Lukasï 5:1-39
-
Kurucheechanksï pʼímaasïndi milagru ma jimbo; orheta chúxapatiicha (1 a 11)
-
Jesúsi ambakerantasïndi achamasïni ma enga lepra pʼamenchani japka (12 a 16)
-
Ambakerantasïndi achamasïni ma enga no újka manakuarhini (17 a 26)
-
Arhisïndi Lebíni eska niuaka chúxapani (27 a 32)
-
Kurhamarhisïndiksï kʼarhindeeri ambe (33 a 39)
5 Ma xanhari, Jesúsi Jenesareti uanamukutenisï* jarhaspti, jima anhandetixapti ka uánikua kʼuiripuechaksï niraspti andarhierani paraksï Tata Diosïiri uandakuani kurhajtsïtani.
2 Marirhu uanamukutenisï, tsimani barkuechani exeaspti. Jimaksï kétsespti kurucha pʼitamatiicha ka kurucha pʼitamatarakuechanksï* juparhiantaxapti.
3 Jesúsi barkurhu jataspti ka arhispti Simónini eska pʼakamapiringa sáni, inde barku Simóniiriispti. Jiájkani uaxakaspti ka úndaspti jima uératini jorhendaani kʼuiripuechani.
4 Enga kʼamarapkia jorhentpini, arhispti Simónini: “Jimeesïsï pá barkuni enga sánderu jauameka ka jatsimaa je kurucha pʼitamatarakuechani parajtsï kurucheechani pʼitamaani”.
5 Joperu Simóni arhispti: “Jorhentpiri, erantskutaskachi uinhamu ánchikuarhini ka nóchi ma kurucha pʼitamaska; joperu jimbokari tʼusï ísï uandani jaka, jatsimauakachkania”.
6 Ka engaksï na jatsimaapkia uánikua kurucheechanksï pʼímaaspti, xáni uánikua engaksï jamberi kurucha pʼitamatarakuecha karunharhini japkia.
7 Ísï jimbo, níjkurhakuasptiksï imeechani engaksï jingoni májku kʼéri ánchikuarhienga paraksï nirani jarhuataani. Imeechaksï máteru barkurhu jarhaspti, ka nirasptiksï ka ueenasptiksï uiniraani barkuechani. Barkuechaksï xáni uinirixapti engaksï úndapka inchameni.*
8 Enga Simóni Pedru exepka ini ambe, andarhieraspti Jesúsini, tinguikuatsespti ka arhispti: “Tata, méntkuni no sáni jukanchaska tʼungini jingoni jarhani, jimbokani ji pekadoriiska”.
9 Simóni Pedru ísï arhispti jimboka ima ka imeecha engaksï imani jingoni japka, ískuksï pakareeraspti jimbokaksï uánikua kurucheechani pʼitamaaspka.
10 Ístu, Santiagu ka Juanu, Sebedeu uájpeecha, ískuksï pakareeraspti, íksï májku kʼéri ánchikuarhisïreendi Simóni jingoni. Joperu Jesúsi arhispti Simónini: “Ásteru chéia, iásï para orhepatini, jirinhaantauakari kʼuiripuechani ísï eskari na jámajka jirinhaantani kurucheechani”.
11 Ka engaksï na andantapkia barkuecha jingoni marirhu uanamukuteni, jimaksï jurajkuspti iámu ambe ka nirasptiksï chúxapani Jesúsini.
12 Ma jurhiatikua, enga Jesúsi iretarhu ma jámani japka, jimajku niáraspti acheeti ma enga iámu uinirhikuarhetini japka lepra. Enga exepka Jesúsini, tinguixurhispti ka arhispti: “Tata, ji míteska eskarini tʼu uaaka ambakerantani* engari uékaska”.
13 Ísï jimbo, Jesúsi ióxurhantaspti, pʼárhispti ka arhispti: “Ji uékasïnga. Ambakenta”. Ka achamasï jirejiresï jupinaspti lepra.
