Markusï 1:1-45
-
Juanu, enga itsï atauenga kʼuiripuechani, aianhpisïndi (1 a 8)
-
Jesúsi itsï atakuarhisïndi (9 a 11)
-
Satanási tsʼéjkusïndi Jesúsi (12 ka 13)
-
Jesúsi ueenasïndi Galilea aianhpini (14 ka 15)
-
Ueenasïndi erakuani imeeri chúxapatiichani (16 a 20)
-
Demoniuni ma petarhitantasïndi (21 a 28)
-
Jesúsi uánikuechani ambakeraantasïndi Kapernaúmi (29 a 34)
-
Jimeesïsï nirasïndi kómarhini enga pínandipka (35 a 39)
-
Ambakerantasïndi kʼuiripuni ma enga lepra pʼamenchani japka (40 a 45)
1 Ísï ueenasïndi ambakiti aianhperakua tata Jesukristueri enga jindeeka Tata Diosïiri Uájpa.
2 Ísï úkuarhispti eska na karakata jaka Isaíasiiri karakata jimbo, enga jindeepka Tata Diosïiri uandakua pári:* “—¡Exe! Axaaka juchiiti uandakua párini chiiti orhepatini jimbo, imakeni orhechepaati parakeni pareju jántskachini xanharuni—.
3 Nema kurhaakuarhixati uinhachani jarhani desierturhisï: ‘¡Listu jatsi je Tata Diosï Jeobaeri xanharuni! Ú je eskaksï Tata Diosïiri xanharuecha pareju jándu pakaraaka’”.
4 Juanu, enga itsï atauenga* kʼuiripuechani, desierturhisï jámaxapti aianhpini eskaksï kʼuiripuecha jatsispka para itsï atakuarhini paraksï xarhatani eskaksï móantaspkia ka ísïksï puáminhaantani imeecheeri pekaduechani.
5 Ísï jimbo, iámindu imeecha engaksï Judeaisï irekapka ka iámindu Jerusaléni anapuechaksï nirasïreendi exeni. Ima iurhekua Jordánirhu itsï ataasïreendi ka imaksï kʼuiripuni japarini uandantasïreendi ambe engaksï no sési úni japka.*
6 Juanueri xukuparhakua, kameiueri pʼunguari jingoni úkata jarhaspti ka sintu ma sïkuiriiri jónguarhisïreendi ka chochuechani auasïreendi ka ístu juátarhu anapu tékolmena* arhasïreendi.
7 Ka ini ambe aianhpisïreendi: “Ima enga ísï tátsekua juuaka eskani ji, sánderu uinhapitiisti ka ji no jamberini jukanchaska para kʼutitseni ka kuarhachiichani kuerandukuani.
8 Jíksïni itsï jingoni itsï ataska, joperu imaksïni espiritu santu jingoni itsï ataati”.
9 Imani jurhiatikuecha jimbo, Jesúsi Nasareti uératini jurhaspti enga Galilea jaka ka Juanu itsï ataspti Jordánirhu.
10 Enga uémentapkia itsïirhu, ima exespti eska auanda jirejiresï mítakuarhespka ka eska espiritu santu ísï kétsexapka komueska palomasï ma ka eska Jesúsini andarhieraxapka.
11 Ka nema auandarhu uératini uandaspti: “Tʼuri jindeeska juchiiti Sapi* engani xáni xénchajka. Jíkeni jaiapanhentasïnga”.
12 Ka espiritu santu jirejiresï úspti eska Jesúsi desierturhisï nipiringa.
13 Ka 40 jurhiatikua jámaspti desierturhisï ka Noambakiti tsʼéjkuspti. Jimeesïsï jámaspti nani engaksï jámajka animaliicha engaksï no sési jámajka, joperu ánjeliichaksï íntskusïreendi ambe enga uétarhincheenga.
14 Tátsekua engaksï na jupikapkia Juanuni, Jesúsi Galilea niraspti para uandantani ambakiti aianhperakuani Tata Diosïiri ambe.
15 Uandasïreendi: “Niárastia ima jurhiatikua enga uaxastakata japkia ka Tata Diosïiri Reinu janoxatiia. Móanta je, ka jakajku je* ambakiti aianhperakuani”.
16 Enga Jesúsi xanharani japka Galilea anapu marirhu uanamukutenisï, exespti Simónini ka ermanu jémba Andrésini kʼuanimaaxaptiksï kurucha pʼitamatarakuechani* jimbokaksï kurucha pʼitamatiispka.
17 Jesúsi arhiaspti: “Chúxapajtsïni je ka jíksïni arhiaka nénajtsï uaa jirinhaantani kʼuiripuechani ísï eskajtsï chá na jámajka jirinhaantani kurucheechani”.
18 Imaksï jirejiresï jurajkuaspti kurucha pʼitamatarakuechani ka chúxapasptiksï.
19 Sántku xanharaspti ka exespti Santiaguni Sebedeu uájpani ka Juanuni imeeri ermanu jémbani, barkurhuksï jarhaspti ka kurucha pʼitamatarakuechanksï sïriantaxapti,*
20 ima jirejiresï ióarhiaspti, ísï jimbo, imaksï barkurhu jurajkuspti taati jémba Sebedeuni imeeri ánchikuarhiriicha jingoni ka chúxapasptiksï.
21 Ka niárasptiksï* Kapernaúmi.
Ka enga ueenapka sábadu jurhiatikua, Jesúsi inchaspti nani engaksï judiuecha tánguarhijka para Tata Diosïni kómarhini ka ueenaspti jorhentpini.
