Markusï 4:1-41
-
REINUERI EJEMPLUECHA (1 a 34)
-
Achamasï enga trigu jatsikujka (1 a 9)
-
Andisï Jesúsi ejempluechani jingoni jorhentpeeni (10 a 12)
-
Ambe enga arhikuekajka achamasïiri ejemplu enga trigu jatsikujka (13 a 20)
-
No nema ójchakurasïndi kandela ma tsïkiata ma jingoni (21 a 23)
-
“Engajtsï chá kánikua ambe íntspiaka” (24 ka 25)
-
Achamasï enga semiia jatsikujka ka enga kʼuíni jarhajka (26 a 29)
-
Semiia mostaseeri (30 a 32)
-
Ejempluechani jingoni jorhentpisïreendi (33 ka 34)
-
-
Jesúsi úsïndi eska pínandintaaka jiáni enga kʼéri ma janini japka (35 a 41)
4 Jesúsi ménderu ueenaspti jorhentpini marirhu uanamukutenisï. Ka uánikua kʼuiripu niraspti andarhierani, jimbosï ima barku sapichu ma jimbo jatapti, jima uaxakaspti ka jarhariaspti sáni. Joperu kʼuiripuechaksï marirhu uanamukutenisï pakaraspti.
2 Ka ueenaspti uánikua ambe jorhendaani ejempluecha jingoni. Ísï jorhendaasïreendi:
3 “Kurhaa je. Ma xanhari, achamasï ma niraspti trigu jatsikuni.
4 Ka enga kʼuájpani* japka, máru semiiechaksï xanharu jimbo andatseeraspti ka jurhasptiksï pájaruecha ka ántskantasptiksï.
5 Máteruechaksï jima andatseeraspti nani enga tsakapu jatandepka, jima enga no kánikua echeri japka, ka sóntkuksï tsikispti jimbokaksï sántku inchatsespka.
6 Joperu patsïsptiksï enga jurhiata andarapka, ka kʼarhisptiksï jimbokaksï imeeri sïranguecha no iauani inchatsespka.
7 Máteru semiiechaksï jima andatseeraspti nani enga chekamikua ambe jukapka ka chekamikua ambe niáraspti sánderu kʼéni ka ójchakuraaspti planteechani jimboksïsï no niárapti frutu jukani.
8 Joperuksï máteruecha jima andatseeraspti nani enga ambakiti echeri japka, andarasptiksï ka planteechaksï kʼéspti ka ueenasptiksï frutu jukani: máruksï 30 xanhari sánderu kánikua jukaspti, máteruechaksï 60 ka máteruechaksï 100”.
9 Tátsekua arhiaspti: “Ima enga kurhandijka, eska jingontku kurhandiaka”.
10 Tátsekua, enga ima jandiajku japkia, ima kʼuiripuecha engaksï imani jingoni japka ka ístu 12 apostoliicha, ueenasptiksï kurhamarhini ambeksï arhikuekasïreeni inde ejempluecha.
11 Jesúsi arhiaspti: “Chájtsï sésikua jatsiska para kurhanguni indeni ambe enga Tata Diosïiriika,* jo, auandarhu anapu Reinueri ambe. Joperuksï máteruecha ejempluechani jingoni jorhendanhasïndi iámindu ambe
12 paraksï no exeni nájkirukaksï exejka ka nóksï kurhanguni nájkirukaksï kurhaajka. Ísï jimbo, imaksï no méni andarhientaati Tata Diosïni* ka nóksï puáminhantaati”.
13 Ístu arhiaspti: “Engajtsï chá no kurhangujka ini ejempluni, ¿nénajtsï uaa kurhanguani máteru ejempluechani?”.
14 ”Ima enga trigu jatsikujka, jindeesti ima enga nirajka uandantani ambakiti aianhperakuani.
15 Jiájkani, jarhastiksï máru semiiecha engaksï xanharu jimbo andatseerajka, indeksï semiiecha jindeesti Tata Diosïiri uandakua enga kʼuiripuecheeri mintsitarhu jatsikunhajka. Íksï jindeesti imeecha engaksï kurhaajka Tata Diosïiri uandakuani joperu sóntku jurhasïndi Satanási ka kénditasïndi Tata Diosïiri uandakuani enga imeecheeri mintsitarhu jatsikunhapka.
16 Ístuksï jarhasti semiiecha engaksï jima andatseerajka nani enga tsakapu jatandeka. Íksï imeesti engaksï kurhaajka Tata Diosïiri uandakuani ka sóntkuksï tsípikua jingoni jiókuarhini.
17 Joperuksï no iauani inchaskuasïndi sïranguechani imeecheeri mintsitarhu ka niárasïndiksï sántku kʼéni. Ka chkésïndiksï* engaksï ueenajka uandanhiata ambe jatsini oksï no sési kánhani jimbokaksï jiókuarhiska Tata Diosïiri uandakuani.
18 Ístuksï jarhasti semiiecha engaksï jima andatseerajka nani enga chekamikua ambe jukajka. Íksï imeesti engaksï kurhaajka Tata Diosïiri uandakuani
19 joperuksï iásï anapu* uandanhiateecha ka jatsikuarhekua ambe enga ísï támisï pájpejka, ka máteru jásï tsitikua ambe, inchaakurhasïndi ka ójchakurasïndi Tata Diosïiri uandakuani, ka ísï jimbo, no niárasïndi sánderu uánikua semiia jukani.
