Markusï 12:1-44
-
Ejemplu tarheriicheeri engaksï uándikpijka (1 a 12)
-
Tata Diosï ka Roma anapu juramuti (13 a 17)
-
Kurhamarhisïndiksï tsíntskueri ambe (18 a 27)
-
Tsimani mandamientuecha engaksï sánderu jukaparhakueka (28 a 34)
-
¿Kristu Dabidi uájpeeski? (35 a 37a)
-
Xéparini jámani karariichani jingoni (37b a 40)
-
Uarhiiti tsïndi enga no ma ambe jatsikuarheka tsimani moneda sapirhati jatsiraasïndi (41 a 44)
12 Jimajkani ueenaspti ejempluecha jingoni jorhendaani. Arhiaspti: “Achamasï ma ubasï jatsikuspti ka tsirindaspti. Ístu, jarhakuspti paraksï ubasï tsitanduni ka torre ma úspti. Tátsekua, echerini amediasï íntsaaspti tarheriichani ka iauanisï niraspti.
2 Ísï tátsekua, axaspti jántspirini ma para arhiani tarheriichani eskaksï arhukukuntapiringia ubasïni.
3 Joperu imeechaksï jupikaspti jántspirini, atasptiksï ka ískuksï axantaspti.
4 Ka achamasï axaspti máteru jántspirini ka ínksï éjpurhu ataspti ka no sésiksï arhispti.
5 Tátsekua, axaspti máteruni ka uándikusptiksï. Ka uánikua máteruechani axaaspti, máruksï ataaspti ka máteruechanksï uándikuaspti.
6 Útasï jarhaspti nema enga úpiringa axani: imeeri uájpani enga xáni xéncheenga. Ísï jimbo, últimu, imeeri uájpani axaspti jimboka eratsesïreenga: ‘Juchiiti sapinksï* kʼóru janhanharhiati’.
7 Joperu tarheriichaksï arhijperaspti: ‘I jindeesti ima enga pʼiuaka erensiani. Ju je uándikuni parachi jucha pakatakuarhini erensiani’.
8 Ísï jimbo, jupikasptiksï uájpani, uándikusptiksï ka petaatantasptiksï.
9 ¿Ambe uaa ima achamasï enga ubasï jatsikuka? Juuati ka uándikuauati tarheriichani ka máteruechani íntsauati echerini.
10 ¿Andi nójtsï méni arhintaspi i ambe enga Karakatarhu jaka: ‘Ima tsakapu engaksï kʼumanchikua úriicha no jiókuarhika, ima jindeesti sánderu ambakiti tsakapu’?*
11 ¿Ka nójtsï méni arhintaspi i ambe: ‘Tata Diosï Jeobani jimbo jurhasti ka kánikua ambakiti ambeesti para jucha’?”.
12 Ima kʼuiripuecha engaksï ikiakuenga, pʼíkukuarhintasptiksï ambe enga Jesúsi uandani japka.* Jimboksïsï uékeendi jupirkuarhini, joperuksï chérhiasïreendi kʼuiripuechani. Ísï jimbo, jimaksï jurajkuspti ka kéndikukuarhisptiksï.
13 Jimajkani, axaasptiksï máru fariseuechani ka ístu máru Erodesiiri chúxapatiichani paraksï no sési ambe uandarani.
14 Engaksï na niárapkia, imeechaksï arhispti Jesúsini: “Jorhentpiri, míteskachi eskari tʼu méntkisï jurhimbikua jingoni uandasïnga ka eskari no nemani jingoni uékasïnga sési pakarani, jimbokari tʼu no imani ambejku exesïnga na enga xarharajka kʼuiripu ma, sánderu sési tʼuri jurhimbikua ambe jorhentpisïnga Tata Diosïiri ambe. ¿Sési jarhaski impuestu maiamuni Roma anapu juramutini* o nómbe?
15 ¿Jatsiskichi para maiampini o nómbe?”. Joperu Jesúsi mítespti eskaksï ísku jatinisï ísï arhini japka, jimbosï arhiapti: “¿Andijtsïnisï tsʼéjkujki? Juáchejtsïni je denariu ma parani exeni”.
