Markusï 11:1-33
-
Jesúsi inchaakusïndi Jerusaléni (1 a 11)
-
No sési arhisïndi jígusïiri anhatapuni ma (12 a 14)
-
Petaantasïndi imeechani engaksï templurhu atarantani japka (15 a 18)
-
Jorhendaasïndi jígusïiri anhatapu ma jingoni enga kʼarhijka (19 a 26)
-
Kurhamarhisïndiksï né arhisïni Jesúsini eska uaaka ambe ma (27 a 33)
11 Ka engaksï Jerusaléni no iauanisï jámani japka, Olibusïiri juátarhisï, —jima enga Betfagué ka Betania jaka—, Jesúsi axaaspti imeeri tsimani chúxapatiichani,
2 ka arhiaspti: “Ní je imani ireta sapichu jimbo. Engajtsï na inchaakuakia, exentaakajtsï burru sapichuni ma enga nótki nema jatani jaka, jima jótakuarhetini jauati. Kuerata je ka juáchejtsïni je.
3 Ka engaksïni nema kurhamarhiska: ‘¿Ambejtsïsï úni jaki?’, chá arhi je: ‘Juchaari Tatasï uékani jati úrani, joperuksïni sóntku juánguachiati’”.
4 Ísï jimbo, imeeri chúxapatiichaksï niraspti ka exentasptiksï burru sapichuni xanharu ma jimbo, puertarhu jamukuteni jótakuarhetixapti ka kueratasptiksï.
5 Joperu máru kʼuiripuecha engaksï jimeesïsï jámani japka, arhiasptiksï: “¿Andijtsïsï kueratani jaki burru sapichuni?”.
6 Ka imeeri chúxapatiichaksï ísï arhiaspti eska Jesúsi na arhiapka ka imaksï jiájkutaaspti.
7 Jimajkani, juákusptiksï Jesúsini burru sapichuni ka imeecheeri xukuparhakua ambeksï tatsuparhakuspti ka Jesúsi jataspti.
8 Uánikua kʼuiripuechaksï tatsuntskakuspti xanharu jimbo imeecheeri xukuparhakua ambe. Ka máteruechaksï pímu ambe pʼikuspti xanharu jimbo.
9 Ka imeecha engaksï orhekupani japka Jesúsini ka engaksï imeeri tátsepani jimbo nirani japka, uinhachasïreendiksï: “¡Oh, Tata Diosï, kuájchaku! ¡Újchakuranhasti ima enga Tata Diosï Jeobaeri nombri jimbo jurhani jaka!
10 ¡Eska Tata Diosï újchakuraaka imani Reinuni enga uaxastanhaaka, juchaari taati Dabidiiri Reinuni! ¡Oh, Tata Diosï, tʼu engari auandarhu jaka, kuájchaku!”.
11 Enga na Jerusaléni inchaakupkia, Jesúsi niraspti templurhu ka exespti sáni iámindu ambe. Joperu Betaniaisï niraspti 12 apostoliicha jingoni jimboka chúrixapkia.
12 Ísï pauandikua, engaksï na uéakuntani japkia Betania uératini, ueenaspti kʼarhimani.
13 Ka iauani jatini exespti jígusïiri anhatapuni ma enga chkurhi jukarini japka ka niraspti exeni sini jukaspi jígusï. Joperu enga na andarhierapkia, no ma jígusï jukaspti, chkurhi ambejkusï jukapti jimboka nótki tiempuespka para jígusï jukani.
14 Ísï jimbo, arhispti: “Nóteru nema akuatia chiiti jígusï”. Ka imeeri chúxapatiichaksï kurhajchaspti.
15 Engaksï na niárapkia Jerusaléni, Jesúsi templurhu inchaspti ka iáminduechani petaantaspti engaksï jima atarantani japka ka engaksï piáni japka ambe ma. Menonhaaspti imeecheeri meseechani engaksï sentabu ambe mójtakutspienga ka imeecheeri bankuechani engaksï palomasïichani atarantauenga.
