Markusï 10:1-52
-
Temungurhiriicha ka diborsiu (1 a 12)
-
Jesúsi újchakuraasïndi máru sapiichani (13 a 16)
-
Ambe enga kurhanguarhipka achamasï ma enga jatsikuarheriika (17 a 25)
-
Ambe enga kʼuiripu ma jatsika para jurajkuni Reinuni jimbo (26 a 31)
-
Jesúsi ménderu uandasïndi eska uándikunhaaka (32 a 34)
-
Ambe engaksï kurhajkuarhijka Santiagu ka Juanu (35 a 45)
-
Jesúsi euajpiantasïndi uánikua kʼuiripuechani (45)
-
-
Jesúsi ambakerantasïndi acheetini ma enga no ueenga exeni enga Bartimeu arhinhajka (46 a 52)
10 Tátsekua kéndikuspti jima uératini ka jima niáraspti nani enga ueenakuarhijkia Judea, Jordánirhu parhikuteni. Ka ménderu uánikua kʼuiripu niraspti andarhierani. Ka ueenaspti jorhendaani ísï eska ima na pʼindepka.
2 Jimajkani nirasptiksï andarhierani máru fariseuecha engaksï uékeenga tsʼéjkuni ka kurhamarhisptiksï sini sési jarhaspi eska acheeti ma jurajkupiringa témbani.*
3 Jesúsi arhiaspti: “¿Ambeksïni juramuchiski Moisési?”.
4 Imeechaksï arhispti: “Moisési sésikua íntspispti para acheeti sïranda ma úkuni témbani para jurajkuni* ka chútantani”.
5 Jimajkani Jesúsi arhiaspti: “Moisési ísï juramuspti jimbokajtsï chá meru no kurhangusïnga.*
6 Joperu ueenakuarhu, enga Tata Diosï kuerauapka kʼuiripuechani, ‘tatakani ka nanakani kueraaspti’
7 ka ‘ísï jimbo, tataka jurajkuati taati jémbani ka amambani
8 ka tsimarhanksï májku kuerpueuati’, ísï jimbo, nóteruksï tsimaniistia sino májku kuerpu.
9 Jimajkani, ambe enga Tata Diosï kúndaka,* eska no ma kʼuiripu niáraaka jarharitani”.
10 Engaksï ménderu niántapkia kʼumanchikuarhu, imeeri chúxapatiichaksï ueenaspti indeeri ambe kurhamarhini.
11 Ima arhiaspti: “Ima enga jurajkuaka témbani* ka máteru nemani tembuni, ísku jándikua ambe niátasïndi* ka no sési úkusïndi imani enga orheta témbeepka.
12 Ka enga ménisï uarhiiti ma jurajkuska uámbani ka máteru nemani jingoni uambuchantani, imajtu ísku jándikua ambe niátasïndi”.
13 Jimajkani, kʼuiripu ueenaspti juákuani máru sapiichani para ima újchakuraani,* joperu imeeri chúxapatiichaksï xukaaspti.
14 Ka Jesúsi kánikua no sési exespti ini ambe ka arhiaspti: “Jurajkua je parajtsïni sapiicha jurhani andarhierani. Asï jáma je pʼínguani jimboka Tata Diosïiri Reinu imeecheeriiska engaksï ísïika komueska i sapiicha.
15 Jíksïni sési jimbo arhisïnga eska ima enga no jiókuarhiska Tata Diosïiri Reinuni ísï eska sapi ma, no méni uaati inchani Tata Diosïiri Reinurhu”.
16 Ka kamanharhiaspti sapiichani ka ueenaspti pʼájtsïkuani para újchakuraani.
17 Enga Jesúsi xanharu jimbo nirani japka, achamasï ma uiriispti andarhierani, tinguikuatsespti ka kurhamarhispti: “Ambakiti Jorhentpiri, ¿ambe jatsiski parani úni parani intsïnhani tsípikua para méntkisï?”.
18 Jesúsi arhispti: “¿Andirenisï arhijki ambakiti kʼuiripu? No nema jarhasti enga ambakitiika, májkusï jati: Tata Diosï.
19 Tʼuri míteska ambe engaksï mandamientuecha arhijka: asï jáma uándikpini, asï jáma ísku jándikua ambe niátani, asï jáma sïpani, asï jáma chkuanderakua ambe uandantani, nijtu chkuanderani para máteruechani euakuarhiani ambe ma, ka janhanharhi chiiti taatini ka chiiti naandini”.
