Lukasï 9:1-62
-
Dose apostoliichaksï arhinhasïndi néna aianhpini (1 a 6)
-
Jesúsi ísku pakatasïndi Erodesini (7 a 9)
-
Jesúsi tʼireraasïndi 5 mili achamasïichani (10 a 17)
-
Pedru uandasïndi eska Jesúsi jindeeska Kristu (18 a 20)
-
Jesúsi uandasïndi eska uándikunhaaka (21 ka 22)
-
Ambe enga jatsika para úni ima enga Jesúsini chúxapajka (23 a 27)
-
Jesúsi ménderueni jáxentasïndi (28 a 36)
-
Ambakerantasïndi tumbini ma enga demoniu ma incharhitini japka (37 a 43a)
-
Jesúsi ménderu uandasïndi eska uándikunhaaka (43b a 45)
-
Imeeri chúxapatiichaksï arhirperasïndi jimbokaksï uékasïnga exeni né sánderu kʼéri ambeeski (46 a 48)
-
“Ima engaksïni no ikiachejka, chánksïni jingoniisti” (49 ka 50)
-
Nóksï jiókasïndi Jesúsini ireta sapichu ma jimbo enga Samaria jaka (51 a 56)
-
Ambe úni para Jesúsini chúxapani (57 a 62)
9 Jimajkani, tánaantaspti 12 apostoliichani ka íntsaaspti uinhapikua ka juramukua paraksï demoniuechani petarpiantani ka ístu paraksï ambakeraantani pʼamenchatiichani.
2 Ka axaaspti paraksï Tata Diosïiri Reinueri ambe uandantani ka paraksï ambakeraantani pʼamenchatiichani.
3 Arhiaspti: “Asï ambe ma pá je ni tenhexkuarhikua,* nijtu sutupu ma tʼirekua ambe jingoni, nijtu kurhinda, nijtu sentabu;* ístu, asï jáma je páni máteru xukuparhakua para mórhekuarhini.
4 Engajtsï kʼumanchikua ma jimbo inchaakuaka, jima pakara je ka ménderu jima uératini ní je.
5 Joperu engaksïni iretarhu ma kʼuiripuecha no sési jiókaska, uarhandunta je* tʼupurini engajtsï na uéakuntani jámaakia paraksï imeecha mítetini jarhani eskaksï no sési úska”.
6 Ísï jimbo, imeechaksï iámu ireta sapirhatiichani jimbo niraspti aianhpini ambakiti aianhperakuani ka iápurisïksï ambakeraantasïreendi pʼamenchatiichani.
7 Ka Erodesi,* enga Galileaisï juramuni japka, niáraspti míteni ambe enga xáni úkuarhini japka ka no úsïreendi jakajkuni. Jimbokaksï máru uandasïreenga eska Juanusï tsítanhantapka,
8 máteruechaksï uandasïreendi eska Elíasisï xarhantapka, ka máteruechaksï uandasïreendi eska ióntki anapu Tata Diosïiri uandakua pári* masï tsíntapka.
9 Erodesi uandasïreendi: “Engani ji kachujchakutarkuarhika Juanuni, jiájkani, ¿neeski i achamasï enga kʼuiripu uandajka eska xáni uánikua ambe úxaka?”. Jimbosï uékeendi exeni.
10 Engaksï apostoliicha kʼuanhatsentapka, aiangusptiksï Jesúsini ambe engaksï xáni úpka. Jiájkani Jesúsi máteru naniisï paaspti, ireta ma jimbo enga Betsaida arhinhajka.
11 Joperu kʼuiripuechaksï mítespti ka nirasptiksï chúxapani. Jesúsi tsípikua jingoni jiókaaspti ka ueenaspti Tata Diosïiri Reinueri ambe aianguani ka ambakeraantaspti imeechani engaksï pʼamenchani japka.
12 Ka jimboka chúrixapkia, 12 apostoliichaksï andarhieraspti Jesúsini ka arhisptiksï: “Axaantia kʼuiripuechani paraksï ireteecharhisï nirani engaksï ixújkisï jaka, paraksï jirinhani nani pakarani ka paraksï tʼirekua ambe piákuarhini jimbokachi iauani jámaxaka”.