16 Ka no nemani jurajkusïreendi para templurhisï parhikutarani ambe ma.
17 Tátsekua, ueenaspti jorhendaani kʼuiripuechani ka arhiasïreendi: “¿Andi no karakata jarhaski ‘Juchiiti kʼumanchikua jindeuati parajtsïni iápurisï anapu kʼuiripuecha jima kómarhini’? Joperujtsï chá úxaka eska ísïiuaka komueska kueba ma nani engaksï sïpariicha jarhajka”.
18 Kʼérati saserdotiicha ka karariichaksï niáraspti míteni ini ambe ka ueenasptiksï jirinhakuntani néna uándikuni. Imaksï kánikua chérhisïreendi Jesúsini jimbokaksï kʼuiripuecha ísku pakarasïreenga engaksï exeenga na enga xáni sési jorhentpienga.
19 Enga chúrini japkia, Jesúsi ka imeeri chúxapatiichaksï uéakuntaspti iretarhu uératini.
20 Pauandikua xarhentku, engaksï ménderu jimeesïsï nitamani japka, exesptiksï eska jígusïiri anhatapu iámu kʼarhispkia.
21 Pedru miántaspti ambe enga úkuarhipka, jimbosï arhipti: “¡Jorhentpiri,* exe! Kʼarhistia jígusïiri anhatapu engari tʼu no sési arhipka”.
22 Enga Jesúsi kurhaapka ini ambe, arhiaspti: “Mintsika je Tata Diosïni.
23 Jíksïni arhisïnga eska enga nema arhiska ini juátani ‘Manakuarhi ka marirhu kʼuanime’ ka ísï arhini mintsita jingoni jakajkuparini ka mintsikaparini eska ísï úkuarhiaka, niáraati ísï úkuarhini.
24 Jimboksïnisï arhijka: iámindu ambe engajtsï kurhakuaka Tata Diosïni, mintsikaparini kómarhi je ka ísï exe je enajkijtsï intsïnhia ka intsïnhaakajtsï.
25 Engajtsï anhandetini kómarhini jauaka, puákunta je kʼuiripuni ma, ambe uéjkiksïni no sési úchini paraka chaari Taati enga auandarhu jaka, ístuksïni puáchentaaka chánksïni engajtsï no sési ambe uaaka”.
26 *
27 Jimajkani, engaksï ménderu Jerusaléni niárapka ka enga Jesúsi templurhisï jámani japka, jurhasptiksï kʼérati saserdotiicha, karariicha ka orhejtsïkutiicha
28 ka kurhamarhisptiksï: “¿Andiresï ini ambe újki? ¿Nékini arhiski parari ini ambe úni?”.
29 Jesúsi arhiaspti: “Jíjtuksïni kurhamarhiaka ambe ma. Engajtsïni chá mókuchintaska, jíjtuksïni arhiaka nérini arhiski parani ini ambe úni.
30 Arhijtsïni je, ¿né arhiski Juanuni eska itsï ataapiringa* kʼuiripuechani, Tata Diosï o kʼuiripuecha?”.
31 Ka imeechaksï ueenaspti mámaru ambe uandani. Uandasïreendiksï: “Engachi arhiska eska Tata Diosï, indejtsïni arhiati: ‘Jiájkani, ¿andijtsïsï no jakajkukupi?’.
32 Joperu, ¿nénachi arhia eska kʼuiripuecha?”. Chérhiasïreendiksï kʼuiripuechani jimbokaksï iáminduecha uandasïreenga eska Juanu Tata Diosïiri uandakua páriispka.*
33 Ísï jimbo, arhisptiksï Jesúsini: “Nóchi míteska”. Ka Jesúsi arhiaspti: “Jiájkani jíjtuksïni no aianguaka nérini arhiski parani ini ambe úni”.
Notecha
^ O “Rabí”.
^ Exe je ambe enga arhijka nota enga Mateu 17:21 jimbo jaka.
^ Exe je Glosario, itsï atakuarhini; itsï atani.
^ O “profeteespka”.
