Markusï 14:1-72
-
Saserdotiichaksï uandontskuarhesïndi paraksï uándikuni Jesúsini (1 ka 2)
-
Uarhiiti ma atajtsïkusïndi aseiti enga sési jájkundejka (3 a 9)
-
Judasï traisionariisïndi (10 ka 11)
-
Últimu Paskua (12 a 21)
-
Uaxastanhasïndi Tateeri Sena (22 a 26)
-
Jesúsi uandasïndi eska Pedru uandaaka eska no míteska (27 a 31)
-
Jetsemaní nirasïndi kómarhini (32 a 42)
-
Jupikasïndiksï (43 a 52)
-
Kʼérati Juesiichaksï jusgarisïndi (53 a 65)
-
Pedru uandasïndi eska no míteska Jesúsini (66 a 72)
14 Ka tsimani jurhiatikua kuerataxapti para úkuarhini Paskua ka ístu Kʼuínchikua enga Kurhinda No Xarhipiti* Jukari Únheenga. Ka kʼérati saserdotiicha ka karariicha, jámaxaptiksï jirinhakuntani nénaksï jámapirini para jupikani Jesúsini ka uándikunksï.
2 Jimbokaksï uandasïreenga: “Jurajku orheta kʼuínchikua nitamani paraksï no kʼuiripuecha ueenani no sési jámani ka tátsekua no sési jánhaskuarhini”.
3 Enga Jesúsi Betania japka, Simóniiri kʼumanchikuarhu tʼirexapti,* ima enga lepra pʼamenchapka. Ka uarhiiti ma andarhieraspti enga jatakua sapichu ma kámani japka enga tsakapu urapiti jingoni úkata japka.* Ka jatakua sapichu uinirixapti aseiti enga kánikua sési jájkundeenga ka kánikua jukaparhaspti ka ambakiti nardu jingoni jeuetakata jarhaspti. Tátsekua, kakaspti jatakuani ka ueenaspti éjpurhu atajtsïkuni Jesúsini.
4 Máruksï kánikua no sési exespti ini ambe ka ueenasptiksï arhijperani: “¿Andisï i uarhiiti ísku ambendurhini* jaki aseiti enga sési jájkundejka?
5 I aseiti úpirindi jukari 300 denariu jimbo ataranhantani ka imani sentabuni imeechani íntsaani engaksï no ma ambe jatsikuarheka”. Kánikuaksï ikiaspti imani uarhiiti jingoni.*
6 Joperu Jesúsi arhiaspti: “Ísku exe je, asï ambe ma arhi je. Inde ambakiti ambe ústi jíndeni jimbo.
7 Jimboka imeecha engaksï no ma ambe jatsikuarheka méntkisïksï chánksïni jingoni jauati ka chájtsï uaaka na uéjki jatini jarhuataani, joperu ji no méntkisï chánksïni jingoni jauaka.
8 I uarhiiti jánguarhintasti úni ambe enga xáni úpiringa úni; atarhestireni aseiti enga sési jájkundejka para jiáni engani jatsinhantaaka.
9 Jíksïni sési jimbo arhisïnga eska iámu parhakpinirhu, nani uéjkisï enga uandanhantaaka ambakiti aianhperakua, ístu uandanhantaati ambe enga i uarhiiti úka ka méntkisï ísï miánhaati”.
10 Ka Judasï Iskariote, ima enga 12 apostoliichani jingoni kuenta úkuarhienga, niraspti kʼérati saserdotiichani exeani para Jesúsini traisionariini.
11 Engaksï kʼérati saserdotiicha kurhaapka ambe enga Judasï arhiapka, imeechaksï kánikua tsípispti ka sentabuksï* aiakuspti. Ísï jimbo, Judasï ueenaspti jirinhakuntani néna jámapirini para Jesúsini traisionariini.
12 Ka primeru jurhiatikua jimbo Kʼuínchikueri enga Kurhinda No Xarhipiti* Jukari Únheenga, jiáni engaksï kéjtsïtakua ueenga para Paskueri kʼuínchikua, imeeri chúxapatiichaksï kurhamarhispti: “¿Naniri uékasïni eskachi niuaka parachi iámindu ambe úntani parari tʼu Paskueri tʼirekua arhani?”.
13 Jimajkani Jesúsi imeeri tsimani chúxapatiichani axaaspti ka arhiaspti: “Ní je iretarhu, jimajtsï kúmuaka achamasïni ma enga itsï páni jaka kʼamukua ma jingoni. Chúxapa je
14 ka nani enga ima inchaakuntaaka, arhi je kʼumanchikuarhu anapu achamasïni: ‘Jorhentpiri uandasïndi: “¿Nani ambandeski parani ji jima arhani Paskueri tʼirekua juchiiti chúxapatiichani jingoni?”’.