14 Jimajkani Jesúsi arhispti achamasïni eska no nemani jámapiringa aianguni ka arhispti: “Joperu níia exeni saserdotini, ka jimbokari ambakentaskia, pá kéjtsïtakuani enga Moisési juramuka parakaksï exeaka eskari ambakentaskia”.
15 Nájkiruka Jesúsi ísï arhipka, méntku iápurisï mítekuarhixapti ambe enga xáni úni japka Jesúsi ka uánikua kʼuiripuechaksï tánguarhintasïreendi paraksï kurhajtsïtani ambe enga Jesúsi uandeenga ka ístu para ambakeraantani.
16 Ka sáno méntkisï, Jesúsi iauanisï nirasïreendi para kómarhini Tata Diosïni.
17 Imani jurhiatikuechani jimboisï, Jesúsi kʼumanchikua ma jimbo jorhentpixapti ka jimaksï jarhaspti uaxakatini máru fariseuecha ka imeecha engaksï jorhentpijka ambe enga Lei arhijka. Íksï iápuru ireteecharhisï uératini jurhaspti engaksï Galilea ka Judeaisï jaka ka ístu Jerusaléni uératini. Ka Tata Diosï Jeoba íntskuspti Jesúsini uinhapikua para úni ambakeraantani pʼamenchatiichani.
18 Ka jimajkuksï niáraspti máru achamasïicha engaksï kʼuírakua ma jimbo* pápka kʼuiripuni ma enga no ueenga manakuarhini ka jánguarhintaxaptiksï inchaatani paraksï jima peerani nani enga Jesúsi japka.
19 Jámasptiksï incharani joperuksï no úspti jimboka uánikua kʼuiripu jarhaspka. Ísï jimbo, karharasptiksï kʼumanchikuarhu ka pʼikujtsïtantasptiksï, ka jimeesïsïksï késkuspti pʼamenchatini kʼuírakua ma jimbo* ka meruksï jima peeraspti enga xáni uáni kʼuiripu japka, Jesúsiiri orhepani jimbo.
20 Enga ima exepka na engaksï xáni mintsikeenga ima kʼuiripuecha, arhispti imani enga no ueenga manakuarhini: “Amigu, tʼuri puáminhaantaskia chiiti pekaduechani”.
21 Jimajkani karariicha ka fariseuechaksï ueenaspti eratseni ka uandanksï: “¿Neeski i achamasï enga no sési ambe uandani jaka Tata Diosïiri ambe? ¿Andi no Tata Diosïjkusï újki puátspeantani pekaduechani?”.
22 Joperu Jesúsi mítespti ambe engaksï eratseni japka ka arhiaspti: “¿Ambejtsïsï eratseni jaki chaari mintsitarhu?
23 ¿Ambe sánderu fásiliiski? ¿Uandani ‘puáminhaantaskaria chiiti pekaduechani’ o uandani ‘jauara ka xanharia’?
24 Joperu parakajtsï exeaka eska Achamasïiri Uájpa jatsiska juramukua parhakpinirhu para puátspeantani pekaduechani...”. Jimajkani, arhispti imani enga no ueenga manakuarhini: “Jíkeni arhisïnga: jauara, tarhata chiiti kʼuírakuani* ka níia níntani chiiti kʼumanchikuarhu”.
25 Enga Jesúsi ísï arhipka, achamasï jauaraspti iáminduechani japarini, tarhataspti imeeri kʼuírakuani nani enga apondetini japka ka níntaspti imeeri kʼumanchikuarhu ka kʼéri ambe arhipantaspti Tata Diosïni.
26 Ka iáminduechaksï ísku pakaraspti ka ueenasptiksï kʼéri ambe arhini Tata Diosïni. Nóksï úsïreendi jakajkuni,* jimboksïsï uandeendi: “Iásï kʼóruchi kánikua ambakiti ambe exeska”.
