Markusï 6:1-56
-
Nóksï jaiapanhentasïndi imeeri iretarhu (1 a 6)
-
Dose apostoliichaksï arhinhasïndi néna aianhpini (7 a 13)
-
Juanu, enga itsï atauenga kʼuiripuechani, uarhisïndi (14 a 29)
-
Jesúsi tʼireraasïndi 5 mili achamasïichani (30 a 44)
-
Itsïirhisï xanharasïndi (45 a 52)
-
Uánikuechani ambakeraantasïndi Jenesareti (53 a 56)
6 Jimajkani Jesúsi uéntaspti jima uératini ka níntaspti imeeri iretarhu ka imeeri chúxapatiichaksï imani jingoni niraspti.
2 Ka sábadu jurhiatikua jimbo, ueenaspti jorhentpini nani engaksï judiuecha tánguarhijka para Tata Diosïni kómarhini ka sáno iámindu kʼuiripuecha engaksï kurhajchapka, ískuksï pakaraspti ka uandasptiksï: “¿Andi nani jorhenguarhiski i achamasï xáni uánikua ambe? ¿Andisï xáni jánhaskatii? ¿Ka néna úsïni xáni kʼérati milagruechani uaani?
3 I karpinteruesti, María uájpeesti, ka Santiagueri ermanu jémbeesti, Joséeri, Judasïiri ka Simóniiri, ¿no ísïiski? Ka ixúksï irekasti pirembeecha, ¿a no?”. Ka ini ambe jimbo, nóksï jakajkuspti* imani.
4 Joperu Jesúsi arhiaspti: “Tata Diosïiri uandakua párini* ma, iápurisïksï janhanharhisïndi, menusi imeeri ireta jimbo, nani engaksï imeeri parientiicha irekaka ka nijtu imeeri kʼumanchikuarhu”.
5 Ísï jimbo, jima no ma milagru úspti, solu namunitu pʼamenchatiichani pʼárhiaspti ka ambakeraantaspti.
6 Ka Jesúsi no úsïreendi jakajkuni na engaksï imeecha xáni sántku mintsikeenga. Ka ireta sapirhatiicha jimbo niraspti jorhentpini engaksï jima no iauani japka.
7 Jimajkani Jesúsi tánaantaspti imeeri 12 apostoliichani ka ueenaspti tsimandani axaani ka íntsaaspti juramukua paraksï petarhitaantani no sési jásï espirituechani.
8 Ístu juramukuaspti eskaksï no ma ambe pápiringa, tenhexkuarhikuajku.* Nóksï jatsispti para kurhinda ambe páni, nijtu sutupu ma tʼirekua ambe jingoni nijtu sentabu* jónguarhikuarhu.*
9 Arhiaspti eskaksï kuarhachiichani jukaantapiringa ka eskaksï no pápiringa máteru xukuparhakua paraksï mórhekuarhini.
10 Ka ístu arhiaspti: “Engajtsï kʼumanchikua ma jimbo inchaakuaka, jima pakara je astakajtsï uéakuntaaka imani ireta jimbo.
11 Ka engaksïni nani no sési jiókaska ka nóksïni uékani kurhajchani, uarhandunta je* tʼupurini engajtsï na uéakuntani jámaakia paraksï imeecha mítetini jarhani eskaksï no sési úska”.
12 Ísï jimbo, nirasptiksï ka ueenasptiksï aianhpini eska kʼuiripu jatsispka para móantani;
13 uánikua demoniuechanksï petarhitaantasïreendi ka aseitiksï atarhiasïreendi uánikua pʼamenchatiichani ka ambakeraantasïreendiksï.
14 Imani jurhiatikuecha jimbo, juramuti Erodesi niáraspti míteni ini ambe jimboka iápurisï mítekuarhispkia Jesúsiiri ambe ka kʼuiripu uandasïreendi: “Juanu, enga itsï atauenga* kʼuiripuechani, tsítanhantastia ka jimbosï újti indeni milagruechani uaani”.
15 Joperu máteruechaksï uandasïreendi: “Elíasiisti”. Ka máteruechaksï uandasïreendi: “Tata Diosïiri uandakua páriisti, ísï eska ióntki anapu Tata Diosïiri uandakua pári ma”.
16 Ka enga Erodesi kurhaapka Jesúsiiri ambe, uandaspti: “Juanu tsítanhantastia,* ima engani ji kachujchakutarkuarhika”.
17 Ísï jimbosï ísï uandeendi, jimboka Erodíasini jimbo, Erodesi jupirkuarhispti Juanuni, jótaspti kadeneechani jimbo ka ónhatarkuarhispti. Erodíasi Filipu témbeespti, ka Filipu, Erodesiiri ermanu jémbeespti. Ka jimboka Erodesi Erodíasi jingoni tembuchaspka,
18 Juanu méntku arhixapti Erodesini: “No sési jarhasti engari chiiti ermanueri témba jingoni irekani jaka”.
19 Jimbosï Erodíasi kánikua ikiakuendi Juanuni ka uékasïreendi uándikuni, joperu no úsïreendi ísï úni
20 jimboka Erodesi chérhisïreenga Juanuni. Ima mítespti eska Juanu sési jámasïreenga ka eska pímbinhasïispka jimbosï kuájpeendi. Ka méni enga kurhajcheenga, no ma ambe kurhangukusïreendi ka no jánhaskasïreendi ambe úni; joperu útasï tsitisïreendi kurhajchani.
