Markusï 5:1-43
5 Jimajkani jiniani uanamukuteni jimboksï niáraspti, jimeesïsï engaksï Jerasa anapuecha irekaka.
2 Ka enga Jesúsi na kétsepka barkurhu, jurhaspti kúmuni achamasï ma enga no sési jásï espiritu ma incharhitini japka ka jimeesïsï uératini jurhaspti nani engaksï uarhiriicha jatsinhantajka.
3 Jima irekaspti nani engaksï uarhiriicha jatsinhantajka ka jiáni jamberi no nema úxapti pʼínguni, ni sikiera kadena ma jimbo.
4 Uánikua xanhariksï jupikasptia kadeneecha jimbo ka tiámu ambe jimbo, joperu ima katsïndurhiasïreendi kadeneechani ka kʼuaniaskaasïreendi tiámuechani. Méntku no nema úsïreendi pʼínguni.
5 Pauani pauani, chúrikua ka jurhiakua, jimeesïsï jámasïreendi engaksï uarhiriicha jatsinhantajka ka ístu juátarhisï. Jiuakuarhisïreendi ka tsakapu ambe jimbo atakuarhisïreendi.
6 Ka enga iauani jatini exepka Jesúsini, uiriipaspti ka tinguixurhikuspti.
7 Ka mátirku uinhachaspti: “Jesúsi, Tata Diosïiri Uájpa enga auandarhu jaka, ¿ambe jatsiski ji tʼungini jingoni? Kurhachexakakeni Tata Diosïni jimbo eskarini no ma ambe úchiaka”.
8 Ka jimbosï ísï arhipti jimboka Jesúsi méntku arhixapka: “Tʼu, no sési jásï espiritu, uérhintsï indeni achamasïni”.
9 Ka Jesúsi arhispti: “¿Nári arhinhasïni?”. Ka ima arhispti: “Ji Lejioniiska, jimbokachi uánikueska”.
10 Ka méntku arhixapti Jesúsini eska no chútantaapiringa imani ireteecharhu uératini.
11 Ka jiánisï, uánikua kúchiichaksï tʼireni jámaxapti juátarhisï.
12 Ísï jimbo, no sési jásï espirituechaksï méntku arhixapti: “Jurajkujtsïni parachi imani kúchiichani incharhiani”.
13 Ka Jesúsi jurajkuaspti. Ka no sési jásï espirituechaksï uérhintaspti imani achamasïni ka kúchiichanksï incharhiaspti ka iámindu kúchiichaksï marirhu kʼuanimespti. Ma 2 mili kúchiichaksï uarhimespti marirhu.
14 Joperu imeecha engaksï kúchiichani eranguani japka, uiriisptiksï sïpakuarhini ka nirasptiksï uandantani iretarhu ka iápuru jimeesïsï. Jimajkani kʼuiripu niraspti exeni aberi ambesï úkuarhipi.
15 Engaksï na niárapkia jima enga Jesúsi japka, exesptiksï imani achamasïni engaksï xáni uánikua demoniuecha incharhitini japka. Jima jarhaspti uaxakatini, xukuparhatini ka miákua jingoni, ka kʼuiripuechaksï kánikua chérakuarhespti.
16 Ka imeecha engaksï exepka ambe enga úkuarhipka, aianguasptiksï máteruechani ambe enga úkuarhipka imani achamasï jingoni engaksï demoniuecha incharhitini japka ka ambe engaksï úkuarhinchapka iámindu kúchiicha.
17 Ísï jimbo, kʼuiripuechaksï méntku arhixapti Jesúsini eska uéakuntapiringa ka eska nóteru jámapiringia jimeesïsï.
18 Jimajkani, enga Jesúsi jatantani japkia barkurhu, ima achamasï engaksï uánikua demoniuecha incharhitini japka, arhispti eska imajtu nipiringa imani jingoni.
19 Joperu Jesúsi arhispti eska nómbe ka arhispti: “Níia níntani chiiti kʼumanchikuarhu. Ní chiiti parientiicha jingoni ka aiangua ambe enga xáni úka Tata Diosï Jeoba tʼungini jimbo ka na engakeni xáni pʼamojkuka”.
20 Achamasï níntaspti ka iámu Dekápolisisï* jámaspti uandantani ambe enga xáni úpka Jesúsi imani jimbo ka iámindu kʼuiripuechaksï ísku pakarasïreendi.
21 Jesúsi barku jimbo kʼuanhatsentaspti para jiniani uanamukuteni niárani. Ka enga útasï uanamukutenisï jámani japka, uánikua kʼuiripuechaksï niraspti andarhierani.
22 Jimajkani jurhaspti achamasï ma enga jima orhejtsïkuenga nani engaksï judiuecha tánguarhijka para Tata Diosïni kómarhini, ima achamasï Jairu arhinhasïreendi. Enga exepka Jesúsini, tinguikuatsespti
23 ka méntku úndaspti arhini: “Juchiiti nanaka sapichu uinhamu pʼamenchaxati.* Ju sáni, ka pʼárhi paraka ambakentaaka ka no uarhini”.
