Lukasï 8:1-56
-
Máru uarhiitiichaksï pámbetasïndi Jesúsini (1 a 3)
-
Ejemplu achamasïiri enga trigu jatsikujka (4 a 8)
-
Andisï Jesúsi ejempluechani jingoni jorhentpeeni (9 ka 10)
-
Ambe enga arhikuekajka achamasïiri ejemplu enga trigu jatsikujka (11 a 15)
-
No nema ójchakurasïndi kandela ma (16 a 18)
-
Jesúsiiri amamba ka imeeri ermanu jémbeecha (19 a 21)
-
Jesúsi úsïndi eska pínandintaaka jiáni enga kʼéri ma janijka (22 a 25)
-
Arhiasïndi máru demoniuechani eskaksï kúchiichani niuaka incharhiani (26 a 39)
-
Jairu uájpa; uarhiiti ma pʼárhikusïndi xukuparhakuani Jesúsini (40 a 56)
8 Ísï tátsekua, Jesúsi niraspti kʼérati ireteecharhisï ka ireta sapirhatiicharhu para aianhpini ka uandantani ambakiti aianhperakua Tata Diosïiri Reinueri. Ka 12 apostoliichaksï imani jingoni jámaxapti.
2 Ístu, imani jingonksï niraxapti máru uarhiitiicha engaksï petarhitanhantapka no sési jásï espirituecha ka engaksï ambakeranhantapka jimbokaksï pʼamenchaxapka. Jima niraxapti: María Magdalena —ini uarhiitinksï siete demoniuecha uérhintaspti—,
3 ístu Juana Kusa témba —i achamasï exeni jarhasïreendi iámindu ambe Erodesiiri kʼumanchikuarhu—, Susana ka uánikua máteru uarhiitiichaksï jarhuataasïreendi imeecheeri jatsikuarhekua ambe jingoni.
4 Ka mándani ireta jimbo, uánikua kʼuiripuechaksï kúparhakuaspti imani kʼuiripuechani engaksï nireenga Jesúsini andarhierani, ka Jesúsi arini ejemplu jingoni jorhendaaspti:
5 “Achamasï ma, niraspti trigu jatsikuni. Ka enga kʼuájpani* japka, máru semiiechaksï xanharu jimbo andatseeraspti ka tʼauandurhiasptiksï, ka pájaruechaksï ántskantaspti.
6 Máteruechaksï jima andatseeraspti nani enga tsakapu jatandepka ka engaksï na tsikipkia, kʼarhisptiksï jimbokaksï itsï kueratanchaspka.
7 Máteruechaksï jima andatseeraspti nani enga chekamikua ambe jukapka, ka jimbokaksï májku kʼéri andaraspka, chekamikua ambe ójchakuraaspti planteechani.
8 Joperuksï máteruecha jima andatseeraspti nani enga ambakiti echeri japka ka engaksï na tsikipkia, ueenasptiksï frutu jukani, máruksï 100 xanhari sánderu kánikua jukaspti”. Ka tátsekua arhiaspti: “¡Ima enga kurhandijka, eska jingontku kurhandiaka!”.
9 Joperuksï imeeri chúxapatiicha kurhamarhispti ambe arhikuekasïreeni inde ejemplu.
10 Jesúsi arhiaspti: “Chájtsï sésikua jatsiska para kurhanguni indeni ambe enga Tata Diosïiriika,* jo, imeeri Reinueri ambe. Joperuksï máteruecha ejempluechani jingoni jorhendanhasïndi iámindu ambe paraksï no exeni nájkirukaksï exejka ka nóksï kurhanguni nájkirukaksï kurhaajka.
11 Ari ambe arhikuekasïndi inde ejemplu. Semiia jindeesti Tata Diosïiri uandakua.
12 Ima semiiecha engaksï xanharu jimbo andatseeraka, jindeestiksï ima kʼuiripuecha engaksï kurhaajka Tata Diosïiri uandakuani, joperu tátsekua jurhasïndi Noambakiti ka kénditasïndi Tata Diosïiri uandakuani imeecheeri mintsitarhu paraksï no jakajkuni ka nóksï pʼímutantskata uérani.