15 Ka imaksïni exeraati kuartu kʼéri ma enga karhakua jaka ka jima tʼuini iámu ambe listu jauatia. Jima únta je iámindu ambe para Paskueri kʼuínchikua”.
16 Ka imeeri chúxapatiichaksï niraspti, inchaakusptiksï iretarhu ka méntkuksï iámindu ambe ísï exentaspti eska Jesúsi na arhiapka. Jimajkani, jimaksï úntaspti iámindu ambe para Paskueri kʼuínchikua.
17 Ka enga na inchatiruepkia, Jesúsi jima niáraspti imeeri 12 apostoliicha jingoni.
18 Ka engaksï uaxaparhakupkia tʼireni, Jesúsi arhiaspti: “Jíksïni sési jimbo arhisïnga eskarini chá máisï traisionariuaka, chá máisï enga jíndeni jingoni tʼireni jaka”.
19 Imeechaksï kánikua kómu pʼikuarheraspti, ka mándani arhinksï ueenaspti arhini: “No jiiska, ¿a no?”.
20 Jesúsi arhiaspti: “Chá máisïiska engajtsï ixú jaka, ima enga jíndeni jingoni atarhutajka kurhinda platonirhu.
21 Achamasïiri Uájpa níntaati ísï eska na karakata jaka imeeri ambe. Joperu, ¡lástima ima kʼuiripu enga Achamasïiri Uájpani traisionariuaka! Sánderu sési japirindi enga no andajpenupiringa”.
22 Engaksï útasï tʼireni japka, pʼíkuspti kurhinda ma, kómarhispti Tata Diosïni,* arhukuspti ka íntsaaspti imeeri chúxapatiichani ka arhiaspti: “Í je, i kurhinda arhikuekasïndi juchiiti kuerpu”.
23 Ístu pʼíkuspti kopa ma, diosmaiamukua arhispti Tata Diosïni ka íntsaaspti imeeri chúxapatiichani ka iáminduechaksï itsïmaspti imani kopa jimbo.
24 Ka arhiaspti: “I arhikuekasïndi juchiiti iurhiri, ‘iurhiri enga újka eska Tata Diosïiri pakatperakua ueenaaka jarhani’. Iurhiri enga uánikua kʼuiripuecha jimbo tsïtanhaaka.
25 Jíksïni arhisïnga eskani nóteruni auakia ini binuni asta jiáni engani chánksïni jingoni auaka jimbanhi binu Tata Diosïiri Reinurhu”.
26 Ka engaksï na pirepkia para kʼéri ambe arhini Tata Diosïni, nirasptiksï Olibusïiri juáta jimbo.
27 Ka Jesúsi arhiaspti: “Iáminduechajtsïni jurajkuaka,* jimboka karakata jarhaska: ‘Ataaka karichi erangutini ka iámindu karichiichaksï etsandurhikuarhiati’.
28 Joperu engani na tsítanhantaakia,* ji orhepaaka jini Galilea ka jinichi exejperantaaka”.
29 Pedru arhispti: “Nájkirukaksïni iáminduecha jurajkuaka,* jíkeni no méni jurajkuaka”.
30 Ka Jesúsi arhispti: “Jíkeni sési jimbo arhisïnga eska iásï, i chúri ante de tʼarhechu ma tsimani xanhari pireni, tʼuri tʼuini tanimu uelta uandaakia eskarini no míteska”.
31 Joperu Pedru méntku úndaspti arhini: “Nájkirukani tʼungini jingoni uándikunhaaka, ji no méni uandaaka eskakeni no míteska”. Ka iáminduechaksï úndaspti májkueni uandani.
32 Jimajkani Jetsemaníksï niáraspti ka Jesúsi arhiaspti imeeri chúxapatiichani: “Uaxaka je ixú, nipa ji kómarhini Tata Diosïni”.
33 Ka pájtaspti Pedruni, Santiaguni ka Juanuni ka ueenaspti kánikua kómu pʼikuarherani ka kánikua uandanhiani.
34 Arhiaspti: “Ji ísï pʼikuarheraxaka enajkini uarhiaia xáni uandanhiani. Ixú pakara je ka jingontku ja je”.
35 Tátsekua jarhariaspti sáni, tinguixurhispti ka ueenaspti kómarhini Tata Diosïni eska enga úpiringa ísï úkuarhini, eska no ísï nitamakuarhipiringa.
36 Arhisïreendi: “Abba,* Taati, tʼuri iámindu ambe úsïnga úni; kénditacherini ini kopani. Joperu eska no úkuarhiaka ambe engani ji uéjka sino ambe engari tʼu uékajka”.
