Markusï 2:1-28
2 Joperu máru jurhiatikisï tátsekua, Jesúsi Kapernaúmi kʼuanhatsentaspti ka sóntku mítekuarhispti eska kʼumanchikuarhu jarhaspka.
2 Ísï jimbo, uánikua kʼuiripuechaksï niáraspti, xáni uáni engaksï no jamberi jatanheni japka, ni sikiera jamukutenisï. Ka Jesúsi ueenaspti aianguani ambakiti aianhperakuani.
3 I ambe úkuarhixapti engaksï tʼámu achamasïicha jimajkisï niárapka ka achamasïnksï ma pákuspti enga no ueenga manakuarhini.
4 Ka jimboka xáni uánikua kʼuiripu jarhaspka, nóksï úspti asta jima jamberi peerani enga Jesúsi japka. Ísï jimbo, karharasptiksï kʼumanchikuarhu ka meru jimaksï pʼikujtsïtantaspti enga Jesúsi japka, ka jimeesïsïksï késkuspti imani kʼuiripuni enga no ueenga manakuarhini kʼuírakua ma jimbo.*
5 Enga Jesúsi exepka na engaksï xáni mintsikeenga ima kʼuiripuecha, arhispti imani enga no ueenga manakuarhini: “Iju, tʼuri puáminhaantaskia chiiti pekaduechani”.
6 Jimajkani máru karariicha engaksï jima uaxakatini japka, úndasptiksï eratseni imeecheeri mintsitarhu:
7 “¿Andisï ísï uandani jaki i achamasï? No sési ambe uandaxati Tata Diosïiri ambe. Jimboka Tata Diosïjkusï újka puátspeantani pekaduechani”.
8 Jesúsi jirejiresï kuenta íntskukuarhespti ambe engaksï eratseni japka ka arhiaspti: “¿Andijtsïsï ísï eratseni jaki chaari mintsitarhu?
9 ¿Ambe sánderu fásiliiski? ¿Arhini indeni enga no újka manakuarhini ‘puáminhaantaskaria chiiti pekaduechani’ o arhini ‘jauara, tarhata chiiti kʼuírakuani ka xanharia’?
10 Joperu parakajtsï exeaka eska Achamasïiri Uájpa jatsiska juramukua parhakpinirhu para puátspeantani pekaduechani...”. Jimajkani arhispti imani enga no ueenga manakuarhini:
11 “Jíkeni arhisïnga: jauara, tarhata chiiti kʼuírakuani ka níia níntani chiiti kʼumanchikuarhu”.
12 Achamasï jirejiresï jauaraspti iáminduechani japarini, tarhataspti imeeri kʼuírakuani ka xanharakuarhipantaspti. Iáminduechaksï ísku pakaraspti ka kʼéri ambeksï arhispti Tata Diosïni ka uandasïreendiksï: “Nóchi méni exexapka xásï ambe”.
13 Jesúsi ménderu niraspti marirhu uanamukutenisï. Ka uánikua kʼuiripuechaksï jurhasïreendi exeni ka ima jorhendaasïreendi.
14 Enga xanharu jimbo nirani japka, exespti Lebíni,* Alfeu uájpani, jima uaxakatixapti nani enga impuestu maiampinhajka, ka arhispti: “Júreni chúxapuni”. Lebí jirejiresï jauaraspti ka niraspti chúxapani.
15 Sánderu tátsekua, Jesúsi ka imeeri chúxapatiichaksï Lebíiri kʼumanchikuarhu tʼirespti.* Ístuksï imeecha jingoni tʼirespti uánikua impuestu kobrarpitiicha ka ístu no sési úriicha,* jimbokaksï uánikuecha chúxapasïreenga.
16 Joperu karariicha, engaksï fariseuepka, exesptiksï eska Jesúsi no sési úriicha* ka impuestu kobrarpitiichani jingoni tʼirexapka, jimboksïsï kurhamarhiapti imeeri chúxapatiichani: “¿Andi inde impuestu kobrarpitiicha ka no sési úriichani jingoni tʼiresïni?”.