13 Ima semiiecha engaksï jima andatseeraka nani enga tsakapu jatandeka, imeestiksï engaksï kurhaajka Tata Diosïiri uandakuani ka tsípikua jingonksï jiókuarhisïndi, joperuksï no iauani inchaskuasïndi sïranguechani. Jakajkusïndiksï ma tiempu, joperuksï nóteru mintsikasïndia engaksï niárajka uandanhiata ambe jatsini.
14 Ima semiiecha engaksï jima andatseeraka nani enga chekamikua ambe jukaka, imeestiksï engaksï kurhaajka Tata Diosïiri uandakuani, joperuksï jurajkutakuarhesïndi eska uandanhiata ambe, jatsikuarhekua ambe ka tsitikua ambe támisï páuaka, ísï jimbo, i ambe iámu ójchakuraasïndi ka nóksï niárasïndi ambanharhi frutu jukani.
15 Imeecha engaksï jima andatseerapka nani enga ambakiti echeri japka, imeestiksï engaksï ambakiti mintsita ma jingoni kurhaajka Tata Diosïiri uandakuani, imeecheeri mintsitarhuksï patsasïndi, ka tekaantaparini, sánderuksï uánikua semiia jukasïndi.
16 ”No nema tixatasïndi* kandela* ma para tátsekua porhechi ma jingoni ójchakurani o para kamarhu inchajchukutini peerani. Sánderu sési, kandela jatakuarhu ma peerasïndi para erajkutaraani imeechani engaksï inchaakuaka.
17 Jimboka ambe enga jískakata jaka, niáraati exenhantani, ka ístu ambe enga méntku no mítekuarhika, ma jurhiani niáraati mítekuarhini.
18 Ísï jimbo, jingontku kurhaa je, jimboka ima enga jatsika, niáraati sánderu intsïnhani, joperu ima enga no jatsika, asta imani ambe euanhantaati enga ísï exejka enajki jatsikuarhe”.
19 Jimajkani, imeeri amamba ka ermanu jémbeechaksï jurhaspti exeni, joperuksï no úspti andarhierani jimboka uánikua kʼuiripu jarhaspka.
20 Ísï jimbo, nirasptiksï aianguni Jesúsini: “Exe, chiiti naandi ka chiiti ermanuechaksï uérakua jarhasti ka tʼunginksïninha uékasïndi”.
21 Ima arhiaspti: “Íksï jindeesti juchiiti naandi ka juchiiti ermanuecha jimbokaksï kurhaasïnga Tata Diosïiri uandakuani ka úsïndiksï ambe enga arhijka”.
22 Ma jurhiatikua, ima barkurhu ma jataspti imeeri chúxapatiichani jingoni ka arhiaspti: “Ju je jiniani uanamukuteni”. Ísï jimbo, parhimesptiksï.
23 Engaksï parhimeni japka lagurhu, Jesúsi kʼuíspti. Jimajkani, ma repentku ueenaspti kʼéri ma janini ka uinhamu tarhiani ka itsï iámu jataxaptia barkurhu ka barku inchamexaptia.*
24 Ísï jimbo, nirasptiksï tsínharhitani ka arhisptiksï: “¡Jorhentpiri! ¡Jorhentpiri! ¡Ixúchi uarhiaka!”. Jimajkani Jesúsi jauaraspti, uinhachakuspti tarhiatani ka itsïni enga xáni no sési nirani japka; ka mátirku ióspti ka méntku pínandintaspti.
25 Jiájkani Jesúsi kurhamarhiaspti: “¿Andijtsïsï no mintsikajki?”. Joperuksï ima kánikua chérakata jarhaspti ka ískuksï pakaraspti. Arhijperasïreendiksï: “¿Andi némindu jindeeski i achamasï? Jimboka tarhiatani ka itsïni jamberi juramukuasïnga ka iichaksï kurhajchasïndi”.
26 Ka niárasptiksï jiniani uanamukuteni, jimeesïsï engaksï Jerasa anapuecha irekaka, enga Galilea uératini jiniani parhikuteni jaka.