13 Joperu Jesúsi arhiaspti: “Chá íntsaa je ambe ma paraksï tʼireni”. Ka imeechaksï arhispti: “Jucha no ma ambe kámaxaka, solu sinko kurhinda ka tsimani kurucheechani, ¿o jucha niua piáni tʼirekua para xáni uáni kʼuiripuni tʼirerani?”.
14 Ka nóchka ma 5 mili achamasïichaksï jarhaspi jima. Joperu Jesúsi arhiaspti imeeri chúxapatiichani: “Arhia je kʼuiripuechani eskaksï ma sinkuentachani kúnguarhintaaka ka eskaksï uaxakaaka”.
15 Ka ísïksï úspti: iáminduechanksï arhiaspti eskaksï uaxakapiringa.
16 Tátsekua pʼíkuaspti sinko kurhindeechani ka tsimani kurucheechani, auandarhu eranchespti ka kómarhispti Tata Diosïni.* Ka enga na arhukuapkia, imeeri chúxapatiichani íntsaaspti paraksï imeecha kʼuiripuechani intsïtaani.
17 Ísï jimbo, iáminduechaksï tʼirespti ka sésiksï uiniarhaspti. Tátsekuaksï tánantaspti kurhindani enga pakarapka ka 12 tsïkiataksï tánantaspti.
18 Tátsekua, enga Jesúsi jandiajku kómarhini japka Tata Diosïni, imeeri chúxapatiichaksï andarhieraspti ka ima kurhamarhiaspti: “¿Na uandasïni kʼuiripu eskani neeski ji?”.
19 Imeechaksï arhispti: “Juanu, enga itsï atauenga* kʼuiripuechani. Joperu máteruechaksï uandasïndi eskari Elíasiiska. Ka máteruechaksï uandasïndi eska ióntki anapu Tata Diosïiri uandakua párisï ma tsíntaka”.
20 Ka ima arhiaspti: “¿Ka chá na uandasïni eskani neeski ji?”. Pedru arhispti: “Tʼuri jindeeska Kristu, enga Tata Diosï axaka”.
21 Jimajkani arhiaspti eskaksï no nemani jámapiringa aianguni.
22 Ka ístu arhiaspti: “Achamasïiri Uájpa jatsisti para kánikua no sési nitamakuarhini ka orhejtsïkutiicha, kʼérati saserdotiicha ka karariichaksï no jaiapanhentaati; ístu, jatsisti para uándikunhani ka tanimu jurhiatikua jimbo tsítanhantani”.*
23 Tátsekua iáminduechani arhiaspti: “Engareni nema uéjka chúxapuni, eska ísku exekuarhiaka,* eska pauani pauani paaka imeeri chkarini enga jindeeka para no sési nitamakuarhini* ka eskarini méntkisï chúxapaaka.
24 Jimboka ima enga uékaaka kuájchakuni imeeri tsípikuani, masi uaati tsïtani. Joperu ima enga tsïtaaka imeeri tsípikuani jimboka juchiiti chúxapatiiska, niáraati tsípikua jatsini.
25 Jimboka, ¿ambe marhuakua kʼuiripuni ma enga niáraska iámu parhakpinini andani, joperu niárani tsïnchekuarhini o jandiajku no sési úkuarhinchani?
26 Jimboka enga nema kʼuratseska jíndeni jimbo ka imani ambe jimbo engani ji uandajka, Achamasïiri Uájpajtu kʼuratseati imani kʼuiripuni jimbo jiáni enga juuaka imeeri juramukua jingoni, Taati jémbeeri juramukua jingoni ka pímbinharhati ánjeliicheeri juramukua jingoni.
27 Jíksïni sési jimbo arhisïnga eskaksï jarhaska máru ixú engaksï no uarhiaka astakaksï exeaka Tata Diosïiri Reinuni”.
28 Ísï úkuarhispti i ambe. Ka ma ochu jurhiatikisï tátsekua enga Jesúsi ini ambe uandapka, juáta ma jimbo karhamaspti para Tata Diosïni kómarhini ka pájtaspti Pedruni, Juanuni ka Santiaguni.
29 Ka enga Jesúsi kómarhini japka, ménderueni xarhanharhispti ka imeeri xukuparhakua meremerexexapti xáni tʼuputʼupuxeni.