17 Enga Jesúsi kurhaapka ini ambe, arhiaspti: “Imeecha engaksï uíuinhasï jaka nóksï uétarhinchasïndi doktorini, joperu pʼamenchatiichaksï kʼóru jo. No jurhaska ióarhiani imeechani engaksï sési jámajka, sino pekadoriichani”.
18 Ka Juanueri chúxapatiicha ka fariseuechaksï pʼindespti kʼarhinda jarhani.* Ísï jimbo, jurhasptiksï andarhierani Jesúsini ka kurhamarhisptiksï: “¿Andiksïsï Juanueri ka fariseuecheeri chúxapatiicha pʼinde kʼarhinda jarhani joperuksï chiiti chúxapatiicha nómbe?”.
19 Jesúsi arhiaspti: “Enga nobiu amigu jémbeecha jingoni jarhajka, amigu jémbeechaksï no jatsisti para kʼarhinda jarhani, ¿a no? Ka no sési japirindi engaksï kʼarhinda japiringa ka jini nobiu útasï imeecha jingoni jarhani.
20 Joperu niáraati ma jurhiatikua engaksï euanhantaaka nobiuni ka jiánksï kʼóru kʼarhinda jauati.
21 No nema tánharhitasïndi jimbanhi takusï imani takusïrhu enga jiánguarhikia. Enga nema ísï úpiringa, jimbanhi takusï sapichu úkuarhintapirindi* ka antsinharhikupirindi takusïni enga jiánguarhikia ka niárapirindi sánderu karukurhini.
22 Ístu, no nema jatsirasïndi jimbanhi binu imani jatakuecharhu* engaksï jiánguarhikia. Enga nema ísï úpiringa, binu karukupirindi sïkuirini ka binu iámu tsïnchepirindi* ka jatakuechaksï méntku nóteru marhuapirindia. Sánderu sési, kʼuiripu jimbanhi jatakuecharhu jatsirasïndi jimbanhi binuni”.
23 Jimajkanisï sábadu ma jimbo, Jesúsi jimeesïsï nitamaxapti nani enga trigu jukapka ka engaksï jimeesïsï nirani japka, imeeri chúxapatiichaksï ueenaspti pʼikuani máru píntsïteechani.
24 Ísï jimbo, fariseuechaksï arhispti: “¡Exe! ¿Andiksïsï indeni ambe úni jaki enga no sési jaka para úni sábadu jurhiatikua jimbo?”.
25 Joperu Jesúsi arhiaspti: “¿Andi nójtsï méni arhintaxaki ambe enga úpka Dabidi enga nóteru ambe ma jatsipkia para arhani jiáni enga ima ka ima achamasïicha engaksï imani jingoni jámani japka niárapka kʼarhimani?
26 ¿Andi nójtsï arhintaski Abiatariiri ambe, ima enga kʼéri saserdotiipka, ka ambe enga úpka Dabidi jiáni enga inchapka Tata Diosïiri kʼumanchikuarhu? Ima auaspti imani kurhindeechani engaksï jindeepka para kéjtsïtani ka ístu íntsaaspti imani achamasïichani engaksï imani jingoni jámani japka. Ka no nema sésikua jatsispti para indeni kurhindani arhani, saserdotiichajkuksïsï újti arhani”.
27 Jimajkani Jesúsi arhiaspti: “Sábadu jurhiatikua únhasti para kʼuiripuecha, ka no kʼuiripuecha para sábadu jurhiatikua.
28 Ísï jimbo, Achamasïiri Uájpa jindeesti Juramuti asta sábadu jurhiatikueri jamberi”.
Notecha
^ O “kʼuírakueni jásï ma jimbo”.
^ Enga ístu arhinheenga Mateu.
^ O “uaxaparhakuspti mesarhu”.
^ O “pekadoriicha”.
^ O “pekadoriicha”.
^ O “no ma ambe arhani”.
^ O “kʼurhukuarhipirindi”, “tsikupkurhipirindi”.
^ O “jatakuecharhu engaksï sïkuiriiriika”. Exe je Glosario, jatakua sïkuiriiri.
^ O “tʼájpatsepirindi”.