20 Últimu, jarhastiksï semiiecha engaksï ambakiti echeri jimbo andatseerajka. Íksï imeesti engaksï kurhaajka Tata Diosïiri uandakuani, tsípikua jingonksï jiókuarhisïndi ka niárasïndiksï sánderu uánikua semiia jukani: máruksï 30 xanhari sánderu, máteruechaksï 60 ka máteruechaksï 100”.
21 Ka ístu arhiaspti: “No nema tixatasïndi* kandela* ma para tátsekua tsïkiata ma jingoni ójchakurani o para kamarhu inchajchukutini peerani, ¿a no? ¿Andi nóksï tixatasïni para kandela jatakuarhu ma peerani?
22 Jimboka ambe enga jískakata jaka, niáraati exenhantani, ka ístu ambe enga méntku no mítekuarhika, niáraati mítekuarhini.
23 Ima enga kurhandijka, eska jingontku kurhandiaka”.
24 Tátsekua arhiaspti: “Jingontku kurhaa je ambe engajtsï kurhaani jaka. Engajtsï chá kánikua ambe íntspiaka, sánderujtsï kánikua ambe intsïnhantaaka.
25 Jimboka ima enga jatsika, niáraati sánderu intsïnhani, joperu ima enga no jatsika, asta imani ambe euanhantaati enga jatsika”.
26 Ka seguiriispti arhiani: “Tata Diosïiri Reinu ísïisti komueska achamasï ma enga semiia jatsikujka.
27 Enga achamasï chúrikuechani kʼuíjka ka jauarani jurhiakua, jinianksï semiiecha tsikisïndi ka planteechaksï kʼéni jarhasïndi joperu achamasï no mítesti nénaksï niárasïni kʼéni.
28 Jimbokaksï echerirhu inchatsetini tsikini jarhasïnga: orheta andarasïndi, tátsekua kʼésïndi ka últimu píntsïta tsïrisïndi.
29 Enga semiia tsïrijkia, achamasï jósa* jingoni uarhotasïndi jimboka niáraskia tiempu para uarhotani”.
30 Ka ístu uandaspti: “¿Náki ejemplu jingonchi úpirini uandani ambeeski Tata Diosïiri Reinu o ambe máteru jingonchi úpirini terukutantani?
31 Ísïisti komueska semiia mostaseeri, jiáni enga jatsikunhajka, i semiia sánderu sapinharhisïndi iámindu semiiecheeri engaksï echerirhu jaka
32 joperu enga jatsikunhajkia, niárasïndi tsikini ka xáni kʼésïndi komueska anhatapu ma. Ka xáni kʼérati rameechani jukaasïndi engaksï auandarhu anapu pájaruecha jima jurhajka paraksï kuájchakukuarhini jimboka kʼumandesïnga”.
33 Jesúsi inde járhati ejempluechani jingoni jorhentpisïreendi ambakiti aianhperakuani, exeparini na engaksï xáni úpiringa kurhanguni kʼuiripuecha.
34 Ka méntkisï enga jorhentpienga, ejempluecha jingoni jorhentpisïreendi. Joperu imeeri chúxapatiichani támu aianguasïreendi ambe enga arhikuekeenga iámindu ambe.
35 Enga chúripkia ima jurhiatikua, ima arhiaspti imeeri chúxapatiichani: “Ju je jiniani uanamukuteni”.
36 Ka enga na uandanuantapkia kʼuiripuechani, imeeri chúxapatiichaksï barku ma jimbo páspti ísï eska na jatarini japka. Ka máteru barkuechaksï niraspti chúxapani.
37 Joperu ma repentku ueenaspti kʼéri ma janini ka uinhamu tarhiani. Oleechaksï no sési páxapti barkuni ka itsï iámu jataxaptia.
38 Joperu Jesúsi kʼuíxapti barkurhu tátsepani iájchakua ma iájchatini. Ísï jimbo, tsínharhitasptiksï ka arhisptiksï: “Jorhentpiri, ¿andi nóri exexaki eskachi ixú uarhiaka?”.
39 Jimajkani Jesúsi jauaraspti, uinhachakuspti tarhiatani ka arhispti marini: “¡Ísku ja! ¡Pínasku!”. Ka nóteru tarhiasptia ka méntku pínandintaspti.
40 Tátsekua arhiaspti: “¿Andijtsïsï xáni chéni jaki? ¿Andi chá útasï no mintsikasïni?”.
41 Imeeri chúxapatiichaksï kánikua chéspti ka ueenasptiksï arhijperani: “¿Andi némindu jindeeski i achamasï? Tarhiata ka mari jamberi kurhajchasïndi”.
Notecha
^ O “jatsikupani”, “kʼuanijpani”.
^ Exe je Glosario, ambe ma enga Tata Diosïiriika.
^ O “imaksï no méni kʼuanhatsentaati Tata Diosï jingoni”.
^ O “nóteruksï mintsikasïndia”.
^ O “i tiempu anapu”. Exe je Glosario, tiempu.
^ O “étskusïndi”.
^ O “lámpara”.
^ O “guadania”.