20 Achamasï arhispti: “Jorhentpiri, ji sapiitini ueenaska iámindu indeni ambe úni”.
21 Ka Jesúsi eratespti, ka jimboka xénchasïreenga, arhispti: “Útasï jarhasti ma ambe engari jatsika para úni: ní ka íntspikuarhi ambe engari xáni jatsikuarheka ka imeechani íntsaa sentabu engaksï no ma ambe jatsikuarheka, ísï úparini, tʼuri auandarhu jatsiaka chiiti jatsikuarhekua ambe. Tátsekua jungua ka júreni chúxapuni”.
22 Joperu enga ísï arhinhapka, achamasï no uékaspti ísï úni ka kánikua kómu pʼikuarheraparini kéndikuspti jimboka uánikua ambe jatsikuarhespka.
23 Jimajkani Jesúsi iáminduechani erateaspti ka arhiaspti imeeri chúxapatiichani: “¡Kánikuaksï úkua jukanchaati imeecha engaksï sentabu jatsikuarheka paraksï Tata Diosïiri Reinurhu inchani!”.
24 Joperu imeeri chúxapatiichaksï ísku pakaraspti engaksï ini ambe kurhaapka. Jimajkani Jesúsi arhiaspti: “Juchiiti uátsïtiicha, ¡kánikua úkua jukasti Tata Diosïiri Reinurhu inchani!
25 Sánderu fásiliisti eska kameiu ma pʼikukuarhisï inchajchakuaka ka eska jatsikuarheri ma Tata Diosïiri Reinurhu inchaaka”.
26 Imaksï sánderu ísku pakaraspti ka arhisptiksï:* “Jiájkani, ¿né uaa pʼímutantskata uérani?”.
27 Jesúsi erateaspti ka arhiaspti: “Kʼuiripuechaksï ísï exesïndi enajkiksï no méni uaa ini ambe úni, joperu Tata Diosï nómbe, jimboka Tata Diosï méntku iámindu ambe úsïnga úni”.
28 Pedru úndaspti arhini: “Exe, jucha méntku iámindu ambe jurajkuska paraksïni chúxapani”.
29 Jesúsi arhiaspti: “Jíksïni sési jimbo arhisïnga eska no nema jarhaska enga jíndeni jimbo ka ístu ambakiti aianhperakua jimbo jurajkuka imeeri kʼumanchikuani, ermanu jémbeechani, pirembeechani,* amambani, taati jémbani, uájpeechani o echeriichani
30 enga no niáraaka iásï, ini jurhiatikuecha jimbo, 100 uelta sánderu intsïnhantani —kʼumanchikuechani, ermanu jémbeechani, pirembeechani, amambeechani, uájpeechani ka echeriichani, nájkiruka no sési kánhaaka— ka imani tiempu jimbo* enga jurhani jaka tsípikua para méntkisï.
31 Joperuksï uánikua engaksï iásï orheteeka, últimueuatiksï ka uánikua engaksï iásï últimueka, orheteuatiksï”.
32 Ka iáminduechaksï niraxapti Jerusaléni karhamani. Jesúsi orhekupaaxapti ka imeeri chúxapatiichaksï eratsepantaxapti, ka imeecha engaksï tátsepani nirani japka úndasptiksï kánikua chéni. Jesúsi ménderu támu paaspti 12 apostoliichani ka ueenaspti miátantaani ambe enga xáni úkuarhinchapiringa no ióni jimbo.
33 Arhiaspti: “Exe je, Jerusalénchi karhamaxaka, ka jini, Achamasïiri Uájpa kʼérati saserdotiicheeri ka karariicheeri jájki jimbo jurajkunhaati. Ka imeechaksï juramuati eska uándikunhaaka ka imani kʼuiripuecheeri jájki jimbo jurajkunhaati engaksï no Israeli anapueka.
34 Íksï kʼuiripuecha teresmarhuati, tʼuárhiatiksï, kʼuikirhiatiksï ka uándikuatiksï, joperu tanimu jurhiatikua jimbo tsíntaati”.*
35 Santiagu ka Juanu, Sebedeu uájpeecha, andarhierasptiksï Jesúsini ka arhisptiksï: “Jorhentpiri, uékasïngachi eskajtsïni íntskuaka ambe engaksïni jucha kurhacheaka”.
36 Ka ima kurhamarhiaspti: “¿Ambejtsï uékasïni eskaksïni íntskuaka?”.
37 Imeechaksï arhispti: “Íntskujtsïni sésikua parachi tʼungini jingoni uaxakani jiáni engari chiiti Reinurhu jauakia, ma chiiti jurhijkandani jimbo ka máteru uikixkandani jimbo”.
