Markusï 3:1-35
3 Ménderu inchaspti jima engaksï judiuecha tánguarhijka para Tata Diosïni kómarhini ka jima jarhaspti achamasï ma enga no ueenga máechakua jájkini manatani.*
2 Fariseuechaksï méntku exexapti Jesúsini paraksï exeni sini ambakerantapirini imani achamasïni sábadu jurhiatikua jimbo, paraksï úni no sési ambe uandani imeeri ambe.
3 Jimajkani Jesúsi arhispti imani achamasïni enga no ueenga máechakua jájki manatani: “Jauara ka ixú terujkani niára”.
4 Tátsekua arhiaspti: “¿Ambe sési jarhaski para úni sábadu jurhiatikua jimbo? ¿Ambakiti ambe úni o no sési ambe úni? ¿Jarhuatani kʼuiripuni ma o jurajkuni eska uarhiaka?”. Joperu imeechaksï méntku no ma ambe arhispti.
5 Joperu Jesúsi ísku pakaraspti erateani iáminduechani engaksï jima japka ka kánikua no sési pʼikuarheraspti enga exepka eskaksï no sáni pʼamojpisïreenga ka arhispti achamasïni: “Iójkurhantsï”. Enga ima iójkurhantapka, ambajkurhantaspti.
6 Jimajkani fariseuechaksï uéntaspti jima uératini ka jirejiresïksï tánguarhintaspti Erodesiiri chúxapatiicha jingoni paraksï jirinhakuntani néna uándikuni.
7 Joperu Jesúsi marirhu uanamukunisï niraspti imeeri chúxapatiicha jingoni ka uánikua kʼuiripuechaksï niraspti chúxapani engaksï Galilea ka Judea anapuepka.
8 Ístu, uánikua kʼuiripu niraspti engaksï Jerusaléni anapuepka, Iduméa anapuecha, Jordánirhu parhikutenisï anapuecha ka ístu imeecha engaksï Tiru ka Sidónisï irekapka jimbokaksï kurhaaspka ambe enga xáni ueenga ima.
9 Ísï jimbo, Jesúsi arhiaspti imeeri chúxapatiichani eskaksï listu jatsipiringa barku sapichuni ma para ima jatani, ka ísïksï kʼuiripuecha no katsinhani, jimbokaksï uánikua kʼuiripuecha andarhierasïreenga.
10 Ka jimboka uánikua kʼuiripuechani ambakeraantaspkia, iámindu imeecha engaksï uinhamu pʼamenchani japka, afuersaksï uékasïreendi andarhierani paraksï pʼárhini.
11 No sési jásï espirituechaksï jamberi tinguikuatsesïreendi engaksï exeenga Jesúsini ka uinhachasïreendiksï: “¡Tʼuri jindeeska Tata Diosïiri Uájpa!”.
12 Joperu Jesúsi méntku úndasïreendi arhiani eskaksï no nemani jámapiringa aianguni neespi ima.
13 Tátsekua, juátarhu karhamaspti ka ióarhiaspti imeechani enga erakuapka ka imeechaksï niraspti imani jingoni.
14 Jimajkani, 12 achamasïichani erakuaspti paraksï apostoliini. Imaksï jámapirindi pámbeni Jesúsini ka ima axaapirindi paraksï nirani uandantani ambakiti aianhperakuani
15 ka íntsaapirindi juramukua paraksï petarhitaantani demoniuechani.
16 Imaksï 12 kʼuiripuecha enga erakuapka, jindeesptiksï Simóni —enga ístu arhirapka* Pedru—,
17 Santiagu Sebedeu uájpa ka imeeri ermanu jémba Juanu —enga ístu arhiraapka Boanérjesi, enga arhikuekajka “uájpeecha engaksï ísïika komueska piritakua enga charanchijka”—,
18 Andrési, Felipe, Bartolomé, Mateu, Tomási, Santiagu Alfeu uájpa, Tadeu, Simóni ima enga tsípikua jingoni jámajka
19 ka Judasï Iskariote —ima enga ísï tátsekua traisionariipka—.
Tátsekua Jesúsi kʼumanchikuarhu ma inchaspti,
20 ka ménderu uánikua kʼuiripuechaksï niáraspti ka imaksï no jamberi úsïreendi tʼireni.
21 Ka enga imeeri familia mítepka ambe enga úkuarhini japka, nirasptiksï jirinhantani paraksï pántani, jimbokaksï uandasïreenga: “Loku úkuarhistia”.
22 Ka karariicha engaksï Jerusaléni uératini kétsemupka, uandasïreendiksï: “Belsebú* incharhitixati. Demoniuecheeri juramutini jimbosï újti petarpiantani demoniuechani”.
23 Joperu Jesúsi arhiaspti eskaksï andarhierapiringa ka ejempluecha jingoni uandontskuarhekuaspti. Ka arhiaspti: “¿Andi Satanási uaa petarhitantani Satanásini?
24 Enga juramukua ma jimbo, kʼuiripuechaksï no májku kʼéri jarhajka ka ueenanksï uarhiperani, juramukua niárasïndi kʼamakurhini.
25 Ka kʼumanchikua* ma jimbo, engaksï kʼuiripuecha no májku kʼéri jarhajka ka ueenanksï uarhiperani, ístuksï niárasïndi kʼamakurhini.
26 Májkueni, enga Satanási ima mismu jingoni uarhiperaaka ka imeecha engaksï imani jingoniika nóksï májku kʼéri jarhani, ima no ióni jamberi jauati ka niáraati kʼamakurhini.
27 Ístu, enga nema inchaakukuska achamasï uíuinhasïni ma para sïpakuni imeeri jatsikuarhekua ambe, orheta jatsisti para jójkuni ka jóndukuni. Solu ísï uaati sïpakuni ambe ma kʼumanchikuarhu.
28 Jíksïni sési jimbo arhisïnga eskaksï kʼuiripuecha iámindu ambe jimbo puáminhantaaka, ambe uéjkiksï niátani oksï no sési ambe uandani imeeri ambe enga pímbinhasïika.
29 Joperu ima kʼóru méntku no puáminhantaati enga no sési ambe uandaaka espiritu santueri ambe. Enga indeni ambe niátaska, no méni puáminhantaati”.
30 Jesúsi ísï arhiaspti jimbokaksï imeecha uandasïreenga: “No sési jásï espiritu ma incharhitixati”.
31 Ka jimaksï niáraspti Jesúsiiri amamba ka ermanu jémbeecha, joperuksï uérakua pakaraspti ka axasptiksï nemani paraksï uandajpani.
32 Uánikua kʼuiripu jarhaspti jima uaxakatini. Ka arhisptiksï: “Exe, chiiti naandi ka chiiti ermanuechaksï uérakua jarhasti ka jámaxatiksïni jirinhantani”.
33 Joperu Jesúsi arhiaspti: “¿Né jindeeski juchiiti naandi ka néksï jindeeski juchiiti ermanuecha?”.
34 Ka exepariani imeechani engaksï jima uaxakatini japka, uandaspti: “¡Íksï jindeesti juchiiti naandi ka juchiiti ermanuecha!
35 Jimboka ima enga újka ambe enga Tata Diosï uéjka, ima jindeesti juchiiti ermanu, juchiiti pirenchi ka juchiiti naandi”.
Notecha
^ Griegu jimbo: “enga kʼarhijkurhatini japka”.
^ O “arhienga”.
^ Nombri ma enga Satanásini arhikuekajka.
^ O “familia”.
