Lukasï 7:1-50
-
Na enga xáni mintsikajka sondaduecheeri orhejtsïkuti ma (1 a 10)
-
Jesúsi tsítantasïndi tsïndiiri uájpani ma Naíni (11 a 17)
-
Sési ambe uandasïndi Juanueri ambe, ima enga itsï ataajka kʼuiripuechani (18 a 30)
-
Jesúsi uandasïndi eskaksï kastigarinhaaka imeecha engaksï no kurhandirajka (31 a 35)
-
Uarhiiti ma puáminhaantasïndi pekaduechani (36 a 50)
-
Ejemplu achamasïicheeri engaksï kántspeni japka (41 a 43)
-
7 Enga ima na arhiapkia iretarhu anapuechani ambe enga uékeenga arhiani, inchaakuspti Kapernaúmi.
2 Ka jima anapu sondaduecheeri orhejtsïkuti ma, jántspirini ma jatsispti enga kánikua xéncheenga. Jántspiri uarhixaptia jimboka uinhamu pʼamenchaxapka.
3 Enga kurhaapka Jesúsiiri ambe, axaaspti máru judiuecheeri orhejtsïkutiichani paraksï arhini Jesúsini eska nipiringa sáni ambakerantani imeeri jántspirini.
4 Imeechaksï niraspti nani enga Jesúsi japka ka méntkuksï úndaspti arhini: “Jarhuata sáni ini achamasïni,
5 jimboka ima uékaasïnga ixú anapu kʼuiripuechani ka imajtsïni úchisti kʼumanchikuani nani engachi tánguarhijka para Tata Diosïni kómarhini”.
6 Ísï jimbo, Jesúsi niraspti imeecha jingoni. Joperu engaksï niárani japkia kʼumanchikuarhu, sondaduecheeri orhejtsïkuti axaaspti máru amigu jémbeechani paraksï arhini Jesúsini: “Tata, asï ísku jatini jurhani ja, jimbokani no jukanchaska eskari inchaakuaka juchiiti kʼumanchikuarhu.
7 Jimbokenisï no ji nika jirinhantani. Joperu tʼu nomasi juramu ka juchiiti jántspiri ambakentaati.
8 Jimbokani jíjtuni úsïnga ambe engajtsïni juramuchijka ka kaasïnga sondaduechani engani ji juramukuajka. Máechakuani arhisïnga ‘¡Ní!’ ka nirasïndi, ka máteruni arhisïnga ‘¡Jútkini!’ ka jurhasïndi, ka juchiiti jántspirini arhisïnga ‘¡Arini ambe ú!’ ka ísï úsïndi”.
9 Enga Jesúsi kurhaapka ini ambe, ísku pakaraspti, pʼirhikuarhispti ka arhiaspti imani kʼuiripuechani engaksï chúxapani japka: “Jíksïni arhisïnga eska no ma kʼuiripu jarhaska Israeli enga xáni mintsikajka eska i kʼuiripu”.
10 Engaksï i kʼuiripuecha kʼuanhatsentapka kʼumanchikuarhu, exesptiksï eska jántspiri nóteru pʼamenchaxapkia.
11 Tátsekua, iretarhu ma niraspti enga Naíni arhinhajka. Imeeri chúxapatiichaksï imani jingoni niraspti ka ístu uánikua kʼuiripuecha.
12 Enga andamukuerani japkia iretarhu anapu puertarhu, exespti eskaksï uarhirini ma petaatantaxapka. Uarhiriiri amamba tsïndiispti ka ini tumbintkusï kánguarhiendi* ka uánikua iretarhu anapuechaksï niraxapti uarhiitini pámbeni.
13 Enga Tata exepka uarhiitini, kánikua pʼamojkuspti ka arhispti: “Ásteru ueraia”.
14 Jirejiresï andarhieraspti ka pʼárhispti imani kʼuírakuani* engaksï jingoni pántani japka uarhirini ka imeecha engaksï páni japka anhaxurhisptiksï. Jimajkani Jesúsi uandaspti: “Tumbi, tʼunginisï arhini jaka: ¡jauara!”.
15 Jimajkani, tumbi enga uarhirini japka tsíntaspti, uaxakaspti ka ueenaspti uandani ka Jesúsi íntskuntaspti amambani.
16 Iáminduechaksï ísku pakaraspti* ka ueenasptiksï kʼéri ambe arhini Tata Diosïni, uandasïreendiksï: “Tata Diosï juchantsïni jingoni peerasti imeeri uandakua párini ma”,* ka “Miántasti imeeri iretani”.