22 Kʼuiripuechaksï ísku pakaraspti engaksï exepka na enga xáni sési jorhentpienga, jimboka ísï jorhentpisïreenga eska kʼuiripu ma enga Tata Diosï sésikua íntskuka para jorhentpini ka no ísï eskaksï karariicha.
23 Ka meru ima jandorisï, achamasï ma jarhaspti jima engaksï judiuecha tánguarhijka para Tata Diosïni kómarhini ka imani achamasïni no sési jásï espiritu ma incharhitixapti ka uinhachaspti:
24 “Jesúsi Nasareti anapu, ¿ambechi jatsiski jucha tʼungini jingoni? ¿Jurhaskijtsïni kʼamajkuni? Ji sési míteska neeskiri tʼu: ¡tʼuri jindeeska ima enga Pímbinhasïika ka enga Tata Diosï axaka!”.
25 Joperu Jesúsi xukaspti demoniuni ka arhispti: “¡Pínasku ka uérhintsï indeni achamasïni!”.
26 Ka no sési jásï espiritu no sési kántaspti imani achamasïni ka mátirku uinhachaspti ka tátsekua uérhintaspti.
27 Iáminduechaksï ísku pakaraspti ka ueenasptiksï mámaru ambe uandani. Uandasïreendiksï: “¿Ambe arhikuekasïni i ambe? ¡Jimbanhi ambe jorhentpixati! No sési jásï espirituechani jamberi juramukuasïndi ka íksï kurhajchasïndi”.
28 Ísï jimbo, sóntku mítekuarhispti Jesúsiiri ambe iámu jimeesïsï, méntku iámu Galileaisï.
29 Tátsekua, uéntasptiksï jima uératini nani engaksï judiuecha tánguarhijka para Tata Diosïni kómarhini, ka Santiagu ka Juanu jingoni, nirasptiksï Simóni ka Andrésiiri kʼumanchikuarhu.
30 Ka Simóniiri suegra* apojtsïkuspti jimboka tinharaxapka* ka jirejiresïksï aianguspti Jesúsini.
31 Ima andarhieraspti ka jupijkuspti para jauatani. Uarhiiti sési pʼikuarherantaspti ka ueenaspti úmakuantani para tʼireraani.
32 Enga jurhiata inchajtsïkupkia ka chúrini jarhania, kʼuiripuechaksï ueenaspti juákuani iámindu pʼamenchatiichani ka imeechani engaksï demoniuecha incharhiatini japka.
33 Iámindu iretarhu anapuechaksï kʼumanchikuarhu jamukuteni jarhaspti.
34 Ísï jimbo, ambakeraantaspti uánikua kʼuiripuechani engaksï mámaru ambe pʼamenchani japka ka uánikua demoniuechani petarhitaantaspti, joperu no jurajkuasïreendi eskaksï demoniuecha uandapiringa, jimbokaksï mítespka eska ima jindeespka Kristu.*
35 Xarhentku, enga nótki erandeni japka, Jesúsi jauaraspti ka uéraspti; jimeesïsï niraspti enga pínandipka* ka ueenaspti jima kómarhini Tata Diosïni.
36 Joperu Simóni ka imeecha engaksï imani jingoni japka, iápurisïksï jámaspti jirinhantani
37 ka engaksï na exentapkia, arhisptiksï: “Iáminduechaksïni jámaxati jirinhantani”.
38 Joperu ima arhiaspti: “Ju je máteru ireteecharhisï engaksï ixú no iauani jaka parani jimajtuni uandantani ambakiti aianhperakuani, jimbokani inde ambesïni juka úni”.
39 Jesúsi iámu Galileaisï niraspti aianhpini, jima engaksï judiuecha tánguarhijka para Tata Diosïni kómarhini ka petarhitaantasïreendi demoniuechani.
40 Kʼuiripu ma andarhieraspti enga lepra pʼamenchani japka, tinguixurhikuspti ka arhispti: “Ji míteska eskarini tʼu uaaka ambakerantani* engari uékaska”.
41 Jesúsi kánikua pʼamojkuspti, ióxurhantaspti, pʼárhispti ka arhispti: “Ji uékasïnga. Ambakenta”.
42 Ka achamasï jirejiresï jupinaspti lepra ka ambakentaspti.
43 Jimajkani Jesúsi arhispti eska níntapiringa, joperu kʼóru mátirku arhispti:
44 “Asï nemani aiangu, joperu níia exeni saserdotini, ka jimbokari ambakentaskia, pá ambe enga xáni Moisési juramuka parakaksï exeaka eskari ambakentaskia”.
45 Joperu enga na níntapkia, ima achamasï méntku iápurisï jámaspti uandantani ambe enga úkuarhipka. Ísï jimbo, Jesúsi nóteru úsïreendia ísku inchaakuni ireteecharhisï, uéramanisï pakarasïreendi jimeesïsï enga no nema irekapka, joperuksï útasï uápurisï anapuecha jurhasïreendi exeni.
Notecha
^ O “profeta”.
^ Exe je Glosario, itsï atakuarhini; itsï atani.
^ O “imeecheeri pekaduechani”.
^ O “tékua”.
^ O “Uátsïti”.
^ O “mintsika je”.
^ O “cheremakuechani”.
^ O “sési jájkuantaaxapti”, “takusï uaantaxapti”.
^ Ixú Jesúsini arhikuekaxati ka máru imeeri chúxapatiichani.
^ O “tarhamba”.
^ O “chupichupijkuxapka”, “kalentura jukaspka”.
^ O jamberi “jimbokaksï mítespka neespi ima”.
^ O “piindipka”.
^ O “pímbinhajkuntani”.