27 Enga Jesúsi na kétsepkia barkurhu, jimajku andaraspti iretarhu anapu achamasï ma enga demoniu ma incharhitini japka. Ióniisptia enga xásku jámeenga ka jimeesïsï irekaspti nani engaksï uarhiriicha jatsinhantajka ka no kʼumanchikua ma jimbo.
28 Enga exepka Jesúsini, mátirku uinhachaspti, niraspti andarhierani ka tinguixurhispti ka uinhachaparini arhispti: “Jesúsi, Tata Diosïiri Uájpa enga auandarhu jaka, ¿ambe jatsiski ji tʼungini jingoni? Kurhachexakakeni eskarini no ma ambe úchiaka”.
29 —Jimboka Jesúsi méntku uinhamarhikuxapka no sési jásï espirituni eska uérhintapiringa imani achamasïni. Demoniu someni incharhisptia* ka uánikua xanhariksï jupikasptia imani achamasïni kadeneechani jimbo ka tiámu ambe jimbo ka exeni jarhasïreendiksï, joperu ima kachundurhiasïreendi kadeneechani ka demoniu iauanisï pásïreendi imani achamasïni—.
30 Jesúsi arhispti: “¿Nári arhinhasïni?”. Ka ima arhispti: “Ji Lejioniiska”. Jimbokaksï uánikua demoniuecha incharhitixapka.
31 Ka méntkuksï arhixapti eska no uekanhaapiringa jima enga jauanhika.*
32 Ima jurhiatikua jimbo, uánikua kúchiichaksï jámaxapti tʼireni juátarhisï ka méntkuksï arhixapti eska jurajkuapiringa paraksï kúchiichani nirani incharhiani. Ka Jesúsi jurajkuaspti.
33 Jimajkani demoniuechaksï uérhintaspti imani achamasïni ka kúchiichanksï incharhiaspti ka iámindu kúchiichaksï lagurhu kʼuanimespti ka jimaksï uarhimespti.
34 Ka imeecha engaksï kúchiichani eranguani japka, uiriisptiksï sïpakuarhini engaksï exepka ambe enga úkuarhipka ka nirasptiksï uandantani iretarhu ka iápuru jimeesïsï.
35 Jimajkani kʼuiripu niraspti exeni aberi ambesï úkuarhipi. Engaksï na niárapkia jima enga Jesúsi japka, exentasptiksï imani achamasïni engaksï demoniuecha uérhintapka, jima jarhaspti uaxandetini nani enga Jesúsi japka, xukuparhatini ka miákua jingoni, ka kʼuiripuechaksï kánikua chérakuarhespti.
36 Ka imeecha engaksï exepka ambe enga úkuarhipka, aianguasptiksï máteruechani na enga niárapka ambakentani ima achamasï engaksï demoniuecha incharhitini japka.
37 Ka uánikua kʼuiripuecha engaksï jimeesïsï irekapka, Jerasa anapuecheeri echeri jimbo, kánikuaksï chérakuarhespti. Jimboksïsï arhipti Jesúsini eska uéakuntapiringa jima uératini. Jimajkani Jesúsi seguirispti jatantani barkuni para níntani.
38 Ima achamasï engaksï demoniuecha uérhintapka, arhixapti eska imajtu nipiringa imani jingoni. Joperu Jesúsi axantaspti ka arhispti:
39 “Níia níntani chiiti kʼumanchikuarhu ka iáminduechani aiangua ambe enga úka Tata Diosï tʼungini jimbo”. Ísï jimbo, achamasï iámu iretarhu jámaspti uandantani ambe enga xáni úpka Jesúsi imani jimbo.
40 Enga Jesúsi kʼuanhatsentapkia, uánikua kʼuiripuechaksï niraspti tsípikua jingoni kúmuni, jimbokaksï iáminduecha erontaxapka.
41 Jimajkani, jurhaspti achamasï ma enga Jairu arhinheenga, jima orhejtsïkusïreendi nani engaksï judiuecha tánguarhijka para Tata Diosïni kómarhini. Tinguixurhikuspti Jesúsini ka úndaspti kurhakuni eska nipiringa sáni imeeri kʼumanchikuarhu
42 jimboka uarhixapkia imeeri nanaka sapichu enga 12 uéxurhinisï jatiriipka ka imantkusï kánguarhiendi.*
Enga Jesúsi xanharu jimbo nirani japkia, uánikua kʼuiripuechaksï niraxapti chúxapani engaksï jamberi katsinhapani japka.