21 Joperu iásï kʼóru niárasptia jurhiatikua para uándikuni. Erodesi tʼirekua ma úspti jimboka máteru uéxurhini andangutaspkia* ka pʼímarhiaspti kʼérati juramutiichani, imani achamasïichani engaksï sondaduechani orhejtsïkuauenga ka ístu pʼímarhiaspti sánderu kʼérati achamasïichani engaksï Galilea anapuepka.
22 Jiájkani inchaspti uátsï ma, Erodíasi uájpa, ka uarhaspti. Erodesi ka imeecha engaksï imani jingoni tʼireni japka,* kánikuaksï tsitispti na enga uarhapka. Ísï jimbo, juramuti arhispti uátsïni: “Uaakareni kurhacheni ambe uéjki ka jíkeni íntskuaka”.
23 Ka ístu aiakuspti: “Jíkeni íntskuaka ambe uéjkireni kurhacheni. Engari uéjka, terujkani jamberikeni íntskuaka juchiiti juramukueri”.
24 Uátsï uéntaspti ka niraspti kurhamarhini amambani: “¿Ambe kurhakua?”. Ka ima arhispti: “Juanueri éjpuni, imeeri enga itsï ataajka kʼuiripuechani”.
25 Uátsï ménderu uiriipaspti jima enga juramuti japka ka arhispti: “Juácherini iáiasï, charola ma jimbo, Juanueri éjpuni, imeeri enga itsï ataajka kʼuiripuechani”.
26 Ka nájkiruka juramuti kánikua kómu pʼikuarherapka, no úspti arhini eska no íntskupiringa jimboka tʼuini aiakuspkia imeechani japarini engaksï jima japka.*
27 Ísï jimbo, juramuti jirejiresï axaspti sondaduni ma para juákuni Juanueri éjpuni. Ka sondadu niraspti ka kachujchakuspti Juanuni jima enga ónhakuarhetini japka.
28 Jimajkani juáspti imeeri éjpuni charola ma jimbo. Ka íntskuspti uátsïni ka uátsï imeeri amambani íntskuntaspti.
29 Engaksï Juanueri chúxapatiicha niárapka míteni, jurhasptiksï ka pántasptiksï Juanueri kuerpuni ka jatsintasptiksï.
30 Engaksï Jesúsiiri apostoliicha niántapka, tánguarhintasptiksï Jesúsi jingoni ka aiangusptiksï ambe engaksï xáni úpka ka jorhentpini.
31 Ka Jesúsi arhiaspti: “Ju je jíndeni jingoni; jimeesïsïchi niuaka enga pínandika* parajtsï mintsikuarhini sáni”. Jimbokaksï no jamberi úsïreenga tʼireni indeni jimbo engaksï xáni uánikua kʼuiripuecha niáreenga.
32 Jimboksïsï barku jimbo nípti jimeesïsï enga pínandipka nani engaksï úpiringa imeechajku jarhani.
33 Joperu máru kʼuiripuechaksï eranguaspti ka ístuksï uánikua niáraspti míteni. Ísï jimbo, iámindu ireteecharhu anapu kʼuiripuechaksï jirejiresï niraspti xanharapani ka orhetkuksï niáraspti.
34 Enga Jesúsi kétsepka barkurhu, exeaspti uánikua kʼuiripuechani ka mintsita jingoni pʼamojkuaspti, jimbokaksï ísï jarhaspka komueska karichiicha engaksï no jatsika karichi erangutini. Ka ueenaspti uánikua ambe jorhendaani.
35 Ka jimboka inchatiruespkia, imeeri chúxapatiichaksï andarhieraspti ka arhisptiksï: “Iauanchi jámaxaka ka chúrixatiia.
36 Axaantia kʼuiripuechani paraksï ireteecharhisï nirani engaksï ixújkisï jaka paraksï tʼirekua ambe piákuarhini”.
37 Joperu Jesúsi arhiaspti: “Chá íntsaa je ambe ma paraksï tʼireni”. Ka imeeri chúxapatiichaksï arhispti: “¿Jiájkanchi jucha niua piáni kurhinda para iáminduechani tʼireraani? 200 moneda plateeri* uétarhiati para xáni uáni kurhinda piáni”.