38 Joperu Jesúsi arhiaspti: “Chájtsï no míteska ambe engajtsï kurhajkuarhini jaka. ¿Andi chá uaa itsïmani imani kopa jimbo engani ji itsïmani jaka, ojtsï uaa itsï atakuarhini* ísï eskani ji na itsï atanhani jaka?”.
39 Imeechaksï arhispti: “Jo, uaakachi”. Jimajkani Jesúsi arhiaspti: “Chájtsï imani kopa jimbo itsïmaaka engani ji itsïmani jaka ka itsï atanhaakajtsï ísï eskani ji na itsï atanhani jaka.
40 Joperuni no jísïni uandajka néksï uaxakaa juchiiti jurhijkandani jimbo o uikixkandani jimbo. Imaksïsï jima uaxakaati engaksï míndanhakia”.
41 Engaksï máteru 10 chúxapatiicha mítepka ini ambe, kánikuaksï ikiaspti Santiagu ka Juanuni jingoni.
42 Joperu Jesúsi iáminduechani tánaantaspti ka arhiaspti: “Míteskajtsï eskaksï iretarhu anapu juramutiicha imeecheeri jájki jimbo jatsiska iretani, ka eskaksï kʼérati achamasïicha juramukuasïnga kʼuiripuechani.
43 Chájtsï no jatsiska para ísï kámberani. Sánderu sési, ima enga uékaaka sánderu kʼéri ambeeni, jatsisti para máteruechani jántspikuani
44 ka ima enga uékaaka orheteeni chánksïni jingoni, jatsisti para iáminduechani jántspikuani.
45 Jimboka ni Achamasïiri Uájpa juki paraksï marhuakuni sino para máteruechani marhuakuani ka para íntspini imeeri tsípikuani* para uánikua kʼuiripuechani euajpiantani”.
46 Jimajkani inchaakusptiksï Jerikó. Enga Jesúsi ka imeeri chúxapatiichaksï uéakuntani japkia Jerikó uératini, uánikua kʼuiripuechaksï chúxapaxapti. Ka Timeu uájpa, enga Bartimeu arhinheenga, acheeti ma enga no ueenga exeni ka enga no ma ambe jatsikuarhepka,* xanharu jimbo uaxarhuspti.
47 Enga kurhaapka eska Jesúsi, Nasareti anapu, jimeesïsï nitamaxapka, uinhachaspti: “¡Jesúsi, Dabidi Uájpa! ¡Pʼamojkureni sáni!”.
48 Joperuksï uánikua kʼuiripuecha ueenaspti xukani ka arhisïreendiksï eska pínasku japiringa, joperu ima sánderu uinhachasïreendi: “¡Dabidi Uájpa, pʼamojkureni sáni!”.
49 Ísï jimbo, Jesúsi anhaxurhispti ka arhiaspti: “Uandajpa je, arhi je eska juuaka”. Imaksï arhispti imani enga no ueenga exeni: “¡Uinhapikuarhinta! Jauara, uandajpaxatikeni”.
50 Ima jirejiresï jurajkuspti imani takusïni enga jukarini japka, mátirku jauaraspti ka niraspti andarhierani Jesúsini.
51 Jimajkani Jesúsi kurhamarhispti: “¿Amberi uékasïni eskani uaaka tʼungini jimbo?”. Ka ima kʼuiripu enga no ueenga exeni arhispti: “Rabbóni,* eskani ménderuni uaaka exeni”.
52 Ka Jesúsi arhispti: “Ambakentaskaria jimbokari mintsikaska, níia níntani”. Acheeti jirejiresï ueenaspti exeni ka niraspti chúxapani xanharu jimbo.
Notecha
^ O “diborsiarikuarhipiringa témba jingoni”.
^ O “para diborsiarikuarhini”.
^ Griegu jimbo: “jimboka chaari mintsita chopeska”.
^ O “májku uananchatarakua jimbo peeraka”.
^ O “diborsiarikuarhiaka témba jingoni”.
^ Exe je Glosario, enganiarpini; ísku jándikua ambe niátani.
^ O “pʼájtsïkuani”.
^ O jamberi “arhijperasptiksï”.
^ O “ermaneechani”.
^ Exe je Glosario, tiempu.
^ Griegu jimbo: “jauaraati”.
^ Exe je Glosario, itsï atakuarhini; itsï atani.
^ O “almani”.
^ Acheeti máespti enga sentabu jámeenga kurhajkuarhini ka máteru ambe.
^ Enga arhikuekajka ‘jorhentpiri’.