24 Jesúsi jirejiresï niraspti imani jingoni. Ka xáni uánikua kʼuiripu chúxapaxapti engaksï jamberi katsinhani japka.
25 Ka jima jarhaspti uarhiiti ma enga 12 uéxurhini páni japkia enga no ueenga iurhiri anhaxustani.*
26 Uánikua doktoriicha jingoni nirasptia engaksï masi úpka sánderu no sési pʼikuastani. Iámindu ambe kʼamajkuspti para úni ambakentani joperu sánderu uinhamu jarhasptia.
27 Ka jimboka kurhaaspka ambe enga xáni uandanhani japka Jesúsiiri ambe, jimeesïsï inchaakurhaspti enga xáni uánikua kʼuiripu nirani japka, tátsepanisï andarhieraspti ka pʼárhikuspti imeeri takusïni,
28 jimboka uandasïreenga: “Engani solu pʼárhikuska imeeri xukuparhakuani, ambakentaaka”.
29 Ka uarhiiti jirejiresï anhaxustaspti iurhirini ka pʼikuarheraspti eska ambakentaspkia imani pʼamenchakueri enga xáni no sési pʼikuasteenga.
30 Ka Jesúsi jirejiresï pʼikuarheraspti eska uérhispka uinhapikua. Jimajkani pʼirhipakuarhespti ka kurhamarhispti kʼuiripuni: “¿Né pʼárhiski juchiiti xukuparhakuani?”.
31 Ka imeeri chúxapatiichaksï arhispti: “Exexakari na enga xáni uánikua kʼuiripu jurhani jaka ka tʼuri útasï uandani: ‘¿nérini pʼárhiski?’”.
32 Joperu Jesúsi iápurisï eraaspti para exeni nésï pʼárhipi.
33 Uarhiiti manarantaxapti* xáni chéni jimboka mítespka ambe enga úpka. Jimajkani andarhieraspti Jesúsini, tinguikuatsespti ka iámindu ambe aianguspti.
34 Jesúsi arhispti: “Ija, ambakentaskaria jimbokari mintsikaska. Níia níntani ka ásteru uandanhiaia, jimbokari ambakentaskia indeni pʼamenchakueri engakeni xáni no sési pʼikuastani japka”.
35 Ka enga Jesúsi útasï uandani japka, jimajkuksï niáraspti máru achamasïicha engaksï Jairueri* kʼumanchikuarhu uératini jupka ka arhisptiksï: “Chiiti nanaka sapichu uarhistia. ¿Ambeteruchi úni ójkutani jauaia Jorhentpirini?”.
36 Ka Jesúsi andajkuarhispti kurhaani ambe engaksï uandani japka, jimbosï arhipti Jairuni: “Asï jáma chéni, tʼu nomasi mintsika”.
37 Ka no nemani uékaspti pájtani, Pedruntku, Santiaguni ka Juanuni Santiagueri ermanu jémbani.
38 Engaksï niárapkia Jairueri kʼumanchikuarhu, Jesúsi exespti na engaksï kʼuiripuecha uinhachani japka xáni uerani ka eskaksï no jánhaskaxapka ambe úni.
39 Ka enga Jesúsi na inchapkia, arhiaspti: “¿Andijtsïsï xáni uinhachani jaki uerani? Nanaka sapichu no uarhisti, kʼuíxati”.
40 Engaksï kʼuiripuecha kurhaapka ini ambe, ueenasptiksï teresmarhuni. Joperu enga Jesúsi na petaantapkia iáminduechani, inchaspti jima enga nanaka sapichu japka, taati jémba ka amamba jingoni inchaspti ka imeeri chúxapatiicha jingoni engaksï nípka pámbetani.
41 Jimajkani, jupijkuspti nanaka sapichuni ka arhispti “Tálita kúmi”, enga arhikuekajka “nanaka sapichu, jíkeni arhixaka: ¡jauara!”.
42 Ka nanaka sapichu jirejiresï jauaraspti ka ueenaspti xanharani. —Nanaka sapichu 12 uéxurhini jatiriispti—. Ka imeecha engaksï jima japka, ískuksï pakaraspti engaksï ini ambe exepka ka kánikuaksï tsípixapti.
43 Ka Jesúsi méntku úndaspti arhiani eskaksï no nemani jámapiringa aianguni. Ístu arhiaspti eskaksï tʼirerapiringa nanaka sapichuni.
Notecha
^ O “Diesi Ireteecharhisï”.
^ O “uarhixatiia”.
^ O “jámapkia emorrajia jingoni”.
^ O “tsirintsirirhikuarhixapti”.
^ Jairu orhejtsïkutiispti jima engaksï judiuecha tánguarhienga para Tata Diosïni kómarhini.