27 Tátsekua enga na i ambe úkuarhipkia, uéntaspti kʼumanchikuarhu ka exespti impuestu kobrarpitini ma enga Lebí arhinheenga, jima uaxakatixapti nani enga impuestu maiampinhajka, ka arhispti: “Júreni chúxapuni”.
28 Ka ima jauaraspti ka jima jurajkuspti iámindu ambe ka niraspti chúxapani.
29 Tátsekua, Lebí tʼirekua ma úspti imeeri kʼumanchikuarhu para Jesúsini erokani. Uánikua impuestu kobrarpitiichaksï jarhaspti jima ka ístuksï jima jarhaspti máteru kʼuiripuecha engaksï imeecha jingoni tʼireni japka.*
30 Ini ambe jimbo, fariseuecha ka karariichaksï ueenaspti no sési arhiani Jesúsiiri chúxapatiichani ka arhiasptiksï: “¿Andijtsïsï impuestu kobrarpitiicha ka no sési úriichani* jingoni tʼirejki ka itsïmani?”.
31 Enga Jesúsi kurhaapka ini ambe, arhiaspti: “Imeecha engaksï sési jámani jaka nóksï uétarhinchasïndi doktorini, joperu pʼamenchatiichaksï kʼóru jo.
32 No jurhaska ióarhiani imeechani engaksï sési jámajka, sino pekadoriichani paraksï móantani”.
33 Imeechaksï arhispti: “Juanueri chúxapatiichaksï someni kʼarhinda jarhasïndi* ka kómarhisïndiksï Tata Diosïni ka ístuksï májkueni úsïndi fariseuecheeri chúxapatiicha. Joperu chiiti chúxapatiichaksï tʼiresïndi ka itsïmani”.
34 Jesúsi arhiaspti: “¿Andi chá úsïni úni eskaksï nobiueri amigu jémbeecha kʼarhinda jauaka ka jini nobiu útasï imeecha jingoni jarhani?
35 Joperu niáraati ma jurhiatikua engaksï euanhantaaka nobiuni ka jiánksï kʼóru kʼarhinda jauati”.
36 Ístu ísï arhiaspti arini ejemplu jingoni: “No nema kachukusïndi jimbanhi takusïni para tánharhitani imani takusïrhu enga jiánguarhikia. Enga nema ísï úpiringa, jimbanhi takusï sánderu antsinharhikupirindi. Ka ístuksï nóteru terukupirindia jimboka máechakua jimbanhiiska ka máteru jiánguarhistia.
37 Ístu, no nema jatsirasïndi jimbanhi binu imani jatakuecharhu* engaksï jiánguarhikia. Enga nema ísï úpiringa, binu chararaapirindi jatakuechani ka binu iámu tsïnchepirindi* ka jatakuechaksï méntku nóteru marhuapirindia.
38 Sánderu sési, kʼuiripu jatsisti para jimbanhi jatakuecharhu jatsirani jimbanhi binuni.
39 Enga nema arhajkia ióntki anapu binu, nóteru uékasïndia jimbanhi binu arhani, jimboka uandasïnga: ‘Ióntki anapu binu sánderu áspisti’”.
Notecha
^ Griegu jimbo: “Jenesareti anapu lagu”. Ístu ísï mítekateespti komueska Galilea anapu mari.
^ O “cheremakuechanksï”.
^ O “jirhimeni”, “súmeni”.
^ O “pímbinhajkuntani”.
^ O “kʼuírakueni jásï ma jimbo”.
^ O “kʼuírakueni jásï ma jimbo”.
^ O “kʼuírakueni jásïni”.
^ O “Kánikuaksï chérakata jarhaspti”.
^ O “engaksï imeecha jingoni uaxaparhakupka mesarhu”.
^ O “pekadoriichani”.
^ O “pʼindestiksï no ma ambe arhani”.
^ O “jatakuecharhu engaksï sïkuiriiriika”. Exe je Glosario, jatakua sïkuiriiri.
^ O “tʼájpatsepirindi”.