17 Ka iámu Judeaisï ka jimeesïsï mítekuarhispti ambe enga Jesúsi ueenga.
18 Jimajkani, Juanueri chúxapatiichaksï niraspti aianguni Juanuni iámindu ini ambe.
19 Ísï jimbo, Juanu pʼitajkuarhiaspti imeeri tsimani chúxapatiichani ka arhiaspti eskaksï kurhamarhipiringa Tatani: “¿Tʼueski engari jupiringa ochi máteru nemani erokaa?”.
20 Engaksï niárapka jima enga Jesúsi japka, achamasïichaksï arhispti: “Juanu, enga itsï ataajka* kʼuiripuechani, axastijtsïni paraksïni kurhamarhini sini tʼueski engari jupiringa ochi máteru nemani erokaa”.
21 Ka ima jandora, Jesúsi uánikua kʼuiripuechani ambakeraantaspti engaksï uinhamu pʼamenchani japka ka petarhitaantaspti no sési jásï espirituechani ka éskataraantaspti uánikua kʼuiripuechani engaksï no ueenga exeni.
22 Ima arhiaspti: “Ní je ka aiangu je Juanuni ambe engajtsï exeka ka kurhaani: imeecha engaksï no ueenga exeni iásïksï exesïndia, imeecha engaksï no ueenga xanharani xanharasïndiksïa, imeecha engaksï lepra pʼamenchani japka ambakentastiksïa, imeecha engaksï no ueenga kurhaani kurhaasïndiksïa, uarhiriichaksï tsítanhantaxati* ka imeecha engaksï no ma ambe jatsikuarheka aiangunhaxatiksï ambakiti aianhperakuani.
23 Tsípisïndi ima enga no ma ambe ójkutajka* parareni jíndeni jakajkuni”.*
24 Engaksï níntani japkia imeecha enga Juanu axaapka, Jesúsi ueenaspti aianguani kʼuiripuechani Juanueri ambe. Arhiaspti: “¿Ambejtsï niraspi exeni desierturhu? ¿Pʼatamuni ma enga tarhiata jiniani ka ixúani manatajka?
25 Jiájkani, ¿ambejtsï niraspi exeni? ¿Achamasïni ma enga ambakiti* xukuparhakua jukarini jaka? Jimboka imeecha engaksï sési jásï xukuparhakua jukajka ka engaksï uánikua ambe jatsikuarheka, juramutiicheeri kʼumanchikuechani jimboksïsï jarhajti.
26 Joperu jiájkani, ¿ambejtsï niraspi exeni? ¿Tata Diosïiri uandakua párini ma? Jíksïni arhisïnga eska jo, joperu sánderu kʼéri ambeesti eska Tata Diosïiri uandakua pári ma.
27 Juanueri ambeesti enga karakata jaka: ‘¡Exe! ¡Axaaka juchiiti uandakua párini chiiti orhepatini jimbo,* imakeni orhechepaati parakeni pareju jántskachini xanharuni!’.
28 Jíksïni arhisïnga eska no ma kʼuiripu jarhaska* enga sánderu kʼéri ambeeka eska Juanu, joperu ima enga sánderu sapichu ambeeka Tata Diosïiri Reinurhu, sánderu kʼéri ambeesti eska ima”.
29 Engaksï iretarhu anapuecha ka imeecha engaksï impuestu kobrarpijka kurhaapka ini ambe, uandasptiksï eska Tata Diosï iámindu ambe sési úsïnga, ísïksï uandaspti jimboka Juanu itsï ataaspka.
30 Joperuksï fariseuecha ka imeecha engaksï sési míteka ambe enga Lei arhijka nóksï uékasti úni ambe enga Tata Diosï uéjka, jimbokaksï no uékaska eska Juanu itsï ataapiringa.
31 Jesúsi seguirispti arhiani: “¿Néni jingoni terukutantaua iásï anapu kʼuiripuechani? ¿Néksï ísï jámasïni?
32 Ísïistiksï eska sapiicha engaksï merkadurhisï uaxakatini jaka ka engaksï uinhachatsperajka: ‘Flautaksïni kústachiska joperujtsï chá no uarhaska; no sési pʼikuarheraparinksïni pirechiska joperujtsï chá no ueraska’.
33 Jimboka jurhaska Juanu, enga itsï ataajka kʼuiripuechani, ima no arhasïndi kurhinda nijtu binu arhajki ka chájtsï uandasïnga: ‘Demoniu ma incharhitixati’.
34 Ka jurhasti Achamasïiri Uájpa enga ima kʼóru tʼirejka ka itsïmani ka chájtsï uandasïnga: ‘¡Exe je! ¡Jukari tʼiresïndi ka jukari binu arhasïndi, sési pájperasïndi imeechani jingoni engaksï impuestu kobrarpijka ka no sési úriichani* jingoni!’.
