Markusï 15:1-47
15 Enga na erandepkia, kʼérati saserdotiicha, orhejtsïkutiicha ka karariicha, engaksï jindeepka Kʼérati Juesiicha,* tánguarhintasptiksï paraksï uandontskuarheni ambeksï úpirini; ka engaksï na jójkupkia Jesúsini, Pilatu jingonksï páspti ka jimaksï jurajkuspti.
2 Ka Pilatu kurhamarhispti: “¿Tʼu jindeeski judiuecheeri juramuti?”. Jesúsi arhispti: “Jo, tʼuri mismu uandaxaka”.
3 Joperu kʼérati saserdotiichaksï uánikua ambe kʼamanharhitantaxapti.
4 Jimajkani Pilatu ménderu ueenaspti arhini: “¿Nóri ambe ma uandaa? Kurhaa ambe engaksïni xáni kʼamanharhitantani jaka”.
5 Joperu Jesúsi nóteru ambe ma arhisptia ka Pilatu ísku pakareeraspti.
6 Ka mándani kʼuínchikua jimbo, Pilatu pʼindespti jurajkuni kʼuiripuni ma enga ónhakuarhetini japiringa; imani enga kʼuiripu arhipiringa.
7 Imani jurhiatikuecha jimbo, ónhakuarhetixapti acheeti ma enga Barrabási arhinheenga; márkuksï ónhaspti imani kʼuiripuecha jingoni engaksï uándikpipka jiáni engaksï juramutiicha jingoni jupiperapka, jimbokaksï ima kʼuiripuecha nóteru uékasïreengia kurhajchaani juramutiichani.
8 Ísï jimbo, kʼuiripuechaksï andarhieraspti Pilatuni ka ueenasptiksï kurhakuni eska úpiringa ambe enga pʼindepka úni mándani kʼuínchikua jimbo.
9 Pilatu arhiaspti: “¿Uékasïntsï eskani jurajkuaka judiuecheeri juramutini?”.
10 Jimboka Pilatu kuenta íntskukuarhespka eskaksï kʼérati saserdotiicha enbidia jimbosï jima pápka.
11 Joperuksï kʼérati saserdotiicha arhiaspti kʼuiripuechani eskaksï uandapiringa eska Barrabási jurajkunhapiringa.
12 Ka Pilatu ménderu kurhamarhiaspti kʼuiripuechani: “Jiájkani, ¿ambe úkua ini achamasïni engajtsï chá uandajka eska judiuecheeri juramutiiska?”.
13 Ka imeechaksï ménderu uinhachaspti: “¡Chkarirhu ma cháparhata!”.
14 Ka Pilatu arhiaspti: “Joperu ¿andi? ¿Ambe no sési úski?”. Ka imaksï sánderu uinhachaspti: “¡Chkarirhu ma cháparhata!”.
15 Pilatu uékasïreendi sési pakarani kʼuiripuecha jingoni, jimbosï jurajkupti Barrabásini. Tátsekua juramuspti eskaksï kʼuikirhipiringa Jesúsini ka sondaduechani jurajkukuaspti paraksï chkarirhu ma cháparhatani.
16 Jimajkani sondaduechaksï páspti juramutiiri kʼumanchikuarhu ka ekuaruksï peeraspti ka ióarhiasptiksï uánikua sondaduechani.
17 Takusï moraduksï ma jatsikuntaspti ka koronaksï ma tepekuspti chekamikua ambe jingoni ka jatsijtsïkusptiksï.
18 Ka ueenasptiksï uinhachaparini arhini: “¡Nári erandeski judiuecheeri juramuti!”.
19 Ka pʼatamu ma jimboksï atasïreendi éjpurhu ka tʼuárhisïreendiksï. Ka tinguixurhikusïreendiksï.*
20 Ka engaksï na teresmarhupkia, pʼikuntasptiksï takusï moraduni ka ménderuksï imeeri xukuparhakuani jatsikuntaspti ka tátsekuaksï petaspti paraksï chkarirhu ma cháparhatani.
21 Jimeesïsï nitamaxapti achamasï ma enga tarhetarhu uératinisï junguani japka ka imanksï páraspti chkarini enga jindeeka para no sési nitamakuarhini.* Achamasï Simóni arhinhasïreendi ka Sirene anapuespti, Alejandru ka Rufueri taati jémbeespti.
22 Ka pásptiksï Jesúsini jima enga Gólgota arhinhajka, enga arhikuekajka kalabera.
23 Jimaksï uékaspti íntskuni binu enga kʼameri jingoni jeuetakata japka,* joperu ima no uékaspti arhani.
24 Ka cháparhatasptiksï chkarirhu ka suerte jimboksï arhukutsperaspti imeeri xukuparhakuani paraksï exeni né pakatakuarhepirini ambe ma.
25 Nuebisïispti tsípa anapu* engaksï chkarirhu cháparhatapka.
26 Jatsikusptiksï karakata ma enga arhienga andisï uándikunhapi, arhisïreendi: “Judiuecheeri juramuti”.
27 Ístu, imani jingoni, tsimani sïpariichanksï tirhipaaspti chkarirhu ma, ma imeeri jurhijkandani jimbo ka máteru uikixkandani jimbo.