30 Ka ma repentkuksï xarharaspti tsimani achamasïicha Jesúsini jingonksï uandontskuarheni jarhani, jindeesptiksï: Moisési ka Elíasi.
31 Engaksï xarhantapka, meremerexexaptiksï ka uandontskuarhexaptiksï ambe enga úkuarhipiringa Jerusaléni jiáni enga Jesúsi níntapiringia.
32 Pedru ka imeecha engaksï nípka pámbeni, kʼuiiraxaptiksïa; joperu engaksï na sési tsínharhipkia, exesptiksï eska Jesúsi meremerexexapka ka ístuksï exeaspti tsimani achamasïichani engaksï imeeri máekandu jimbo japka anhandetini.
33 Engaksï i tsimani achamasïicha sánhani arhini japka jarharini Jesúsini, Pedru arhispti: “Jorhentpiri, ¡xáni sési engachi ixú jaka! Ju je uaani tanimu kʼumanchikuechani sïkuiriiri: ma para tʼu, ma para Moisési, ka máteru para Elíasi”. Joperu no mítespti ambe enga uandani japka.
34 Ka enga Pedru ini ambe uandani japka, nube ma úkuarhispti ka ueenaspti ójchakuraani. Enga nube iámu ójchakuraapkia, imeechaksï chérakuarhespti.
35 Jiájkani nuberhu uératini kurhaakuarhispti nema uandani jarhani: “I jindeesti juchiiti Sapi* engani ji erakuka. Kurhajcha je”.
36 Enga na i ambe kurhaakuarhipka, Jesúsiterkusï pakaraptia jima. Imeechaksï no ma ambe uandantaspti ka jiánisïksï no nemani aianguspti ambe engaksï xáni exepka.
37 Ísï pauandikua, engaksï na kétsentapkia juátarhu, uánikua kʼuiripuechaksï niraspti kúmuni.
38 Ka imani kʼuiripuechani jingoni, achamasï ma jarhaspti enga uinhachapka: “¡Jorhentpiri, ju sáni exeni juchiiti tatakani! Ínkusïni kánguarhijka.
39 Exe, no sési jásï espiritu ma incharhisïndi ka inde ueenasïndi uinhachani. Méni enga incharhijka no sési jásï espiritu, ataki pʼíntasïndi ka kʼuruata* uéchasïndi. Ísterku jurajkusïndi ka no uékani jarhasïndi uérhintani.
40 Arhiaska chiiti chúxapatiichani eskaksï petarhitantapiringa, joperuksï no ústi”.
41 Ka Jesúsi uandaspti: “¡Iásï anapu kʼuiripuecha engajtsï támisï jámani jaka ka engajtsï xáni no mintsikajka! ¿Na jatini jamberi jatsia para chánksïni jingoni jarhani ka tekaachentanksïni? Juácherini chiiti tatakani”.
42 Enga tumbi nirani japka Jesúsini andarhierani, demoniu kuáskuspti, no sési kántaspti ka úspti eska tumbini ataki íntskupiringa. Joperu Jesúsi xukaspti no sési jásï espirituni, ambakerantaspti tumbini ka íntskuntaspti taati jémbani.
43 Iáminduechaksï ísku pakareeraspti engaksï exepka na enga xáni uinhapika Tata Diosï.
Iáminduechaksï ísku pakarasïreendi imani ambe jimbo enga xáni úni japka Jesúsi. Jimajkani Jesúsi arhiaspti imeeri chúxapatiichani:
44 “Jingontku kurhaa je ambe engaksïni arhiaka ka asï méni mirikurhi je, jimboka Achamasïiri Uájpa kʼuiripuecheeri jájki jimbo jurajkunhaati”.*
45 Joperu imeechaksï no kurhanguspti ambe enga Jesúsi uandani japka. Nóksï úspti kurhanguni jimbokaksï no jánhastanhaspka ka nóksï tekaasïreendi kurhamarhini ambesï arhikuekaani japi.