38 Ka ima arhiaspti: “¿Namuntsï kurhinda kámaxaki? Ní je exeni”. Ka engaksï na exepkia, arhisptiksï: “Sinko echakua kurhinda ka tsimani kurucheechani”.
39 Jiájkani arhiaspti kʼuiripuechani eskaksï namunituchani kúnguarhintapiringa ka eskaksï uaxaakupiringa uitsakuarhu.
40 Jimboksïsï kúnguarhintapti sienichani ka sinkuentachani ka uaxaakusptiksï.
41 Tátsekua pʼíkuaspti sinko kurhindeechani ka tsimani kurucheechani, auandarhu eranchespti ka kómarhispti Tata Diosïni.* Ka enga na arhukuapkia kurhindeechani, imeeri chúxapatiichani íntsaaspti paraksï imeecha kʼuiripuechani intsïtaani. Ka ístu arhukuaspti imani tsimani kurucheechani ka iáminduechani íntsaaspti.
42 Ísï jimbo, iáminduechaksï tʼirespti ka sésiksï uiniarhaspti.
43 Tátsekuaksï tánantaspti kurhindani enga pakarapka ka 12 tsïkiataksï uinirini tánantaspti ka ístu kuruchani enga pakarapka.
44 Ka 5 mili achamasïichaksï arhaspti imani kurhindani.
45 Jimajkani jirejiresï arhiaspti imeeri chúxapatiichani eskaksï barkurhu jatapiringa paraksï úndani jiniani uanamukuteni nirani, Betsaidisï, enga jamberi ima uandanuantapiringa kʼuiripuechani.
46 Ka enga na uandanuantapkia kʼuiripuechani, juátarhu karhamaspti para Tata Diosïni kómarhini.
47 Enga na chúripkia, barku terumikisï niraxaptia marirhu joperu Jesúsi útasï jandiajku jarhaspti juátarhu.
48 Jimajkani eraaspti eskaksï imeeri chúxapatiicha no na páxapka barkuni jimboka no sési tarhiaxapka. Ka enga nótki erandeni japka,* Jesúsi niraspti andarhieraani ka xanharapaspti marirhisï, joperu uékasïreendi uanopakuani.*
49 Engaksï imeeri chúxapatiicha exepka eska ima marirhisï xanharaxapka, uandasptiksï: “¡Chérpiri máesti!”. Ka méntkuksï ísï uinhachaspti
50 jimbokaksï iáminduecha exespka ka chérakuarhesptiksï. Joperu Jesúsi jirejiresï arhiaspti: “¡Asï uandanhia je! Jiiska. Asï ché je”.
51 Ka nóteru tarhiasptia enga Jesúsi na jatantapkia barkurhu imeecha jingoni. Ka iáminduechaksï ísku pakaraspti engaksï ini ambe exepka
52 jimbokaksï nótki kurhanguxapka imani milagruni enga Jesúsi úpka kurhindeecha jingoni ka ístuksï no úsïreendi jánhaskani jimboka imeecheeri mintsitasï no ueenga kurhanguni.
53 Engaksï na parhimepkia marirhu, Jenesaretiksï niáraspti ka jimaksï no iauani jótaspti barkuni.
54 Ka engaksï na kétsentapka barkurhu, kʼuiripu mítentaspti Jesúsini.
55 Ka méntkuksï iápuru jimeesïsï niraspti aianhpini ka kʼuiripu ueenaspti pákuani pʼamenchatiichani kʼuírakueecha jimbo.* Ka jimaksï niárasïreendi nani enga Jesúsi jámani jarheenga.
56 Ka méni enga Jesúsi inchaakuenga ireta sapirhatiicharhu, kʼérati ireteecharhu o nani uéjkisï, kʼuiripuechaksï merkaduecharhisï peeraasïreendi pʼamenchatiichani. Kurhakusïreendiksï eska jurajkuapiringa paraksï sikiera imeeri xukuparhakuani jupirhukukuni. Ka iáminduecha engaksï xáni pʼárhienga, ambakentasïreendiksï.
Notecha
^ O “nóksï mintsikaspti”.
^ O “Profetani”.
^ O “tékskurhikuajku”.
^ Griegu jimbo: “kobri”.
^ Jónguarhikua ma enga jukapka nani páni sentabu.
^ O “uauandunta je”.
^ Exe je Glosario, itsï atakuarhini; itsï atani.
^ Griegu jimbo: “jauatanhantastia”.
^ O “imeeri kumpleaniuespka”.
^ O “uaxaparhakupka mesarhu”.
^ O “engaksï uaxaparhakupka mesarhu”.
^ O “piindika”.
^ Griegu jimbo: “200 denariu”.
^ O “ka újchakuraspti”.
^ Griegu jimbo: “kuarta bijilia jimbo”. Tresi de la manianisï uératini asta enga erandeni jarhajkia, sáno seisi de la manianisï.
^ O “uanojtakuani”.
^ O “kʼuírakueni járhatiicha jimbo”.