35 Néna uéjkiini, enga kʼuiripu ma méntkisï sési jámajka, xarhatasïndi eska jánhaskatiiska”.
36 Ka fariseu ma méntku úndaxapti arhini eska nipiringa imani jingoni tʼireni. Ísï jimbo, Jesúsi inchaakuspti fariseueri kʼumanchikuarhu ka uaxaparhakuspti mesarhu.
37 Ka uarhiiti ma enga ísï mítekateepka iretarhu eska no sési ambe niátasïreenga, mítespti eska Jesúsi fariseueri kʼumanchikuarhu tʼirexapka* ka jatakua sapichu ma páspti enga tsakapu urapiti jingoni úkata japka. Ima jatakua sapichu uinirixapti aseiti pʼuntsumiti.
38 Jesúsiiri tátsepani jimbo niáraspti, ka imeeri jantsirirhu niáraspti ueparini ka kuakandurhataxapti imeeri uekua jingoni ka imeeri jauiri jingoni kutsundukuntaxapti. Putindukuxapti ka aseiti pʼuntsumiti atandukuspti.
39 Ima fariseu enga Jesúsini pʼímarhipka exespti ini ambe, ka eratsespti: “Enga i achamasï sési jimbo Tata Diosïiri uandakua páriipiringa mítepirindi eska inde uarhiiti enga pʼárhini jaka no sési ambe niátasïnga”.
40 Joperu Jesúsi mítespti ambe enga eratseni japka, jimbosï arhipti: “Simóni, uékasïngakeni arhini ambe ma”. Ka ima arhispti: “¿Ambe úskia Jorhentpiri?”.
41 “Tsimani acheetiichaksï sentabu kánguxapti achamasïni ma enga sentabu kuánitpeenga; acheeti ma 500 denariu* kánguxapti ka máteru 50.
42 Ka jimbokaksï no úxapka maiamuntani, ima achamasï enga sentabu kuánitpeenga arhiaspti eskaksï nóteru ma kánguxapkia. Jimajkani, ¿né sánderu uékaa achamasïni?”.
43 Simóni arhispti: “Ji arhijka eska ima acheeti enga sánderu kánguni japka”. Ka Jesúsi arhispti: “Ísïisti”.
44 Jimajkani pʼirhikuarhispti, uarhiitini eratespti ka arhispti Simónini: “¿Exexakiri ini uarhiitini? Inchaakuska chiiti kʼumanchikuarhu ka tʼureni no íntskuska itsï parani jupanduni, joperureni i uarhiiti kuakandurhatasti indeeri uekua jingoni ka kutsundukuntastireni indeeri jauiri jingoni.
45 Tʼureni no putinharhikuska joperureni i uarhiiti kʼóru tʼuinisï putindukustia desde engani janoka.
46 Nóreni atajtsïkuska aseiti joperureni i uarhiiti kʼóru atandukusti aseiti pʼuntsumiti.
47 Jimbokenisï ji arhijka eska nájkiruka uarhiiti xáni uánikua ambe no sési niátaka, puáminhaantasti indeeri pekaduechani jimbokarini kánikua uékaska. Joperu ima enga sántku ambe puáminhantajka, sántkusï uékpijti”.
48 Jimajkani arhispti uarhiitini: “Tʼuri puáminhaantaskia chiiti pekaduechani”.
49 Imeecha engaksï imani jingoni uaxaparhakupka mesarhu, úndasptiksï arhijperani: “¿Andi neeski i achamasï enga pekaduechani jamberi puátspeantajka?”.
50 Joperu Jesúsi arhispti uarhiitini: “Tata Diosïkeni pʼímutantasti jimbokari mintsikaska. Níia níntani ka ásteru uandanhiaia”.
Notecha
^ Griegu jimbo: “máechakua uájpankusï kánguarhiendi”.
^ O “kʼuírakueni jásïni”.
^ O “kánikua chéspti”.
^ O “profetani ma”.
^ Exe je Glosario, itsï atakuarhini; itsï atani.
^ Griegu jimbo: “jauatanhantaxati”.
^ O “ima enga no téksarhutajka”.
^ O “mintsikani”.
^ Griegu jimbo: “kuatapiti”.
^ Griegu jimbo: “tʼungini japarini”.
^ O “eska no ma kʼuiripu jarhaska engaksï uarhiitiicha kánguarhiajka”.
^ O “pekadoriichani”.
^ O “uaxaparhakuspka mesarhu”.
^ Exe je Glosario, denariu.