28 *
29 Ka imeecha engaksï jimeesïsï nitameenga, manajtsïparinksï no sési arhisïreendi ka uandasïreendiksï: “¡Iáchka! Tʼu engari uandeenga eskari xerentapiringa templuni ka eskari tanimu jurhiatikua jimbo ménderu úntapiringa,
30 kétsenta jimini chkarirhu ka kuájpikuarhi”.
31 Kʼérati saserdotiicha ka karariichaksï ueenaspti májkueni teresmarhuni, arhijperasïreendiksï: “¡Jarhuataasti máteruechani ka jini no úsïndi kuájpikuarhini!
32 Enga inde Kristueka, Israeli anapu juramuti, eska kétsentaaka chkarirhu iáiasï, ka engachi exeaka, ísïchi kʼóru jakajkukuaka”. Ka imeechaksï jamberi no sési arhisïreendi engaksï mándani ladu jimbo japka tirhipakuarhetini chkaricharhu.
33 Ka teruxutinisï* uératini, iámu jimeesïsï pápkʼandespti ka ísï jarhaspti asta tresisï* jamberi.
34 Ka tresisï,* Jesúsi mátirku uinhachaspti: “Éli, Éli, ¿láma sabaktáni?”, enga arhikuekajka, “Juchiiti Tata Diosï, juchiiti Tata Diosï, ¿andirenisï ísï jurajku?”.
35 Ka máru engaksï jimeesïsï jámani japka, kurhajchasptiksï Jesúsini ka uandasptiksï: “¡Kurhaa je, Elíasini uandajpaxati!”.
36 Jimajkani kʼuiripu ma uiriipaspti, pʼíkuspti xurhata ma ka binu xarhipitirhu inchamaspti ka pʼatamurhu ma jatsirhukuspti ka intsïtaspti para ima itsïmani. Ka uandaspti: “¡Ísku exe je! Nándika juuaka Elíasi para késkuntani”.
37 Joperu Jesúsi mátirku uinhachaspti ka uarhispti.*
38 Ka templurhu anapu kortina karupakurhispti karhakua uératini asta kétsekua jamberi.
39 Sondaduecheeri orhejtsïkuti jima jarhaspti anhandetini Jesúsiiri orhepatini jimbo ka enga exepka ambe enga xáni úkuarhipka enga Jesúsi uarhipka, uandaspti: “Sési jimbo, i achamasï Tata Diosïiri Uájpeespti”.
40 Ístu, jimaksï jarhaspti uarhiitiicha máru engaksï iauani jatini exeni japka, ka jimaksï jarhaspti María Magdalena, María Santiagu Sapichueri* amamba ka Josésiiri, ka ístu jima jarhaspti Salomé.
41 Íksï uarhiitiicha pámbetasïreendi ka jarhuatasïreendiksï Jesúsini jiáni enga Galileaisï jámeenga. Ístuksï jima jarhaspti uánikua máteru uarhiitiicha engaksï imani jingoni karhamapka Jerusaléni.
42 I jurhiatikua jimbo, iámu ambe listu jatsinhasïreendi jimboka pauandikua sábaduepiringia, ka jimboka chúrixapkia,
43 José enga Arimatea anapuepka, no sáni chéparini Pilatu jingoni niraspti uandontskuarheni ka kurhakuntaspti Jesúsiiri kuerpuni. José achamasï máespti enga kánikua janhanharhinheenga ka enga ístu Kʼérati Juesiicha* jingoni kuenta úkuarhienga, íjtu erokuarhixapti Tata Diosïiri Reinuni.
44 Joperu Pilatu no mítespti sini Jesúsi uarhispia, ísï jimbo ióarhispti sondaduecheeri orhejtsïkutini ka imani kurhamarhispti.
45 Enga sondaduecheeri orhejtsïkuti aiangupka eska Jesúsi uarhispkia, Pilatu sésikua íntskuspti Joséni para pántani Jesúsini.
46 José ambakiti takusï linueri piáspti ka késkuntaspti Jesúsini. Tátsekua, takusï jingoni irhirespti ka jatsintaspti tumbarhu ma enga tʼuini jarhanharhitapkia kʼerendarhu ka kʼéri tsakapu ma uirhijpaspti para tumbarhu míkani.
47 Joperu María Magdalena ka María Josésiiri amamba, ískuksï pakaraspti eraani jima enga Jesúsi jatsinhantapka.
Notecha
^ O “Sanedríni”.
^ O “kʼéri ambeksï arhisïreendi”.
^ Exe je Glosario, chkari enga jindeeka para no sési nitamakuarhini.
^ I itsïmakua, úsïreendi eska kʼuiripu ma nóteru ambe ma pʼikuarherapiringia ka iámu xúrasïreendi.
^ Griegu jimbo: “Jindeespti ora para tanimu úni jámani”.
^ Exe je ambe enga arhijka nota enga Mateu 17:21 jimbo jaka.
^ Griegu jimbo: “ora para seisi úni jámani”.
^ Griegu jimbo: “ora para nuebe úni jámani”.
^ Griegu jimbo: “ora para nuebe úni jámani”.
^ O “últimu jirejtaspti”. Griegu jimbo: “íntspintaspti imeeri espirituni”.
^ Griegu jimbo, i uandakua “Sapichu” jamberi úpirindi arhikuekani eska i Santiagu no xáni jatiriispka o eska no xáni iójtarhaspka eska máteru Santiagu enga apostoliipka.
^ O “Sanedríni”.