43 Ka jima jarhaspti uarhiiti ma enga 12 uéxurhini páni japkia enga no ueenga iurhiri anhaxustani* ka no nemani exexapti enga úpiringa ambakerantani.
44 Uarhiiti tátsepanisï andarhieraspti ka jupirhukukuspti imeeri takusïni ka uarhiiti jirejiresï anhaxustaspti iurhiri.
45 Jesúsi kurhanguarhispti: “¿Nérini pʼárhiski?”. Ka iáminduechaksï arhisïreendi eska no nema. Pedru arhispti: “Jorhentpiri, uánikua kʼuiripuechaksïni andarhieraxati ka katsinhaxatiksïni”.
46 Joperu Jesúsi arhiaspti: “Nemarini pʼárhisti, jimbokani pʼikuarheraska na engareni uérhika uinhapikua”.
47 Enga uarhiiti exepka eska Jesúsi kuenta íntskukuarhespka, andarhieraspti Jesúsini manaraparini,* tinguikuatsespti ka iáminduechani japarini uandantaspti andisï pʼárhipi ka na enga jirejiresï ambakentapka.
48 Joperu Jesúsi arhispti: “Ija, ambakentaskaria jimbokari mintsikaska. Níia níntani ka ásteru uandanhiaia”.
49 Ka enga Jesúsi útasï uandani japka, jimajku niáraspti achamasï ma enga Jairueri* kʼumanchikuarhu uératini jupka ka arhispti: “Chiiti nanaka sapichu uarhistia. Ásteru ójkutani jaia Jorhentpirini”.
50 Enga Jesúsi kurhaapka ini ambe, arhispti Jairuni: “Asï jáma chéni, tʼu nomasi mintsika ka ima sési jauati”.
51 Enga niárapkia kʼumanchikuarhu, no nemani jurajkuspti eska inchaakupiringa imani jingoni, Pedruntku, Juanuni, Santiaguni ka nanaka sapichueri taati jémbeechantku.
52 Iámindu kʼuiripuechaksï ueraxapti ka uánhexaptiksï xáni no sési pʼikuarherani nanaka sapichuni jimbo. Ísï jimbo, Jesúsi arhiaspti: “Ásteru ueraia je jimboka nanaka sapichu no uarhiska, kʼuíxati”.
53 Engaksï kʼuiripuecha kurhaapka ini ambe, ueenasptiksï teresmarhuni jimbokaksï mítespka eska nanaka sapichu uarhispkia.
54 Joperu Jesúsi jupijkuspti ka arhispti: “Iurhitskiri, ¡jauara!”.
55 Nanaka sapichu tsíntaspti* ka jirejiresï jauaraspti. Jimajkani Jesúsi arhiaspti kʼuiripuechani eskaksï tʼirerapiringa nanaka sapichuni.
56 Ísïisti, imeeri taati jémbeechaksï kánikua tsípixapti, joperu Jesúsi arhiaspti eskaksï no nemani jámapiringa aianguni ambe enga úkuarhipka.
Notecha
^ O “jatsikupani”, “kʼuanijpani”.
^ Exe je Glosario, ambe ma enga Tata Diosïiriika.
^ O “étskusïndi”.
^ O “lámpara”.
^ O “jirhimexaptia”, “súmexaptia”.
^ O jamberi “Ióniisptia enga demoniu ísï no sési kámeenga”.
^ Griegu jimbo: “abismurhu”. Exe je Glosario, abismu.
^ Griegu jimbo: “máechakua uájpankusï kánguarhiendi”.
^ O “jámapkia emorrajia jingoni”.
^ O “tsirintsirirhikuarhiparini”.
^ Jairu orhejtsïkutiispti jima engaksï judiuecha tánguarhienga para Tata Diosïni kómarhini.
^ O “Nanaka sapichuni incharhintaspti imeeri uinhapikua para irekani”.