16 Ísï jimbo, imeechaksï juákuspti ka Jesúsi kurhamarhiaspti: “¿Neeski i enga ixú jukanharhitini jaka ka neeri nombri karakata jarhaski ixú?”. Imeechaksï arhispti: “Roma anapu juramutiiri”.
17 Jimajkani Jesúsi arhiaspti: “Jiájkani, íntsku je Roma anapu juramutini ambe enga imeeriika, joperu Tata Diosïni ambe enga Tata Diosïiriika”. Imeechaksï ísku pakaraspti engaksï kurhajchapka Jesúsini.
18 Jimajkani, saduseuechaksï jurhaspti —imeecha engaksï no jakajkujka eskaksï uarhiriicha tsíntaaka— ka kurhamarhisptiksï:
19 “Jorhentpiri, Moisési karaspti eska enga achamasïiri ermanu jémba ma niáraska uarhini ka kánguarhini uarhiitini joperu sapiichani nómbe, i achamasï jatsisti para tembuntani uarhiitini para uájpeechani jurajkukuani ermanu jémbani enga uarhikia.
20 Jiájkani siete kʼuiripuechaksï jarhaspti engaksï ermanuepka. Ima enga orheteepka, tembuchaspti joperu uarhispti ka no ma sapini kámaspti.
21 Ka ermanu jémba tembuntaspti uarhiitini joperu imajtu uarhispti ka no ma sapini kámaspti; ka máterujtu tembuspti ka májkueni úkuarhinchaspti.
22 Ka siete ermanuechaksï uarhispti ka nóksï ma sapini kámaspti. Ka engaksï na iáminduecha uarhipkia, uarhiitijtu chúngumaantaspti.*
23 Jiáni engaksï uarhiriicha tsíntaaka, ¿neeri témbeua ima uarhiiti? Jimbokaksï siete ermanuecha tembuspka uarhiitini”.
24 Jesúsi arhiaspti: “¿No ísï jimbojtsïsï támisï jaki chá? Jimbokajtsï no kurhangusïnga ambe enga arhijka Tata Diosïiri Karakata nijtu na enga xáni uinhapitiika Tata Diosï.
25 Jimboka jiáni engaksï uarhiriicha tsíntajka, tatakeechaksï no tembuchasïndi niksï nanakecha uambuchani. Sánderu sési, ísïistiksï eskaksï ánjeliicha engaksï auandarhu jaka.
26 Joperu jiáni engaksï uarhiriicha tsítanhantaaka,* ¿andi nójtsï méni arhintaski ambe enga Moisési karaka jima enga anhatapu sapichueri ambe uandantajka? Jima Tata Diosï arhispti Moisésini: ‘Ji jindeeska Abraániiri Tata Diosï, Isaakiiri Tata Diosï ka Jakobueri Tata Diosï’.
27 Ima no uarhiriicheeri Tata Diosïisti, sino imeecheeri engaksï tsípiti jaka. Chájtsï támisï jarhaska”.
28 Karari ma enga jima japka, kurhaaspti ini ambe. Enga kurhaapka na enga xáni sési mókukuantapka Jesúsi, kurhamarhispti: “¿Náki jindeeski orheta mandamientu?”.*
29 Jesúsi arhispti: “Ari orheteesti: ‘Kurhaa, oh, Israeli. Májkusï jati enga jindeeka Jeoba, juchaari Tata Diosï Jeoba.
30 Xéncha chiiti Tata Diosï Jeobani iámu chiiti mintsita jingoni, iámu chiiti alma* jingoni, iámu chiiti eratsekua jingoni ka iámu chiiti uinhapikua jingoni’.
31 Ka máteru jindeesti: ‘Xénchaa máteru kʼuiripuechani* ísï eskari tʼujkumindu na xénchakuarhijka’. No ma mandamientu jarhasti enga sánderu jukaparhakueka eskaksï i tsimani”.
32 Ka karari arhispti: “Jorhentpiri, sésiri uandaska, ísï eska na jindeeka, májkusï Tata Diosï jati ka no jarhasti máteru.
33 Ka xénchani Tata Diosïni iámu mintsita jingoni, iámu eratsekua jingoni ka iámu uinhapikua jingoni ka ístu xénchaani máteru kʼuiripuechani* ísï eska ma na xénchakuarhijka, sánderu jukaparhakuesti eska kéjtsïtakua ambe kurhirakuni ka máteru jásï intsïmperata ambe íntskuni”.