37 Tátsekua andarhientaaspti ka exespti eskaksï kʼuíxapka ka kurhamarhispti Pedruni: “Simóni, ¿kʼuíxakiri? ¿Andi nóri úski sikiera ma ora pʼíngukuarhini parari jingontku jarhani?
38 Jingontku ja je ka méntku únda je kómarhini parajtsï úni orhepani uérakuni tsʼéjkukuani. Ísïisti, chaari mintsita uékasïndi úni ambe enga sési jaka, joperu chaari kuerpu* no úsïndi pʼíngukuarhini”.
39 Jimajkani ménderu niraspti kómarhini ka májkueni kómarhispti.
40 Ménderu andarhientaaspti ka ménderuksï kʼuíxapti jimbokaksï uarhixapka kʼuínchani. Ka imeechaksï no jánhaskasïreendi ambe arhini Jesúsini.
41 Ka ménderu andarhientaaspti imeeri chúxapatiichani para tanimu úni jámania ka arhiaspti: “¡Iásï enga i ambe úkuarhini jaka chájtsï masi arhixaka kʼuíni ka mintsikuarhini! ¡Sésku jarhastia! ¡Oreestia! Exe je, Achamasïiri Uájpa no sési úriicheeri jájki jimbo jurajkunhaati.*
42 Jauara je, juia je jimboka janoxakaia ima engareni traisionariuaka”.
43 Enga Jesúsi útasï ini ambe arhiani japka imeeri chúxapatiichani, jimajkisï niáraspti Judasï, ima enga 12 apostoliichani jingoni kuenta úkuarhienga, ka ístuksï uánikua kʼuiripuecha niáraspti espada ka chkari ambe jingoni. Ini kʼuiripuechani, kʼérati saserdotiicha, karariicha ka orhejtsïkutiichaksï axaaspti.
44 Joperu Judasï enga Jesúsini traisionariipka, tʼuini arhiasptia: “Imani engani ji putinharhikuaka, imantsï jupikaaka ka sési jupikatini pá je”.
45 Ísï jimbo, seguiriispti Jesúsini andarhierani ka arhispti: “Jorhentpiri”.* Ka uékperakua jingoni putinharhikuspti.
46 Jimajkani andarhierasptiksï Jesúsini ka jupikasptiksï.
47 Joperu máechakua enga jima japka, pʼitajtarhaspti espadani ka ataspti sánderu kʼéri saserdotiiri jántspirini ka méntku kutsïkua pʼikueeraspti.
48 Ka Jesúsi arhiaspti: “¿Espada ka chkariicha jingontsïni jurhaski jupikani enajkini ji sïpari máe?
49 Pauani pauani chánksïni jingoni jarhasïreenga templurhu jorhentpini ka chájtsïni no jima jupikaspka. Joperu i ambe ísï úkuarhisti paraka niárapiringa úkuarhini ambe enga Karakatarhu arhijka”.
50 Jimajkani iáminduechaksï jurarkuspti ka sïpakuarhisptiksï.
51 Joperu tumbi ma enga takusïjku ma jukarini japka, ambakiti takusï ma linueri, jimajku niraxapti chúxapani Jesúsini. Kʼuiripuechaksï uékasïreendi jupikani tumbini,
52 joperu ima jurarkuspti takusïni ka patsïki jásï* sïpakuarhispti.
53 Ka pásptiksï Jesúsini sánderu kʼéri saserdoti jingoni, ka iámindu kʼérati saserdotiicha, orhejtsïkutiicha ka karariichaksï jima tánguarhintaspti.
54 Ka Pedru iauani jatini chúxapaspti ka ekuaru jamberi niáraspti sánderu kʼéri saserdotiiri kʼumanchikuarhu. Ka kʼumanchikuarhu anapu jántspiriicha jingoni uaxakaspti jorhentani.
55 Kʼérati saserdotiicha ka Kʼérati Juesiichaksï* jirinhaaxapti kʼuiripuechani engaksï no sési ambe uandapiringa Jesúsiiri ambe paraksï úni uándikuni, joperuksï no ma ambe exekuntaxapti.
56 Ka nájkirukaksï uánikua kʼuiripuecha niárapka no sési ambe uandani Jesúsiiri ambe, no ma ambe terukuntasïreendi.
57 Ístu, máruksï anhandespti ka ueenasptiksï chkuanderakua ambe uandani Jesúsiiri ambe, uandasptiksï:
58 “Jucha kurhaaska enga i achamasï uandaka: ‘Ji xerentaaka ini templuni engaksï kʼuiripuecha úka ka tanimu jurhiatikua jimbo máteruni úntaaka enga no kʼuiripuecha jimbo úkata jauaka’”.
