engachi xáni kurhandika eskari úska Kapernaúmi, májkueni ú chiiti iretarhu’”.
24 Ka ístu arhiaspti: “Jíksïni sési jimbo arhisïnga eska Tata Diosïiri uandakua párini ma, nóksï jaiapanhentasïnga imeeri iretarhu.
25 Jíksïni sési jimbo arhisïnga eska Elíasiiri jurhiatikuechani jimbo, uánikua tsïndiichaksï jarhaspka Israeli jiánisï enga méntku no janipka tanimu uéxurhini ka terujkani, ka enga kʼarhingua japka iámu jimeesïsï.
26 Joperu Tata Diosï no arhispti Elíasini eska imani uarhiitiichani nipiringa jarhuataani, sánderu sési, arhispti eska nipiringa jarhuatani tsïndini ma enga Sarepta anapuepka enga Sidónisï jaka.
27 Ístu, Eliseueri jurhiatikuechani jimbo, enga Tata Diosïiri uandakua páriipka, uánikua kʼuiripuechaksï jarhaspti Israeli engaksï lepra pʼamenchani japka, joperu ima no imeechani ambakeraantaspti, Naamanintku enga Siria anapuepka”.
28 Jimajkani engaksï ini ambe kurhaapka, kánikuaksï ikiaspti imeecha engaksï jima japka nani engaksï judiuecha tánguarhijka para Tata Diosïni kómarhini.
29 Ísï jimbo, jauarasptiksï ka petaatantasptiksï iretarhu uératini ka iótakuarhuksï páspti juáta ma jimbo paraksï jima uératini uekopani, imani juáta jimbo nani enga imeecheeri ireta japka.
30 Joperu ima terujkanisï nitamakuaspti ka kéndikuspti jima uératini.
31 Tátsekua Kapernaúmi kétsemaspti, ireta ma enga Galilea jaka. Jima jorhendaasïreendi kʼuiripuechani mándani sábadu
32 ka imeechaksï ísku pakarasïreendi engaksï exeenga na enga xáni sési jorhentpienga, jimboka ísï jorhentpisïreenga eska kʼuiripu ma enga Tata Diosï sésikua íntskuka para jorhentpini.
33 Ka jima engaksï judiuecha tánguarhijka para Tata Diosïni kómarhini, achamasï ma jarhaspti enga espiritu ma incharhitini japka, demoniu ma enga mátirku uinhachapka:
34 “¡Ah! Jesúsi Nasareti anapu, ¿ambechi jatsiski jucha tʼungini jingoni? ¿Jurhaskijtsïni kʼamajkuni? Ji sési míteska neeskiri tʼu: tʼuri jindeeska ima enga Pímbinhasïika ka enga Tata Diosï axaka”.
35 Joperu Jesúsi xukaspti demoniuni ka arhispti: “Pínasku ka uérhintsï indeni achamasïni”. Jimajkani demoniu kuáskuspti achamasïni kʼuiripuechani japarini ka tátsekua uérhintaspti ka no ma ambe úkuspti.
36 Engaksï na kurhaapka ini ambe, iáminduechaksï ísku pakaraspti ka ueenasptiksï arhijperani: “Exe je na enga juramukua jingoni uandajka. No sési jásï espirituechani jamberi juramukuasïndi ¡ka iichaksï uérhiantasïndi kʼuiripuechani!”.
37 Ísï jimbo, iámu jimeesïsï mítekuarhixaptia ambe enga Jesúsi xáni ueenga.
38 Tátsekua uéntaspti jima engaksï judiuecha tánguarhijka para Tata Diosïni kómarhini ka Simóniiri kʼumanchikuarhu inchaakuspti. Simóniiri suegra uinhamu tinharaxapti* ka arhisptiksï eska jarhuatapiringa sáni.
39 Ísï jimbo, andarhieraspti ka xukaspti tinharakuani ka uarhiiti sési pʼikuarherantaspti. Ka uarhiiti jirejiresï jauaraspti ka ueenaspti úmakuantani para tʼireraani.
40 Enga chúrini japkia, kʼuiripuechaksï ueenaspti juákuani iámindu pʼamenchatiichani engaksï mámaru ambe pʼamenchani japka. Ka ima iáminduechani pʼájtsïkuasïreendi para ambakeraantani.
41 Ka ístu, demoniuechaksï uérhiantasïreendi uánikua kʼuiripuechani, uinhachaparinksï: “¡Tʼuri jindeeska Tata Diosïiri Uájpa!”. Joperu Jesúsi xukaasïreendi demoniuechani ka no jurajkuasïreendi eskaksï uandapiringa, jimbokaksï mítespka eska ima jindeespka Kristu.
42 Enga erandepkia, Jesúsi uéraspti ka jimeesïsï niraspti enga pínandipka.* Joperu kʼuiripuechaksï niraspti jirinhantani ka jimaksï niáraspti nani enga ima japka ka arhisptiksï eska imeechani jingoni pakarapiringa.
43 Joperu Jesúsi arhiaspti: “Ístuni jatsiska para máteru ireteecharhisï nirani aianhpini ambakiti aianhperakua Tata Diosïiri Reinueri, jimbokani inde ambesïni juka úni”.
44 Ísï jimbo, Jesúsi Judeaisï jámaspti aianhpini jimeesïsï engaksï judiuecha tánguarhijka para Tata Diosïni kómarhini.
Notecha
^ O “roiuni”.
^ O “enga profeteepka”.
^ O “tiempueri”.
^ O “roiuni”.
^ O “imani enga jima japka nani engaksï judiuecha tánguarhijka para Tata Diosïni kómarhini”.
^ O “chupichupijkuxapti”, “kalentura jukaspti”.
^ O “piindipka”.