46 Jimajkani ueenasptiksï arhirperani né sánderu kʼéri ambeespi.
47 Ka jimboka Jesúsi mítespka ambe engaksï eratseni japka imeecheeri mintsitarhu, tataka sapichuni ma peeraspti imeeri máekandu jimbo
48 ka arhiaspti: “Ima enga sési erokajka ini tataka sapichuni jimboka juchiiti chúxapatiiska, ístureni sési erokasïndi jíndeni; ka ima engareni sési erokajka jíndeni, ístu sési erokasïndi imani engareni axaka. Jimboka ima enga ísï jámajka eska sánderu sapichu ambe, ima sánderu kʼéri ambeesti”.
49 Enga Juanu kurhaapka ini ambe, arhispti: “Jorhentpiri, exeskachi kʼuiripuni ma enga demoniuechani petarpiantani japka chiiti nombri jimbo; joperu jimboka no juchantsïni jingoni jámasïnga, arhiskachi eska no jámapiringa indeni ambe úni”.
50 Joperu Jesúsi arhispti: “Asï jáma je pʼínguni, jimboka ima engaksïni no ikiachejka, chánksïni jingoniisti”.
51 Ka enga niárani japkia jurhiatikua para Jesúsi auandarhu karhanchentani, sési eratsekata jatsisptia Jerusaléni nirani.*
52 Ísï jimbo, axaaspti máru uandakua páriichani eskaksï orhepapiringa. Imeechaksï niraspti ka ireta sapichu ma jimboksï inchaakuspti enga Samaria jaka, paraksï iámu ambe listu jatsikuni Jesúsini.
53 Joperu jima anapuechaksï no jiókaspti Jesúsini, jimboka ima sési eratsekata jatsispkia Jerusaléni nirani.*
54 Engaksï indeni ambe exepka Santiagu ka Juanu, engaksï imeeri chúxapatiipka, arhisptiksï Jesúsini: “Tata, ¿ochi juramua eska auandarhu uératini chpiri uekorheaka para kʼamajkuani ini kʼuiripuechani?”.
55 Joperu Jesúsi pʼirhipakuarhespti ka xukaaspti.
56 Ísï jimbo, máteru ireta sapichu jimboksï niraspti.
57 Ka engaksï xanharu jimbo nirani japka, nema arhispti: “Jíkeni chúxapaaka nani engari tʼu niuaka”.
58 Joperu Jesúsi arhispti: “Kúmu jiuatsïichaksï jatsikuarhesti nani inchakuarhintani ka auandarhu anapu pájaruechaksï jatsikuarheasti xerekuechani, joperu Achamasïiri Uájpa no jamberi jatsikuarhesti ambe iájchani”.
59 Tátsekua, Jesúsi arhispti máteruni: “Júreni chúxapuni”. Ima achamasï arhispti: “Tata, jurajkuni orheta juchiiti taatini nirani jatsintani”.
60 Joperu ima arhispti: “Jurajkua eskaksï uarhiriicha jatsiantauaka imeecheeri uarhiriichani. Joperu tʼu ní ka iápurisï uandantsï Tata Diosïiri Reinueri ambe”.
61 Ka máteru arhispti: “Tata, jíkeni niuaka chúxapani, joperu jurajkuni orheta juchiiti kʼumanchikuarhu anapuechani nirani uandanuani”.
62 Jesúsi arhispti: “Ima enga tarheni jarhajka ka tátsepanisï eraani para exeni ambe enga jurajkuka, no uaati inchani* Tata Diosïiri Reinurhu”.
Notecha
^ O “tékskurhikua”.
^ Griegu jimbo: “plata”.
^ O “uauandunta je”.
^ Ixú Erodesi Antipasini arhikuekaxati. Exe je Glosario, Erodesi.
^ O “profeta”.
^ O “ka újchakuraspti”.
^ Exe je Glosario, itsï atakuarhini; itsï atani.
^ Griegu jimbo: “jauatanhantani”.
^ O “eska nóteru irekaakia para imajkumindu”.
^ Exe je Glosario, chkari enga jindeeka para no sési nitamakuarhini.
^ O “Uátsïti”.
^ O “pʼuruata”.
^ O “traisionariinhaati”.
^ Griegu jimbo: “Jerusalénisï eraaspti”.
^ Griegu jimbo: “Jerusalénisï eraaspkia”.
^ O “no marhuauati”.