59 Joperu i ambejtu no terukuntasïreendi imani ambe jingoni engaksï uandeenga.
60 Jimajkani sánderu kʼéri saserdoti jauaraspti, terujkani niáraspti ka kurhamarhispti Jesúsini: “¿Nóri ambe ma uandaa? ¿Ísïiski ambe engaksï i kʼuiripuecha uandani jaka chiiti ambe?”.
61 Joperu Jesúsi no ma ambe uandaspti, ísku pakaraspti. Ísï jimbo, sánderu kʼéri saserdoti kurhamarhispti: “¿Tʼu jindeeski Kristu, Tata Diosïiri Uájpa enga Pímbinhasïika?”.
62 Jimajkani Jesúsi arhispti: “Jo, jiiska ka chájtsï exeaka Achamasïiri Uájpani uaxakatini jarhani Tata Diosïiri jurhijkandani jimbo enga xáni uinhapitiika ka jurhani jarhani auandarhu anapu nubeecharhisï”.
63 Enga sánderu kʼéri saserdoti kurhajchapka Jesúsini, karunhespti ka uandaspti: “¿Ambeteruchi úni kurhajchaua máteru kʼuiripuechani?
64 ¡Chájtsï mismu kurhaaskia na enga no sési uandaka Tata Diosïiri ambe! ¿Nájtsï exesïni chá?”. Ka iáminduechaksï uandaspti eska uándikunhapiringa.
65 Ka máruksï ueenaspti tʼuárhini, ónharhitani ka atani ka arhisïreendiksï: “Engari tʼu Tata Diosïiri uandakua páriika,* aiangujtsïni aberi nékini ataski”. Ka engaksï na páksanharhikupkia, jusgadurhu anapu kuáriichaksï páspti.
66 Enga Pedru kétsekua japka ekuaru, uarhiiti ma niáraspti enga jántspini jámeenga sánderu kʼéri saserdotiiri kʼumanchikuarhu.
67 Enga uarhiiti exepka eska Pedru jima jorhentaxapka, eratespti ka arhispti: “¡Tʼujturi Jesúsi jingoni jámaxapka enga Nasareti anapueka!”.
68 Joperu ima uandaspti eska no ísïispka. Uandaspti: “Ji méntkuni no míteska ini achamasïni, ískuri ambe ma uandaxaka”. Ka jamukutenisï niraspti.
69 Joperu uarhiiti exespti ka ménderu arhiaspti imeechani engaksï jima japka: “Indejtu imeecha jingoni jámasïndi”.
70 Ka Pedru ménderu uandaspti eska no ísïispka. Ísï tátsekua, imeecha engaksï jimeesïsï japka, úndasptiksï ménderu arhini Pedruni: “Ísïisti, tʼujturi imeechani jingoni jámasïnga jimboka jimintku xarharasïnga eskari Galilea anapueska”.
71 Jimajkani Pedru ueenaspti uandani eska no sési ambe úkuarhinchapiringa enga chkuanderani japiringa ka jurariispti: “¡Ji méntkuni no míteska indeni achamasïni enga chá uandani jaka!”.
72 Ka ménderu jimajku pirespti tʼarhechu ma para tsimani úni jámania, ka Pedru míjpaaspti* ambe enga Jesúsi arhipka: “Ante de tʼarhechu ma tsimani xanhari pireni, tʼuri tʼuini tanimu uelta uandaakia eskarini no míteska”. Ka Pedru jurajkutakuarhispti uerani xáni no sési pʼikuarherani.
Notecha
^ O “No Kʼúratarakua”.
^ O “uaxaparhakuspti mesarhu”.
^ O “enga alabastrueriipka”.
^ O “tsïtani”.
^ O “Kánikuaksï no sési arhispti uarhiitini”, “Ka xukasptiksï uarhiitiini”.
^ Griegu jimbo: “plataksï”.
^ O “No Kʼúratarakua”.
^ O “újchakuraspti”.
^ Griegu jimbo: “Iáminduechajtsï téksarhutaaka”.
^ Griegu jimbo: “engani na jauatanhantaakia”.
^ O “Nájkirukaksï iáminduecha téksarhutaaka”.
^ Uandakua ma enga ebreu o arameu jimbo jaka ka enga arhikuekajka ‘¡oh, juchiiti taati!’, joperu májkueniisti enga ma pʼurhe jimbo uékperakua jingoni arhijka taatini pa.
^ Indenisï arhikuekani jati na engaksï kʼuiripuecha pekadoriika.
^ O “traisionariinhaati”.
^ O “Rabí”.
^ O “xásku”, “sáno patsïki jásï”.
^ O “Sanedríni”.
^ O “profeteeka”.
^ O “miántaspti”.