34 Enga Jesúsi kurhaapka na enga xáni sési mókukuarhipka karari, Jesúsi arhispti: “Nóri iauani jarhaska Tata Diosïiri Reinurhu”. Ka nóteru nema tekaasptia kurhamarhini ambe ma.
35 Joperu Jesúsi templurhu pakaraspti jorhentpini ka uandaspti: “¿Andiksïsï karariicha uandajki eska Kristu, Dabidi uájpeeska?
36 Espiritu santu jimbo, Dabidi uandaspti: ‘Tata Diosï Jeoba arhisti juchiiti Tatani: “Uaxaka juchiiti jurhijkandani jimbo asta jiáni engakeni chiiti jantsiriicharhu kétsekua peerachiauaka imeechani engaksïni ikiachejka”’.
37 Ka enga Dabidi ísï arhijka ‘juchiiti Tata’; jiájkani, ¿andisï imeeri uájpee?”. Ka xáni uánikua kʼuiripu enga jima japka, tsípikua jingonksï kurhajchasïreendi.
38 Ka enga jorhendaani japka, arhiaspti: “Xéparini jáma je karariicha jingoni engaksï tsitijka takusï iósti ma jukantani paraksï xanharisï jámani ka tsitisïndiksï eskaksï kʼuiripuecha uandajpauaka merkadurhisï
39 ka ístuksï tsitisïndi orhepani* uaxakani jima engaksï judiuecha tánguarhijka para Tata Diosïni kómarhini, ka tʼirekuecharhu, tsitisïndiksï uaxakani jima engaksï imeecha uaxakajka engaksï sánderu kʼéri ambeeka.
40 Ka euakuarhiasïndiksï uarhiiti tsïndiichani ambe engaksï xáni jatsikuarheka* ka iónksï kómarhisïndi paraksï sési pakarani kʼuiripuni japarini.* Imeechaksï sánderu no sési kastigarinhaati”.
41 Jimajkani Jesúsi uaxakaspti ka jima uératini enga uaxakapka, eraakuarhisïreendi nani engaksï sentabu jatakuecha japka ka Jesúsi exexapti na enga kʼuiripu nirani japka sentabu jatsirani; uánikua kʼuiripu engaksï jatsikuarheriipka, uánikua monedeechanksï jatsiraasïreendi.
42 Jimajkani niáraspti uarhiiti tsïndi ma enga no ma ambe jatsikuarhepka ka tsimani moneda sapirhatiichani jatsiraaspti engaksï sántku jukaparhapka.*
43 Jesúsi uandajpaaspti imeeri chúxapatiichani ka arhiaspti: “Jíksïni sési jimbo arhisïnga eska i uarhiiti tsïndi enga no ma ambe jatsikuarheka, sánderu kánikua jatsiraska ka eska máteruecha.
44 Jimbokaksï iáminduecha jatsirasïnga ambe engaksï pakajkujka,* joperu i uarhiiti enga no ma ambe jatsikuarheka jatsirasti na enga xáni jatsikuarhepka para nitamakuarhini”.
Notecha
^ O “uátsïtinksï”.
^ O “eskinarhu anapu tsakapu”. Indeni tsakapunisï arhikuekani jati enga kʼumanchikuarhu karhakua jukeenga para eskinani ma jójtsïtani para sánderu uíuinhasï jarhani.
^ O “kurhangusptiksï eska Jesúsi imeechanisï arhikuekaani japka”.
^ Griegu jimbo: “Sésarini”. Ísïksï arhiasïreendi máru Roma anapu juramutiichani.
^ O “uarhispti”.
^ Griegu jimbo: “jauatanhantaaka”.
^ O “mandamientu enga sánderu jukaparhakueka”.
^ Exe je Glosario, alma.
^ O “Xéncha chiiti prójimuni”.
^ O “xénchani prójimuni”.
^ O “sánderu ambakiti uaxantskuecharhu”.
^ Griegu jimbo: “kʼumanchikuechani”.
^ O “paraksï indeni ambe arhiparhatani”.
^ Griegu jimbo: “tsimani leptoni jatsiraaspti”, ka i ma kuadrantiispti.
^ O “pakatajka”.
